follow Mohamed abdelfatah on Facebook :
 https://m.facebook.com/mohmad.abdelfatah.35?ref=bookmarks
---------------------------------------------------------
اول مكان القلب يرتحاله
الساعه واحدة بعد نص الليل
سهران بيكتب للحنين جوابات
ساب القلم و اتكتم و اخرّس
كل الشوارع لفه روحه في جبس
حس الشجر ببرود يديه لكن
ريحة الاماكن عايشه جوه النص
خرج من روحه في الشارع بدأ الحوار
اتنين في واحد يبقي كله تمام
كيفك يا صاحبي قولي عامل ايه
وازاي بتكتم صمت جوه كلام
و ازاي تنام في البرد مش لابس
ازاي ايديك تلجت و مازلت مش حاسس
افتحلي قلبك قولي ما تشاء
و مقالش غير "ادمنت يا صاحبي الفراق"
و بكيت في حضن القطن مقدرتش
احبس دموعي فيا طول الوقت
الورد خاني يا صديق الورد
بالوقت ايقنت الوجع مش سهل
و الحل ممكن يبقي اتفه شئ
غافلينه عمدا او بقصد الجهل
تعبان يا صاحبي بس ليه تعبان
غرقان في سد العشمانين غرقان
و ازاي يا صاحبي العشم
هيعدي بيا السد
انا مش حراجي القط
اكتبلها الجوابات
و استني يجي الرد
وضع العلاقه وضيع
كات فاكرة اني هبيع
كل اللي فات مني
علشان اراضيها
معزوره ممش فاهمه 
ان اللي فات مني 
و الله ميسواش
غير دمعتين منها
غير ضحكتين مني 
و الضحك مش ببلاش
" سطر الغياب في النص ممكن يطول عادي "
بكفايه بُعد الكفه مش ناقصه
كل الحكاية تنتهي برقصه
و بيت و اهل و شِعر خام
و خيال رخام يستحمل التكرار
و يشد اوتار السعادة باختصار
الحب مش محتاج يا عالم غير قرار
و احنا فيها و لا اقولك" انهي الحوار "
صدت في روحه روحه من تاني
اتمشي وحده بدون نقاش مع حد
لسه الاماكن ساكنه جوه النص
هذا المكان مثلا
يمكن يكون فاكره
الكرسي ده عـ النيل
شاهد علي التفاصيل
و البياعين عارفين
الشاي و حمص شام
و بتاع الدرة عارف
اتنين درة مشوي
بتنين جنيه وقتها
حتي الدرة حبها
و تقولي انسي و اعيش
ربك لبالمرصاد
و الصبر منغير صاد
البر وحده كفيل
ننهي العلاقه بدون
حاجه لبكا ومناديل
المجروحين فاهمين
ان العياط مش شفا
سابِك و قال بالشفا
سابت و قالت طُز
المجروحين كالرز
و انا كنت حبايه
من فدانين مجاريح
مستغرب اني صريح
انا برضو لسه هقول
عن بنت "بنت اصول"
انا اللي كان واطي
ازاي تقولي هسيب
و مقولش غير عادي
و ازاي تسيب واسكت
مكتبش حتي حنين 
مش عايزه حتي اسرد
قصتنا عـ الدواوين
الصمت كله انين
عارفين يا مستمعين
الشعر ده مخلوق
زي البشر من طين
بيحس بالتفاصيل
عيل في روحه جميل
و في وحدته كاتب
مكتوب عليه يدفع
لو غيره هيحاسب
و انا زي زي كتير
بالليل بنام في سرير
و بدفي روحي بشعر
عايش كاني كتاب
ملهوش غلاف خالص
عايش علي الذكري
رغم الامل ناقص
حلفتها بحبي
تديني رد اخير
بعتتلي ورق ابيض
كتر يا حلوة الخير
انا الغريب معلش
البنت لما تقش
يقف الولد ساكت
و انا خلاص هسكت
بطلت اغني حتي للطرقات 
بطلت اكتب للحنين جوابات .

سهران بيكتب للحنين جوابات | محمد عبد الفتاح

شارع الذكري | محمد عبدالفتاح

يجوز نرجع تاني | محمد عبدالفتاح

كليوباترا | محمد عبدالفتاح

اليوم بدأ
والناس بتصحي تروح لأشغالها
و أنا روحي لسه بتسعي بالفطرة مبسوط بترحالها
بتنفس الأشياء مش أكسجين خالص
بتنفسك / صورك / او كل شئ ايدك
خبطت بخفه عليه
بتنفسك و اشتاق
مريض بنفس الداء
دايما بميل للوحدة مش قاصد
و في وسط أصحابي العيل الفاسد
اللي اترمي في القهر من صغره
متكتريش وجعي و تقولي مكتوبله
عارفه الزمان قاسي
بيعلم الانسان
طب ليه مبتعلمش
كل اما كنت العب في الحارة بالاحجار
و ارميها عني بعيد
دايما بروح و اتعب علشان الاقيها
دلوقتي لما كبرت
بقيت بعيط ليه علي حاجة برميها
صاحبي اللي ياما سألني عن قرارات
دايما باخدها في عز من انا خايف
قالي النهاردة عن الفراق حكمه
"قالي النصيب أعمي انت اللـ مش شايف "
انت الغريب فينا
مش كنت قولت زمان
ان البكا للناس والحزن مش لينا
دلوقتي كل الناس شايفه الوجع فينا
الوقت سكينه و مكتفه دراعي
كل الوجع في الناس
من بعض اوجاعي
كان نفسي افضفضلك
و احكيلك المعاناه
من وجعي بكتبلك
كل اللـ بتمناه
ياللي انتي ساكنة العين
و مجمله جفوني
حطيت عياط قلبي
رنات لتليفوني
كل اما حد يرن
بيزيد في قلبي الشوق
صوتي اللي زي الجرس
بقي زي شريط خلصان
و بقيت بحن عشان
مقدرش اعيش دونك
ليه الدموع المربكة
بتحلو في عيونك 
ازاي فارقتي بدون
تنهيدة في وداعنا
و اصحابك الاندال
بيغنوا لـ وجعنا
قربتي ليه من ناس
حالفين ما يجمعنا 
لو حتي حضن مجاز

البيت حيطانه ازاز
متحدفوش الظلط 
صدقنا ليه الغلط
كدبنا ليه الصح
متكدبيش علشان 
انا و انتي مش عايشين
بنموت بنفس الجرح 
مبلومش غير نفسي
ازاي اخون واببرر الاخطاء
و ازاي رميتي في حضني برفانك
انا جوه مني حاجات حبيت اقولهالك
بس انتي مش فاضيه
خدتي اللي فاضل بينا و مشيتي
خدتي الحاجات الحلوة من بيتي
كان نفسي بس احضنك
و اقسم معاكي الهوا
اقصد نفس خدتيه
بعد الفراق سيبتيه
و انا خدته في الرئتين
لكن بفعل الوقت
والحرق في الاعصاب
مبقاش نفس في الرئه
بقي دمع نوعه تقيل
ينفعني وقت البكا
مبلومش غير نفسي
كل اما تيجي
فـ لحظة علي بالي
بستني يوم ينتهي
وأبدأ في ترحالي
وأتنفسك وأشتاق
مزيكا اه مـ الفراق
هي اللي باقيالي
كان نفسي تبقي
زي ما اتمنيت
"ام لعيالي"
كام نفسي لكن منطقي
مش اي شئ نتمني انه يكون
يكون
ولا اي طير اتكسر
يقدر يعيش مسجون
انا زي هذا الطير
مكسور و مستني
تليفوني لما يرن
مكتوب عليه اسمك
يمكن ساعتها افوق
دلوقتي رايح انام
بتمني من ربنا
نتلاقي من تاني
لو حتي ف الاحلام ..

مبلومش غير نفسي | محمد عبدالفتاح

المرتد | محمد عبدالفتاح

تابعوني علي الفيسبوك :)

Mohamed abdlfatah

Mohamed Abdelftah l أقابلكوا لما أموت

follow on facebook

https://www.facebook.com/mohmad.abdelfatah.35

Mohamed Abdelftah l بوادر اكتئاب

انا مش حزين | محمد عبدالفتاح

#follow Mohamed Abdelfatah on Facebook :
 https://m.facebook.com/mohmad.abdelfatah.35?ref=bookmarks


Mohamed Abdelfatah | إنساها و عيش

follow Mohamed abdelfatah on Facebook : 
 https://m.facebook.com/mohmad.abdelfatah.35?ref=bookmarks


محمد عبد الفتاح | السنين السلف - Mohamed abdelfatah | elsenin elsalaf

تابعوني علي فيس بوك : https://www.facebook.com/mohmad.abdelfatah.35?ref=bookmarks

ودعيني
طلاما قررتي .. ان اللي ما بينا
يتحول فجأة ل سكر داب في الشاي و خلاص
و أتحول من شخص في عينك كان كل ما تتمنيه للا شيء
و يصير الحب اللي مابينا دموع علي عيني
و " بحبك " تتقال في خيالي بدال " سامحيني "
بتقولي عليا ان انا خاين و ان انا كداب
و كلام و عتاب و حسابي قديم بتحاسبيني
طب أرد ب إيه ..
- ربنا يهديكي و يهديني 

بعدين وياكي 
بتحبي تملك ايها شئ
و انا كنت إيجار مش ملاكي
و كل يومين
تدفعي وصولات
علي فكرة متاجرة كل الناس
مش كلها هات
في حاجات تتباع منغير حسابات
زي الانسان اللي بيعشق و لكنه أتساب
زي ملك الموت اللي بياخد ..  بيروح ميجيش
و انتي مكنتيش زي ملك الموت
و لكني هموت لو روحتي بعيد 
و انا عايز أعيش

لو طلعت روح للي خالقها
انتي المسئولة أمام الله انا مش مسئول
يا حببتي السجن مش الدنيا
في سجين بيقضي سنين محبوس
و يموت مذلول
في طريق نمشيه و بإدراكنا
عارفين ان نهايته فراقنا
انما بنكمل و نكابر
كان صعب يكون حبك عابر
صعب المظلوم يصبح ظالم
و الظالم يتبدل قاتل
انا عمري ما كان طبعي الخذلان
لكن وياكي انا متاكد
ان انا فاشل

سيبتك تتمادي في اخطائك
و باقول دي مسيرها هتتغير 
تغلطي قدامي و أعديها
و الفجوة تزيد تغلطي أكتر
و فضلت انا ساكت مستني
عشم الشيطان ف دخول جنه
يا خسارة مشينا طريق لكن
في الاخر واقفين في مكانا
نندم علي ايه و نفكر ليه
م الاول احنا اللي أختارنا

انا مش طالب غير توديعك
و وداعي يليق بمقام حبي
قدمت مشاعري و اخلاصي
و غلطة وحيدة كانت ذنبي
 مش وقت كلام فـ حاجات فاتت
 في حاجات بتعيش علشان ماتت
 و حاجات بتموت تفضل ذكري
 زي اما كتبت في عشقك يوم
 - انا لسه بحبك علي فكره - 

انما طبعك
مشكلتك ان انتي عنيده
بتحبي العزلة و ترتاحي
لما ابعد و تعيشي وحيدة
بتحبي تشوفي دموع عيني
و تحبي الضعف اللي يصيبني
انا عمري ما كنت اتخيل يوم
ان امسك كده حد سايبني
احساس انك لسه معايا
ماسكه في ايدي 
ولسه في حضني 
اهو ده اللي بجد اللي تاعبني

احساسي معاكي ملوش اوصاف
زي اما يشوف انسان جنه و يدخل فيها
يقطف تفاح و لا يتعاقب
ولا ينزل أرض
ولا يعافر
زي اللي مسافر في سفينه
و ساب شنطة سفره علي المينا
لو كمل سفره ما راح يرتاح
ولا عارف كيف و ازاي هيعود
انا و انتي مكناش يوم اتنين
لأ واحد ولا كان بينا حدود . 

ف الاحسن لما هنتفارق
نبعد في سلام
و تقولي سلام يا حبيب عيني
و تدعيلي ان اتخطي الازمه
ولا نرغي في اي كلام وخلاص ملهوش لازمه
نحترم الذكري اللي ما بينا
نحترم البعد
مش نقسي و نجرح تاني في بعض
و في كل هزيمه نقول شكرا
للدرس اللي يعلم فينا
الدنيا ساعات مبتفهمناش
و مفيش في الدنيا دروس ببلاش
واللي بيتعذب في الدنيا
اللي مينساش 

وانا مش هنساكي لكن هبعد
و استني وداع منك ليا
انا راضي بـ اي قليل فعلا
لو حالة بكلمات أغنيه
او حتي رساله بدون اسمي 
او تعتذريلي بصوت هادي
و ساعتها يكون ده وداع رسمي
هتقبل و هداري الدمعه
و هبان مبسوط قدام الناس
مش هشرب تاني بنفس الكاس
 ( احنا )  بقينا ( انا ) و ( انتي ) خلاص
 و في كل سلام جاي هيبقي
 في ما بينا حدود
 العاشق بقي زاهد حبك
 بكفاية وعود
 انا عارف قيمتي خلاص عندك
 حطيت عنوان تلك القصه
مش هقبل اكون اللي ف نظرك
كلب برخصه  
انا عارف قميتي و مستغرب
انك عارفاني و بتكابري
و لو بطلت في يوم حبك
ف هاكون ميت مرمي في قبري
اوقات بسالني و بستعجب
حبيتك ليه و انتي غريبه
ف يرد القلب بكل هدوء
الحب ملوش أسباب واضحه
الحب عيون تفضل فاضحه
و انا عيني تملي بتفضحني
دلوقتي وانا بقولك تمشي
بحبك اكتر م الاول
بس الموضوع ده خلاص طول
من حقك انك تنسيني
و حقي برضو تودعيني . 

  
#m7md_3ftah

محمد عبد الفتاح -ودعيني | Mohamed Abdelfatah - wad3eni

مبقتش فاكر دي الفراشه الكام
اللي بإيديا بدوس عليها بغشم
طايرين في عينهم حبهم
غارقين في بحر العشم

وانا
مش زهرة الأوركيد
ولا لوني أخضر زي ما شايفين
أنا كالموبيد
بقتل الفراشات و بدمر البساتين

اول سكير منغير ما يشرب خمر
اول سجين منغير كلبش حديد
انا كل لمسة إيد علي خصر مبحبوش
كل شعلة حطب في الغيط
تلك البارود الذي بيدمر الفراشات
بطريقة مصطنعه
بطريقه محفوظه
- عايزك لزوم عوزه
او فسحه جوه كافيه
- ضميني أرجوكي - 
محتاج لحضن يضم
كداب أوي و صدقت
صاحبي اما قالي زمان
الحضن لو يلزم
كان اولي حضن الام 

عربيد في كازينو و البنات خمره
مش فارقه لونك بيضه او سمره
صبي الكاسات منغير ما تغريني
بشفايفك اللولي و بلوزتك الحمره

مبقتش عارف دي الفراشه الكام 
بقيتوا ليه في نظري بتشبهوا الايام
و كل يوم في جديد
بنت بعيون يناير
بنت بضفاير ديسمبر
بنت ضحكتها اكتوبر 
بنت بشرتها نوفمبر 
كلكم أيام في نظري
كلكم أيام
لكن في بنت في وسطكم
جوايا بيكم كلكم ⁦
احتارت ياما في وصفها
و عجزت الاقلام

 مش فراشه قد ما هي
 قصيدة لسه بوزنها
 معزوفة أغنيه
 متاهتش ف الخضره
 ولا أرض دوست عليها في المطرة
 ولا حتي كاس خمره
 مش بيضه ولا سمره
 صدقني معرفهاش
تسالني نفسك ايه
بتمني مخسرهاش
في حاجات عشان مش ملكنا
بتروح .. قوام ترجعانا
و الجرح متغطاش

و كأنها
واخدة م الفراشات جناح
واخده م العصفورة قلب
تقدر تعلم فنانات الكون
طرق كتير للحب
و برغم كونها جميله من بره
لا بد أذكر قدر الجمال ف القلب 

قلبها
ماية النيل الجميله ف الشتا
هدوء غابات الاستواء ف الصيف
قلب لو كان حي يبقي 
أنغام في أغنية يا طيب
دقاته مزيكا عتيئه
أم كلثوم ف انت عمري 
وانا مستعد أموت سكير
لو هي خمري . 

هي لما باكون واحشها
تتقلب نوتة بيانوا
صعب جدا تلقي بيت
مستعد تموت عشانه
احلي بنت في عيني هي
بنت و بدرجة حورية
الوحيدة اللي في عنيا
ام لعيالي اللي جايه
كنت دايما اشوف معاها
عمر جاي و سنين كتير 
بيت محندق قد حالنا
و عيلين طالعين شقاي
لما أم تكون كمانجه
يبقوا هما طبيعي ناي


النداء ده للفراش
اللي طاير من قصادي 
و اللي انا دوسته بغبائي
أنتوا مش حابين وجودي
انتوا حابين احتوائي
حضني كان زي الجنينه 
بكفاية ليكم برتعه
ليه مبتحسوش ب حضني 
غير في وقت المنفعه
م الليله دي
كل حي يروح لحاله
كل متعشم في حبي
يشيل أماله
انا مش قصيدة
وانتوا حابين تسمعوني
مش جنينه
وانتوا حابين تسكنوني
مش هاقول غير كلمه واحده
بحب واااحدة
بس هي غريبه جدا
 كات في حضني من يومين 
معرفش راحت مني فين . 











قصة الفراشات - محمد عبدالفتاح |Mohamd abdelfatah - kest elfrashat

لينك الفيسبوك
https://www.facebook.com/mohmad.abdelfatah.35

لينك اليوتيوب 
https://youtube.com/c/Mohamedabdelfatahofficial


لينك البيدج 
https://www.facebook.com/Mohmadabdelftahfans/


لينك التيك توك
https://vm.tiktok.com/ZSTDvLoo/


لينك انستجرام
mohamd_abdelfatah_official




من غير سبب واضح - محمد عبد الفتاح | mn3'er sbb wad7 - Mohamd abdelfatah

facebook account 
https://www.facebook.com/mohmad.abdelfatah.35

Popular tracks by Mohamed Abdelftah l محمد عبدالفتاح