كفياك تعجيز 
تقدر ترتاح 
حابس نفسك 
و الدنيا براح 
بتقول الكون مش هيساعنى 
من فضلك ممكن تسمعنى 
انا زيك يمكن ف التكوين
بهرب م الناس 
و أتدارى ف حضن الضلمه وحيد
انا بعشق جدا ف التجديد 
حاجه تثبتنى على الماضى 
انا شبه شريط دايما فاضى 
مخنوق مالك 
هتقول عادى 
و الدايره تدور 
ساكت على طول 
و طموح بيزيد 
بعد و تهديد 
و دموع محبوسه ف قاع الروح 
من رأيى خلاص 
جه وقت البوح 
الكون كونك 
خليك لو مره ف حكاياتك 
تشبه لونك 
افرد جناحاتك لأخرها 
متخفش و طير 
كفياك تعجيز 
كفياك تأخير 
تجاعيد الفكره المهمومه 
طالت قلبك 
مزهقتش يعنى من الاحساس 
انك وحدك
لو وسط الناس 
متعبتش م الضحكه الدايبه 
و انك افيه / متكرر من بعد التتر 
و انك متدارى ورا بروفه مسميها الستر 
هذا الاحساس 
انك مش ممكن من تانى 
هتكون حساس 
متدارى بخيبتك و سذاجتك 
ورا جزء ازاز 
بتكتف نفسك ع الاخر 
جوا البرواز 
اعلن روحك 
الفكره ان جاتلك صدقنى 
كات جايه عشان تمحى جروحك 
انا شبهك يمكن ف التكوين 
و لكنى زهقت من الفرجه 
على بعض حاجات 
بيحاولوا يكونوا البنى ادمين 
كفياك تعجيز 
و تموت روحك بالنيكوتين 

محمد عاطف

mohamed-atef-109