إن كنت صديقي .. نص بالعاميه 
كلمات والقاء / محمد السيد عزيز

ان كنت صديقي ساعدني
قوم طفي النور
وان كنت حبيبي ناولني
عنبر وبخور 
قوم ولّع بخّرني وطلّع 
م الجته عفّار
قوم صُب الشاي فـ الكوبايه
ده الشاي ع النار
لو حابب نعناع وقرنفِل
هتلاقي هناك 
لو حابب تفتح قوم فتّح 
باب او شباك 
لكن ارجوك اطفي الراديو 
واللاب والنور ..
وان كنت صديقي ضحكني
انا مش مسرور
وان كنت حبيبي بكيني 
ع الحال العال . 
وان كنت حقيقي شخصني
بدل الدكتور




..

إن كنت صديقي

قضيت ليالي زي ديا كتير
مش فارقة غير تقل الجسد
وقلة النسمة

مش فارقة غير 
الضلمة صاحبتني الليلادي
والقمر غايب ماجاش
والمروحة بتلف في مليون اتجاه
زي المصير 

سقارة يا سقارة يا وجع 
مصر القديمة
يا وجع روحي ونوحي 
في الليالي الأليمة

قضيت ليالي زي ديا كتير
بس الليلادي الروح اخف من طفي السجاير
من نظرة عينين عاشق
من أنين 
الليلة روحي اخف من كل السنين 
والذكريات بتدق صدري قبل نص الليل
تفتح لي سكة قمرها بدر تمام ..
تفتح.. يضيق
وامسك زمام الأمر , .. كإني 
 ملكت أمري
لكن غريبه ما ملكتش اي شئ
...
اربع حيطان بتضيق  على عضمي 
ما اسمعش صوت تهشيم
بتطولني نار خالي ابراهيم 
ما اسمعش صوت ألمه
حاسس
, أكيد بيتألم 
 لكن بدون ما ينادي حد
دلوقتي زارني في ليلة ضلمة 
زي الليلادي
غريب... 
...
..
قضيت ليالي زي ديا كتير
فبقت بتوحشني
اطفي اللمض
واعلي صوت حرق السجاير في ايدي 
 اصوات حروق الدم
في وريدي
اصوات تنادي في عقلي  من غير صدى
تفتح ف عيني المدى
وارجع صغير
واقف قدام مراية الباب الطويلة 
ماسك مسدس خرز 
وبنشنه في صدري
وبموت

٢٠١٨
محمد السيد عزيز

مسدس خرز

للسيده جمالات شيحه 
بعد السلام والذي منه 
قلبك معبق بالريحه 
وقلبي شم وشاخ سنه
انا وانتي ديماً بنحنو 
لناس محال تاني هترجع 
يمكن تشوفنا او تسمع 
لكنهم مش هيردو 
للسيده جمالات شيحه 
بعد السلام والذي منه
انا قلبي دايب إكمنه 
ضاع منه غالي من الغاليين
وبعيد يا قلبي عن السامعين
انا لسه بتخيله عايش
لكن صورته خيال بايش
اول ما بجري عشان احضن
القاني بحضن ف الفاضي
وافضل استِّف ف الماضي
وارص باقي فتات صورته 
واشم ريحته اللي فـ اودته
وافوق علي الدمع الماضي
واحسرتاه يا ولاد يا ولاد
للرب حكمه فـ اخده عباد 
له برده حكمه فـ مد مداد
لعباد نَفَسها علي الفاضي
للسيده جمالات جمالات
اتمسي بالخير يا جميله
بكفايه جرعات الليله
ومسيرنا نتقابل تاني 
ارض الله واسعه بلاد وبلاد
للسيده جمالات جمالات

محمد السيد عزيز

للسيدة جمالات شيحه

الزحمه عرق المحيط
اسكندرية مزنقة 
رسمتلي شجرة وبيت
رسمت حبل المشنقة
هي مش مدركة 
كرهي القديم للصيف
وانا مش مدرك قسوتي 
واشتياقي للشتا,
والسما الغامقة
مش الازرقه
..
حبيتك بالصيف, لأ
حبيتك بالشتي , اومال
والخوف؟ ما ياما قلبك دق
والبرد؟ ندفي بالخيال
والنوم؟ هيصحينا الود
البسلك جاكيت جلد
وتجيلي زي الـشتواية 
متذوقه
تحت السما الغامقة
مش الأزرقة
..
-والصيف الجاي؟ 
نهاجر
نص الكره التاني
-والشغل؟
ناخد اجازة "معاني"
-دي جديدة ؟
لا , دي أماني
-انت مجنون 
وبعاني
وانتي محالة ,
في اغسطس المكوي
وانتي جميلة ,
والهدوم شتوي
سحابة فايته تشف, وبتضوي
تبصلي كداهو 
ومبرّقة
تحت السما الغامقة
مش الأزرقة

عزيز

حبيتك بالشتي

"مزيج الأطلال + نص "قدرت اغشك بالأمل،معلش
كتابة وإلقاء: محمد السيد عزيز

..
وبعد ما دمر كل شيئ
ولع سيجارة 
وقعد يبص على الرماد في الجو
كات فرصة سعيدة جدا
لما القمر قرر يزين مشهده الدامي 
ببدر الكمال 
والمطر يحلو
مشهد ببعد الاحتمال بشوية
بس مش قاسي
كان بردو قادر يطبع 
فوق كل الخراب لمسة جمال حانية
بتخلي نار الدنيا مش حامية
وازازة قادرة تخلي البرد نار قايدة
فقرر يشتعل
في التو
..
هاتي ايدك
جسي نبض القلب لو طالع
ترجمي الدقات قصايد
او توك للشعر
تقيّد النبض اللي فاير
في خصل شعرك
وتصد فمك عن كلام لابد منه
عتاب بايت
أو لوم سيوف تلمع
تعكس شرار عينك 
فيصد عيني عن النظر في اكتمال وشك
قدرت اغشك بالامل معلش
مع انه كان صادق
والوعود ما كانتش كدابة قوي
وان القلوب في البدأ كانت مطر
وفي النهاية سراب
فطلعت في الاخر بياع كلام كداب
بيجيلي نوم بالليل عادي
و بقضي يومي زي كل الناس، 
ع الباب

ودموع بتشبك
 في كراسي باص المدرسه
  .. بتشبّر الشبابيك
..  ما نشوفش حاجة

قومي تترسمي فوق بخار المايه
زي جنيه
زي ليل البعد والغيه
تترسمي وانتي
كفاية انتي للطريق
والقصد 
والنيه 

تتمد ايد الاسطى علشان تمسحك
تنمحي الدنيا
فانمحي في ثانية
والعنه في سري.
.....
لعله خير
عيل يموت في الحرب 
او
حادثة طريق
او يتنسل من بطن امه حتت لحم
لعله خير


اعشقك
احلم 
اعيشك
اهجرك في اليم
لا احد يهتم
لعله خير
يبقى ده الهم الاخير
تنبت الجناحات تطيري
واترمي في بطن بير
بس لا "جاءت سيارة"
ولا ارسلو واردهم ، 
ولا ادلى دلوه
شوفي كام يوسف في بطن بيره
مات لوحده اسير
طيري، احلمي، وعيشي
لا تهتمي
وانا هعطشك
م البير
..

محمد السيد عزيز 
٢٠١٧


مزيج الأطلال - قدرت اغشك بالأمل، معلش

Track: RENEE S Feat. Kawtar Sadik - Samouni Salam
كتابة وإلقاء: محمد السيد عزيز

محور الكون
ديسمبر ٢٠٢٣

Self Involved - محور الكون

Music: Emm el khelkhal - Khlaed Jubran
كتابة وإلقاء: محمد السيد عزيز
----


ارتاح هنا
ع الباسطا-دي
حاسب 
دي سلمه مكسورة
خبط عليا وانا هفتح
واطبع بوسات فوق القورة
اطبطبك
 كلك تتهز
وانفضك
من لمز وغمز
ارقيك من الحاضر والأمس
وبكرة 
ان كان له ضرورة
.....
وانا 
ما بقولش بحبك
لكن
هعقدلك عقد فصوصة بريق
 فصين م المرو
وفص عقيق
يحميكي من الضلمه وم الضيق
وان لف رقابك
تلقي امان
وان لف رقبتي 
ما اكونش برئ
..
راجع من اخر الكون 
ملعون
في ايديا قلوب دايبه من الخوف
كات راسمه كيان حواليه بتطوف
بتهمهم بالنبض المألوف
وتضخ الدم في عب الكون
والكون ملهوف ومهوش فاضي
بيلف يلف
وكعوبي انا دابت ع الفاضي
والشمس تحف
تلسعني قلوبهم مش شمسك
وان كنت بشوفك.. مش لامسك
يا حلاوة بكرايا وامسك
وحلاوة روح بتروح عندك
ارجع عطشان..
انا مش هقول بردو بحبك
لكن
 هفصصلك رمان
يروي الزمن لو كان عطشان
ويرد ايد الكون عنك
وعيون الجان
..
لو روحي تسند على صدرك
القاني بشوف
لو راسي تسند على كتفك
ارجع مألوف
وان كلي يتكن ف كلك
ارجع انسان
.. 
وانا مش هقول بردو بحبك
لكن
هسأل
عن سر لون عينك في الشمس
وغربتك وسط صحابك
وكلام الهمس
وان فات عبيرك.. غطاني
القى العبير كله معاني
بتفسر السر الكوني 
و الانهيار الانساني 
..
القصيدة اتحولت غزل
من غير قصد ولا نية
انا كنت بفتح لاصحابي 
 .. لقيت جنية
اتاريني بفتح باب البيت 
على شباكك
رماني وجعي ل اقرب حضن
في شباكك
ما تخافي شوكي مبيشوكش
 ان شافك
في الليل بيقلب نور اصفر
و حنية
..
قلبك
بقى صبار يستني االليل
يمكن 
كف يطبطب فوق شوكه
من غير قصد
في الضلمه
..
..

محمد السيد عزيز
يناير 2024

هفصصلك رمان

Music Track: Ibrahim Maalouf Naga (feat. Adnan Jubran)trio Jubran
كتابة و إلقاء محمد السيد عزيز
......

في المحنه
طبطب ع اللي بيبكي
وخاف ع الساكت
واحضن في اللي يخاف
الدمعه ان نزلت .. فهتجري
اما اللي دموعه ما نزلتشي
هيعيش خواف 

الدنيا 
بتعري  الروح وقت المحنه
وترص عيال آدم 
جوا الفتارين
انتو  سبقتو واحنا اللاحقين
والموت شواف 

تدلق القهوة الساقعه على دراعك
تلقاه سقعان
كام حضن الليلة مكانش معاك
كام ودن بتسمع دب النمل
ومش سمعاك
كام ليل بيعدي
وعدى وهيعدي
وانت الواقف مش بتعدي
زي المانيكان
.. 

من اللاشئ
للا شئ
لشبه حروف
جايين نهد الدنيا
بدمعنا المولوتوف 
راجعين نداري سؤتنا
فساقتنا الظروف
قومنا سرقنا الموسيقى
من ابراهيم معلوف
وعشان حقوق فكريه
هيمسحوه قريب
ده ما يمنعش ابدا
ان ابراهيم طيب
بيحتوي الانسان
وبيعمل المعروف
...

بنستنى الغروب لجل نتحرر
م العيون
نظرات البشر سكاكين
من تحت جفون
بتسرسب م الخوف خوف 
وتبص لكن ما تشوف
وتلوم وتعاتب
وتصالح
او تطرح  ملح
وساعات بتطبطب
وتطمن
وساعات ت ج ر ح
والدنيا
فيلم porn طويل
ساعتين ع ال loop
دقيقتين راكب
والباقي مركوب

والانترنت الغير محدود
محدود
زي وضعك لاقتصادي
والاجتماعي
وانتهاء صلاحية الوعود
..
...

بنخاف من قرص الشمس
ومن ضل الشجر
وبندمن مهدئات طبية
و مكملات غذائية
الطبيعه مخصمانا
فاستبدلناها بأدوية
تعدد الشخصيات لانفصامي
مش الزامي
لو كلها دراميه
وتعدد الحواديت
بقى فيلم (porn) طويل ع ال (loop)
دقيقتين راكب
ساعتين مركوب 
والانترنت الغير محدود
محدود
محجوب
زي عينيكي على سطح البحر
وانا بغرق
في ظروف دامية
..
..
لو هطلب  حضن
ابقى شخص اعتمادي
كلمة معلش بقت غالية
في وضعنا. الاقتصادي
فبقيت تحضنهم وانت المحتاج المعلش
وتقول معلش
خليها عليا المرادي
...
لو هطلب اهتمام
 ِِ (Attention whore) ابقى 
...
لو هطلب الوصل
ابقى شخص حكاك
..
لو هطلب 
ابقى شخص محتاج

فطلبت الوحدة
ونسيوني
بتلف الدنيا
افتكروني
رجعولي في ليلة فلقيوني
مبقتش بخاف
وبقول للاعور ف عيونه
يا جمال عينك
خطفوني
وبشيل سكاكين تحت جفوني
نتبادلو سوائل عبر الويب
نتبادلو مشاعر عبر الويب
كله مميكن
فبقيت انشف من الصوّان
لو تطلب عيني 
هلين
واخلعهم
لو تطلب ايدي الاتنين
هستأذنك تقطعهم
لو تطلب قلبي 
هقولك في قلوب احسن
الناصيه الجايه شمال في يمين
في يمين
في شمال
واما هتمشي هرجع تمثال
كما كان الحال
...
دي مش قصيدة
ده ريسيت (Receipt)
خبيت بلاوي ف قلبك
شيبت
من كتر ما اتخضيت
اتوسخت بلون الدنيا الاصفر
بقيت معفر
اشبه بنهار مطلعلوش شمس
او اغبر
واختارت تفكر فترة
ثم 
مبقتش تفكر
اخترت تسنك مع ترس الدنيا
بتلف تلف
على قد الوسع اللي ف قلبك
عقلك بيخف
فنجان مظبوط
صدرك مكبوت
عقلك مضغوط
وتلف تلف
٣٣ سنه في عجلة هامستر
خلصت؟
استريح
كنت فاكرك جامد
ميهزكش الريح
اتارينا فوق جرف هار
فانهار بنا
بس لسه بنطلع التصاريح
... 
....
هذا الوضع الاقتصادي
مش محتاج صندوق النقد
ولا جامعة الدول
ولا دول النفط
هذا الوضع العالمي 
مش محتاج سقوط امريكا
ولا السوشيال ميديا
والانترنت
هذا الوضع العربي
مش محتاج قائد عربي
ولا مسواة الراجل بالست
هاذا الوضع الشخصي
مش محتاج هذا الكم
من المهدئات
وجلسات الثيرابيست
كل الاوضاع دي
محتاجه
 ٨ ٨٪
او 
٥٪ 
at the least
....

فيلم بورن/ عجلة هامستر -Hamster Wheel   
محمد السيد عزيز
20 يناير 2024

Hamster Wheel - عجلة هامستر

باكتبلكم
من وحي ال
antidepressant
والمهدئات
وف ذكرى ريفو وبدايله
من المسكنات
وف ذكرى يناير
يا يناير
الورد اهو مات
ومفتحش
اتحول كل العالم لحديقة حيوان
لاسطبل
لجحش
وصبرنا ع الجار السو
لكن صبرنا منفعش

واتحولت الكورة الأرضية
لنعش
مين مات؟
اتاريه التعلب فات
وف ديله سبع لفات
..
العهده تملي ع الراوي
الراوي اهو مات
ومشينا كتير
والخطو معلم ع الأسفلت
خبيت في الوحده كتير
لكن ادمنت
حبيت في الوحده كتير
لكن أهملت
والكل اتكلم وبيتكلم
بس انت
سكت
أدمنت سكات
والتعلب فات
وف ديله سبع لفات
..
باكتبلكم
حواديت ملتوته ومسكونه
ببنات حلوات
معلش يا حلوة كبرت انا
ع الجوستنج بالذات
تضحكي
راح تتفك الترابيس
تلعبي
تتفتح المتاريس
يتفك التكشير م الصورة
معلش
كبرت يا أمورة
وبقيت من ضمن الأشباح
ان ضلك لاح طرفه ف ضلي
زي الخفافيش
راح اتفتت
سنترافيش
وان ضلك راح
راح اتفتت لمفيش
يكفيني النبض اللي اتسرع
يوم فاتو عيونك من ورا شيش
اهي لقمه وبنقول بسم الله
فتحت جلسه
ضمن الجلسات
واهو تعلب فات
وف ديلو سبع لفات
..
أحلامي خطوط بالطول
احلامك عرض
تايهين
بندور
كما حوا وادم عل بعض
تفتكري هنلتقي على عرفه؟
شكلك محترفه وراح تقسي
اهو عشت يومين انا من نفسي
واحمد ربك
الدنيا
غرزت نابها ف قلبك
فاتعلمت الصد
والدم السايل من جفنك
شهاك للعض
كان اولى العض يكون
حلمات
بس التعلب فات
وف ديلو سبع لفات
...
حبيت 25 العصر
واتحبيت 25 العصر
واستنيت مين يحكم مصر
لكن هوا ما استناش
اتحول حلمنا اشلاء
على عضم
وسنانا معادتش بتقدر ع القطم
ولا حتى ايدينا طايله اللطم
ف سكتنا
لكن سابوناش؟
بالظبط زي كل مره
قالك احلامك دي ضاره
حاول تشوف شغل بره
هتعيش هنا؟
يبقى هوشش
هوششش

فاتهشينا
في بطون جعانه حوالينا
مستنيه اللقمه
اللي نمدها بايدينا
وانت يدوبك
يدوب
فبقيت تتخبط ف قلوب
اسقع منك
وايادي تخبط جواك
تسرق سنك
أرجوك متصورش نفسك جوا القصيده
ضحيه
انت الملام
كلنا شياطين
كلنا عابرين
كلنا أحلام

لكن معذرة
مبنقدرش نشوف قدام
بنسرسب نفسنا لصفوف خلفيه
غير مرئية
وبنتفرج

والمسرح محضرلوش جمهور
اتفضل سافر بره
غور
اتفضل حاول
اسكت
قول
اتفضل
شب ومش هتنول
اتفضل رول
خليك مسطول
اتفضل صب
خليك سكران
اتفضل غيب عن الوعي
كل اما تغيب
هتعيش في سلام
مصر بقت غيمه كبيره
دخان .. دخان
الكل اتجمع حوالين النار
بيشد انفاس
انفاس
والغيمه تزيد
الغيمه اشبه بحديد .. سجان
بقى سجن كبير
اتفضل شوفلك متر وعيش جواه
والكل اهو واقف يتفرج
يعبد ف الغيمه
وينادي الغيمه
اه يا غيمه عظيمه
انا مش مسطول
اه يا غيمه عظيمه
انا راح اقول
الثورة جميله
وبتول
ولا فض غشائها الا الغول
بس الانجاس
مسابوش للطهر
غير متر في متر
اتفضل غيب ع الوعي
خليك مسطول
اتفضل جوا عجلة هامستر بتلف بتلف
مسحول
احنا خطوط طول
وانتو العرض
قاطمين وسطنا
أشلاء بتطير في الجو
وللأرض
نعود
غارسين ضوافرنا ف أرضنا
مصر
ماحناش سكان القصر
احنا الحرافيش
ومفيش نبوت
افتح بنموت
افتح بنموت
افتح بنموت
...
محمد السيد عزيز
فبراير 2024



التعلب فات

كنا بنمشي بخفه لا نترك أثر
خطانا تقلت في السما وع الأرض
كنا نشوف الكون
على مد البصر
دلوقتي توهنا وبنحسس على بعض
ما أصعب القلب الغرقان
من غير قارب
مش اصعب م اللي يقولك
انت لذيذ
عشان شارب
مش اصعب م الشفه اللي بوستها ماهيش نايب
مش اصعب م الوحده ع اللي اتعودها
وبقى سايب
مش اصعب م الورد الدايب
مش ابعد من حضن الغايب
مش ابرد من حضن التايب
ولا اقرب من نظرة عينها
..
كلام
كلام كتير نفسك تقوله مقولتهوش
وناس كتير نفسك تشوفهم
لكن مجوش
واحلام باتت على حبل افكار
واهي بتبوش
٣ صور فاضلين
من الألبوم
ميتمسحوش
وعيونها هامت في الاوض
على السرير
فوق الكنب
في المكتبه وسط الكتب
تنظرك تلقاك مفيش
انظرك 
علشان اعيش
,,
بقيت سيزيف
  لكن بدحرج في القمر
علقت قلبي في بالونات
ويا الصور
والريح تهب تشيلني انا ويا الكور
من ع الطريق
لكن يكون حضنك برئ
مدخلتهوش
مدخلتينيش
كنت موارب
دلوقتي هكلمها
و هتقولي
انت الليلادي لذيذ
عشان شارب
..
...
اربع حيطان
باب على شمالي
شباك على يميني
اشباحكو الليله هتطلع ميتيني
والليل
همسح صوركم وانا شارب 
والصبح هرجعهم
هزنق اشباحكم في الركن
وهفجعهم
وأرمي نفسي ف حضنكم
واوجعكم 

وارجع اكلمها
فتقولي.
انت الليلادي لذيذ
..عشان شارب
..
خوفت افوق ما ابقاش لذيذ
وخوفت ادقق ف الصور
ما القاش عزيز
واخاف يتوه يوسف
ما يبعتليش قميص
يفضل في بطن البير
وسط العقارب
فبقيت اكلمها
عشان تقولي
انت الليلادي لذيذ
ولو شارب

انت الليلادي لذيذ عشان شارب

يا طرح البحر يا هدية
يا حورية
وحرية
وساكنه القلب 
جنيه
اليكي القصد والنيه
و فرحة قلبي و جروحه
يا راسمه بكره وطموحه
وخالعه الجسم من روحه
وكل مشاعري محنيه

يا نور عينك
وظلماتي
بدندن لحن مش عادي
بيسري في ليلي بآهاتي
يصحي الطيبه ف عينيا
وجفني يصلي في الرايحه
ويذكر ربه في الجايه


احب مقولش 
ولو سيفك بيسرقني
انده عليكي الليل
مفيش غير قلبي يسمعني
ارسم خطاوي فوق الرمل
يرسم عينيكي الكحل
يدبحني
يتهز حلقك 
يهز القلب
يوجعني
وانا ٣٤ سنه تعب
خزلان
لو مس قلبي حنان
هيتفتت
يصبح رماد
يكحل عيون رمشك
يرسم خطاويكي اللي جايه واللي مش جايه
لو بس خطوك ناحيتي
انا كنت ارقص طول الليل
يطلع نهارك احضنك
يتكر عمري في سحبة المناديل
يتدارى اسمي في لهفتك
لو شوفتها
كنت ابقى صاحب بار
اصب قلبي لعطشانين العشق
اشق صدري بطول طريقي اليكي
وامنح لكل العابرين اسمي
واقولهم اسمك 
علشان يحبوكي ربع المحبه ف قلبي ليكي
وامسح رخام البار 
بقمصاني
من امتى كان الحب له اسباب
بنحب
بنعاني
هتحبني؟
لا
هتسافر
هتنساني
هتحبها؟
باقي العمر هحبها واخلقها طول الليل
زي القصايد 
فصلت
في مجملي الانساني
زي الخطاوي في رحلتي
فوق كتفي اشيلها 
جوا قلبي
في عنفواني
واغرق 
يسحبها رمش عينيا على شطي
متغرقيش
عيشي
كوني ولو مش ليا بس تكوني 
في الوجود 
نسمه في ليالي الصيف
وردة ف ربيع
خماسين خريف
وانا في الشتا راح ارسمك
جكاكيت في حيطة اوضتي
انظرك
لو قلبي فات فيه برد الليل
ينظرك
لكنه يفضل يستحي يقوم يلبسك
وان كنتي طيف
وان كنتي ذكرى عابره في وسط السنين
اشعر حنين الآن هيهد حيلي
هيرسمك قدامي كإنك
حق وحقيق
كان نفسي نصبح اي حاجه
وأي شئ
ايه العمل يا صديق 
معرفش
خليني احبك في ليالي الضيق 
خليني جنبك
مش عايز منك اي حاجه
مش عايز منك شئ 
..


محمد عزيز
مايو ٢٠٢٤

مش عايز منك أي شئ

طحان

لأني أنوي العيش طويلاً

الآن الآن
أغرق في البر
على الشطآان
ونهال
نرمين
مروه
وريتا
عدوني الشارغ
للشيطان
..
أهلا قرنين أحمر في احمر
انا كنت مصور بكره اخضر
انت الملعون
بهتان
اصفر
وانا جاي ازور احمد طحان
....
وابويا السيد
والسجان
والدنيا بتلعب بيا .. أوان
على فين العسكر
والمحضر
على فين تترقص
تتمخطر
....
انا كنت ولسه
وبكره 
هكون
انا مش مجنون
انا بتحضر
...
جهزني لبكره عشان اسرق
م الضحكه الحلوه اللي تلألأ
والدمعه السخنه اللي بتسبق
قلبي المهجور المتعمر
..

انا كنت السيد والعبدك
انا لسه الساكنك
والهاجرك
انا طولي وعرضك
والعابرك
وماليش في الدنيا اللا مشاعرك
دورت في ريتا على الأحضان
دورت في مروة على اللهفه
دورت في نرمين ع الأاحزان
ونهال الغيه المش شايفه
اعمى
بيتمتى
يعدي السكه ويخبط فيكي 
ومش ثابته
امتى الاقيكي
 يمكن بكره؟ 
دي الحرب العالميه التالته

ومافيش الا الغيم الجاي في ديسمبر
وعينيكي اللي تعدي كما الطيف
كل نوفمر
يجي يناير يقتلني 
فبراير ب28 يوم يسرقني
والبرد الساكن شوقي اليكي 
منذ طوقلتو
بيفور في اغسطس
ويولع كل الحب ف قلبه اليكي 
اخر يوليو

انا فاكر 
رابعه تاني 
أيه احمد محمد صلاح
تفتكر خلفت كام ولد ؟ كام بنت 
ضلمتك نورت كام قلب  بنت؟
كسرتك صلحت كام  قلب بنت؟
وحدتك
عرتك
في الضلمة بنت
محاولات انتحارك الفاشله 
قتلتك
 عشت
على سلم مسرح عبدالوهاب
تبكي
اللي ضيوعك
ليه رميت الورد على قبر ابوك
ليه سابوك؟
علشان عقلت
ابكي يا ابن امبارح
يا ابن بكره 
الشتا يكسر بيبانك
تفتح تلاقي البرق بيقسمك نصين
والرعد
يرد شباككك بابين
تفتح تلاقي 
منى اتجوزت 
وانت الحزين
الحزن خدل عينيك 
ما بقيتش تبكي
مبقتيتش تحزن 
وبقيت تخاف
وهديل تسرق منك لحاف
تاكل في قلبك حاف
فتمدلها الرغيف

انت اللي بتطمن قلوب حبايبك
وفي نفس ذات الوقت
انت المخيف

يا هديل
كسمك
على كل لحظه قتلت فيها طفولتي
علشان اكمل صورتك
ولكل لحظة رميت في بيرك يوسف
فاختارني تبقي مرات عزيز مصر
واخواته
كس 
ااختك
..

في 2024
في اقصى حر مر على مصر
منذ وعيت
وانا كل ده مخبي
واستنيت
معرفش ايه مستني
بس قاعد فوق كنبة اوضتي
في ميامي
اسكندريه
حي المنتزه الملعون
خالي ابراهيم يطلعلي في البلكون
احمد الطحان 
يقولي مش زعلان
ابويا يربت فوق كتافي الساقطه
من شيل السنين 
عيون سعاد حسني تغازلني 
تغرز رجولي في وحل الرغبه 
تغزلني
إزميرالدا محال تعشق الأحدب
وانا لسه أجدب
بغزل خيوطي الصوف على ايديا
انتي في عينيا السكه والجاي
مستحيل
ببكيكي ليل
وانتي في احضان الغريب
..

أحدب ميامي

في البحر لم فتكم في البر فتوني
بالتبر لم بعتكم بالتبن بعتوني
..
الناس بتموت
الناس بتموت
ينعل ديك ابوكو

افتح افتح افتح
..

ارجع ارجع ارجع
"سرينة مدرعة"
آآآآآآه
في كهربا هنا يا ولاد المـ...كة

"صوت صريخ"

قوم قوم
ارجع ارجع ارجع
الناس بتموت تحت يا ولاد الكلب
ارجع حرام عليكو 
الناس اللي تحتيهم

ارجع
الناس بتموت كله يشد
..

واحد اتنين عمر جابر فين

ما تلعبوووش .. ما تلعبووش
ما تلعبوش يا عمر
ما تلعبوووش .. ما تلعبووش

اهو اهو الزمالكاوي اهو
..

هات العلم ده

مات ده يا جدعان  ؟ مات ؟
مات ؟ مات ؟
طب اللي ما ماتش الحقوه

..

انسحبو انسحبو
انسحبو انسحبو
عشان الزمالك معلش 
معلش
معلش عشان الزمالك
..

عشرين واحد مات 
انسحبو يا خو..ت

..
في الجنة يا شهيد 

لا اله الا الله 
لا اله الا الله 
لا اله الا الله 

يا نجيب حقهم يا نموت زيهم
في الجنه يا شهيد
يا نجيب حقهم يا نموت زيهم
..
من ساعة ما دخلنا م البوابة
حاطين سلك شايك السلك وقع علينا
الناس كلها بتموت
اتنين وعشرين واحد ماتو
واربعه وسبعين ليه
والله البنات كنا بنشيلها بايدينا عشان ما تموتش
والله العظيم

وقنابل و50 واحد فوق بعض
هوا ايه احنا كفار ؟

..

كل الشباب دي كلها ده فرح
ده جايلهم فرح
بدل ما تحضرو افراحهم بتحضرو جنازتهم
ده زمانا اللي احنا فيه
ده عصرنا اللي احنا عايشين فيه 

انا عايز واحد عاقل لو انا مجنون
يفهمني الناس دي ماتت ليه ؟

احنا مش ارهاب
كله دلوقتي هي شماعة بيعلقونا عليها

فين الارهاب في كده
واحد طالع يشجع 

ماعهوش تيكت تموته
مرتضى منصور طالع يقول معهوش تذكرة
يعني ماعهوش تذكرة تموته ؟
..

منك لله يا مرتضى منصور
اشوف قلبك محروق على عيالك
اشوف فيك يوم يا مرتضى يا منصور

ابن الكلب قال جبتلهم التذاكر 
فين التذاكر
..

رايح يتفرج ع الماتش ؟
نيجي ناخده من المشرحه؟
يرضى مين 
يرضى مين يارب  
يرضى مين يارب  
يرضى مين يارب  
..

مات ؟ مات ؟
طب اللي ما ماتش الحقوه

في البحر لم فتكم في البر فتوني
بالتبر لم بعتكم بالتبن بعتوني
انا كنت ورده في بستاني قطفتوني
و كنت شمعه جوه البيت طفيتوني
لو عدت بالمره هاتوا المر واسقوني
..


مجزرة الدفاع الجوي +18

ما لقتش حضن 
أرمي فيه نفسي الليلادي
الدمع على خدك
ينادي
يا صحابي من 2010 
مين فيكو فاضي
يا صحابي من بعد الطوفان
من فيكو ناجي

انا ابن الذكرى وسواد العسل
والليل
وضميري صاحي من ثورة يناير
وم التحرير
بدهن بيوت الناس أمل
مدهون بزبده
تضرب عليه الرشاشات يسيح
تدهس عليه الدبابات
يسيح
تنده عليه النداهات
فيجود
بغناوي من قبل اللقا
وعيون منى
غزلان بتجري في صدري 
زي دخان السجاير
ليه دمي فاير 
معرفتش الاسباب
طحان وحشني ومري ما شوفته
غير مرتين
ووحشني ابويا
وذنبه ف رقبة مين؟
انا خوفت مره وعيشت باقي العمر اخاف
وحلمت مره 
ففضلت باقي العمر انام
ازمات بواقيي العمر 
تنهش لحمتي
وانا لحمي أبيض 
م العزلة في قواقع
ما بقاش فيه واقع 
بقى
كله افتراض
يا جبان يا قمقم
يا مندفع
بلا دافع
تبكي الليله دي 
وبكره 
يحلها الحلال

قواقع

خاف م اللي نابه طويل
هيعض قلبك
هيعورك 
ويميل

والقلب م العضه هيدق تكنو
وويسكي طول الليل

لم أشربك بل كلت من روحك 
لم اعشقك
بل سرسبت جواي جروحك
وانا لم اعوذ بالله منك
بل كنت عاوزك
ومين يدوق روحك في يوم
ولم يعوزك؟

حسبي بإني لمست ايدك في الصلاة 
لوحدي
ولمست خدك في خمر ليلي
بدوقك
لم هز قلبي في يوم
غير خصر عودك

واتمنى عودي يعزفك
ما اتمنى عودك

حسبي بإني كنت صادق في كاليتيا
حسبك ليالي تفوت في بعدك
بالحزن فيا

اتمنى ال 
mulitvers 
يكون حقيقي
وفيه نسخه منك.
هتحبني
وهتبقي ليا

أغسطس
٢٠٢٥

Calithea كاليتيا

مقاطع من أفلام:

اللون الأزرق
Once upon a time in America
A Serious Man
The machinist
Barton Fink
Bird man
بالألوان الطبيعية
Scent of a woman
Good Will hunting
معالي الوزير
American psycho
الحريف
بيروت الغربية
الحب فوق هضبة الهرم
المنسي
دهشة

الموت زي البحر

موسيقى فيلم خارج الخدمة

باكتبلكم من اوطى نقطة في العالم
من روحي الضلمة
باكتبلكم بارادة حرة
من غير ورقة وقلم
غير ميكروفون 
وخشبة المسرح تقول:
يا ايها الناس اسمعو
لم يسمع احد
يا ايها الناس اجمعو
لم يجمع احد
لكن ما زلت بقول واغني 
على خشبة المسرح
تمر ذكراكي ف خيالي اسرح
ما اعرفش ايه خلاني اعمل كده
لأ
عارف
انا كنت ضعيف وخايف
كنت بترجى الاجابة وانسى السؤال.
انا ابقى ايه ? 
وهبقى مين ?
وشايف نفسي فين كمان خمس سنين ?
سألتني (الاتش آر) بمنتهى الانانية 
وسكت بمنتهى الاهمال
لكن في عقلي تدور افكار عيال
ماعندهاش تربية
عن شكل رجليها تحت المكتب 
ولون الجزمة 
دلوقتي اقدر اجزم 
اني كمان 5 سنين 
هبقى كتاب مالوش لازمة
يسندو بيه كعب ترابيزه بتميّل 
مع السنده
.. 
انا مش عايز ابقى زي عم محمود
ومش ببحث زي بدر عن الخلود
ولا بهرب زي كيفي من الاله
ولا ازمتي في بنت حبيتها وصدتني 
فصدتني
- لكن -
هذا اقرار مني بندالة منهجي
وخذلاني لخلاني 
وهوان العشره على ولاد الحلال ، مش سهل
مش سهل برد الفرشة
كل اللي اتعلقو بطرفي ، 
اتعلقو بقشة 
انا ولا حاجة
انا اللي اخترعت اللاشئ وحبيته
وانا اللي نهيته بايديا دول
معرفتي بالحياة 
اني جيت في رابعه ابتدائي
حبيت ايه احمد
واني كنت خلفة صالحة
من اب صالح
وام صالحة
واني كنت فالح في العلام
واني كنت اول اخواتي
واخرهم باين
مش عارف
بس بردو كنت خايف
و أبله جليله 
كانت توصلني المدرسه بدري
درءاً لخوف امي اني اتوه
كنت بحبها لكن 
خليت امي تقطع رزقها
لما العيال افتكروها امي
وبقت امي توصلني
واقول للعيال امي اهي امي اهي
ما اعرفش ايه حصل
خلاني استعر من نفسي زي ابله جليله
من جوفي .. من خوفي 
و قلة حيلتي ، وهدوئي الكيّس
ما اعرفش ايه خلاني اوصل كده 
انا كنت كويس
كنت كويس
كنت بعرف انصح الناس
وآويهم 
كنت احب القعدة وسطيهم
لحد ما بقيت من غير قصد بأذيهم .. ويأذوني
اعزيهم .. يعزوني
وكنت 
في تانية ثانوي او في اولى
مش فاكر
لاجئ في بير مسعود
زي العساكر 
كنت بترجى نظرات البنات
ونظرات البشر 
دلوقتي نظراتهم تاكلني
*قرنفلايه تحت ضرس العقل* 
وانا معدي في وسط البلد بالليل
ما اعرفش ايه حبك لوسط البلد
ما اعرفش ليه حب البشر كلهم لوسط البلد
مالها اطرافها؟ .. 
بعيدة .. و غريبة زينا 
يمكن عشان كده بنلملم نفسنا 
من حوالين البلد
ونروح وسطها
عشان ما نحسش الغربة 
والغربة ناشفة ،، بتفرّط 
وامي لسه كانسة الارض م الفرافيت.
...
مسيري هوصل للي مش عارفه
ومسيري هبقى اللي مش عايزه
زي ما بقيت كده بالظبط
انا هموت بنوبة ذكرى
او بنوبة ضغط
مش عارف .. بس هموت
دي رحلتي بردو 
من الكيوت 
للاصفر البهتان
دي تكملة قصة امبارح
بس انا كنت تقريبا غرقان
ولسه بصحى اهو وبفوق
و انزل لتحت
ما اعرفش تعبان ولا ارتحت
ما اعرفش انا فين
ما اعرفش انا ليه
ما اعرفش ازاي
عليك السلام يا ضيف احمد 
والرحمة والبركات
وتعالى نوزع قُرص ، و نشرب شاي 
رحمة على روحك ، 
على كل اللي مات
اهو انا دلوقتي اقدر الليلادي ابات 
مرتاح
او شبه مرتاح
وبكره راح يطلع صباح 
هيثبتلي ان اللي قولته ده كله كدب 
وكل اللي هقوله كدب 
كلها محاولات 
لايه? ما اعرفش
بس بنحاول
بنحاول اننا نبقى اي حاجة 
عشان نعرف نداري 
طراطيف صوابعنا الخناجر
لو غرزناها في قلوبهم
هيصيبهم عمى في عينيهم
ويصيبهم شلل ف رجولهم 
معلش معلش معلش انا اسف
انا اسف اسف اسف معلش
انا اسف يا كل الناس
على جوف القلب وقلب الوش
اسف لخالي ابراهيم 
على رميته محروق 
اسف ل خالي حسين 
لما مات مضغوط
اسف يا خال مجدي 
على حادثة الاسعاف
اسف يا حاج سيد 
على وقعتك مكبوت
ودورة الكون بعدك دورة كاملة باستخفاف
كان ما حصلكش حاجة
اسف ل جدي 
اللي كان نفسه يشوفني رفيع 
عشان كنت بصعب عليه
تُخني بيدرّله الشفقة ف عينيه
ماعرفش ليه شافني مُدّر للشفقه
ماعرفش ليه شافني 
ذو شأن 
كل اللي شافه ما صابنيش 
لكن دوشني
ما اعرفش ليه ما ودعتوش قبل الموت
ما اعرفش كنت ببكي على سريره بجد 
ولا كنت بمثل عشان عمي يشوفني
فيحسني بحب العيله اكتر
ما اعرفش ليه بصغر دلوقتي او بقصر
ما اعرفش ليه بعد نبؤة كل العالم
اني هكون احسن واحد في العالم
دلوقتي بدمر كل قناعتهم عني 
ورؤاهم الساذجة العبيطة
ربما غرتهم لمعة خدودي 
ونظراتي الحويطة 
ربما غرتهم نفختي الكدابة 
ربما 
بملك برائة ف عينيا ، بس جوفي
ما فهوش برائه
في حاجات لو تطلّعو عليها
هتجحدوني بالحيا
او يمكن ترؤوفو بحالي
تمدو ليا ايديكو عطف
وعينيكو شفقة
انا اسف
انا اسف
هنام دلوقتي 
وبكره الصبح 
هكمل حياتي زيكو 
وتصبحو على خير 
ويبعدني عنكم في المنام
اول واحد بيصحى 
واخر واحد ينام
سلام
...
محمد السيد عزيز

انا كنت كويس

مش كفاية نشوف بنات حلوين
عشان يحل عن رقابينا
مر الزمن
مش كفاية نكتب قصايد 
تبل ريقنا في حر الخريف
انا مش اخير
وانتو مش اول بشر بيخافو م الدنيا
فتعالو نستسلم للـ "بروزاك"
واثارة الجانبية 
نشد برد الليل على صدورنا
يحضن عضامنا يرد فينا الروح 
البرد شاهد زور
باننا عايشين
والضلمه خبت براويزنا 
فوق حيطان البيت
يخبطنا خيط هربان
من فتحة الشباك
ياهل ترى نلحق نهار العام الجديد ؟
ولا الخطاوي تزقنا تحت الرصيف 
100 اختيار بيزغزغزالعقل العجوز 
والكلاكسات راجة قلبك 
امتى الكاوتش هيحضنك؟
لكن 
بنخاف نموت كافرين 
انا مش هصارع على مطرحي جوا الحياة
انا عايز اطير
بره حدود عقلي وحكاويكم
بره الحياة البرزخية 
بره الحياة 
والموت
بره عذاب القبر 
والأخره 
وحبل الصراط , والجنة 
والملكوت
انا مش هصارع على مطرحي جوا الحياة 
يا يجيني بهدو وف سلام ..... يا ارحل 
مع الماشيين 
خدوني وياكم رافع راية استسلام
كيس المخدة الابيض المبلول
يا دنيا لم تفتح دراعها الا لو تضرب
يا دنيا لم تضحك في وشي الا لو هتغيظ
خايف اعيشك
بس 
خايف اموت , 
فبعيش

محمد السيد عزيز

انا مش هصارع على مطرحي جوا الحياة

ماشي كإني عارف السكة

ممكن 
لو مافيهاش اساءة ادب 
تنقذيني اتنين وجمعه 
وتلات وحد 
وانا هعرف اكمل باقي الاسبوع وحدي
من غير تعب
ولا حد
علشان انتي ايدك انعم 
وشفايفك ارق 
وانا جسمي باظ من قلة الاهتمام
ومن الأرق
وعينيا حمرا من الدخان

ومن البكا بالليل 
في الشق

ومن النظر في عيون بنات حلوين
بسهام اقل 
من اللي مغروسه في صدري
لكن أدق

ومن النظر ف عيون يتامى الأب زيي 
اعرف اطبطب على قلوبهم بعيني 
وبكف ايد وهمي 
وبكلام زي العسل لو قلبك حجر 
هيطيب 
ويرق

ما بقاش ف قلبي حبيب غيري 
انا .... أنانية
والدنيا دي ضيقة وكبيرة
ومدورة 
ومتنية
مالهاش طريق سالك على ركن كان جواك
قادر يضمك
كل الطرق بتوصلك 
لأمك
وانت الوحيد العارف الذنب القديم
فتخاف تضم 
وتخاف تحب 
وتخاف تعيش
وتخاف تموت 
مبقاش في قلبك بيوت 
غير بيت العصافرة
والشوارع السد
والذكرى ام ريحه

والضحك من غير سبب ع النكت القبيحة
وحاجات كتير
لو قولتها
هتبان فضيحة
وحاجات كتير فضلت ف قلبك 
من وانت عيل
بيوقفوك في الجون علشان تخين
ويعلموك تبقى لوحدك
وتبقى حزين
يدخل فيك جون, جونين 
تلاته 
اربعه
تفضل في عينك طيبة قاعدة مربعه
بيشوفها بس اطفال المدارس
فيضمو نظرة عينيك بضحكة من البريئة
وده كفاية

محمد السيد عزيز

لو مافيهاش اساءة أدب

كنت قاعد
كنت واقف
كنت زي الصنم
فيه مواقف صمتنا بيكون لغم 
لا مجال للحس
او للألم
قومت غازل صوف على ايديا 
حك خدي في مسحتي عينيا
انظرك
بعينين بتشلب دم
امشي
رجليا تقطّر دم
احضنك تتلف ايد على ايد
المسك
بالوهم
والتنهيد
امشي م الشط ده للشط ده
كات جميلة السكة 
متسفلتة
كات جميلة البنت
مترددة 
وال عيال مكبوتة في ضهري
صحيو يوم ثايرين على صبري
يجرو ويزعقو 
وانا بجري
سقطو من جيبي على الاسفلت 
كنت صايم عن حاجات دلوقت
بس كلت ولما كلت ندمت
بس كلت ولما كلت 
ببص
انظرك
بعينين بتشلب دم
امشي رجليا تقطر دم
احضنك
حضني ده يبقى الكام؟
لم نعد وسيبنا للأيام
تحسب الفاضل على بكره 
فيه كلام محسوب 
وفيه فطرة 
واحنا لو هنحب مش هندوب
فيه حذر لندوب ما نتجمعش
واحنا لو غيبنا نقول مكتوب
واحنا نتفارق عشان ما نفعش
فيه امل 
طبعا 
ماهوش لينا
احنا بنطبطب على ايدينا
كتفنا بيخاف من الطبطبه
تسري فينا رعشة 
على كهربا
عودتنا الدنيا ناخد حذر
وبسلامة نية خوّنا
نص بسمة من شفايف القدر
نترعش ونكش في ديلنا
توبنا عن حتى النظر 
لعيون بنات جيلنا
انظرك
بعينين بتشلب دم
امشي رجليا تقطر دم
احضنك
بقعة في صدري العليل
كنتي طابية 
وكنت عقر وزير
فيه روتين في الحركة بس امان
والحياة بالشك.. والسجان
تدفنك 
لو حي في الفوازير

محمد السيد عزيز

عودتنا الدنيا ناخد حذر

29 سنة 
ماشي بدور على ودن تسمعني
واما لقيتها
لساني قرر ينتحر زي الفرص 
رن الجرس ماعرفش فسحة ولا دي المراويح 
ده انا لسه كنت بعافر اخرج 
من بطن أمي بصرخة 
نزلت زي الترجمة في أوضة الولادة 
على السرير من تحت 
"مش عايز"
يا ترى يا فندم انت بتفكر ف ايه ؟
مش عايز ايه ؟ 
وليه يعدي الحلم يتمختر
فستان سواريه 
يطرف عينيك الحمرا لون دمك 
تنزل دموع زي الزعل....تبكي من الأول
بكره هتنشف زي اختها ف كمك
تنزل دموع زي الأمل .... تضحك من الأول
بكره هتنشف زي اختها
وأمك 
والليل اكيد راح يجي بعده نهار
بردو النهار راح يجي بعده الليل
وده صاحبي اللي اتحدي عشانه قرص الشمس
حسبه تلخبط 
زي الاعاقة المجبرة ع الشرف .. 
زي الدموع الناشفة في المناديل
دموع ترف
احنا اللي فات من ذكريات بتدق في قلوبنا الخزف
تخلق شروخ باينة على وشوشنا الرغيف
تحرق عينينا النار
دي نار شوقنا
ولا دي نار وخلاص
خلاص كبرنا بدون خلاص 
والطفل اللي عايش جوا 
ما يلزمنيش.

Mohamed Aziz

Popular tracks