كلمات #محمد_أشرف

صوت #ريهام_أحمد

وبعد ما فات علينا سنين
بنتقابل فى يوم صدفه
بتطلع منى تنهيده ولمعه عين
وقلبى يدق مـ الشوقه ومـ اللهفه
وقبل ما تصحى فيه حاجات
بتلمح عينى للدبله الـ فـ شمالها
بكسرة نفس أعدى طريقى وسط سكات
ورغم الحزن والكسرة قلبى أكيد بيدعلها
يارب احفظها وأسعدها


وبعد ما فات علينا سنين

كلمات #محمد_أشرف

صوتك يا وطن مبحوح
ورأى الحق فيك مدبوح 
وجسم الخلق كله جروح 
صوتك يا وطن مبحوح 
كلام الناس خلاص اتبدل 
وعمر الحالة ما هتتعدل 
طول ما الزمام مكبوح 
صوتك يا وطن مبحوح 
حلمنا الحلم قولنا يجوز 
لوالنا الفرح تانى البوز 
حتى الحلم مش مسموح 
صوتك يا وطن مبحوح 
شريط العمر مل وسف 
وبينا وطنا دار ولف 
وريحة الفرقه ماشيه تفوح 
صوتك يا وطن مبحوح 
سيوف الغدر سنه سنانها 
وأهل بلدنا كل أملها 
تدور فين سفينه نوح 
صوتك يا وطن مبحوح 
رفعنا الراس نشم نفسنا 
طريق مشوار قطع انفاسنا 
طريق أخر مداه كان نور 
نبص نلاقى أخرته سور 
صوتك يا وطن مقهور 
عمادك يا وطن مكسور

Sotak Ya Watn

كلمات : #محمد_أشرف

هادوس برجلى على جرحى
وأفصل من سواد توبه
بدله البسها فى فرحى

وهاسقى من دموعى أراضى
وهأزرعها ورود أحلامى
 
واكسر سور
داير ميدور
باحباطه محاوطنى

وهأحاول كتير وأسعى
وألف بلادك الواسعه
وأكمل اللى ناقصنى

وهالغى من قاموسى اليأس
ولا هابرر فى يوم خيبتى
ولا هألعن قى حظى النحس

وقربى لربى ويقينى
مريحنى مقوينى
مطمنى فى يوم هأوصل

وعلشان الحلم يستاهل
فلازم يبقى تحقيقه مش ساهل
وغير تحقيقه مش هأقبل

هادوس على جرحى

كلمات #محمد_أشرف

انتى بالنسبة لى فرح
لغز صعب الاقيله شرح
ساكنة قلبى زى سر
طعم سكر بعد مر
فيكى حاجه عن الناس زيادة
حسن وسحر غير العادة
مادة خام كده للسعادة
أملى انول فـ حبك شهادة
دعوة واحدة حلوة منك
تكفى عنى أى شر
برضاكى أحبك أو غصب عنك
مسجون وبيكى صبحت حر
بيكى بس بأكون أمير
وقلبى بيرفر يطير
يا واخدة من أمى كتير
يخليكى ليه طول العمر
علمتى قلبى ازاى يحس
علمتى قلبى ازاى يغير
ماليه عينى انتى وبس
حبى ليكى حب غير

أنتى بالنسبه لى فرح

كلمات وأداء : #محمد_أشرف
حابس احلامه
ومقفل تملى عنيه
ومغمق ستايرها
ومركب أزازها فاميه

ولا سايب لنور بكره فتحه منها يشقشق
وسقف طموحه مـ الاحباط بقى مشقق

باصص للدنيا فى مرايا قديمه باهته مصديه
حابس روحه و همومه فى خانه تايهه منسيه

شايف عمره قصاد عينه 
بيتسرسب
وسايب همه على حلمه فوق كتفه
بيتكركب

وكل ده ليه
قالك ايه
عشان الفرصه لسه مجتش

ملعونها
ومحروقها
دنيا تيت وبنت تيت ومتتعش

طب أنت جريت
ولحلمك فى مره سعيت

أصل الفرصه و الاحلام 
حمام أبيض لفوق طاير

عايزه عزيمه على اقدام
ولاجل ما تطولها
لازم فى الدنيا كده تعافر

Khana Mnsya _ خانه منسيه

كلمات :#محمد_أشرف
ألقاء : #ياسمين_غريب

عن حتتنا وأحنا عيال
عن اللمه وراحه البال
عن الضحكه اللى كانت صافيه
وكلامنا من القلوب يتقال

محدش كان مركب وش
نهايه الغلطه كانت معلش

كم ذكرى وكم صورة
جوة القلب محفورة

قعده ستى تحكيلى
عن العفاريت

وتزويغى من أمى
وعن لعبى بالكبريت

وعن تقليدى للبوكيمون :D
بشكل عبيط

وكل ما طولى يزيد حبة
أبوبا يعلى فى الترباس

وحد قريبى مبحبوش
لما يصر أنى أتباس

وأول واحدة حبيتها
ولما أستنى طلتها
وأنا واقف قصاد بيتها

ونط السور فى اعدادى
ولعب الكورة فى النادى

و100 ذكرى و100 موضوع
وكم فرحه سببها دموع

عن حتتنا وأحنا عيال
عن اللمه وراحه البال
عن الضحكه اللى كانت صافيه
وكلامنا من القلوب يتقال

عن حتتنا واحنا عيال

يا واخده م السما تفاصيل
باينه وظاهره ف عيونك
 
ف تنهيدك غنا و مواويل
يا ليلى القلب مجنونك

وروحك ويا تفاصيلك
حكايه وم الاله ايه

ببسمه الكون بيتجسد
كما وردة تنبت فيه جوايا

فروحى تنتشى بفرحه
وتسقى الوردة بدمايا

ولو حتى هتاخد منى
فتاخد مني وتكمل
لاجل تعيش وتتحمل
وتفضل عايشه جوايا


يا واخده م السما تفاصيل

فعل ماضى
كلمات و القاء : محمد أشرف 

الوطن بقى فعل ماضى
والضمير بقى مستتر

والخسيس ف جنايته قاضى
وقلوب ضحايا بتحتضر

والجدع منصوب عليه
نص ميت شبه عايش
دفن حلمه يضاف اليه

تعريفه ف الدنيا دى عالة
تحقيقه حلمه دا استحالة

كل فعل واخده أمر
مجبر يساير لاجل يعبر
سكه بتخالف ضميره
خطوة شوك ع خطوة جمر

مجرور بكسرة نفس واضحه
لو يدارى عيونه فاضحه

والزمن واخد سكون
شكل عام يشبه جنون

صورة باهته مشققه
على حيطه مايله متعلقه

لطفل شايب لبسه بالى
بيبيع ف ورد بنص ضحكه

وعجوز بيتسند حيطان
ماشى ينده أى حاجه بأى فكه

شعب بيكلم ف نفسه
كل همه يكفى نفسه

والف صورة ب 100 وجع
صوت أنينها ما يتسمع

اقرا فتحه ع الوطن
اللى راح بارخص ثمن
#محمد_أشرف

فعل ماضى

يا من رُزقتى الحٌسن
واضح بيتجلى
فيكى الجمال ايه
مين عنها يتخلى
ف العين دى 1000 حياه
والتانيه 100 جنه

كلمات : محمد أشرف
القاء : محمد أشرف

عشقك زهد

قصيدة حتتتا وأحنا عيال
كلمات محمد أشرف
إلقاء عبدالله جاد

MohameD AshraF

Popular tracks