على فكره 
انا مش البنت المثاليه 
ولا انا 
اللى بتمشى توزع ابتسامات على طوب الارض
بالعكس تماما
ده انا اغلب م الغلب

فرحتى مش كامله تمللى 
ده الفرض بأنى فرحت 
قلبى بوسع العالم واكتر
بس ما بيساعنيش
اوقات الوحده بتقتلنى
مع انى بكون ف الزحمه

انا بحب عيلتى اوى
وبحب اصحابى
وقطتى :)
بحب اضحك ف وش الناس الغلابه اللى فالشارع
والراجل اللى بيلم الزباله
وساعات بشوط الكورة مع العيال اللى بيلعبوا ف الشارع  لو جت تحت رجلى
وبجيب إجوان

الحياه مش سهله زى ما كنت فاكره
بالعكس
هى الناس بتتغير ليه
تلاقيه كان اخوك ومره واحده بخ
وليه الناس بتوعد وما بتوفيش
وليه بيكدبوا
يكونش عشان احنا بنى ادمين
فاستغلوا الموضوع غلط
جايز
بيقولوا عليا البت الجدعه
اللى ب 100 راجل
انا مش بزعل على فكره
بالعكس
انا عارفه ان انا مش بنت زى كل البنات 
اللى بتفك ضفايرها
وتسيب شعرها للهوا 
انا عاملة شعرى كحكه وقامطاها اوى
انا بضحك وبهزر بس غالبا مش من قلبى

نفسى اركب مورجيحه مع اصحابى
والهوا يزغزغنى لحد ماافطس م الضحك
وممكن اموت وانا بضحك 
ما يهمنيش المهم اضحك
انا بحب اوى اكل شوكولاته وايس كريم
بس الدكتور قال انهم بيتخنوا
ومش عارفه اسمع كلامه 
ولا اكلهم ؟
بحب المطره وانا بتمشى ع البحر
وهى نازله على وشى 
بحس انى باخدها بالحضن
الاتوبيس بيكون زحمه
فمش بركبه
مع انه هيوصلنى بسرعه
فبضطر اخد تاكس
مش كل حاجه بعوزها بجيبها
ساعات بعاقب نفسى
لما بتغلط
واوقات باكفئها واديها حتة شيكولاته
وكتاب
بحب القرايه وبحب الكتابه
بس الاكتر بحب الاحساس
بتفرج ع الافلام ف التليفزيون
مبحبش اخش السيما
عشان ابويا قالى السيما حرام
انا بصلى وبحب ربنا 
وبتكلم معاه من قلبى
وبحس بيه وهو بيطبطب عليا 
مشتاقة اوى لحضن ابويا 
عشان اترمى فيه واعيط
واشكيله من الدنيا وعاميلها 
القصد
انى مش البنت المثاليه
بالعكس تماما 
ده انا اغلب م الغلب


انا مش البنت المثاليه

هنحط حطة منتش ادها

حصري مهرجان ( حياتي معاكي وقلبي في اديكي  ) سامر م(MP3_160K).mp3

هنحط حطة منتش ادها

Mohamad Emad

Recent comments

Kareem Atef

Related tracks