أنا المغلوب علي أمره ..قليل الحيلة والهمة
أنا اللي بتوب من التوبة برئ من حولي والقوة
برئ من خطري والوسواس
برئ من نفسي والأنفاس
برئ من كل شئ للناس 

علي الأعتاب ..غريب وطول العمر متغرب
أعوز أهرب ..مفيش غيرك يكون مهرب
ومنك إليك وعليك التوكال والبوح
أنا المجروح .. ومستني سفينة نوح
توصلني لبر أمان

أنا الطمعان في جودك ونا كلي عيوب وذنوب
وبطلب منك الغفران
تسامحني...وعنك أتوب 
يا كل خطيئة عملها زمان
 
علي الأعتاب
محمد غنيم

علي الأعتاب

بنشلب دم
فروق توقيت
في قطر الموت
وهدم البيت
وصوت الناي
في قلب الغيط
بيشلب دم
 
بنشلب دم 
وعيش راضي
و بغباغانات
علي الفاضي
في مزلاقانات
و موت عادي
في كرسي اهم
 
بنشلب دم
في وسط الحاشية والحراس
بنشلب دم
قضاء قدرك
كدا وخلاص
بنشلب دم 
ألوم امك
ولوم الناس
بحق الدم
 
بنشلب دم
بستهتار
تموت كدبت
ناخد ب الطار
وعم الجهل
دق الزار 
ونشلب دم
 
هنشلب دم
طول ماحنا
تفك ايدينا
في المحنه
نزيف الدم 
ملامحنا
بتتجسد في قلب النار

بنشلب دم

أولى بيك

بترد ردودك بالعافية
كان ناقص تدخلي ب قافية
وحاجات بتقولها لايمكن
تتصدق في الأساطير

قال فاكر إنك ممكن 
تلعب علي أعصابي وأغير
قال فكرك إني ح صدق 
أنا مش داقق عصافير

هو أنت ابن بارم ديله
بتتأنزح وبتتمنظر
حتي اللي كبرت في خيره
 بتشربه كاس الحنضل 

أنا ممكن أعرف أحور
وأدور وألف وأدور
لو يعني شيطانك صور
ح أركب حنطور وأطير 

وطاقية في لعبة ساحر
والأرنب طالع داخل 
ما تقصر هات م الأخر
او أقول ... تصبح علي خير 

لعبة ساحر

لعبة ساحر

الحق نور ..والنور يقين
الشك عتمه ..ونار جحيم
الطفل جوه ف بطن امه
موجود وفي الاحشاء مكين
وصفوف من الاحباب تهاني
مبروك ما جالك....... 
قول امين

الخير دا بذرة 
الشر بذرة
ازرع تلاقي
محفوظ وباقي 
يوم التلاقي
والناس عرايا متجمعين

الحق نور …النور مبين
الرحلة مش هي وظروفها
دا فيها زاد
الزاد منين ؟
التقوي حق..
النور خلقها
التقوي دين

الصوت بيعلي
والتجمهر حل المكان
في حلقه مفقودة
وسط الزحام
الجمع بيزيد ..ويكتر
الحضور بقي ف التمام
الحلقه المفقودة تظهر
والذهول مل الامتحان
الذهول مش وصف حاله
الذهول مل العين يبان
القصد م الذكر حاله
تجي لعندك ف المنام
وتقوم م النوم تسبح
تدعي لربك ف القيام

الخير دا بذرة
الشر بذرة
ازرع تلاقي
محفوظ وباقي
يوم التلاقي
والناس عرايا متجمعين

والرحلة مش شك ويقين
الرحلة دين..
تاخد كتابك يابن آدم
م الشمال او مل يمين

الرحلة

قالولي ما توصف أوصف ايه
دا سحر عينيه .. بتوه أنا فيه

أميرة.. قول دي شجرة وغضن
ومنبع للجمال والحسن

فراشة وطايرة طيارة
تسري العين ...يا سارة
لطيفة وهي مبتسمة
بريئة براءة النسمة

حبيبتي جمالها رباني
حرير ..يا شعرها الطاير
دي صولو ..مزيكا وأغاني
وانا وفي وصفها حاير

في وصفها حاير

في وسط الزحمة طليتي
 في وسط الناس 
ملاك إحساس .. 
وعفوية
سلسبيل إخلاص 

ياروحي.. ياجميلة الروح 
منين ما بروح…
 وصوتك لحن في وداني
ياوخداني علي البارد وع الحامي 
أدوب وأسهر لحد الليل 
وليلي ياعيني ياغرامي
في حبك السهر يحّلى
يغير طبعي وكياني
لا أنا عايز حبيب بعدك
ولا هعشق حبيب تاني

بلاش التقل دوخني
بلاش البعد والحرمان
وكلمة بصدق ..
قالوها زمان 
ما جمع الا ما وفق
وصدفة خير … 
بألف ميعاد

في وسط الزحمة

بعد التحية والإحترام
إزيك ...تمام
مابقتش ليه بعرف أنام ..ولا بيهدالي بال
طيب  ..سؤال 
هو الأهتمام دا ممكن يتطلب 
ولا اللي بيحصل دا حلال؟!
ولا الحب في هذا الزمن 
أصبح محال

 الحب ..اللي بينضرب به المثل
مش دايما عسل 
ولا اللي فات من حياتي دا
 لا يمكن يتغسل

النغزه اللي أنا حاسس بيها
جوا في قلب
مش عارف أدويها 
ولا أنا عارف أوصفلك فيها
هي دي نغزه شوق 
ولا دي أزمة ذوق
ولا دي آهة  تعبان
ولا دي آه…
 من قسوة تلك الأيام
ولا دا طير هربان 
من هزو وهذيان
وجناحه يدوب …
بيرفرف م الحرمان
ومن تقل المسافات 
قول ...
لو حتي تقول بسكات
 نفس الأعراض بتجيلك 
ولا دي كلها سكرات 

بعد الأشواق ببعت سلامات 
لكل جريح ...
بتشيله الريح .. مطرح ما توديه
أخبارك ايه .. وبتعمل ايه
بقالك مدة متغير 
طب ساكت ليه ..
ما ترد عليا ...
أوحتي ابعت جوابات
شوف الحيران بيخبط شوق
ويوقع في كلام ...
من تحت لفوق
كل دي حكايات
وسلام في ختام 
كل الحكايات
 طلعت أوهام

بعد التحية

في حكم العادي والمقبول …
ما بتدمش الحياة علطول 
وعادي لو تكون عادي ..
محدش عارف المقدور
وعرض في سينما صيفية..
ووخدنا الحياة بالدور
حياتنا كراسي موسيقية بتنقص كل ما بندور


بلاش تضغط في أحلامك وعيش يومك كأنه مجاش
وتستنظر تشوف سيرتك في قطر الدنيا
ما تشوفهاش
وتصنع المستحيل م المر ..
وتوهم نفسك إنك حُر
وبَكّر الدنيا كله ُيكّر ..
وفجأة الفليم ..
يوقف عرض.

كراسي موسيقية

رعشة ايديكي …سلامي …إليكي
وشوق الحبايب ..
دا لايق عليكي
ربكة في خدودك ..تِحّمر ورودك
ويهتز عودك ..ساعة لقانا 
 يسقط علينا الرطب في الجناين
تصفر رياح خماسين في المداين
وتدهن لقانا بلون لونه بمبي 
وقربك حبيبي يكفر لي ذنبي

بتضحك عينيكي ب رقة وشياكة
وكاملة حبيبتي في غاية اللياقة

نسايم نسايم تهفهف تطير
في شعرك ياروحي
وسنك صغير

سنك صغير

نزيف الذكريات الحاد في جمجمتك
صراع حاضر وكان ماضي 
 ف م فضلك ... بلاش تفكير
بلاش تتعبها ع الفاضي

مشاهد السيما قدامك 
بتظهر فيها أحلامك .. فتتأثر وتبكي كتير
متزعلشي .. لأنك مستحيل تندم علي حاجة محصلتشي

وايه يعني .. ! غريب إنته في تفاصيلك
عايز تثبت تقول للناس ! وليه يفرق معاك غيرك !
ولو عايز تقول ؟ ما تقول !
في وسط التوهة ...والزحمة ...وناس ضايعة
وناس تايها... وناس تانية صيبها ذهول
رسالتك يابني لو وصلت !
 هتبقي رسالة من مجهول
متزعلشي .

محمدغنيم
رسالة من مجهول # ١

رسالة من مجهول

هاشم ..ياصدي صوتي
ياضلي المسافر في الدنيا 
من بعد الغروب 
ياأول سطر في حكايتي 
وسرى الظاهر المكتوب 
أبوك ..مكروب
لكنه عاش …كتير أيوب
بيصبر حتي علي صبره
ومن صبره مفيش مهروب
أبوك …مضروب 
بقلقه عليك 
وخايف أنه يوم موته يأثر فيك
أبوك يعقوب في أحزانه
يخاف إنه ينام  يحلم…
يشوفك ..
في المنام يوسف 
يقوم مفزوع من الخضة
ويتوضى بالدموع فضة
وتبيض العيون وتدوب
هاشم..
ما أنت الحظ في الدنيادي …
وأنت نصيب 
بدعوة ينولها في مكة  
روشتة بجد موصوفة ..
بيد طبيب 
وهحكيلك حاجات عندي
 عن  الدنيا… يهمهم بيها كل حبيب
أقولك ع اللي حسيته
في موتك جدك
وموت ستك… بعدها بسنين
في قلوب بتدوب في حبايبها ..
وحبايبها قلوب دايبين
تخاف تمسكها تتعلق ..وتتشوق
ف تتشقق وتبقي حزين
ف أنا.. أنت 
وأنت ..أنا مين..
أنا سِيّنك ..وأنت الشِيّن
نعيش أخين.. نعيش حابيبن
كما لو كنا شئ واحد
أكون حَسّنك.. تكونلي حُسّين
معادلة صعبة مش سهلة
بنلعبها ما بين طرفين

مفيش أحزان بتتساوى
مفيش كسرة بتتداوى
وحسرة القلوب وحشة
بتقسم ف القلوب نصين

فعيش هاشم في أحلامك 
يانور عيني ..بقلب سليم
وسبيني أغوص ف أحزاني 
وأعيشها غنيم

هاشم

هاشم

أنا عارف إن الضعف الكامن جوه إرادتي
مش محض الصدفة البحتة
بل تدبير رباني 

أنا اصلاً لا جل ما تعرف 
أصغر واحد في إخواني
وأصغر واحد هيقولك 
ازي هتعيش واحداني
من غير ما تكون متكدر

وأنا يمكن… أكتر واحد
يوصف من غير ما يعبر
عن وجعك قبل دقايق
من غير ماتقول وتفكر
وازي تعرف تتلون
من غير ما تكون متنكر
وازي في مشاهد السيما
تعرف تبكي وتتأثر
 
أنا اصلاً كل ما بكبر
قلبي بيتكرمش أكتر 
والدنيا بتصغر جداً
 قدامي وبتتلاشي
هحكي عن قصة واحد 
عارف يمشي ويتامشي
عايش بالهارد بتاعه
من غير نسخه علي فلاشة
تعرف من كتر صداعه
عايز يشتري كماشة
لو في دمل في صباعه
يقطعه زي الجلاشة !

والزهق الحاصل لسيادته
 م العالم ابو دم تقيل 
عايز يتعلق بسلامته في الدنيا
 من غير مسامير
رافض يتثبت لو ثانية
مانع التصوير
ما بيكره شئ في الدنيادي
قد التطبيل
وازي هيعيش في الدنيادي
من غير تمثيل !
بيشوف الدنيا في احلامه 
رافضة التأهيل 
مع إن الدنيا في احلامه
ليها شكل جميل !
 
اصلاً إنسان متحير
من صغره وهو صغير
بيبص كتير قدامه
علي أمل انه هيتغير!

والأمل الواضح قدامه
 يبعد... وكأنه سراب
حتي الاحباب اللي تحبه ...غلبوا الاحباب !
من كتر صارمته وتجرمته
مبقاش له صحاب
ويشيل من نفسه بذات نفسه 
زي الأغراب
وعشان يتصالح مع نفسه
راح كاتب للنفس جواب

والنص الواضح قدامكم
كان جزء من جوه كتاب

مرسل إليك

مُرّسل إليك

أنت اللي بديت ..
أنت اللي بديت ..
تخيلني نسيت
توه تذكرتني .. 
وأنا جرحي من بعدك داويت
لا لا .. تلومني .. 
حاسب  نفسك إن دريت
قلبي اللي احترق  شمعه 
والحب أنت طفيت
أنت اللي بديت 
أنت اللي بديت ..
وفر معاذيرك ..أنا من ضعفي قويت
كم إني عنيت ... في بعدك 
كم إني عنيت
بعت إنت حياتي  .. 
وغيري إنت شريت
لا ترسل مراسيلك ..
من نظري إنت هويت
لا تشف الجراح مني ..
وإن بدي إني شفيت
أنت اللي بديت..
أنت اللي بديت

محمد غنيم 
وفر معاذيرك

وفر معاذيرك ..(خليجي)

الحلم مالُهْشّي مازورة 
بيراود ناس عن أفعالها
 فاتحس في فعلها مجبورة
ويزهق ناس من أحوالها
ما تحش إنها مستورة

ويزاول ناس ويبهدلها
ويزغلل في عينيها… شاغلها
ويرقص حواجبها وديلها
بالشكل والصوت والصورة

وأنا وأنتم بندور …في مكانا
وبنصرف وقتنا وكلامنا
في حاجات بتهد في أحلامنا
راح ندفع … علي كله فاتورة

ف الحالم أبو أيد مبتورة
دايما بيبالغ ف الصورة
 تلقيه دايماً كشري ونفري
خايف يتبسم من قلبه
لتبان السنة المكسورة

الحلم مالُهْشّي مازورة
بتحدد حجمه ..مقاسه
الحلم شبه تنورة ..
بيدور ويلف في كاسه
 فتح  ..فين السنيورة
مولد والحاوي أساسه
الحلم شبه عصفورة …
بتطير ترهق أنفاسه  
قرصان في بحارها الواسعة
نورس …يخطف إحساسه

الحلم مالهُشّي مازورة

ياليل في أحضانك وجع
ياليل للعابدين سلطان
سَاهم والسهم اتنزع
كان للانبيا عنوان

يونس ذو النون يانبى
ياحسّ مبحوح م الزكام
ياحلم في جُليب (قلب) الصبى
يابشر فقدين العلام

دا مفيش نبي كان أجنبى
ولا حُرمّة حبلت في المنام
قُدوسٌ في جُليب الصبى
سُبوحٌ في ساعة الفِطام 

يونس يا ذا النون يانبى
شِالله ياصحاب المقام
ياعترة أهل رسول نبي
السر مدفون في الكلام

المدّ خوفي ومطلبى
الحوت مشدود ب اللجام
معقود في حسى ومذهبى
يقطينى شجرة عاش وعام

الرمز والحرف الأبى
دوامة في بحر الضلام
الخُطوة مسٌ سرمدى
والبحر مليان بالحيتان

غرقانه توهتي في كوكبي
عطشانة للنور والسلام


ذو النون

ذو النون

السيرك القومي

في حاجات في الدنيا لازم تألمك
وطبيعي جداً إن محدش يفهمك
بتقول آه .....طب ايه بيوجعك ؟!
سمعني صوتك ولا خايف لأسمعك ؟
أنا ع العموم كنت جاي أودعك
هتسلم علي ولا آهك تمنعك ؟
...
..
.
يلي عايش لوحدك
ليه سكت جواك الكلام ؟!
هو أنته بتسمع سكوتك
ولا اتمنعت من الكلام ؟
في شئ بيخنق نبض صوتك
وأنته رافض للكلام
ماهو لو تعبت ؟!
قول كفاية...
او حتي أنطق .. كلمة حرام
سكوتك معناه يخوف
سكوتك معناه الكلام
ياريتني أفهم صمت صوتك
وأنته بتشد الحزام
نفسك بتعافر جوه نفسك
شكلك بتكابر والسلام
أسمع لصوتي اصله عرفك
عايش معاك قبل الخصام
أسكت ..... 
وأنا معاك راح أسكت
وأسرح ....
يمكن في السرحان تنام
أو يمكن في السرحان دوا
أو يمكن في السرحان كلام

محمد غنيم 
قبل الخصام

قبل الخصام

وعمري ما خوفت مل المكتوب…
ولسه بعد في الأيام
راح أكتب شعر بالمقلوب…
بيحلي السمع في الأنغام
أبان في الجمع مش محسوب…
ف تخرج ضحكتي بسلام
محبش يوم أكون  مغلوب…
ف ترسم فرحتي الأحلام
أشوف الأصل في المطلوب…
أفك المعضلة بلجام
فتفهم إني عمري ماتوب…
وصعب أتوصف بكلام 

تعريف
محمد غنيم

تعريف

الحب أناني.. ما يتجوزش ..ولا يدخل بيت.. ولايتهني ..ولا يدخل عش …ولو خاب واتجوز بإرادته …ممكن ما يعش
الحب أناني ..
بيفضل  دايماً ..إنه يعيش وحداني 
واخد أنفاسه اللي المحتارة من روح قلبين
عاشق معشوق في براح الدنيا.. طاير بروحين
لو شاف حابيبن فرشين السما أطياف  وخيال 
شيطان الحب يفرق بينهم ..
علشان يفضل مرتاح البال 
ويكمل هو حياته.. كداب ..محتال..
ويشاغل دول.. ويلاوع دول ..ويفسح دول…
قايم بسلامته بدور كورنيش ..
عايش في الدنيا بروح إبليس
ويبرر بكلام من وحي خيال 
قال يعني عشان..القصة تعيش

كيوبيد الحب ..
ملاك من الجنة بيتفنن ازي يختار
يضرب بسهام الهوي قلبين ملين الدنيا خضار وعمار
الحب دا سر من الأسرار..
الحب ستار..
بتعيش في الجنة وأتاريك محدوف في النار

الحب قرار …بالوقف الفوري لضرب النار
الحب شعار .. 
وهتاف خيبان ..
بيلف يدور ويدوق حرمان
حلزون ملفوف.. دنيا الإنسان 
لو خف ..يشوف ويعيش تعبان
الحب مغمس بصميتة علي نصبة شاي..
الحب بيطلع منا ازي 
الحب  الخبز اللي ما شبع بطن الغلبان
الحب حنان اللي يدفي واحد بردان 
الحب الصادق مش بيغش
الحب قصيدة ومكتملتش
نهايات مفتوحة لاخر وش… هيودع دنيا الأحلام 
الناس بتحب الحب عشان… تهرب مش عارفة تنام…
الحب كلام

للحب وجوه آخرى
محمد غنيم

دنيا الأحلام

ياحور العين..
 ياغصن وبان
ياوافرة من الجمال …
 إحسان
أنا العطشان ..
في طلة شوق ..
ونفسي أدوق …
وجن جنان..  
فطيم حرمان
هيعمل ايه؟ 
في حرمانه لو النظرة ..ما طفتش العذاب و ال آه

دا أنا الإنسان في تفاصيلي
وأنت كا الملاك جذاب
عذاب… أكمني مش طايل
وحاير والجمال ينساب
عذاب وعذوبة في الحالتين
فسبحان من بدع شكلك
وأعطاكي  الجمال خلاب

يا واخدة م القمر حتة 
ياشمس منورة الحتة 
لا قبلك سبعة ولا ستة 
مفيش بعدك ينكتبلو كتاب

ياحور العين …ياغصن وبان
ياوافرة من الجمال …
 إحسان

ينكتبلو كتاب
محمد غنيم

ينكتبلو كتاب

لكل وقت أدان

الامل وياّ الصراحة 
ارض خصبه للتفاؤل
والتبجح والبجاحه
عندي تطرح ميت تساؤل ؟!
زي ..........
هو ليه الصبر طيب ؟!
ولا اصل جنسه ايه ؟!
حد عرفه من قريب ؟
حد باعه ؟ 
مين شاريه !
هما ليه دايماً يقولوا
أنه مفتاح الفرج ؟
حد عارف مين قالوله ؟!
خاف لا يحكي 
او اتحرج !
هو عارف إن اسمه
خلي صبره طعمه مر
ولا حرف الصاد في رسمه
خلي طبعه يبقي حر
حد حس الصبر زيه
وانه داء الصاع صاعين
وإن تلمح نور في ضله
يتلو من سوره ياسين
حد عارف 
انه ذنبك ؟
حد قايل 
انه عرفك ؟
اسكت ...
 متبهدلش نفسك
واصبر كما صبر
الحسين

محمد غنيم 
الصبر طيب

‎⁨الصبر طيب كلمات محمد غنيم وغناء وألحان نيفين غنيم⁩.m4a

انا المفطور علي الوحدة .. غريب الطور
انا المكتوب علي جبيني .. نهاية الدور
انا الجودي والسفينه عليه
انا كشف الحساب داين في نحيه والنواحي كتير
انا درب الودع والطير 
انا المزامير 
وبترنم في نّفث داوود
انا الوعد اللي طال ليلي
وانا الموعود
انا محنه وجع بايت
في صوت أيوب
انا ال آها في صوت عاشق
وانا المطلوب

‎⁨درب الودع(قصيدة)⁩

سفر الغرق والتيه

المجد المزيف ... عشتروت
آخر كلام انكتب برا التابوت
اركع وفوت
جوا البيوت برا البيوت
آخر التعويذة موت
آخر التعويذة موت
عشروت
المجد المزيف

سفر اللي عاش يكفيه

ارض الخراب ... وغراب
كل الكلاب
كل اللي عدي من هنا بقي كوم تراب
لون السحاب 
شكل العذاب
ديل الكلاب 
بقوا كوم تراب
ارض الخراب
وغراب

سفر واعدوا لهم 

الحمية .... اجلدوا ولاد الزواني
كل من طمس الحقيقة
كل من عبد الاغاني
كل من احدثها إفكٍ
كل من سرق المعاني
اجلدوا ولاد الزواني
الحمية

سفر فلا غالب لكم ( الملحمة الصغري )

الدم الزكي .....ريحة بخور
كل القصاري زرعت ...طلعت زهور
حتي القبور اتفتقت ... يوم العبور
النصر قادم يحلف منادي الحي
إن النصر قادم 
ريحة بخور ... الدم الزكي 

سفر الخلاص ( الملحمة الكبري )
كر وبلا ..... الضرب فاير في الخلا
وغبار كتير 
اقفل حساب المهزلة والصلح خير
اليوم دا يوم المرجلة 
نادي العيال كلها واضرب نفير 
اتجمعلوا
الضرب فاير في الخلا اوعوا تفروا وترجعوا
اتجمعوا
اليوم يوم المرجلة اليوم حسم المهزلة 
فضلت كتير

الملحمة الأخيرة (يوم الخلاص)

روحك السابحه في تقطيع الكلام جواك
لفين وخداك
ولمين  .. هتسلمك اشلاء

إياك تكون مشتاق 
لتوليف الحروف قصه 
تغرب علي جبينك 
وتزود الغُصّه

وإياك تكون مشتاق ..
لضي من الحروف اعمي
يفهم المعني 
ويفصل م العمش قفطان

مشتاق وانا المشتاق
لتوب م العفه 
في ميقات الجمال إحرام
مشتاق لعطف القصيدة 
في النفوس إلزام
إشتاق بحرف الألف 
نهج  وبلاغ وبيان
وسلام علي بلقيس 
قوارير المحبه .. سلام
يوصل لذات نفسك .. يوهبك
ان الحقيقة في ديل الغرام ..فستان
عري سيقان الهوي لفرسخين قدام

مشتاق لروح ثاير 
فضي المواجع بوح
مشتاق وانا طاير متل
الحمام الدوح
تقلت عليه المسافات
قام سلم الرايه
كترت عليه الحكايات
قال السفر غاية
راح لم ضله وغاب

مشتاق لحد الكفاف
يليق عليه الصوف
ارضي بظلم الغير
اجري كما الملهوف
شايل في قلبه كتير
درويش بليه الخوف
كان ينقصه الخفه

مشتاق ..
في ليل اخرص
جمع الحبايب جوز
وانته الوحيد مفترق
رغم انه مش هيجوز
تفضل وحيد معتكف
وتقولي مين هيشوف
ايه الغريب .. فيا

ايه الغريب ..فيا

كلمات : محمد غنيم 
غناء وألحان : نيفين غنيم

انا المفطور علي الوحدة .. غريب الطور
انا المكتوب علي جبيني .. نهاية الدور
انا الجودي والسفينه عليه
انا كشف الحساب داين في نحيه والنواحي كتير
انا درب الودع والطير 
انا المزامير 
وبترنم في نّفث داوود
انا الوعد اللي طال ليلي
وانا الموعود
انا محنه وجع بايت
في صوت أيوب
انا ال آها في صوت عاشق
وانا المعشوق

‎⁨درب الودع ⁩.m4a

في ضل الحضرة ناس قاعدين
وكله في خلوة الحضرة
وصوت عصافير غني وبساتين
بتوحي في الوجود.. نضرة

وسيد شيخ من العارفين
علاقته بالحضور نظرة
يقوم واحد من المساكين
يجدد عهده بالفطرة

يقول ..
 مسكين وغيرك مين
من العظمة وم القدرة
يغير أستاذ من القاعدين
يدندن لحن بالفطرة
يقول ...
علي عهدك ومني قريب
ياكلي وبعض 
البعض البعض من كلي
منيش مرتاح ف الوحدة 
لقانا نصيب .

يهيج الجمع في الحضرة
يزيد الحب والنشوة
هنا كل القلوب خضرة
يجوز المشي عل الميه

يقوم استاذ من السامعين
حزين مسكور
 ومطهر
دموعه تحسها بيتادين 
تلملم جرح متكسر

سؤال مقصود وكله صعود 
ومعراج للسما السبعة
 سؤال استاذ وكله مجاز
علاقة مين تبان للناس في بعدك عنه .. منه قريب ؟
سؤال مطروح من الاستاذ
ذكاء ودهاء منه بعيد

مجاز النص عمره ما جاز
علاقة مابين ...يقين واحد / وواحد صفر
ارد جواب علي الاستاذ 
فيسكت وينبهت بالصفر
يرد الشيخ مجازك جاز
صحيح اللقي دا نصيب

محمد غنيم
اللقي دا نصيب
#الشيخ والمريد # ٢

الشيخ والمريد ٢ اللقى دا نصيب

عن طيف شباب بيخنق فيك عيل صغير..
عن لمعة في عين خليت كل ما فيك ..يغير..
عن التفريق ما بين الوحشة
.. والوحدة..
عن التخلي عن التحلي بروح صدّيقْ كان محلي ... في نفس الغبش اللي فيك ..
عن طريق صعب تشوف في حد استريح..
عن طريق موصول... بوصول الي باب المتاهه ..
عن صديق في المحنه في نفس البداهه
عن حيرة ..في قلب حيرة ..طي حيرة .. لبطن اوسع..
عن حياري ..
عن سكاري ..
عن عيون طلبه استشاره للحقيقة..
عن حقيقة ظهره فينا غيبه عنا 

عن الأهم ..والمهم
عن القانون ..وروح القانون
عن ملح الدموع ..جوه العيون

عن نفس النفس اللي فيك ..
وفيها سبع طبقات
عن الأسامي... والسبع المثاني ..
وحاجات كتيرلو بوحت بيها... هترجم رجم الزواني

عن ضيق الارض الرحبه ...
عن الصحبة ...
عن نفسي .. وليس ...
عن غيرها.

عنعنة
الشيخ والمريد # ٤

الشيخ والمريد ٤  عنعنة

Poet
مشتاق لروح ثاير/فضي المواجع بوح/مشتاق وأنا طاير متل
الحمام الدوح/تقلت عليه المسافات/قام سلم الرايه/كترت عليه الحكايات/قال السفر غاية/راح لم ضله وغاب

MohamedGhoneim

Popular tracks