nnnnnn

ويا رفقتى مادام أتت الأحداث 
تقطع الأنفاس .. وتلون الكلام 

ومدام بقينا إتنين 

ومدام ماعدش لا حكم ولا إحتكام 
فلنختلف علنا .. أمام الناس 
فلنختلف علنا .. أمام الناس 

لان فيه غلطة مبوظة الخارطه 
ولابد ما نخرج انا وانت م الوارطه 

ليه إنتو حاسين وانا مش حاسس
أو انتم مش حاسين وأنا حاسس ؟ 

ليه إنتوا بايتين 
تشربوا نخب إنتصارتكم ؟ 

وليه أنا مهزوم كدا وبنعى ؟ 

إزاي نكون أصحاب 
وانتو إنتشيتوا بخمرة الاشتياق ؟؟


وإنتو سكرتوا بصرخة الإغتصاب 

يا إخوتي أنا ف عشق الظلم أخيب ما يكون 

والغدر مش طبعي ..

ليه إنتوا فرحانين وأنا بنعي ؟ 

وإذا كنتوا حررتوه لأبناءه ؟ 

شجرة المحبه 
بينفض أوراقه 

ليه هربوا زي الموت في وش الريح ؟؟
ليه حسوا بالقسوه ؟ 

إسمع أنين الطفل والنسوه 
هل التعاطف مع الأوطان بالرشوة ؟ 

القلب يتأجر مفروش بالساعة 

والعين تطنش فى نظير ساعة 
عربية .. ولاعة ..

هاتدفعوا .. هانشفعوا 
فى الزنقة ننفعوا 

تسرق .. أقل قديس
تقتل .. أقول عادل 

ألون التدليس وآحلل الباطل

اما الشعار ف أهوه 
نحقق الثورة .. نوزع الثروة .. 

نوحد الأمة لو ننزع الفروه .. 
وإن يصرخوا المتضررين .. 

والدم في وش الدبيحه غاض.. 

نرفع شعارات " التطهر بالأنين " 
أو " الألم ساعة المخاض" 

حبة ضحايا لأجل ما نسعد ملايين آخرين 

الكدب في عش الغواية باض 
قانون جديد للمسلمين   

نفعني واستنفع باكتر ما تتوقع 
الإنتهازية سلاح العصر 

أنا أشتم الأردن 
وإنت تشتم مصر 

ما هو في سباق المصالح 
يبقى اللى فاسق صالح .. 

إنت أداة إسرائيل 
وأنا الكلب العميل 
والأمة تبقىق لونين .. عربين .. غريمين 
والإسلام إسلامين .. 

الماء عذب فى شفتك 
في شفتي مالح .. 

الحظ جاي فى سكتك 
من سكتي رايح 

يسكن ما بينا البين .ز 
وإلا ليه فهمني .. مش قادر أفهمك 
ليه اللى الهمني ماهوش نفس اللي الهمك ؟ 

ليه إنت صاعد للعلا بملابس العسكري 
ليه بائن وأقول عليك مفتري 

يابو الحذاء الميري 
ما تبعد الجزمة دايسه على ضميري 

يا مرمل الولية 
يا قاتل الولد 

يا مطربق السماء على رأس البلد 
قائد جيوش السلب 
ياناش الغمة 

ويا قلب يا أبن الكلب  

صدقت فيه أه وصدقت كلمة شعب 

وأدي الجميع خاسر
السالب الأمة مع المسلوب 

وآدي فجر أمتنا الجميل مغلوب 

وآدي إنتحار الأمه بالمقلوب 

وأنا غريب الدار 
لابسني توب العار 

ساكن في وطني بالإيجار .. 
عايش في أمه ما تحترمش الحزن 

جندي تعيش وبينتشي بالدم 
يقتل شباب الأمة لا يندم 

قوم يابني من نومك 
إسرق حلق أمك .. وأرض واد عمك 

وقفل الشارع .. وإنقل السكان 

وإنهب الواجهه .. وبدل الالوان 

وإعمل ولا سامع 

خللي جميع المعقولات تتلخبط 

وإن يسألوك ساعة الجواب أستعبط 
يستعبطوا إنت إعمل الأعبط 

ما تخافش .. عندك جيش 
من اللى بياكلوا العيش 
وإذا عزت اللقمة .. 
جدعان يا كلوا الخيش 

بيخافوا من ضلك .. ويقبلوا الأقدام 
ويهتفوا بفضلك .. من الرعب فى الأحلام 
ويخلدوا إسمك على مدي الأعوام 

ويهتفوا بإسمك .. مع إن ذكروا حرام 

ما أخيبك أمه .. ما أتعسك أمه 
لا عدل ولا همه 

لا مصدقه فعل .. ولا تحفظي كلمه 
أمه تدور وتلف 
تقيله مش حاتخف 
بليده مش بتشف .. 

حماسية .. وحماسها بكتيروا ساعة يجف 

أمه بتتخابط .. أمه بتتعابط 
أمه ومالهاش لا زابط ولا رابط 

ولا كبير عيله .. ولا قرابة دم 
وفكره وهميه ما تورث إلا الهم 

ما تحل عني يا عم 
إحنا ورثنا كلام .. 

علشان ده لما تقول 
على طول أقول .. وبكام ؟ 

ماهو حب .. دبرني 
وتاريخ .. فكرني 
وطريق .. نورني 
ومصير .. بصرني 
ده أنا بقيت عربى من قبل مالقي اللي يمصرني 

أنا إنتمائي لأمتي ممسخرني 
محسوبه في الأحزان علي
في الفرح تنكرني 

ياللي إنت لا أمه ولا إنت أم 
فيه أم ما تعرفش ساعة الألم .. 
تضم !! 

أنا في القمار هاستغبي واتجاسر 
واقف مع الخاسر 

تتحل سلمي .. 
تتحل علمك علمي .. 

تتحل نار .. تاكل أسامي أباتنا 
وضفاير إخواتنا 
والضحكة في صدورنا وفي بيوتنا 
 
اللحظة عبثية .. زمن قصير النظر 
والموت المنتظر 

والحب بين الأخ وأخوه صبح ألغاز 
اللى إتصرف في الهايفه 
كان كفيل يشد ضهر النيل 

لكن بلادنا بتعشق التجميل 
وتحب لما تموت .. تموت فى ترومبيل 
ماركة .. كذا 

وأعذروني إذا شفتم لساني طويل 
الإنتحار أعلي قوايم الموت 

الإنتحار في الكدب .. 
والإنتحار لما نخبي الصوت 

وبمنقاتلش العدو 
يا نعيش نقاتل بعضنا .. يا نموت 

الحزن أتقل من حجارة الصبر 
والهم أوسع من فراغ القبر 

وأنا الحزين .. الحزين 
وأغب الخالدين 

لكن يا إخواني 
أنا أول المؤمنين 
بعودة الصغار 

يبوسوا باب الدار 
ويحضنوا النهار 

مؤمن بإن المعادن تتجلي بالنار 
وإن الجديد أجمل من القديم 
وإن الألم يخلق إنسان جميل عظيم 

وحقولكم قبل الفراق 
مازال على الأرض شاعر 
مالبسش توب العار 
ولا مد إيده السمرا في الأسواق 


nnnnnn

mohamed