قصيدة : يا عاشقين اتجمّعوا جنب الدفا
كلمات وإلقاء : مايكل عادل
إهداء : للاجئين والمحرومين من الحق حتى في الهروب

بسم الإله
خالق وطّننا والحياة
بسم الشعوب والناس ولقمة العيش الحلال
بسم الجبال
بسم المزارع
والشوارع
والمَطَر
بسم المطارح
والمسارح
والخَطَر
بسم اللي عاشوا دفيانين وقت الشتا
بسم اللي ماتوا بردانين
وسط العراء
وسط الحَجَر
بسم الطوفان اللي هايقلب كل شيء
بسم الزمايل في المعارك والطريق
يا عاشقين وجه النبي
صلّوا عليه
يا عاشقين
واستعطفوا قلب الشتا ع اللاجئين
والغلبانين
والمحرومين
م الحق حتى في الهروب
قولوا لأطنان الجليد فوق القلوب
تنزل سلام
تحمل رسالة دفيانين من قلبنا
قولوا لأبناء العراء
يستحملوا
قولوا لسكّان العراق
أن يُمهلوا
قلب الحياة مهلة سنين
فوق السنين
يمكن يداوي جرح كل المحرومين
يمكن تعود الأرض
يمكن بعد حين
يا عاشقين وجه النبي
سمّوا على اللي يموت بضربة من البارود
صلّوا على المقتول بجوعه
واللي بردان من عهود

بسم الحياة والمغفرة
والعفو وقت المقدرة
بسم اللي ساكنين الشوارع
والمزارع
والنجوع
بسم اللي سايبين البنادق
والخنادق
والربوع
يا عاشقين وجه النبي
إدعوا الإله
يكفينا شرّ الأجنبي
إدعوا وناجوا في الصلاة
قلب الحياة يعرف معاني الطبطبة
على قلب عيّل كان مُناه
يعرف ملذّات الحياة
إدعوا ف صلاتكم كُل حين
للمحرومين
يلقوا مكانهم في قلوب المدّعين
يلقوا مكانهم جوّة صورة مع فلانة
جنب ذلك ولّا ذاك
يا عاشقين اتجمّعوا جنب الدفا
جانب نيران شعلة غضب
من قلب محروم مـ الحياة
ردّوا الندا
من ده و ده
حاوطوا بقلوبكم كُل حين
اللاجئين
والمحرومين
والأفئدة
كُل ذنوبها إنها
خايفة تموت
متجمّدة


يا عاشقين إتجمّعوا جنب الدفا | مايكل عادل

كلمات وأداء : مايكل عادل
ألحان وتوزيع : شادي مؤنس
غناء : دياب أبو زياد وشادي مؤنس

العازفين
احمد عبد الستار - كمان
جون - ناي
ايمن صدقي - ايقاعات
حسام ناهد - تشيللو
شادي مؤنس - عود

الكلمات

قبل الكلام ما بيتكتب وبيتشطب
قبل اختراعهم للدقيقة بكام دقيقة
قبل اختراع الكدب والسكك الغلط
قبل أمّا أصلا نكتشف إيه الحقيقة
قبل اكتشاف ان الحنان شبه العَبَط
وان الطريق المستقيم بين نقطتين أصعب طريق
كان اللي باقي في الحياه أبسط كتير
من إن ضحكة تتسرق تصبح مفيش
أو إن غيرك يقتلك علشان يعيش
علشان نعيش..
لازم نكون وقت اللقا
فاكرين معاد الافتراق
لازم تراعي فـ وحدتك أمَل اللقاء
لازم تراعي في الزحام
عدم الدوام
واعرف بإن الاشتياق قد لا يدوم
وانك في اخر التجربة
لازم تقوم..
علشان تعيش..

.. علشان تعيش
بطّل تفكّر في الخلود
أعصر في أوقات الفَرَح
والابتسام وقت الأمَل
فكّر في إن اللي بيمشي
لن يعود
أعصر في أوقات الحنين قبل اللقا
فكّر في إن أكيد فيه ناس متشوّقة..
علشان تعيش..

علشان تعيش..
قابل جنونك بابتسام
قابل معاركك في الحياة من غير سلام
علشان تعيش..
اعرف بإن قضيتك ليها تمن
وهاتدفعه
مهما يطول بيك الزمن
علشان تعيش..

علشان تعيش..
إنزل على الأسفلت وامسح دمعتك
والمس دماء سالت عشان حريّتك
واحجز مكانك في الصفوف
حدد ملامس كف إيدك في الكفوف
يحرم عليك تلمس كفوف الخائنين
حافظ على الفكرة اللي عاشت من سنين
حافظ وعدّي الاختبار
علشان تعيش..
علشان الدنيا بتقلب فجأة بدون إنذار..

"علشان الدنيا بتقلب فجأة بدون إنذار
وعشان الناس علشان الجنة
جابولنا النار
ولأن العالم فجأة بيفضى وتبقى وحيد
وعشان الضلمة وشيل الهم
ولإنك لو هتروح للشارع
تغرق دم
والزحمة هتخلص من حواليك
من غير أعذار
والناس لو شايفينك طيّب
هايقولوا حمار
ولعدة أسباب اتقالت..
هتروح لبعيد
بالتالي هتبدأ م الأول..
فأكيد مشوارك هايطوّل..
وحنينك لحمارك ياخدك
على هَمّ جديد..


علشان تعيش - مايكل عادل وشادي مؤنس

زي المسافة...
بين المحبة والدلَع
الاشتياق يفرق مسافة عن فِعل الوَلَع..
والانهزام...
قدّام مشاعر مُضنية
هو الخلاف بين البشر والأنبيا
والحقيقة.. وقت ضايع م الجميع
رحلة تضم الأذكيا والأغبيا
سكّة بتطول كل ما يزيد الأمل
ثم يضيع..
زي التراب لمّا بيظهر في الربيع
وبيردم الحلم اللي دايم من سنة
زيي أنا..
لما ابتديت أفرح بكيت
على فرحة في الوقت الغلط..
وصديق بعاده بيقتل الضحك الوليد
وغياب على القلب اتربَط..
على حلم شايفُه من بعيد..
كان مُعجزة..
وأصبح عَبَط..
على ضحك كان مَلو السَمَع..
أصبح روتين....
وحاجات كتيرة ماتُختَصرش فـ كلمتين...
"إزّاي" و"ليه"
فَرَقت ما بين...
شكل الوشوش في السيلفيهات...
والبورتريه...
 ضحكة في وسط اللمّة...
وضحكة الواجب...
وشّ تاني بيتخلق بعد المتاعب...
ضحكة جديدة عليّا أشبه للفزّع...
أو للسخافة...
زي المسافة...
بين المحبّة والدلَع

المسافة - مايكل عادل

وكإن كُل الناس اتفرّقت فجأة
وبقينا واحد واحد في الطريق ماشيين
متقسّمين بين السكك شمال ويمين
مش دريانين بالافتراق... وحتى الوحدة مش فارقة
زي ما يكون اتسرق عقلنا
أو قلبنا محطوط عليه غيمة
مع إننا مستقتلين ع الحلم
لكن نسينا الشكل والمضمون
نشبه مشاهد تايهة جوّة الفيلم
هربانة من سينما الكبار... محشورة في الكارتون
كنّا من حبّة دقايق كتلة واحدة في الطريق
بقينا ليه متفرّقين في كُل شيء!
رغم الشَبَه...
والسن...
رغم الحنين للحقيقة...
والبحث وسط الزبالة...
عن المعاني البريئة
رغم التمدد في الألم
رغم انكماش البراح
كان أولى نفضل في الونَس بعد اللي راح
لكن بقينا مكشوفين لصهد الشمس...
وللمطَر...
كتف اللي جنبك كان بيحميك م الخطر
ويونّسك بالهَمس
ويحدف عليك الضل...
دلوقت حبّات التراب طايلة الجميع
دلوقت ماشيين في الضباب..
رغم الربيع
وبنلتفت مانشوفش بعض
مانشوفش غير التجربة
والذكريات
ونحس بشويّة حاجات...
خدناها من قلب الزمن سرقة..
دامت معانا ثانية ولّا اتنين
وكأن كُل الناس اتفرّقِت فجأة...
وبقينا واحد واحد..
في الطريق ماشيين

Michael Adel

Popular tracks