زعلانه منك اوى زعلانه زعل كبير اكبر من ان اعصابى تتحمله ولا جسمى بقا متحمل كل الالم دا حاسه ان عضمى مليان زعل مخلينى مش قادره اتحرك خالص معرفش ازاى بحبك كدا معرفش حطيت نفسى مكانك كتير بس اقسم بالله عمرى ما كنت هعمل زيك حتى لو كنت متخطية الموضوع عمرى ما أعمل كدا لو  عارفه أن  قلبك فيه حاجة  ليا  مبعرفش اجرحك ولا اجرح حد حقيقى قلبى بيوجعنى جدا مش عارفه اعمل ايه والله اروح فين من إحساسى دا معرفش ليه مفكرتش فى إحساسى وريأكشنى ليه؟ ليه إحساسى اخر حاجة فكرت فيها أو ممكن تكون مفكرتش اصلا روحت جبت الدبلة والمحبس وفرحت بسرعه عارف مفيش حاجة فى الدنيا بتتعبنى قد لما افتكرك فجأة كدا واكون بسمع اغنية جميلة وأقوم عامله كوبى جرى لللينك عشان اسمعهالك بس فجأة افتكر انك مش هنا اوقات كتير بكون راجعه من بره مبسوطة من خروجة أو مشوار وبجرى افتح الفون عشان احكيلك وفجأة بفتكر انك مبقتش موجود بحس أنه خلاص قلبى هيقف وأما بشوف اى بوستر فيلم جديد ببقى متحمسه بغباء وابقى هكلمك اقولك لازم نشوف الفيلم دا بس بفتكر انك مش هنا اقسم بالله لما المواقف دى بتعدى عليا فاليوم وغيرها كتير بتمنى وقتها انى اكون ميته عشان محسش..

مضايقة منك اوى مضايقة وغضبانه منك كل مرة دماغى بتجيبلى فكرة السعك بيها وانكد عليك حياتك صوت عالى جوايا يقولى يا منة انتى مش كدا ولا قلبك كدا يا منة انتى قلبك طيب وجميل متوسخيهوش سبيه واسكتى وربنا يعوضك فالجاى عارف انت طول الوقت كنت بتتريق عليا انى بوق ومعرفش اعمل حاجة بس مش دى الحقيقه انا عمرى ما كنت عاجزة انتقم من حد أذى قلبى بس دى مش انا والله انا بختار اسكت واسامح مش عن ضعف عارف برده اقبل ما هبقى هتغابى دايما جوايا صوت يقولى هو انت عوزاه يحس بحاجات وحشة؟ عوزاه ميعرفش يركز فى شغله ويومه يبوظ ؟ هيرضيكى يعنى لو هو قلبه وجعه بسببك؟ لسه مبستحملش عليك الهوا وللاسف لسه بغير كل لما بتخيل انك ممكن تكون بس بتكلم خطيبتك مش هقولك بتخرجوا مثلا بحس انى عاوزه اعمل فنفسى حاجة وبقعد زى الهبلة الهى نفسى فى اى حاجة مش عارفه اعمل ايه فاستيعابى البطئ انا اتخيلت سيناريوهات كتير وحشة بس مش لدرجة السيناريو دا بس برده مش عارفه ليه لما فكرت اجرحك مهونتش عليا بس انا هونت عليك وبعتنى بارخص سعر ..

انا معرفش انا كنت بالنسبالك ايه بس غالبا انا كنت فترة لذيذة مش اكتر و حاجة تهدى اعصابك بيها بعد علاقة ارتباط وحب وخطوبة فشلت وفرصة اعداد و تهيئة لخطوبة وجوازة جديدة معرفش انا كنت ايه وحقيقى مش قادره أواجه كل دا هو انا للدرجادى كنت ولا حاجة على فكرة معنديش مشكلة أن حد يشوفنى بطريقة سيئة أو اى صورة اى كان ايه هى بس ليه يعنى حسستنى انك شايفنى حاجة حلوة وجميلة وفجأة صدمتنى كدا اعتقد معدتش هعرف اتصدم فى حد لأنى قررت معدتش هتحمس تانى لحاجة والله تعبت من التفكير مش عارفه ليه عملت من كدا ليه قفلتها فوشى للدرجادى مفيش حد حبك فى الدنيا دى قدى والله كنت شايف فيه ايه فى خطيبتك ممكن يكون أفضل منى انا مكنتش ملاك وعارفه أنى مستفزة وكيادة بس كان عندى حب كبير ليك كان كفيل يشيل كل صفاتى دى ويغيرنى واحدة واحدة بس انت مصبرتش ..

انا احترت اقسم بالله فيك واحتار امرى اعمل فيك ايه دماغى هتموتنى من التفكير  انت تعمل كدا فيا ليه بجد انا وريتك احلى حاجة فيا اومال لو كنت وريتك النجوم فى العز الضهر كنت عملت فيا ايه عاوزه اعرف بجد ايه إلى عملته فيك يخليك تلعبلى فى اعدادات دماغى حاسه انى هتنقط خلاص انا كان لازم اعرف انى وانا فرحانه كل دا هيطلع على جتتى والله عاوزه حد يجى يضربنى على وشى والله اكتر غلط فى حياتى بس حقيقى حبيتك ولو اتعاد بيا الزمن للاسف هختاره برده ..

بيبقى احساس وحش اوى لما أمل الانسان يخونه يا فؤاد ..

مش عاوزه أعيد إلى بينا مع حد تانى انا بحبك انت واخترتك انت وعاوزه اختارك  تانى وتالت ورابع وسابع وعاشر بس مدتنيش فرصتى أختار زى كل مرة غصبتنى بس المرادى مش عارفه اتصرف ومتلجمة واحشنى وعاوزه اطمن عليك بس مبقتش عاوزه اعرف حاجة عنك حقيقى اكتر من أنك كويس عشان عارفه لو عرفت عنك حاجة ودورت وراك هشوف إلى يضايقنى وصحتى مش هتستحمل دا لسه جوايا امل ومعرفش جيباه منين كنت عندى استعداد احاول بس انت مستنتش زعلانه منك اوى والله  عارف اوقات كتير بفكر  انى نسيت خلاص بس بكتشف انى بسكن الالم عشان مفضلش أتوجع بس بتأكد انى بكدب على نفسى لما اى رقم غريب بيرن حرفيا بيجيلى حالة هلع رهيبة وبكون متوقعه أننا هنتكلم نتعاتب بس هنتعاتب على ايه بجد؟ العتاب ميريحش حاجة من النار الى فيا دى طول الوقت حاسه انك جمبى مهما بعدنا حاسه انى لسه هشوفك احنا لسه فيه بينا حاجات هتتعمل بس يمكن هتتعمل فى وقت تانى مش عارفه اعمل ايه مبعرفش اتخلى عن حد حبيته لللاسف انا عاوزه اعرف انت سايبنى لوحدى ليه كدا انت مش عارف انت ايه بالنسبالى ولا ايه الدنيا وحشة وقاسية اوى وانت مش هنا والله ياريتك معايا..

Comments

Mena Elnaghy"

Mena Elnaghy"

Mena Elnaghy"

Mena Elnaghy"

Mena Elnaghy"

Mena Elnaghy"