Name: يك_شيش by Mohamed Zayed_الحُصري
Duration: 7 min 6 s
Description: كنتي أسهل بڤه تقتل "يك شيش"

حتي العذاب يتحب ❤️❤️

يا سلام يا سلام ♥️♥️♥️♥️♥️

كل اللي قالو هنفضل هنفضل  وفي النهاية محدش رفيق

مزيج هادئ

عمري ما أنسى - أحمد عبدالمولى - 74

نص فرنك || فرج البنا

كنتي أسهل بڤه تقتل "يك شيش"

يك_شيش

عملت للتراك ابلود بعد ما اتمسح من ع الساوند كلاود عشان المفروض التراك ده مايتنهيش.

زينب - أحمد الطحان

هندسة صوتية : مصطفى الملواني
كلمات : محمد عصاام
لينك الأكونت : https://www.facebook.com/M7mdess16
الكلمات :

يارب انا ماكُنتِش كدة
رجلي الشمال تِقلِت - أوي -
وبقيت بَزُك من التَعَوُد .. مش عَرَج
وبقيت بكشَّر من مفيش وقت الهَرَج
معرفش انا اللي بقيت رِخِم
ولا التعب هو المُسَيطر ع المَزاج
على كل حال
" الصبر مفتاح .. " - لأ بلاش
الجُملَة دي مبحبهاش
بتزيدني صبر!
وفـ قلبي نَغزَة باحِسَّها تأنيب ضمير
او دعوَة على شخصي الضعيف
من شخص ما
وفي راسي زلزال لما بيقوم بَرتِجِف
وبخاف انام
أصحى على القبر وحساب
وذنوبي كسبانة ومفيش حل وهروب 
لأ معتقِدش ..
فيه أكيد إتاحِة فُرصَة أتعادِل واتوب!.
وبقيت كئيب ..
بسكُت من اليوم مُعظَمُه
واضحَك اذا صادِف وملِّيت م السكوت
طول عمري فقري
زيي زي لمبَة في فرع زينِة عيد
.. جديد
مبتشتغلش
وتاريخ لـ شخص عظيم مُؤَثِّر
متنقلش
كلمِة " بحبِّك " من طرف واحِد
مقالش
أول مُرتَّب .. شَهر شُغل ومرمطة
فيه احتمال انُّه اتنَشَل
بزعل عليه
يارب انا ماكُنتِش كدة
من بعد ما اتعوِّدت ع الوضع الجديد
مابَقِتش فاكر كنت إيه!

يارب انا ماكنتش كدة - محمد عصام

زي البيوت في الصِيف
ما عادش لقلبي حُرمة ..
وبقيت مَشاع ..
أتشاف بنور العين
ونور الصحبة
وخطوة العابر !
تفضحني نسمة شوق
تطير منها الستاير ..
وان غابت النسمة اللي بتبرد غيابهم
أغرق في عرق الغيبة .. تخاصمني السَّراير !
يشويني ليلي ع الملاية من القلق
والشوق ينغص عيشتي لو جفني اتقفَل
ما بقتش بسأل نفسي ( كيف بدأ الخلق ؟!)
دلوقتي بسأل نفسي امتى هينتهي ؟!
عقلي لما بيترمي في حجر المخدة بيتحرق
ما بقاش بيسأل ع الوجود .. أو ع العدم
بقى يبكي زي عيال حارتنا يوم شِتا
والأرض عكّاها المطر .. وما فيش نزول
وكأني ضايع وسط كوم إجابات !
قشّة في كومة إِبَر !
وما فيش سؤال لايق لأي إجابة ..
أنا كل حاجة عارفها حصلت امتى وازاي وبذنب مين !
لكن ما فيش صيغة سؤال ..
تقدر تقولك قلبي بيفكّر في إيه ؟
في نحس أكتر من كدا ؟!
أكتب قصيدة عشان ابوح ما القاش حروف ترضي اللي نفسي استنطقه !
جوايا ناس كلبشتهم لما اتقابلنا
عشمني فيهم ضيّهم وحلفت اصونهم
واكمني طيب عمري ما اديتهم خوانة
اديتهم المفاتيح ..
دلوقتي هم مكلبشين جوايا مش متكلبشين !
ورجعت بسأل نفسي ..
مين اللي محبوس جوا مين ؟!
طول عمري
باهراني اللمض .. الضوء خطفني
وكل نور بيشدني !
ما اعرفش أكتم قلبي بين اربع حيطان..
بالوقت
أدركت ان انا
رايح لموتي بقوة الدبان
وفضولي ألمس لمبة الصاعق !
..
على كل حال
القلب مفروط ع البلاط
والضهر مفرود للسما
وان كان دا قلبي ..
بس عمري ما اوطي اجيبه
زي كل اللي اتفرط على سكتي
دلوقتي
مش عارف انام !
والقلب بايت زي نص رغيف قديم ..
ما استطعموش غير اللي مالقاش اللي صَابح
وبقيت كبير
وشي مكرمش
قلبي ضافر بنت بيخربش في صدري !
كل اللي بينبهني على فرصة فاتتني
ما بقتش باعرف اقوله : "لسه بدري "
قلبي نغزني ..
قُلت ايه ؟!
عجّزت
جسمي اترعش
على وحدتي اتعكزت !
شَعري وِقع
وبقيت ببان أكبر ما انا
بتجيني فكرة موتي تعمل هرجلة
جوايا خوف محبوس ومتعلم شراسه
لو يوم طلقته
مش هيهجم غير عَليَّا !
مش عارف أبكِي
مش عندي وقت أضيعه
علشان أنزل مايه زايدة فـ نن عيني
سيبهم ووقت ما يقفوا على باب المهابة
هيكسروه
وهتبكي قدام البشر
زي العِيال !

-عبدالرحمن الدمياطي -

زى العيال - عبدالرحمن الدمياطي

ربنا اللي في كايرو .. رب كريم ..
موسى علّا عمايرُه .. جعلُه كليم ..

موسى غير موسى اللي في الأقاليم ..

موسى في الأقاليم مالوهش عصايا ..
كفُّه أخشن من كِلِيمة وِصاية ..
قلبه أبيض من بياض خَسّاية ..
..

كِلمتُه القسّاية .. مابتمشيش ..
قَسوتُه النسّاية .. مابتأذيش ..

زي صورة العيلة جوّة الجيش ..
صورة ماتدفيش
ومابتحضُنش ..

موسى .. كمّل موسى .. ماتفرعَنش ..
مات مِفَلس .. مش لأنه ماعانش ..

عان كتير والله .. جوّه الروس ..
عان كلام بيضاهي أي فلوس ..

مات وساب من بعده ( سِت ) وَصَايا :--
...

الوصية الأولى كانت :- بوس !

بوس إيديك م الوش قبل الضّهر ..
وش إيدك أشقى من ضَهرها ..

بوس دماغ الفكرة فجر وضُهر ..
دوس على التماثيل بفيل أبرهة ..

بوس شفايف مصر طول الدهر ..
حضن مصر الأبقى .. مش قبرها ..

مَهرها ؟
عُمرك .. ماتبخلبوش ..
مُهرها ؟
جامح .. ماتركبهوش ..

روّض امبارح .. وماتراودوش ..
إلا لو راودك عن الدنيا ..
..

في الوصية التانية قال :- ثانية ..

في انتصارك .. ثانيتَك بـ (سنين)...
في الهزيمة .. الثانية بـ (الفيمتو) ..
ثانية وانتو بتجروا في الميادين
لا تساوي الثانية لو نمتوا ..

كل فكرة وليها أب حكيم ..
أقتلوه .. ثم أوئدوا بنتُه ..
..

في الوصية التالتة قال : خَلطة ..

خلَطة
م اللي مابيطيقوش شَلتة ..
واللي غلطوا وكرّروا الغلطة ..
واللي لسه بيدّنوا ف مالطا ..

أمسكولهم ألف مِيت بَلَطة ..
واطردوهم طرد م القلعة ..
دول جياع مالهومش في الشبعة ..
..

في الوصية الرابعة قال : سَبعة ..

سَبعة مابيِهدُوش .. و بيْهِدُّوا ..

الفضول / والجرأة / والجدعنة
والطموح / والحِلم / والعَنعَنة
والنصيحة الجاية من جِدّو ..
..

في الوصية الخامسة قال : هنسَى ..

هنسى دايما في الوصية حاجات ..
الكمال في الشيء ماهوش ميزة ..
فيه في حياتكم أهرامات / علامات ..
مش ضروري نشوفها في الجيزة ..

زي عمّك موسى في الأقاليم ..
قد يكون فعلا ماكانش كليم ..
بس كان إنسان فترة وجيزة ..

لما أموت أوعاكم تبكوني
واختمولي الباسبور والفيزا ..

وأذكروني في أتعس الأوقات ..
وف قعادكم وانتو بتتسايروا ..
..

والوصية السادسة قالها ومات :-

إحذروا من موسى اللي في كايرو ..
..
..
#بشيكل_فول_وبنص_طعمية

موسى اللي ف كايرو - حسام ابراهيم

نور انطفى

عشوائي (١) - محمد عصام - أحمد سعيد بكير

حلو
والحلوين بيتباعوا
الزمن
طبّقني بدراعه
كنت زاهد فيه
وفي قناعه
كنت كاره
كل أتباعه
حلو 
والحلوين بيتقِسموا
كان بيكره 
كل يوم إسمه
يحمل الأطفال
ف يبتسموا
لا يرى العالم
سوى جسمه
حلو
والحلوين بيتفصموا
نص يجري في الحياة 
هارب
نص يجري ورا النجوم
شارب
نص نايم وحدة في القارب
سايب المسافات
بتتحارب
مل كونه
فأر لتجارِب
النتيجة الدايمة
بالسالب
حطوا قلبه جوا كام قالب
قولبوا الإنسان ولا حسّوا
لا يهم صَفاه ولا حسُّه
لايهم الهم والدوخه
إسطوانه 
زايفة مشروخة
إسطوانه
اتكسّرت منّي
قولت مرة للسما
حنّي
قولت مرّة للعيون
إنّي
قولتلك بتهدّ إكمنّي
أنا الأصدق
حلو
والحلوين دعاة مبدأ
لا يجوز أشعر فلا أبدأ
عودتني الأغنيات أسرق
أي لحن يشوفني فيزقني
كان غيابك
وحش بيشقني
كنتي فرشة 
ف أرض من غير لون
كنت جرم 
ف ضلمة من غير كون
كنت موجود بس دلوقتي
لا أجد نفسي ولا وقتي
لا أجد قلمي
ولا ورقتي
لا أجد من ينتشل حزني
لا أجد من يكتشف حسني
حلو لكن
قلبي بيدوسني
كان معايا طريق
بيحرسني
كان معايا صديق
بيقرصني
فاعرف اني غلطت في كلامي
كان معايا
حلم في منامي
كان معايا
ذكرى في سلامي
كان معايا معاني لكلامي
كان معايا كتير
لكن تاهوا
افترسني الخوف وأشباهه
افترسني الليل وأشباحه
كان معايا حروف
لكن راحوا
حلو والحلوين بيتزاحوا
حلو 
والحلوين 
كما المساكين
ميشوفوش الشر في السكاكين
يشتروا الأحلام من الدكاكين
رغم رفض الدولة تعريفها 
رغم إصرارها لتحريفها
رغم حرق الشجرة في خريفها
سقتنا الدولة تخاريفها
عارفها
أو بتجهلها
ملكش الحق تسألها
ولكن مهما كان كونك
ودينك
سكتك
لونك
متسألش سوى عيونك
تراب الأرض مش منصف
ووطنك كله شئ مؤسف
ميشبهلكش في جنونك
وتتمسك به
فيخونك.

عصام شوقي - مَعانِي

#الحُصري
https://www.facebook.com/profile.php?id=100006750258523

يك_شيش

Mohamed Zayed_الحُصري

Recent comments

shimaa

Sara Gomaa

Asmaa Ibrahim

وكن يا الله انت الرفيق والأمان لقلبي دائما 💕💞

Related tracks