اصحى يا نايم وحّد الدايم
وقول نويت بكره ان حييت
الشهر صايم والفجر قايم
اصحى يا نايم وحّد الرزاق
رمضان كريم

مســحـراتى
مـنـقـراتى
جاى لك ليلاتى
يا خال عوض
يا زين ومالك
والطبع زين
سبع ممالك
وفدانين
تحب تحسم
بسن يبسم
وبين ولادك
تحب تقسم
بالعدل دايماً
يا خال عوض
أظنّى قاعد
والفرن قايد
تسمعنى عايد
عليك باخبّط
فى الشاى تخلّط
عشان تخرّط
ولا مهندس
عمال يخطّط
يا خال عوض
أظنّى تشرب
شايك وتطرب
لواد بيضرب
على طبل بازه
فات الحداشر
شهر فى اجازه
وعاد ينادى
يا خال عوض
أظنّى تنده
وتقول يا لوزه
يا لوزه بنتى
أبوكِ انتِ
من تحت لبده
لفوق صديرى
بعنيكِ عاينى
شنب خضيرى
ومناخير جناينى
ومســحـراتى
مـنـقـراتى
فالح يقول لى
يا خال عوض
يا خال يا خال
وكمان يا خال
يا زين وراضى
بالمندره دى
زهّرت بابك
وقنيت شبابك
وانا فى الأراضى
والمشى طاب لى

والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”

* * *

وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
يا خال عوض بسمتين فى ضحكتك دِيّه
الأوله من زمان والثانيه بدريّه
الأوله صبر أما التانيه عسليّه
عدّيت على الباشا راكب قلت مش نازل
والشمس وقفت تغازل بسمتك دِيّه

اصـحى يانايم وحّد الدايم

السعىُ للصوم خيرٌ من النوم

دى ليالى سمحه نجومها سبحه

اصـحى يانايم.. يانايم اصحى
وحّد الرزاق

سيد مكاوي - المسحراتي-يا خال عوض

كُتُبْ وِنَاسْ

إِصْحَى يَا نَايمْ ، وَحِّدْ الرَّزَّاقْ
وِقُوْلْ نَوِيْتْ ، بُكْرَه انْ حِيْيْتْ
الشَّهْرْ صَايَمْ ، الفَجْرْ قَايمْ
إِصْحَى يَا نَايَمْ ، وَحِّدْ الرَّزَّاقْ
رَمَضَانْ كَرِيْمْ
مِسَحَّرَاتِى قَدِيْمْ جِدِيْدْ
مِنَقَّرَاتِى خَفِيْفْ شِدِيْدْ
فَاتِحْ مَدَارِسْ سَاعْةْ السُّحُورْ
وِطَبْلِتِى طَبْلِةْ الْحُضُورْ
خَدْتْ الثَّقَافَهْ عَلَى أَسَاسْ
انْ الثَّقَافَهْ كُتُبْ وِنَاسْ
قَرِيْتْ لِطَهَ وْلِلْحَكِيْمْ
وِلْعَمْ بِيْرَمْ وِلِلنَّدِيْمْ
وِمْنِ الْمَعَرَّهْ عَلَى بُلاَقْ
أَبُو الْعِلاَ مِنْ أَبُو الْعَلاَءْ
شُفْتْ الْجَمِيْلْ يُشْكُرْ الجِمِيْلْ
فِى كُلّْ حِتَّهْ وِفْى كُلْ جِيِلْ
مِنْ فَنِّنَا جَاءَتْ الْفُنُونْ
مِنْ شَاعِرْ جَاءَ شَاعِرونْ
وِمِنْ تُرَاثْ لِنَا عَمِيْقْ
شِيُوخْ أُرُوبَّا عَلَى الطَّرِيْقْ
وِمْشِيْتْ فِى شَارِعْ نُورْ الظَّلاَمْ
وِشُفْتْ لَكْ يَا عَبْدْ السَّلاَمْ
اكْمِّنِّى رَاجِلْ زَيَّكْ أَمِيْرْ
الْفَجْرْ أَبْيَضْ زَى الضَّمِيْر
وِالْمَشْى طَابْ لِى .. وِالدَّقْ عَلَى طَبْلِى
نَاسْ كَانُوا قَبْلِى .. قَالُوا فِى الأَمْثَالْ :
" الرِّجُلْ تدَبْ مَطْرَحْ مَا تْحِبْ "
وَانَا صَنْعِتِى مِسَحَّرَاتِى فِى البَلَدْ جَوَّالْ
حَبِّيْتْ وِدَبِّيتْ كَمَا العَاشِقْ لَيَالِى طْوَالْ
وِكُلّْ شِبْرْ وِحتَّهْ مِنْ بَلَدِى
حِتَّهْ مِنْ كَبَدِى
حِتَّهْ مِن المَوَّالْ :
قُلْتْ الْمَحَبَّهْ وْقُلْتْ الْمَعْرِفَهْ قِسْمَهْ
وِخَدْتْ عُودِى وِكَانْ عُودِىْ رَبِيْعْ نِسْمَهْ
أصَبَّحُهْ بِاللَّيَالِى وِيِجْرِى فِى النِّجُمَهْ
أَنَا قَرِيْتُ الْبَلَدْ وِالْفَجْرْ وِالإِنْسَانْ
وَانَا اتَّبَعْتْ الضُّحَى وْحَدَّثْتْ بِالنِّعْمَهْ
إِصْحَى يَا نَايَمْ وَحِّدْ الدَّايَمْ
السَّعْىُ لِلصُّومْ خَيْرٌ مِنِ النُّومْ
دِى لَيَالِى سَمْحَه نُجُمْهَا سِبْحَهْ
إِصْحَى يَا نَايَمْ يَا نَايَمْ اصْحَى
وَحِّدْ الرَّزَّاقْ

المسحراتي - سيد مكاوي - فؤاد حداد - كُتُبْ و ناس

0
اصحى يا نايم وحّد الدايم
وقول نويت بكره ان حييت
الشهر صايم والفجر قايم
اصحى يا نايم وحّد الرزاق
رمضان كريم
مســحـراتى
حوّد ومال
مـنـقـراتى
على القنال
مالى آمالى
عبر خيالى
بحر الليالى
وحط الرحال
مينا أمينه
أعلام وزينه
تاج المدينه
أبو زيد هلال
نقول وصلنا
ما احلى الوصال
يقول مثلنا
صبر ونال
أيوب لناعسه
فارس لمايسه
حنة سوايسه
يا ابن الحلال
ع السمسميه
وشد الحبال
فى الميه ميه
من الرجال
وفى المقاومه
وفى المداومه
وفى الاحتمال
يا سويس جريئه
يا ام النضال
كنتِ الطريقه
وكنت المثال
وكنتِ مَرْبط
كل الآمال
وكنتِ أثبت
من الجبال
يا بحر مالح
وريح زلال
و برّ  طارح
حُسن وجمال
والمشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
بالخير سلامك وزين فى الدنيا أعلامك
رمضان يحب السهر والنور فى أحلامك
رمضان يحب القمر من بدر أيامك
يا بدر سينا وبدر الأوّله يا سويس
ويكتب الحمد للرحمن بأقلامك
اصـحى يا نايم وحّد الدايم
السعىُ للصوم خيرٌ من النوم
دى ليالى سمحه نجومها سبحه
اصـحى يا نايم.. يا نايم اصحى
وحّد الرزاق

المسحراتي - سيد مكاوي - فؤاد حداد - تاج المدينه أبو زيد هلال

المسحراتي - سيد مكاوي - فؤاد حداد -القدس

المسحراتي - سيد مكاوي - فؤاد حداد -10رمضان

المسحراتي - سيد مكاوي - فؤاد حداد -كل ليلة

مسحراتى
منقراتى
انادى
كل الولاد فى بلادى
أنادى بنتى إيناس
ألاقى خدى انباس
أنادى ابنى حسن
ألاقى صدرى اتحضن
عايز اهادى ولادى
بغنوه اجمل غنوه حبوا الوطن
حبوا الوطن فى الغيط ابو الفدادين
و فى حصة العربى و درس الدين
حبوا الوطن
حبوا الوطن فى الجبهة و الميدان
يوم الجهاد الكل مجتهدين
حبوا الوطن
و تعملوا من قبل ما تقولوا
حبوا الوطن باحق و اشقوا له
لولا العرق ما كنش نُور الجبين
حبوا الوطن

حبوا الوطن فى المطرح الدافى
الأُم تسقيك الحنان الصافى
والأب ما يحبش يشوفك حزين
حبوا الوطن
حبوا الوطن فى الحى فى الشارع
من نور لنور و الجى و الطالع
نادوا الحضور فى جمعة الملايين
المشي طاب لى و الدق على طابلى
ناس كانوا قبلى قالوا فى الامثال
الرجل تدب مطرح ما تحب
و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر.. و حته من بلدى.. حته من كبدى.. حته من موال
حبوا الوطن
و قدموا الموال دا
من الولاد للوالده
قوموا اقطفوا لها الورده
أصل الامل فى المودّه
كل العرب عيله واحده
حبوا الوطن

المسحراتي - سيد مكاوي - فؤاد حداد -حبّوا الوطن

اصحى يا نايم وحّد الدايم
وقول نويت بكره ان حييت
الشهر صايم والفجر قايم
اصحى يا نايم وحّد الرزاق
رمضان كريم
مســحـراتى فى شهر الصيام
مـنـقـراتى على الدوام
شوف القمر اكتمل تمام
من ألف ليله وألف عام
قمر يراكم مغرب وشام
قمر تراحم قمر وئام
يا من تواصوا ألفين سلام
قمر محجّب بالابتسام
بشفه يحبى فيها الكلام
لاغى الحمام اللى فى الإمام
فى السيده حنّ للمقام
ذكر معانا وقال ما بانام
ذكرت يا سعد يا كرام
والليل قطيفه ولا ملام
تحت القمر قلبى فى هيام
من ليلة النصف للختام
فى ليلة القدر له مرام
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
بعد الشهاده وبعد السجده للرحمن
حينكتب لى قيام الليل وصوم رمضان
وما دمت عارف طريقى وصالح النيه
وكل خطوه تزيد أوصالى حنيه
فى ساعة الفجر يفتح لى الأمل رضوان
اصـحى يا نايم وحّد الدايم
السعىُ للصوم خيرٌ من النوم
دى ليالى سمحه نجومها سبحه
اصـحى يا نايم.. يا نايم اصحى
وحّد الرزاق

المسحراتي - سيد مكاوي - فؤاد حداد - القمر

اصحى يا نايم .. وحد الدايم
وقول نويت بكره إن حييت
الشهر صايم .. والفجر قايم
اصحى يا نايم .. وحِّد الرزاق
رمضان كريم
***
مسحراتي .. منقراتي .. تحت القمر
قريت مسائل ..و من الاوائل جاني الخبر
اصحى يا نايم .. وحِّد الرزاق
رمضان كريم
***
ومن المدينة والراشدينا .. فيما غبر
أصل الحكاية سمع شكاية .. مد البصر
شاف الخليفة أجسام ضعيفة .. زي الصور
لو لسّه حية عيونها حافية .. من النظر
في نار تغلب وإيدين تقلب .. ميه بحجر
قالت باسلي ولادي يا اللي .. تعرف عمر
ومهما نشهق لا بد نزهق .. من السهر
يمكن يغيتهم نعاس يميتهم .. قبل السحر
سالت دموعه وبين ضلوعه .. قلبه انفطر
قال كل مسلم جناحه مؤلم .. إذا انكسر
شوف جسمه مايل تحت الحمايل .. مد وصبر
قالت شلت ذنبي يغفر لي ربي .. لو يغتفر
قامت قيامة من اليتامى .. لما ظهر
أبو المواجع كأنه راجع .. من السفر
جاب المؤونة بإيدين حنونة .. وقال يا مضر
أنا علىَّ تخدم أيدي .. بدو وحضر
ع الأرض تنه ينفخ ودقنه .. بين الشرر
الإنسانية كلمة غنية .. دم وعبر
أسلافنا هما شقوا مداها .. فطرة وبداهة
وخير أمة نمشي بهداها
نمشي بهداها على الأثر
المشي طاب لي والدق على طبلي
ناس كانوا قبلي .. قالوا في الأمثال
"الرجل تدب مطرح ما تحب" .. وأنا صنعتى مسحراتي في البلد جوال
حبيت ودبيت كما العاشق ليالي طوال .. وكل شبر وحتة من بلدي
حتة من كبدي .. حتة من موَّال
يهديني طول المدى رؤيا الندى والطيف
وقلبي ينزل على كل القبايل ضيف
يطلع من الحي رحلات الشتا والصيف
ويشرب الطهر من زمزم براحاته
طابت جراحاته يا ساكن منى والخيف
***
اصحى يا نايم .. وحد الدايم .. السعي للصوم
خير من النوم .. دي ليالي سمحة .. نجومها سبحة
اصحى يا نايم .. يا نايم اصحى .. وحد الرزاق

المسحراتي - سيد مكاوي - فؤاد حداد -عمر بن الخطاب

المسحراتي - سيد مكاوي - فؤاد حداد - الحمد لك

الامل شباب
صحي يا نايم
وحد الدايم
وقول نويت
بكره ان حييت
الشهر صايم
والفجر قايم
اصحي يا نايم
وحد الرزاق
رمضان كريم
مسحراتي وقلبي داب
منقراتي علي ألف باب
سبحت للملك والرحاب
وحلفت بالأمه والكتاب
يا مسلمين الأمل شباب
دا جرح أطيب من اللي طاب
دي شمس ما تعرف الغياب
دي ريحة الجنة والحساب
أنا الذي ارتجي الثواب
هداني ربي إلي الثواب
أطلع من المر والعذاب
زي الشهيد أبيض الثياب
يا شفتين باسو في التراب
يا نخلتين راحة المصاب
واحة المآب 
يا مدنتين نوروا السحاب
يا والدين الدعا مجاب
والمشي طاب لي
والدق علي طبلي
ناس كانوا قبلي قالوا في الأمثال :
"الرجل تدب مطرح ما تحب"
كتبت نوفمبر 1968

الامل شباب

اصحي يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحي يا نايم
وحّد الرزاق
رمضان كريم

مسحراتي في ليالي السماح
منقراتي وطبلتي بجناح
ونغم بيرمي بفوق وينزل نَدَي
طلع السلالم ع اللي نايم نده
ونغم علي كل النغم سلطان
اياحه بنته تلبس القفطان
والدنيا زي العيله معيّده
ونغم يلف القلعه والسيده
ونغم يلف القنطرة والعريش
وعشت يوم فرحان بإنِّي أعيش
ونغم يموت في مصر وفي حبها
ست الجمال والحسنوالأبهه
وشقا الصنايعيه وشقا الفلاحين
ويدحرج الضحكه علي الفدادين
ونغم ياللي في الليالي نجف
ويفرّ زيّ الطير إذا ما ارتجف
ونغم بيجري لحد آخر بيت
ومن رصيفي للقمر شبيت
والدنيا بتحب اللي شب وعزم
يا مؤمنين ونغم يحي العلم
ونغم علي الجبهه يحيي الجنود
زرع الأمان يا ظهرنا المسنود
يا بدر من رمضان يا نور النبي
يا كل أحلام الجدود قربي
يوم عشره بالحريه وبالانتصار
مصر الأميره تبشّر الأمصار
ونغم طلق ع المهره شاطر حسن
جمع البيوت وحكي الحكايه وحضن
كل الولاد بيقولوا يحيا الوطن
وأنا بأغني واقول شرارة بدر طاقة قدر

والمشي طاب لي
والدق علي طبلي
ناس كانوا قبلي 
قالوا في الأمثال:
"الرجل تدب مطرح ما تحب "


سيد مكاوي-فؤاد حداد-نغم المحبه

التراك علي اليوتيوب
https://www.youtube.com/watch?v=zQbnzoJDvrI

الفيلم
https://www.youtube.com/watch?v=58KaoLuEVXI

مجموعة اغاني الفيلم التسجيلي صيد العصاري

محمد محي-حدوتة-شريط حبيت -1991

حدوتة-محمد محي-شريط حبيت -1991

انتي فين انتي
محمد محي
البوم اعاتبك
1994

Mohamed Abdelmohsen 1

Popular tracks