بكتب عن اللمة
جت عكس ماإتمنيت
بكتب عن الحمّى
بردان .. وامتى دفيت
واكتب عن الضمّة
ونا عمري مااتضمّيت

بكتب وبتراجع
وامسح كلام مُفتعل
واكتم كلام واجع
علشان مازدش الزعل

بكتب عن الماضي
وارجعله وانساني
كان نفسي تتغاضي
لو مرة علشاني

بكتب ومش لاقي
ولا فكرة جوايا
بكتب ، ومين باقي
يقراها ويايا
كان باقي كتير
ومشيوا مع الوقت
وعدوا هيبقوا..
نفس وعود كل اللي مفارق
وانت يـ عبيط بردك صدقت
قالوا هيفضلوا..
لكن عادي
كله مفارقك
فرقت ايه يعني المرادي؟!

يتكرر صوتهم ف دماغك
ف تشوف نفسك
زي ماوصفوك
مولود بنقص وعيب
بـ إيدين تملّي تسيب
بتخاف تدوم فـ تغيب
ومفيش بطل خوّاف
مش خامة الابطال 
ولا كنت يوم زيهم
علشان كدا محسوب
دايما مع الأنصاف
وعشان كدا بقيت وحدك
لا عُدت بتحكي وياهم
ولا بتهمّهم ف الاصل
يدوب كات فترة ، جه غيرك
ف قطعوا معاك حبال الوصل
ف خُدها نصيحة لو عايز
لا يُغرز فيك حدّ النصل
اصنع حواجز وحدتك
ولا تخرجش برّاها
ولو على حلاوة اللمّة
ماتتعشمش تلقاها
وماتآمنش لحد ابداً
بس قوله "مصدّقك"
شمسك اللي تدفّي قلبك
سهل جداً تحرقك

#محمد_احمد

مش خامة الأبطال

توحشيني
وكُل مادا
قلبي يتعلّق زيادة
وبتدربك .. كإنه سباق
بتجري مشاعري وتجيلك
واتوه واجي .. ونا مشتاق
لنظرة واحدة من عينك
بتسرح فيا وتصيبني
وتنصفني وتغلبني
وتاخد روحي ويّاها
وهي ماشية وتسيبني
جسد مهجور ومستنّي
بحبك وانتي بتغنّي
بحبك وانتي فرحانة
بحب كلامك الدايم
فـ يوم ماتكوني سهرانة
بحب كلامي ويّاكي
بحب شرودي ف هواكي
بحب تملّي رؤياكي
واحبك وانتي بتخبّي
ورغم عنادنا بتكوني
فـ ضهري تملي وتلبّي
وايام لُقانا
مشاعر كتيرة
بتغزوني فجأة 
فـ نفس الثواني
فـ بقوى وبشتاق
وبضعف واغير
بشوفني بعينك
كيان نفسي اكونه
بشوفك بقلبي
فـ بصبح بصير
كإنك اميرة
كإني الاسير
بعيشك فـ حزني
بصاحبك فـ نومي
يا شمسي اللي دايما
تفتت غيومي
تغير شجوني
لفرحة كإني طفل
لسه ف صباه
بيحلم يجيلك
بيشبط فـ ديلِك
لا يعرف يخبّي ويخفي فـ هواه
وقلبه اللي مليان
ضلام يطفي نورك
بييجي ف حضورك 
وينبض حياة

#محمد_احمد

Mohamed Ahmed

Popular tracks