ساعتها قلبي شهق يشهد عليه الشفق

أااااااااااه أاااااه ع الشط واقف بلا مركب و فاتوني

حزن أبدي في صوت الشيخ على كل مقهور في الحياة.. ونجيب رفيق المقهورين..

ساعاتها قلبي شهق يشهد عليه الشفق

مناديل دي ولّا قلوع ؟ وده بحر ولّا دموع؟

الشيخ إمام -الحليوه

كل عين تعشق حليوة 
و إنتي حلوة في كل عين 
يا حبيبتي أنا قلبي عاشق 
و اسمحيلي بكلمتين 
كلمتين يا مصر يمكن 
هما أخر كلمتين 
حد ضامن يمشي آمن 
أو مِـآمن يمشي فين 
.......................... 
شابة يا أم الشعر ليلي 
و الجبين شق النهار 
و العيون بحرين أماني 
و الخدود عسل و نار 
و اللوالي ( اللؤلؤ) بابتسامتك 
يحكوا أسرار المحار 
يللي ساكنة القصر عالي 
إيمتى يهنالي المزار 
كلميني يا صبية 
طال علي َّ الانتظار 
كلمتين يا مصر يمكن 
هما أخر كلمتين 
حد ضامن يمشي آمن 
أو مِـآمن يمشي فين 
..................... 
قصرك المسحور غيلانو 
أغبى من دود الغيطان 
بعد مص الغصن الاخضر 
ينحتوا عضم العيدان 
و اللي خلى الارض خضرا 
و اللي خلى الدار آمان 
عاش بجور ملو جوفه 
مات بخوفه من الغيلان 
طوّع الغلبان 
ما قالش عن شقا العمر اللي كان 
كلمتين بمصر يبقوا 
هما أخر كلمتين 
حد ضامن يمشي آمن 
أو مِـآمن يمشي فين 
.................... 
أدي كلمة من عذابي قلتهالك 
باقي كلمة 
من حنيني صنتهالك 
في الضلوع من دنيا ظلمة 
كنت خايف يلمحوها 
يقتلوها في سكة ظلمة 
سقسقت و النور بشاير بشاير 
زهرة الصبار يا سلمى 
يا نسيم الشوق يا طاير يا طاير 
خد لمصر في الصبح كلمة 
طول ما يبقى الركب ساير 
بالبصاير و العينين 
يبقى ضامن يمشي آمن 
يبقى عارف يمشي فين

الشيخ إمام يُسلطن كل عين تعشق حليوة

حلّو المراكب - نادر - الشيخ إمام يبكى بعد وفاة نجيب سرور

هتجن يا ريت يا اخوانا ماروحتش لندن ولا باريس
دى بلاد تمدين ونضافة وذوق ولطافة وحاجة تغيظ


ملاقيتش جدع متعافى وحافى وماشي يقشر خس
ولا شحط مشمرخ افندي معاه عود خلفة ونازل مص
ولا لب اسمر وسودانى وحمص وانزل يا تقزقيز
هتجن يا ريت يا اخوانا ماروحتش لندن ولا باريس

ولا واحد طالع يجرى وواحد تانى بيجرى وراه
ويقول ها هع حصلتك يابن اللى ابصر ايه عاملاه
لا الشارع غيط يا اخوانا ولا احنا بداره ولا احنا معيز
هتجن يا ريت يا اخوانا ماروحتش لندن ولا باريس

ولا واحده فى وش الفجر تبرطع مالية الدنيا صوات
قال ايه جوز خالتى ام احمد سلفة اخوها السيد مات
سبحانك ما اعظم شانك والله الموت دا مفيد ولذيذ
هتجن يا ريت يا اخوانا ماروحتش لندن ولا باريس

ولا واحد بيبيع حاجة يقول بريال وتاخدها بصاغ
يا اخوانا دى حتى الابرة تاخدها بوشة وقلب دماغ
حلفان وخناق ومناهده ويمكن ضرب كفوف يا حفيظ
هتجن يا ريت يا اخوانا ماروحتش لندن ولا باريس

ولا شفتش ده اللى بلاسة وده اللى بعمه وده بطربوش
ملابسنا يا ناس تشكيلة تعد أصحابها ما يتعدوش
والنكتة ان احنا قراشوة وضحكة وشاطرين في التهليس
هتجن ياريت يا اخوانا ماروحتش لندن ولا باريس
 
ولا عركة فى نص الليل دايرة بالحيل وساحبها بوليس
قدامها جدع متجرجر وشه معور قال دا عريس
الخلق ماهى بتتجوز واشمعنى احنا مفيش تمييز
هتجن يا ريت يا اخوانا ماروحتش لندن ولا باريس


ولا فيش ميت الف جعيدى بتوع يانصيب هاجمين ولا فيش
ميت الف معوض هاجم جاي معاه صندوق ورنيش
والله كرهت القهوة وحرمت اقعد ع الافاريز
طبعًا هتجن يا ريت يا اخوانا ماروحتش لندن ولا باريس


دول ناس كنا احسن منهم قول ومسيرنا باذن الله
نبقى احسن منهم برضك بعد الدرس اللى اخدناه
والله ده عيب نتهجى دروس يا اساتذه على التلاميذ
هتجن يا ريت يا اخوانا ماروحتش لندن ولا باريس


كلمات : بيرم التونسي

هاتجن ياريت ياخوانّا مارحتش لندن ولا باريس - بصوت الشيخ امام

هنغني
هنغنى و دايما هنغني .. و نبشر بالخير و نمني
و نلف الدنيا الدوارة .. على صوت النغمة الهدارة
و معانا المشرط و البلسم .. في الكلمة الصاحية النوارة
هو احنا كده .. هو احنا كده
و هنبقى كده .. و هنبقى كده
ماشيين .. عارفين .. مع مين .. على مين
دايما واضحين مش بين ده و ده ..
هو احنا كده .. و هنبقى كده

الشارع بيتنا و غنوتنا .. و الشارع اعظمها مغنى
من لحم الشارع غنوتنا .. على لحن الشارع بنغنى
وان جعنا شبعنا بتتقضى .. مانبعش الكلمة بميت فضة
و الصوت الشايل فكرتنا .. بتراب الشارع متحنّي

هو احنا كده .. هو احنا كده
و هنبقى كده .. و هنبقى كده
ماشيين .. عارفين .. مع مين .. على مين
دايما واضحين مش بين ده و ده ..
هو احنا كده .. و هنبقى كده

هنغني و ديما هنغني - الشيخ إمام

دار الفلك
في مغزلك
طول السنين ما أمهلك
يا ناسج الروح في الحياة
الحب لك
والخلد لك

انت الأزل
وانت الأبد
والهالك اللى يجهلك
يا شعب يا روح الوجود
الحكم لك
والملك

الليل حلك
والبوم سلك
والبحر عطشان منهلك
والسهم طاش اسقي العطاش
انت الكريم وبنسالك

يهوذا خان
اكم يهوذا وباع مسيح
لا يهوذا دام
ولا جرح بيلازم جريح

مليون يهوذا
خان امانك وانهلك
وانت اللي باقي
ع السواقي ومنجلك
يفرش حصير القمح
فوق دم المسيح
وانت الجريح
تيجى الاطبا وتسألك
ما اعجبك
ما انبلك
ما اجملك
يا شعب يا نبض الوجود
الحكم لك
الملك لك.. الملك لك

دار الفلك - Dar Elfalak | الشيخ إمام

ابوح يا ابوح 
غناء / الشيخ امام 

الشيخ امام - أبوح يا أبوح

الشيخ إمام - أنا أتوب عن حبك Cheikh Imam

أنت النعيمُ لقلبي و العذابُ له فما أمرَّك في قلبي و أحلاك 
عندي رسائل شوقٍ لست أذكرها  لولا الرقيب لقد بلَّغتُها فاك 

أنت النعيم لقلبي - الشيخ إمام عيسى


كلمات : الفاجومي أحمد فؤاد نجم
ألحان و غناء : الشيخ إمام عيسى

يامَّا مويل الهوا _ الشيخ إمام

الشيخ إمام-مرمر زماني

إذا الشمس غرقت في بحر الغمام
ومدت على الدنــيا مــوجة ظــــلام 
ومات البصر في العيـون والبصايــــر
وغاب الطريق في الخطوط  والدواير 
يا ساير يا دايــر يا ابــو المفهومــــية
ما فيش لك دليـل غير عيون الكلام 

‫اذا الشمس غرقت‬ - الشيخ إمام  و الشاعر أحمد فؤاد نجم

رثاء الشيخ إمام للزعيم الفيتنامى " هو تشى منه " .


يادى العجب يارجب
يامرتب الحكايات
اسمع وشوف واندهش
واكتبها فى الكتبات
عسى الكلام ينقرى
لو قلبوا الصفحات
خلى الشعوب والدول
تتعلم البطولات
****
الحزن طول عمرنا
له من حياتنا حياه
نقضيها فى النهنهه
ونضيع الأوقات
نبكى على اللى مضى
ونعيش مع اللى فات
شوف العجب يارجب
واعجب من الروايات
شعب الملاحم بكى
نزلت دموعه دانات
ع الظالم المفترى
حلفت عليه ما يبات
****
اول ما طار الخبر
بين الجنود اشاعات
دمع البارود انهمر
دفعات ورا دفعات
واحده تصيب العدا
تردى العدا عشرات
والتانيه من عفوها
زعق الفضا زعقات
والتالته تحمى السما
من فانتوم الخواجات
والرابعه من بعدها
الميه والألفات
فى الأرض والسموات
يغسل طريق البشر
ويموِّت الحشرات
****
ولما ذاع الخبر واتأكد الخبر
صاح السلاح فى الحرس
قال هوشى منه مات
الحاكم اللى زهد فى الملك واللذات
و الزاهد اللى حكم ضد الهوى واللذات
مات المسيح النبى
ويهوذا بالألوفات
مات الصديق الوفى
للخضره والغابات
مات ... 
بس فات للأمل
فوق الطريق علامات
لو سار عليها العمل
طول الطريق بثبات
تهدى الطريق سكته
وتقرب المسافات

هو تشى منه _ الشيخ إمام

من أشعار زين العابدين فؤاد
..

الفلاحين بيغيروا الكتاني بالكاكي
ويغيروا الكاكي بتوب الدم
وبيزرعوك يا قطن ويا السناكي
وبيزرعوك يا قمح سارية علم
وبيدخلوكي يا حرب فحم الحريقة
وبيزروعكي يا مصر شمس الحقيقة
***
وانتي ميدان الحرب.. سينا البداية
وانتي جنينة الصلب.. والنصر غاية
وانتي البكا والغلب.. انتي الرحاية
وانتي البارود والحب.. والحرب جاية
***
غنوا التلامذة الصبح للحرية
الفلاحين ضموا غيطان القمح
رفعوا الرايات في الفجر متندية
رفعوا السنابل بنادق
عبوا البنادق بارود
الرمل قادت حرايق
والنار في دم الجنود
***
والحرب زي جناين الحرية
مهرة ومالهاش حدود
والحرب لسة ف أول السكة
اتفجري يا مصر
اتفجري بالحرب ينطلق النهار
اتفجري بالحرب ضد الجوع ضد القهر ضد التتار
اتسلحي للحرب بالحرية
واتفتحي وردة بدم ونار
واتجمعي من ألف صرخة وضحكة
والحرب لسة ف أول السكة

الشيخ إمام - الفلاحين

عطشان يا صبايا
وانا عاشق.. ع السبيل
عطشان والميه ف بلدي
على عكس ما يجري النيل
والنخل العالي مطاطي
والجذع الواطي ذليل
والريح العاكس كابس
والريح العاطي بخيل
والنسمه اتعكر لونها
من هم الناس يا خليل
عطشان والنيل في بلدي
والزرع اخضر وجميل
وانا كنت امبارح خالي
واليوم دا صبحت عليل
عطشان ودوايا حبيبي
يسقيني العشق دليل
ودليل الحب عمايل
وكلام الحب جميل
وانا كل ما أقول التوبه
تغويني المواويل
تطرح في القلب جناين
تفقس فيها الزغاليل
عشاق يا حمام الغيه
ولا فيش قدامنا بديل
سكه ومحسوبه علينا
نمشيها جيل ورا جيل
ع الشوك نفرد خطاوينا
في الليل تضوي القناديل
حوالينا قلوب حبابه
ومعانا العقل دليل
والشمس تصب صبابه
والمنبع نهر النيل
وان لاموا علينا يلوموا
ما لهمش علينا سبيل
ما هو شوك العشق ملامه
والشوك في الورد أصيل
ودوني ع السبيل
ودوني ع السبيل

الشيخ إمام  _ عطشان يا صبايا

كلمات : احمد فؤاد نجم
الحان : الشيخ إمام
---------------
قيدوا شمعة يا أحبة و نورولي
رمشتين من رمش عين
و بيندهولي
من هنا سكة ملامة
من هنا سكة ندامة
سكتين يا للا السلامة
أمشي فين يا ناس قولولي

قيدوا شمعه - الشيخ إمام

..انا بسمع أىّ حاجة 
لأىّ حد ...فى أىّ حتة !

حلّو المراكب - نادر - الشيخ إمام يبكى بعد وفاة نجيب سرور

Mina Ghaly

Recent comments

فرحة صلاح

yahia

مينا

Ahmed Al-Baqoury

Related tracks