_موت القرنفل

الشعر... مش بيعالج الروح الحزينه من حزنها
ولا بيداوي عِلّة ساكنه ف النفوس
لٰكن أكيد يقدر يعبر عن وجعنا لما تطحنا التروس
لما تحرقنا الشموس
واحنا ماسكين الفؤوس نخبط ف بور الأرض تطرح خضار
يا مين يرجع لينا ضي النهار؟!
يغزل من العتمه اللي حاوطت شطنا نوتة
يروي للجيل اللي جي بعدنا عننا حدوتة
ويعلمه ازاي يجيب التار

كنا كبار وصغار متشنكلين من حلمنا ف سن صنانيرهم
يرمونا للحوت اللي ساكن ف المحيط يبلعنا
ويجربو فينا كل أشكال التجارب
إن مرة فتحولنا القفص.... زي الطيور بنهج
ومهما بجناحنا بنبعد مصيرنا بنادقهم
بيروضو فينا الولد على كل شيء يفتك بروحه
زي الكلاب المتكتفه جوا القصور
حسب الأوامر بس نتحرك
_كل
_إبرك
_أقف
_موت......
نموت
متخيلين المهزلة؟!
وازاي شباب زي القرنفل ف مهدها بتموت
ناقصين أمل
صايباهم اللعنه اللي صابت جيل قبلهم
عيبهم أكيد انهم حبو الحياة
واتعشمو في اللي ما بتشفقش على كف الغلابة

حتى النجوم نورها خاصم حينا
وحجبت الضي إنه يدخد ف الشوارع
آدي المدينة اتحولت جبانة واسعة 
والبيوت صبحت قبور
والديابة ف كل حته بايته تعوي
وتنط من ع السور
تنهش الجتت اللي نايمة فوق السراير
تخطف الحب اللي كان ف البلكونات
والدايات بيندبو لحظة ميلاد الحلم من بطن المصيبة

الليل طويل
يشبه قضيب القطر منغير منتهى 
وضلامه دامس
والحزن عشش جوا قلب الغلبانين
والسما
مهما بتشتي 
تقدرش تطفي نار سببها الحزن

طال انتظارنا للصباح طال انتظرنا 
عدينا الليالي الكاحلة عضين على صباعنا
ليلة، اتنين 
مر سنتين ولسه بنقول فين..... 
يا فجر إمتى ع القلوب هتهل؟! 
تكسر الخوف 
والضي يدخل ف الضلوع يدوب التلج اللي فيها 
َوالعيال من غير مهابة تجري تاني ف الحارات 
والحبايب يغرقو ف أحضان لُقاهم ف البلكونات
والدايات يهللو ببشرى الوليد 
َوينخلق من ضلعنا الوطن الجديد
امتى هيحصل كل دا؟ 
هنعيش ونحضر عصر من غير القيود؟ 
ولا هنفضل زي ما احنا 
متعصبين العين 
متربطين ويا السواقي
واهبين عقولنا للتساؤل
وقلوبنا لحبال مشنقة.!

_محمد كمال

موت القرنفل "محمد كمال"

كاتم أنيني
وبقالي  عشرين حول بالع لساني
واهب كلامي للعدم والموت 
آمنت بديانة السكوت 
ورضيت بحكم البنكنوت
لما خد من بين إيديا حب عمري ورماها لضلع غريب 
انا واللي زي مفطومين ع المر 
عريانين من كل شيء دافي
مرفوضين م الدنيا من غير سبب 
ديما وحايد ف العدد
ملناش ونيس
ومفيش فروق بين سبتنا وبين الخميس 
حلقة بتجرجر ف حلقة 
يومنا منه ألف نسخة  ف المطبعة
من وسط كل البشر تقدر تميزنا 
بالندبة ف قلوبنا 
وفراغ جيوبنا 
وشقوق كعوبنا
ودموعنا اللي حرفت في وشنا الأخاديد

مرضانين بالسعي 
والصبح نطلع من جحورنا نطلب اللقمة 
نرضى بفتات غيرنا 
وغيرنا مبيحلاش ف عينه غير لحمنا الدبلان

حِني علينا يا قسوة الأيام 
وامنحينا دقيقه رحمة 
مستنزفين لحد آخر ملي طاقة
ورغم فقدان الشغف ف كل شئ لسه بنعافر ونسعى

لسه بنبدر ع الطرق أحلامنا
متعشمين تطرح فيوم الفرح
وندوق ف مرة بقلبنا معنى السكينة
احنا الشموع اللي بتسيح من الهزيمة 
مصاحبنا طعم الجوع 
ورجولنا واخدة على طلوع السلالم ورمينا من فوق

إن مرة حسينا الأمان نقلق
وأقل نكسة تردنا مطرح ما كنا 
محبطين
وناقصنا شئ من أي شئ نملكه
الفقد واخد مننا كماله الأشياء 
وسايبنا عايشين ع الأمل 

زهقنا من سوق العمل 
والسُخرة طول اليوم مقابل اللي "ميشبعش نملة" 
مش حلمانين بالراحة 
ولا حلمانين تجيبولنا حته من القمر
احلامنا أحلام البشر 
يوم ما ننطق يتسمع منا الكلام 
يوم ما نبكي نلقى إيد تمسح بُكانا
ولما نوصفكم ديابة...... متصدروش أمر إعتقال



أمر إعتقال شعر"محمد كمال"


ف بداية الصدمة
وقت اما روحي لبست الأحزان
وانسرقت الأحلام الساكنة ف عيوني
لما القدر قصلي الريش اللي باقي ف الجناح
وسابني اعوم وسط التجارب
ف البلاد اللي ليها روحت صفر _ف كل حاجه_
ورجعت سالب
شوفت ان المسؤلية حاجه صعبة
والقرار لازم يكون عاقل رزين 
وان وقت النومة توعى لكل حاجة 
حتى لو جوز العيون مغمضين 
وان هتفوت السنين من غير ماتدري
وان فيها مهما تجري مش هتوصل 
وان دمعك قبل نومك فرض دين 
وان فيها الشغل من غير منتهى
سيب سنينك تتنهب خدلك ليرات 
ابعت حوالة خلي أهلك يفرحوا 
وخلي قلبك
كبش يفديلك حبايبك إن مسهم ضيقة
في بلاد الغربة والشوقة عرفت الحقيقة 
ان وطني مهوش وطن
وإني حلمي ف إيد كفيلي إترهن 
واننا شوية مكن 
متسخرين علشان نسد إيجار سكن
وحق عفش
وقسط قرض
ونيش عروسة
وغيرها ياما م الحاجات اللي فوق رقابينا دايسة 
والأغا
سادد ودانه عن صريخ الشعب كله 
كل يوم يفرض ضرايب
زيادة ف الأسعار
وقصف ف الأعمار
والشباب تتسحل بين البلاد لجل الدولار 
وامتى هيعود النهار بعد اما طال ليلنا؟ 
تذكرة قطر الغلابة صبحت بتدبح
ريحة الظلم الخبيث كل يوم عن يوم بتطفح
معادش فيها حاجه حلوة
كلها صبحت خراب 
قول مغارة للغراب 
والبنكنوت فارض شروطه على الجميع
والديابة بتنهش الغنمة اللي خارجة عن القطيع
فكان لابد نموت ف صمت 
نحزن ف صمت 
تنهش الحيرة نافخونا
توحش اللقمة كفوفنا
وإن نخاف نفرط ف خوفنا 
بس كله بدون نفس
صمتنا دين البقاء 
راية بيضة بس مش لازم نوضح 
والغريبه رغم إنعدام الحليلة نضحك
والسكارى ف الكاسات بيعصرو نن العنين 
ويشربو لجل تاني يحسو نشوة
وانا منفي هناك 
حيران أعود أو لا أعود 
خايف رجوعي يبقا تكسير للوعود
كنت واعد كل أهلي بعيشة تانية
وحب عمري ببيت كبير 
والحيطان بالدهان
وسقف بيتنا يكون مسلح بدل الخشب
والحقيقة جيوبي فاضيه من كل شئ
مستني تحصل معجزة تغير مصيري



الصدمة_محمد كمال_

تمن سنين جوا النفق 
العتمة بلعتنا 
كل الشباب اتحولو فجأة لمسوخ  
نسيو انهم من حقهم يسهرو
يسمعو شوية أغاني ويرقصو ع النيل 
يلعبو بالزهر ع القهوة 
ويبلو ريقهم بكلمتين من جنس ناعم 
الوقت يا مية ندامة عليهم 
تبص ف عيون الولد فيهم تفهم سبب قولي...؟..


Mohamed Kamal

Popular tracks