Nabil Abdelhamed

أموت و أخرج أنا و إنتي
و نتكلم و نتمشّى ..
و نشبك إيدنا ع الكورنيش
في وسط الزحمة و الدوشة ..
و أنا إللي فـ جيبي ميكَفْيش
عشان لو قُلتي نتعشى ..
لكن مُمكِن نجيب تِرمِس
و ممكن برضُه حُمص شام ..
صحيح الحالة مش ماشية
لكن بُكرة هتبقى تمام ..
هتتعَدِّل و بُكرة تروق ..
ما تيجي نروح سوا ع البُرج
و أوريكي البلد من فوق ..
و أشاورلك علي أوضتي
على سطوحنا في باب اللوق ..
هناك أنا كُنت بشتاقلِك
هِناك أنا كان قاتلني الشوق ..
و ياما هناك سِهرت أحلم
لحد ما راحت الأحلام ..
لكن برضُه مسيرها تروق
هتتعَدِّل و تبقى تمام ..
أجيبلك تاني حُمص شام ؟ ..

كلمات نبيل عبد الحميد
الحان أحمد مصطفي


حمص شام

تايه مع الزحمه 
كلمات الشاعر نبيل عبد الحميد

الحان أحمد مصطفي

كلمات الراب الفنان زاب ثروت

من حفل يوم 28 نوفمبر

Feat Zap Tharwat - تايه مع الزحمه

مات مسكين | نبيل عبد الحميد | أداء : محمد صابر

كلمات : نبيل عبد الحميد 
https://www.facebook.com/nabil.ab7meed

أداء : منّة كُردى 
https://www.facebook.com/Kawkabmashy

موسيقى : حلوة يا بلدى  لـ منال محى الدين 

الكلمات : 

بتجمعنا البيوت عيله
و تجمعنا الشوارع أهل ..
كتافنا بتِقْسِم الشيلَه
و كل الصعب يصبح سهل ..

في ضِل العِشرَه و الجيره
كبرنا ويّا بعض إخوات ..
شهامه و باقيه في السيرَه 
حكوها جدودنا في الحكايات ..

جَدَع عِتره و متأصَّل
بشوفه ما بين وشوش الناس ..
بياض القلب متفصّل
على الكف اللي كله حماس .. 

قابلته مرّه في الشارِع
يادوب قبل الأدان بمفيش ..
حِلِف لازم معاه أفطر
برغم إنه ميعرفنيش ..
و مرّه حاسبلي ع الأُجره 
عشان الفكّه مش كافيه ..
نزل قبلي و راح ماشي
و سابلي ضحكته الصافيه .. 

بشوفه صنايعي في الحارة 
و ترزي حريمي ع الشارع ..
و بياع فُل في إشاره 
و دُفعه من  الحدود راجِع  ..
وشوشنا كلها واحده
بنشبه بعض لون و ظروف ..
نفوسنا بالنصيب ترضى 
و بيننا الطيبه و المعروف ..

يا صاحب عُمري يا ضهري
رفيقي فـ كل مشواري ..
معايا تملّي ع الدوغري 
و كاتم كل أسراري ..
تُقف جنبي و تفرحلي
في وقت الفرحة ما بتحصل ..
و في الشِدّه بتسبقني
و توصل قبل ما بوصل ..

جَدَع عِتره و متأصَّل
بشوفه ما بين وشوش الناس ..
بياض القلب متفصّل
على الكف اللي كله حماس .. 

#جدع_عتره


جدع عِتره - نبيل عبد الحميد - منة كُردى

Law Msafer - لو مسافر

Vocal& Guitar : Moa'taz El-Hady
Lyrics : Nabil Abdelhamid
 Music Arranger : Kareem El-Naggar
Mixing& Recording : Rakan Sherif

Law Msafer - لو مسافر

فى يوم 15 نوفمبر - إتحرق 13 تلميذ رايحين مدرستهم فى عهد السيسى 

#ماتوا_التلامذة

كراريس - كلمات : نبيل عبد الحميد

خلاف نسبى ، #نبيل_عبد_الحميد

كرم المصرى 
الناس حكايات 
لـ نبيل عبد الحميد 

Wednesday 01:54 PM

كُنا سبعة

ويّا بعض نروح و نيجي

أي وقت و أي حتة ...

جامعه ماشي

قهوه ماشي

أي هلس و رمي جِتة ...

بس من بعد الشهادة

كُلُه كان عَمّال يعافِر

شال هدومُه و راح مسافِر

خَد هُمومُه و سابنا سِتة ...

ساب جاكِتة لـ حَد فينا

و قالُه ذِكرى

رد قالُه عُمري ما انسا ..

شالها عندُه و يوم جوازُه

كان لابسها و سابنا خمسة ..

فات شهور و عملنا حادثة

كان سببها الصربعة ...

طيش شباب و هزار سواقه

و ضحك فاضي و مرقعة ..

و التمن كان حَد غالي

مات و سابنا أربعة ...

صدمة كانت مُفجِعة

لمّا فُقنا قالولنا مات ..

و أما واحد فينا كَمِّل

باقي عُمرُه بعُكازات ..

كان بيمشي تاتا تاتا

و الألَم خلّاه يسيبنا

للخطاوى إحنا التلاتة ...

بالمعارف و الوساطة

و الرشاوي و الهدايا ..

جالُه تعيين وجه قِبلي

راح و ساب واحِد معايا ..

و النهاية

نيجي ع القهوة و نحكي

مَرّه كُل فين و فين ..

و المسافة تزيد ما بيننا

و الشهور بتجيب سنين ..

باقي مين ؟

غير حنين الروح و دَمعه

و صُورَه كانت باقيه عندي ...

و أفتِكر لو شُفت جامعه

ولّا جمب القهوة أعَدّي ...

إن إحنا كُنا سبعة

و إني في الآخر لوحدي ...

‫#‏نبيل‬ عبدالحميد

‫#‏خالد_المصرى

كُنّا سبعة لـ نبيل عبد الحميد

المسافات
لـ نبيل عبد الحميد
#كرم_المصرى

Wednesday 05:31 PMالمسافات لـ نبيل عبد الحميد #كرم_المصرى

قانون الدنيا الساخر .. نبيل عبد الحميد

أخر كلام قاله ... شعر نبيل عبد الحميد ... إلقاء سيد شاكر

كلمات : نبيل عبد الحميد 
أداء صوتى :كريم قاسم سرور 
--------------------------
ساب المُنشار
دق المسمار
بَص على زبُونُه
متردد
ينطق أو يسكُت
محتار ..
- أؤمُر
- شُكراً
- ترابيزه / دولاب ؟
- لا أبداً .. أنا عايز باب ..
جربت كتير أبواب لكن
ولا واحد كان نافع بيننا ..
و إن جِه مظبوط لازم برضُه
في الآخر يطلع فيه سِنّه ..
لو كنا واربنا الباب يمكن
كان يفضل م الهوا سرسوب ..
كان ممكن أتوب ..
كان ممكن يبقى المكتوب
إن إحنا نحافظ على بابنا ..
كان ممكن نتعب
و نكمّل
و هنوصل
على أد تعبنا ..
سرسوب الهوا قَفَلُه و سابنا
إتنين و مابينهم
باب مقفول ..
أنا يعني بقول
لو ينفع أجرّب باب تاني
يفتح على كل اللي ما بيننا
لو حتى هيطلع فيه سِنّه
وانا هقفل و افتح بحساب ..
- كان نفسي أساعدك صدقني
أنا آسف
كان آخر باب ...

آخر باب

كلمات : نبيل عبدالحميد
https://www.facebook.com/nabil.ab7meed?ref=ts&fref=ts

أداء صوتي : محمد عزمي
https://www.facebook.com/mohamed.azmi.315

قصيدة (مذكرات أم حمادة) من ديوان أهرام الجمعة 
__________________________
من يومين ..
روحت للدكتور وقاللي
بعد ما شاف السونار ...
ربنا عوّض عليّا 
بعد طول الإنتظار ...

(2)
النهاردة يبقي فاضل 
ييجي اسبوع ع الولادة ...
قولنا هنسميه محمد
والدلع هيكون حمادة ...

(3)
اشترينا سرير صغيّر
كان معاه ألعاب كتير ...
رغم إني عارفة إني 
مش هسيبُه ف السرير ..
وإهتمامي بكل حاجتُه
خلي أبوه بادئ يغير ..

(4)
رغم وجع الحمل فيّا
والولادة القيصرية
كنت طايرة م السعادة ..
كنت أول مرة امسك
بين ايديّا ايدين حمادة ..

(5)
النهاردة مات بباه
سابني وحدي للي باقي ..
ساب حمادة وهوّة عيّل 
لسة داخل لـ إبتدائي ..

(6)
بعد مُر سنين شقايا
جه كرم ربّك زيادة ..
لما جالي وجاب ف ايدُه
ظرف ابيض فيه شهادة ..
م السعادي انا هبقي رسمي 
مامِت الدكتور حمادة ..

(7)
لسّة راجعة م المطار
بين حيطان البيت أعافر ..
سابني لأجل يشوف طريقُه
خد سنيني معاه وسافر ..

(8)
..........

(9)
..........

(15)
مرّ الوقت 
شهر اهو فات
لكن لسّه مفيش جوابات ..

(16)
..........

(20)
..........

(25)
عدّي شهور
عرض وطول 
جايز برضه يكون مشغول !

(26)
...........

(40)
...........

(50)
إبني حمادة ..
بكتب م المستشفي سلامي
مستنيه دُعاك بالرحمة
أول لمّا هتقرا كلامي ..
تيجي تزورني فـ مدفن أبوك
ويارب ما يقطعلك عادة ..
لو مش عارفُه
هيدلُّوك ..
إسأل علي قبر أُم حمادة ..


مذكرات أم حمادة - كلمات : نبيل عبدالحميد - أداء صوتي : محمد عزمي

من كلمات : نبيل عبد الحميد 
عود : سعد العود 
بيانو : عمرو عبد السلام
---


Osama Elhady - Nafs El Makan | أسامة الهادي - نفس المكان [ HomeStudio ]

الوادى المقدس - نبيل عبد الحميد - أداء مى سعيد

Composed By : Wagdy el Fiwy 
Lyrics By : Nabil Abd L Hamid 
Arranged By : Wagih 
Final Mixing : Wagdy el Fiwy

Zaman _ Wagdy El Fiwy

أين تذهب هذا المساء _ نبيل عبد الحميد _ أداء مى سعيد

تأليف موسيقى : صقر

الكلمات:
دَستور 
يا كوم دبايح جيّه تِوفي ندور
من عمر رايح بين بلاد و بحور
ضاقت مطارح عمركوا المهجور
شافِت عنيكُم بُكره في العواجيز ...
كان دور و داير وانتوا وسط طابور
و السِكّه ماشيه و الزمن تعجيز ..
دستور يا ناس مش لاقيه بينها حلول
جايين يلاقوا الحل في التعاويذ ...

Ta'aweez soundtrack | موسيقى ديوان "تعاويذ" للشاعر نبيل عبد الحميد

كلمات : Nabil Abd El Hamed
غناء : Mohamed Tamim
توزيع و ميكس : Mohamed Adel
تصميمات : Moataz Gad
انتاج : A M P MUSIC
====

دُكانة فـ الحارة ..
بيبيعوا فيها الموت
و بضاعة جُوة تابوت ..
ولا دايم إلا الله
و الفاتحة ع اللي يفوت .. 
يا بلاد ما فيها بيوت ..
يا بيوت ما فيها رغيف 
الماضي كان أشكيف ..
عايش معاك فـ كابوس
فـ خيالك المحبُوس 
جالك فـ حِلم مُخيف ..
يتّمشّى فـ الحارة
و فـ إيدُه زُمّارة
زَمّر بصوت عالي
جيت إنت على بالي
أيّام ما كُنت ضعيف ..
فـ صحيت أنا مفزوع ..
خايف و مش شايف
و إن كُنت مش عارف
هـ حكيلك الموضوع ..
مين إللي كان ظالم
مين إللي كان موجوع ..
لمّا العِجاف حلّت
مين إللي مات م الجوع ..
الحرب دي حربي
و الخيل مكانش أصيل
و الدرع فيها هزيل
كان م الورق مصنوع ..
و لا كانش عندي سيف 
يا بلاد ما فيها رغيف ..
ساعتى فـ إيد الوقت
وقتى فـ حُبك ضاع ..
و أنا لمّا قُمت و فُقت
كان فـ المزاد إتباع ..
يا بؤرة الأوجاع
خِفّى عليّا شوىّ ..
من يوم ما وجعك شاع
راح من عنيّا الضى ..
و الجرح بعد ما مات
صبح النهاردة حيّ ..
خِفّى عليّا شوىّ ..
الماضي كان أشكيف 
جالك فـ حلم مخيف ..
و فـ إيدُه زُماره
زمّر بصوت واطى ..
و إن كُنت أنا الخاطى
أستاهل إللى يكون ..
يا غُربتى فى الكون
أنا بِعت فيك عُمرى
و ما خدّت فيه عربون ..
و إن كُنت أنا التاجر
فـ أنا بعت بـ خُسارة ..
كان السداد آجل
و الدفع بالتقسيط ..
أخدوا إللى كان حيلتى
و طلعت أنا إللى عبيط ..
قالوا الحساب موجود
عدّى علينا و فوت 
هتلاقى دُكانة
بيبيعوا فيها الموت ..
موجودة فـ الحارة 
تاخُد هناك حقّك
طبلة و زُمّارة ..


Nabil Abdelhamed

Mohamed Ibrahim