حبك شبح كلمات والقاء محمد صالح #تيكو
هندسه صوتيه احمد سليمان

حبك شبح.mp3

قصيدة (بتحبني ولا؟؟؟؟ )كلمات وإلقاء محمد صالح #تيكو

كان يوم جديد
م النوم صحيت على رنه من فوني
أتصال
والرنه كانت أغنية (يهمك ف ايه)
فتحت عيني ووضعها كان انكسار
ده اسم صاحبي من زمان رديت عليه
(انا)
كيفيك يا صحبي وحشتني فينك يالاه
انت هنا جوه البلد
ده قلولي مره انك سافرت
جاوبني قال فعلا حصل
الوضع كان سئ كتير
وف يوم وليله قوام غادرت
على فين سافرت؟؟
لإيطاليا يابني واهلها
الفيزا يعني أخدتها؟؟
الضحكه منه سمعتها هههه انا روحت عوم
رديت تدوووووم
بس انت يعني ازاي غامرت
تهريب تسافر تتسرق
روحت ف طريق مليان قلق
أفرض غرقت؟؟
ربك ستر عدى الخطر والبليه لعبت ف الإدين
وارقص يازهر
دلوقت انا قاعد هنا 4شهور وفاضلي شهر
بس المهم ....هو انت فين؟؟
(انا)
انا زي ماانت ماسبتني من كام سنه
عاطل بفخر
جماد وزي ماسبتني ف مكاني صخر
ليا الشرف
بطل قرف
ترجع معايا وقولت إيه ؟؟
وبسرعه انا رديت عليه تمام اساسي
قالي شوفت انا كنت ناسي
انا بتصل و هاقولك ايه
ايه؟؟
بكره الفرح هابقى عريس لازم تكون حاضر يابيه
انا قولت حاضر
كان قلبي يرقص م الفرح وكأنه ابني فرحت بيه
ناجح وشاطر
(يوم الفرح)
كان يوم فرح
وانا روحت بدري عن المعاد
ومكانشي فيه حد اعرفه
واقف هناك
لاقيت في قهوه كويسه
والجو كان ساعة مسا
رايق تمام ..رديت سلام القهوجي
وسألني قال هاتشرب ايه؟؟
ع الريحه قهوه محوجه
ومسكت فوني لعبت فيه
جاني اتصال ظاهر رقم
وأخره كان مهوش غريب
50 تسلم خمستين (أمرا عجيب)
والرنه كانت هي هي (يهمك ف ايه)
صوابعي فجأه اتكلبشت
بالعافيه مني اتحركت فتحت عليه
سامع سكوت سامع قلق
سمعت دقة قلب خاف
سامع تردد ف الكلام
سمعت نبرة صوت حزين
سامع سنين رجعت وراااا
أيوه ألو ..هو أنتي مين؟؟؟
ردت انا... ايوه معاك ايوه هنا وعرفت صوتي؟؟
بقى ده سؤال بقى يتسأل
وازاي راح انسى ف يوم سبب
قتلي وموتي
ايه فكرك بيا وايه قصدك تعودي
قالت وداع من بعدها
سمعت دوشه عندها وزيطه وحاجات
أغاني عليت جنبها ف السماعات
والأتصال بينا أنتهي
وبنص ساعه ف وقتها ساكت ووش القهوه راح
واتجددت جوايا ذكري
وكل جرح من الجراح
وسمعت صوت الطبل قام
ع الزفه قومت جريت قوام
حتى الحساب معرفش كام
تمام تمام ونسيت قوام اللي حصل
صاحبي العريس صاحبي واحشني خلاص وصل
ينزل أمامي وفرحته تسكن عنيه
باين عليه فرحان أوي
كان بينا خطوه وخدتها وجريت عليه
وف بعض نحضن بالأوي
لمعت عنيه جامد أوي
وشد أيدي أعرفك
كلمتها عنك كتير
دلوقتي هي بتعرفك وكأنها عشرة سنين
مدت إيديها وم الخجل
حاطط عنيا ف شئ بعيد
نطقت ولما سمعتها
قالتلي بيك اليوم سعيد شرفتني
نورتني وسعيده لما عرفتني
جبل الجليد فجأه أتقسم فوق كل جسمي بيترسم
رفعت عيني ف وشها بعد اما كانت شايفه أرض
مكياج ملامح غشها
دي هي هي بوشها مش لاقي رد
زلزال ف جوفي يرجني
والانهيار بيهدني
مدفع صور هاجم حدودي يهزني
وعنيها نظره تذلني
مقدرش اصد
الشعر شاب فوق كل راس
موقف وفين منه الخلاص
وهدومي ضاقت ف المقاس منظر يخض
واقف مكاني وكل شئ فجأه أختفى
مبقتش شايف أي شئ
نور الفرح من عيني وافق ينطفى
دخلوا الفرح مبروك عليكوا تفرحوا
وانا والوجع مع بعض دام بنا الوفا
مبروك عليكوا يوم زفاف
وانا هامشي اجر ف خطوتي
م الدنيا تاني رجعت أخاف من يوم جديد
والدمعه زوجه ف عصمتي
السكه كات تمشي وانا
واقف بفوك ف خنقتي
كان يوم جديد
كان يوم فرح..............
#محمد_تيكو

كان يوم فرح  كلمات والقاء محمد صالح #تيكو قصيده

قصيدة لحظة وداع كلمات والقاء محمد صالح #تيكو   هندسه صوتيه احمد سليمان

أغنية كانت هنا تجربه غناء والحان سامح خلف كلمات محمد صالح #تيكو

قصيدة الكراش الطرف التالت كلمات والقاء محمد صالح #تيكو هندسه صوتيه احمد رشدي

قصيدة بخاف اتخيله انت كلمات واداء دنيا

قصيدة هيئة جواب كلمات واداء محمد صالح #تيكو هندسه صوتيه studio cloud احمد يوسف

قصيدة داعش 4x4 كلمات والقاء محمد صالح #تيكو

#انا_وانتي_قدامي
الصيف بيبهت ع الوشوش بالحرق
والشمس تخرج لجل ماتنفذ قراره
الذكرى تطهو ف القلوب بالسلق
وعنيكي سر الوجع من كويتي بناره
المشي ع الكورنيش مع ليل هزيل ضعفان
مع صوت لموج عالي م الشط كان غضبان
مع صوره ممسوحه من لوحه للتايهين
ناس ع الرصيف نايمين
وانا وحدي ف الزحمه...انا وانتي قدامي!!
ماسكين لقانا ف إيد والتانيه أحلامي
بخطف كلام قولتيه وعلينا بتصنت
واشوفنا فين رايحين..
عن عين بتحضن عين
وحياتي ضميني
تفوقي وبتضحكي عنك تذوقيني
مش قابله سرقة شوق وتقومي باصه لفوق
واخطفها بالعافيه ..مع إنه بمزاجك
قال يعني مش بالرضى ف ارجع واجبهالك
ونعيد كتير ف السلف وارجع أرد الدين
العين تدوب ف العين والشوق يغرق بحر
يكفيني هذا السحر من عينك البني
النني يحضني واتوه ساعات وسنين
انا كنت مش حاسس ان احنا متراقبين
وان السبب اني
دلوقت ف الحاضر برجع واعيد ذكرى من ماضي ضاع مني
انا وانتي متفقين بس انتي غيرتي
ليه فجأه قررتي تدي التاريخ عنوان أو فرصه للتدوين
ليه يلقى بينا مكان وطريقه للتكوين ويلاقى عرش وروح
انا وانتي شئ م البوح بإيديكي كممتيه
قلبي اللي جيتي عليه
منساش هواكي الحر
طعم الحياه مش مر
مع إنه مش بيمر على قلبي متحلي
الوعد مستني أخر قرار بينا
قررتي تتخلي عنا لناس غيرنا
وبنيتي هذا الجسر عكس اتجاه سيرنا
ونسيتي ماف الكادر
مشهد بيقلب غدر على شاب شاف الموت
بس التابوب مرديش يقفل على صباعو
العجز بيره غويط مع وسعه مايسعنيش
مع قبر يشبه نيش حضنك فقط ساعو
-ياحبيبي انت بخير ؟؟
*والله شبه تمام طول وقفتك جنبي
-ياحبيبي عندي كلام انا طالبه تعذرني مهو برده مش ذنبي
مش عارفه ايه الجاي او انت امتى تقوم
فيا كلام مكتوم واجع كتير قلبي
*ارجوكي متقوليليش.."
انا برده منفعكيش تستاهلي شئ احسن
واهو برده يستحسن تعيشي ايامك
السكه قدامك تضحك وبتنادي
والله ده العادي مع انه شئ مش سهل
فضلتي رأي الأهل على وعد كان بينا
-ياحبيبي مش ذنبي والله مغصوبه
*اللعبه مش أرواح القصه سبوبه
واهو يعني ذنبك ايه اللي انتي بتحبيه
فيه حاجه معيوبه..
قفلتي ومشيتي؟؟
ووراكي خليتي واحد بيتجسس على نفسه وياكي
على ذكرى كات بينكم يحبي ورا طيفكم
لساه بينبض روح لساه بيملك دم
عايش وقلبه سليم لكن يتيم الام
فاقد لاحضانك لكنه بيراقب وبيقسى ويعاتب طيفك من الذكرى
تلاقيكي مش فاكره ونسيتي قصتكم
الاهل قصت كم من صوره جمعتكم
وقت اندماج الروح
الصوره نازفه جروح بتشوه الماضي
البحر كان فاضي ولوحدي بتمشي ف الزحمه ع الكورنيش
بصتلي ملقتنيش انا وانتي قدامي.... 
#محمد_تيكو

قصيدة انا وانتي قدامي كلمات والقاء محمد صالح #تيكو

بالطو أبيض كلمات والقاء محمد صالح تيكو

قصيدة استني كلمات وإلقاء محمد صالح #تيكو

#المتاهه  محمد الكفافي عمرو شرف ابراهيم جمال محمد صالح تيكو

قصيدة هي والوحده ..كلمات وإلقاء محمد صالح #تيكو

قصيدة حضن بديل محمد صالح #تيكو

#الشبح

أنت مش زيهم.."
ولا فيك شبه منهم
ولا صوت ضميرك
ولا حب غيرك
ولا حتى خيرك جاي ليك من كتفهم
ولا ف الطباع
ولا ف السلام وقت اللقا أو ف الوداع
ولا رد فعلك لما كانوا بيلووا جامد ف الدراع
ولا بعت يوم اللي اشترى ولا اشتريت ود اللي باع
ولا كنت مره بتنتمي لفصيله من نسل الضباع..

أنت خيال حبة هوا ملهوش وجود......
وده رأيهم ..على راسي لازم يحترم
انت الوتر صاحبك رماك
من قبل شدك ف القانون ولا شوفت عود
وده ظنهم.. حلمة ودانهم تتخرم
أنت الهرم..
أنت الصمود و المستحيل
أنت البطل وانت البديل والكل رافض يعترف
ان انت اصلا مختلف
ان انت واعي و محترف ف يحرفوك زي التاريخ
وانا برضه لا أملك دليل غير شعر يشبه للصريخ
كان حبل صوته ضعيف هزيل
رافض تطاطي أو تميل وقت اما كله بينتني وبيتغرف
الكل ساجد للملك وانت اللي رافض تنحني أو تعترف
ظالم لنفسك ليه كده وف القصيده ظلمتني
ملعون أبوك يا دي الشبح من نفسي ليه خوفتني
كرهتني إني أعيش زي البشر لما انكشف هذا العفن
جوه الكفن جسمي اتحشر ميت ورافض يندفن
فقير ورافض يتغني 
للشعر ليه سلمتني ملعون أبوك يا دي الشبح
زي الشبح عيشتني

أمرك عجيب..
إزاي تبوس إيد الهلال وانت بتحضن ف الصليب
إزاي بتحضر كل ليل والشمس ملت م المغيب
إزاي بتحفظك الشوارع
وانت غريب مش من هنا
وازاي هنا ناسي القريب....؟!!!!
عشمان تجيب العقل من مخ البهايم
إزاي توقف ألف حرب كات قايمه من أجل الغنايم
بقى يعني لو جاك الطوفان انت الوحيد الناجي عايم؟!!
الكل لو فاطر نفاق إزاي ف حقك تبقي صايم؟!!!
إزاي بتتنفس كلامهم
بسمتك ردت سلامهم
إزاي بتتحمل آلامهم وقت اما ينوا يفضفضوا
مادد إيديك بالحسنى ليهم وهما وطوا يعضعضوا
يتوضوا مع غيرك نفاق وبسيرتك انت اتمضمضوا
ويغمضوا عينهم عشان مايفتحوش ف عينيك أمل
طب شوفت مره ان الصنم يقدر يشد لجام جمل!!
ولا الحمل يقدر يثور أو يبقى تور!!
جنيه كانت كافره ف الجنه تتحول لحور!!!
الشعر عمره ما يبني بيت لكنه شيد ف القصور"
لو ع الكسور ....مسيرها بكره هاتنجبر
وادي النهايه للقصيده وللخبر
كسر الخواطر برضه صعب
وانا خاطري شعب بيتمحي من ع الوجود وبيندبح
ولهذا هاقبل ابقى طيف وهاكون لطيف لكن شبح......
#محمد_تيكو

قصيدة الشبح كلمات وإلقاء محمد صالح تيكو وغناء سامح خلف

Mohamed Teco

Popular tracks