اشعار وتراث

ياريت عمري ماهويت at منتزه الأمير سعود بن عبد المحسن

بدر بن عبد المحسن _ من رجعك

في عيني تغيب الشمس وتشرق في عيني
في ناظري للشمس موت وميلاد

لليل في دمعي سنا نجمتين
وللصبح في جفني شفق هم وسهاد

كن السهر درب عليه اب تجين
ولا ودي أقطع درب لاماك برقاد

ياللي جميع الناس بينك وبيني
وكل لحظة أنا نتظر منك ميعاد

عذري لياسي منك إنك تبيني
خنت الرجا وان صنت لي عهد ووداد

ولمصافحك ربي خلق لي يميني
أمدها لك وصل وأمدها بعاد

البسمتك ترخص غوالي سنيني
جرحي يهون ووجايرالشوق يزداد

أنسى عذاب العمر و ما أنسى حنيني
تبلى ليالي العمر وجروحك جداد

بدر بن عبد المحسن - موتاً و ميلاد

على الوساده شرايد نوم - من ما ترك خلي الجافي 
لعل تالي سهرك اليوم - يا عين و اللي مضى كافي 
هجرت هم و طويت سقوم - و دخلت في المخدع الدافي 
و ساعة غفى جفني المحروم - و رميت حملي على اكتافي 
حلمت باللي هواه حلوم - يصب جمرٍ على اطرافي 
و انا احترق يالله المقسوم - و اطفي النار بلحافي 
يا زين للعاشقين سلوم - و غاديك تحكم بالانصافي 
هو ينعدل لا شقى مظلوم - او يشكي السقم متعافي 
ما﻿ شفت جرحٍ عليه هدوم؟ - هذا انا البيٌن الخافي

بدر بن عبد المحسن - ما شفت جرحاً عليه هدوم ؟

إنتى عيونك هـ العتيم سبحان رب خالقه 
قصيدة لشاعر قديم عاشق وماحد صدقه
ومن كثر ما غبتي عليه جمع قصيدة وشققه

إنتى عيونك سالفه سمعتها ليلة سفر 
واثنين مروا بعاصفه وضيعوا نجمة وقمر 
ومن يومها كثر الظلام وراح السحاب وبارقه 

إنتي عيونك هالمدى بحر وطيور مهاجرة 
تركت في شطه صدى صوت تجرح آخره
ليتك سمعتي صرختي بالحيل كانت صادقه

إنتى عيونك نجمتين ضي ورا ضي يعود
ويادوب غابوا ليلتين خلو شموس الكون سود 
رحتي ولا ظنك تجين 
وين الوعد يامفارقه

إنتى عيونك والعتيم سبحان رب خالقه 
قصيدة لشاعر قديم عاشق وماحد صدقه
ومن كثر ما غبتي عليه جمع قصيدة وشققه

بدر بن عبد المحسن - أنتي عيونك هـ العتيم

كلنا عشاق لكن كل واحد له حكايه 
ولما تجمعنا الأماكن تأخذك مني المرايا 
أوعد عيوني بشمسك 
وتوعدي نفسك بنفسك
ما ملك عقلك وحسك 
لا أنـــا ولا سوايــــا

أعطي ظهرك للمرايا وشوفي غيرك
أظهري من ليل كحلك 
ومن اساورك وحريرك 
إفتحي الشباك مره وشوفي الناس والشوارع 
وش كثرهــا ها الغربه مره 
للي وسط الزحمه ضــايع

أوعد عيوني بشمسك 
وتوعدي نفسك بنفسك 
ما ملك عقلك وحسك 
لا أنــا ولا سوايـــــا

كلنا عشاق لكن كلنا نحبك نحبك
وانتي جرحك فيا ساكن 
وأنا همي برا قلبك 
أمشي لو نصف المسافة 
وقفي بينك وبيني 
وش تبي بهذي المرايا 
إنتي اجمل وسط عيني
أوعد عيوني بشمسك 
وتوعدي نفسك بنفسك 
ما ملك عقلك وحسك 
لا أنــا ولا سوايـــــا
كلنا عشاق وكل واحد له حكايه

بدر بن عبد المحسن - كلنا عشاق لكن كل عاشق له حكاية

لو تغيبـي ولو رحـل وجهك حبيبـي

في غيابـي عنك أشوفك .. وفي عذابـي منك أشوفك

صـدقينـي مـا نـقـص هالليـل بعدك إلا قمـرا

وما فـقـدت من النهـار إلا شعاع الشمس بكـرا

وأجمل الناس حبيبـي .. حبيبـي

لو تغيبـي لو رحـل وجهك حبيبـي

تصغر الدنيا وتضيـق

كلّ مافي الدنيا أعرفه إلا بيتـي والطريق

أنا أحبك ذا نصيبـي .. إبعدي عني وغيبـي

صـدقينـي مـانـقـص هالليـل بعدك إلا قمـرا

ومافـقـدت من النهـار إلا شعاع الشمس بكـرا

لك ليـالي ما سألتـي .. ولي ليـالي ما سـألت

لو دريت إنك زعلتـي .. كان أفرح مـازعـلت

بس داري مافي قلبـك إلا قلبـك

وأختياري إني أحبـك والا أحبـك

ومن عذاب الحب يكفـي لو تجرّح قلب واحد

وإنتي يا حبـي وضعفـي لا يهمك كله واحد

لجل تتغير فصول .. ويبكي الغيـم في عيونـي

وتزهر جبال وسهول .. اضحكي بيـّا وبدونـي

وصدقينـي مـا نـقـص هالليـل بعدك إلا قمـرا

ومافـقـدت من النهـار إلا شعاع الشمس بكـرا

بدر بن عبد المحسن - لو تغيبي

قالوا سألتي عني سألتي .. 
وأنا ما أدري ويني ضايع ياعيني .. 
ما أدرى وش اللي ذكرك .. 
مقطع شعر في دفترك .. 
والإ الكلام عن صاحبك .. 
وأنت عقدتي حاجبك .. 
قلتي كلام كله كذب .. 
وليه أتصلتي عنى سألتي ؟ 
آخر لقانا في الخريف
تذكري الثوب الخفيف
والبرد يوم خفتى علي من البرد
وأمطار الخريف ..
ومرت سنة يمكن سنين
ويني أنا ووين السنين ؟
قلتي كلام كله كذب
ليه أتصلتي عني سألتي ..
صوتك طيور مهاجره ..
مرت في قلبي مسافره ..
والحب لو طال الغياب أول مداك وآخره .. 
غيبي سنه وألا سنين ..
با أجيك أنا وألا تجين ..
وأنا ما أدري ويني ضايع ياعيني .. 
ما أدرى وش اللي ذكرك .. 
مقطع شعر في دفترك .. 
والإ الكلام عن صاحبك .. 
وأنت عقدتي حاجبك ..
قلتي كلام كله كذب .. 
وليه أتصلتي عنى سألتي ؟ 

بدر بن عبد المحسن - ليه أتصلتي


عن كل نجم ظهر بسدل أجفاني 
لعل ما عيش حزني لحظة غروبه 

وعن كل خل طويل الصمت كفاني 
الصاحب اللي قليل الهرج عذروبه 

وعن كل ثوب جديد باالبس أكفاني 
وأدله ولا ألقى رسايل هم في جيوبه 

أنا الجفا ليه أخاف الناس تجفاني 
وأنا الحبيب الذي من يعشق عيوبه 

راعي الوعد وأن صدق مرة ولاقاني 
يحتار بين السراب وقلب محبوبه 

يامن عذابه يشققني ويرفاني 
فرقاك غصب علي بالحيل مكتوبه 

خبرت نصف تعب من نصفه الثاني 
بعضي الرماد وبعضي نار مشبوبه

بدر بن عبد المحسن - أنا الجفا

ليه أحس إني وأنا اشوفك حزين - وقلبي الليله بهمي ممتلي

كانها الفرقى طلبتك حاجتين - لا تعلمني ولا تكذب علي

خلني ما بين شكي واليقين - السكوت رضاي عنك وزعلي

باكر اللي خافي لازم يبين - والوعد بلقى مكانك به خلي

وانتظر لي ليلة او ليلتين - لين ما يقفي السحاب وينجلي

ولا طويت الياس بذرف دمعتين - للهوى الغالي و باوادع هلي

صاحبي بموت من كثر الحنين - خلني بختار لحظة مقتلي

بدر بن عبد المحسن - كانها الفرقى طلبتك حاجتين

الوعد باكر .. 
و لو تأخرتي لا يجي باكر
ما أبي باكر بدونك
احبسي الفجر في عيونك
و إن أشغل طيفي ظنونك
واعديني بعد باكر ...
أنا ظلي تحت شمسك
و لو تغيبي ما هو ظلي .. 
و انتي اسمك في حياتي 
يهمسه بعضي لكلي ..
آه يا ضعفي و غروري
اعدلي فيني و جوري
و اصدقي راعي شعوري
و واعديني بعد باكر ..
هذا وجهك في عيوني
ما رسمته لا وربي .. 
و اللي يصرخ في ضلوعي
هذا صوتك ماهو قلبي ..
آه يا شمعة وجودي ..
اشعلي نارك في عودي..
اهجري قلبي و عودي
و واعديني بعد باكر ..

بدر بن عبد المحسن - الوعد باكر

تاقف على اطراف الهدب .. وماشافتك عيني
صافحتني ومدري يدك هي لمست ايديني ...
سلم .. ابارد السلام ..
وهذا ترى كل الكلام ..
اللي بقى بينك وبيني ...
تخيـّــل ...
من وين ... ومنين ومتى ...
بالله ذكرني ...
بالله ذكرني ... متى
جيتك انا فـ ليلة شتا ..
تهزني ريح الشمال ...
محتاج انا لبسمه وشال ...
تركتني لبرد الطريق وانا على بابك ..
اتذكر انك قلت لي بالله وش جابك ..
ودعتني قبل السلام .. وهذا ترى كل الكلام
اللي حصل بينك وبيني ...
تخيّــــل ...
اليوم لعيوني السما والارض البعيد ...
اليوم ولغيرك انا يطري على بالي القصيد ...
اشتقت للقلب الخلي ..
وش هم .. لو تعتب علىّ ..
جيتك انا فـ ليلة ألم .. قلبي على كفي ...
همست لي روح ياغريب الشوق مايكفي ...
سلم ابارد السلام ...
وهذا ترى كل الكلام ...
اللي بقى بينك وبيني ...
تخيّــــل

بدر بن عبد المحسن - تخيل

لو هو غضب بيّحت ما ضم جوفي // من الغثا واظهرت عقب العقل جهل
ولو هو آلم ما طال عندك وقوفي // ولا جيت أبـ اسمع قصة الذيب والحمل
ولو هو ندم كسرت .. باقي سيوفي // على دروب الوصل ومفارق الشمل
صوت العظام اللي تكسر حروفي // مابه كلامٍ تنطقه شفتي سهل
إن جيت امش ِ الدمع تبكي﻿ كفوفي // وإن جيت أقول الشهد يوذيني النحل
الحمل ماهو اللي تشيله كتوفي // الموت لا صارت كتوفي هي الحمل !!
ومن قال باكر .. قلت باكر حتوفي // والباقي إنشد عنه ضرابة الرمل

بدر بن عبد المحسن - لو هو غضب

لو تعبتي من السفر
و همس أشواقي
و لو شكيتي من الضجر
و ناوية فراقي
قصّي وجهي من الصور
و اتركي الباقي

قصّي وجهي و الشحوب
و عتمة الماضي الحزين
و اتركي الشمس الطروب
و عطر زهر الياسمين
اتركي ضيّ النجوم
و طفّي أحداقي
قصّي وجهي من الصور
و اتركي الباقي

أنا في كلّ السحاب
و المدى الصافي البعيد
طفل يلعب في السراب
بان في الصورة وحيد
أنا من كل الشجر
ذبلت أوراقي
قصّي وجهي من الصور
و اتركي الباقي

بدر بن عبد المحسن - الصور

أتراما لجلك أنتي أتراما
صدقيني في حياتي ما هقيت أني سحاب
و لا يمامة 
أنما لعيونك أنتي طرتي لأجمل أبتسامة
لين قلتي وين جنحانك
وين جنحاني ؟!!
و طحت 
طحت من أعلى غمامة

ودي أدري ؟ !!
أنا مريت بين أصابعك رمل
أو فوق خصلات شعرك ماء
كانت أمطاراً و ظلماء
و أذكر أني كنت أطيح
و ماسكاً فكفوفي ريح
و هذا آخر ما أتذكر
وين ضنك ؟
وين ضنك بتجرّح
و أتكسّر
أي أرض و أي صخر
أو عدامة
و كلها فعيونك أنتي
و طرت لأجمل أبتسامة
لين قلتي وين جنحانك
وين جنحاني ؟!!
و طحت 
طحت من أعلى غمامة

بدر بن عبد المحسن - أتراما

من كتب الحب العتاق وتاريخ القراق 
وستاير الدمع الرقاق ..
جمعت قلبي غبار وقطع فخار ..
ومن على المرمر البارد ..
ومن ما نسته النار من غيمي المحروق ..
وحملت عيوني وركبت أول سفينه تبحر ..

على وجهي الاصفر خريف طال ..
وسلال من رذاذ وملح ..
وفي صدري حجارة نسيوها بحاره ..
مروا علي ف يوم ..
وقالوا تعال معنا وما كان يجمعنا ..
إلا الضياع والريح ..

راجع من الايام من الاحلام ..
ومن الف سناره مغروسة بقلبي
لقيت لي بشارة ما اغلى عطا ربي ..
أثر العمر ساره وموج البحر ساره .. 
وكل المدى ساره ..
سافرت كل العمر وراجع احب سارة ..

بدر بن عبد المحسن - سارة

في كل قصة حب أحلام ومدينة ..
ليل ونخيل وهبوب ..
لكل قصة حب لو كانت حزينه ..
أجمل ألوان الغروب ..
ناظري ضي الحوانيت القديمه ..
ونقش أبواب البيوت ..
كلها شعر ومواعيد قديمه ..
وصوت قلبي اللي يموت وما يموت ..
لكل قصة حب عذال وحسود ..
ليه تخدعنا الأماني والليالي السود سود
إشعلي جمر العناد قربي معاد أشوفك ..
لا يفرقنا السواد ..
ارسمي وجهي بكفوفك ..
ولا تجرحنا عيون الليل وحروف النميمه 
ولا يعذبنا السكوت ..
إن عطشنا أو شربنا الدمع ديمه ..
للهوى بنحيا ونموت ..
لكل قصة حب أشواك وورود ..
وليه نصرخ من ألمها وكلها تنبت في عود ..
ناظري هذا قمرنا لو تغطيه الغيوم ..
وناظري هذا شجرنا مهما تحرقه السموم ..
ولو تجرحنا عيون الليل وحروف النميمه ..
ولو يعذبنا السكوت ..
إن عطشنا أو شربنا الدمع ديمه ..
للهوى بنحيا ونموت

بدر بن عبد المحسن - قصة حب

ظهرت من عيونك ليلة
لـ هاالدنيا لليل والنهار
كانت السما زرقا داكنه ما تغيرت 
والمباني ساكنه الا على الماء
وفي قلوب الصغار 
كان الطريق خالي 
وأحجار الرصيف تكسرت 
وقلت مساحات الخضار
وكن الدروب تكورت على المساكن 
مدري من البرد اومن قلة الأحباب
لكن بقى لون الغبار الداكن 
وصوت الفراغ في الدروب 
ظهرت من جفونك ليلة عيونك نثرت
دمعك و قلبي
ليلة تجرحنا العتاب
ما اكذب عليك كنت مشتاق ليلتها وربي 
لبيتي ولغرفتي ولمكتبي مشتاق
لأقلامي والأوراق
ولقيتها مثل ما كانت تحت الغبار 
حلم وقصيد من شرار
ومفرش محروق
وزرع يبس وعروق وفجر بلا أبواب
ووسادة ياما ليالي أستكثرت
نومي عليها ما تغيرت
رديني لعيونك أرجوك رديني 
مابي أحد ما بيني 
أبي عيونك بس 
تكفيني تكفيني تكفيني

بدر بن عبد المحسن - ظهرت بعيونك

حفل تكريم الأمير الشاعر/ بدر بن عبدالمحسن 

اشعار وتراث

mohamed A'kel