مشاعرك بتتاكل

شكرا..
شكرا لكل واحد قلبه اتعمي ومشفش غير نفسه..
شكرا لكل واحد شاف حقيقته الغلط صح وصدق نفسه...
 وبرضو شكرا لكل انسان ساعه الجرح مستناش ومشي...
 وشكرا للحس بالوجع وفضل ومرضيش يمشي..
 شكرا للي كان بالغدر والخراب نيته ليك وكان مصدق انه ملاك وبريء..
 وشكرا للي اتهان واداس وعشان بُعدك يقتلوا ملا بدموعه اباريق..
 وشكرا للي كان اناني ومش شايف غير صوره ليه علي قزازه مالت جواها خيبه امل بينقط منها كل يوم وجع وهو ولا دريان.. وشكرا للي باع نفسه وقِدر وسامح حد مايتسامح وهو مليان.. 
شكرا للي علمني معني الكدب وتزييف الحقايق وهو ياولداه .. 
صدق انه كان الطاهر اللي عمر الكدب مادق بابه .. وبابه اصلا من اخس انواع الكدب عملوا وقواه.. 
شكرا للعلمني ان الغالي.. لايمكن يزؤك تبدل الرخيص بالغالي.. 
وشكرا للي كان غالي.. واتحمل الرخيص عشان الغالي..
 شكرا للي وراني نوع من البشر.. يشوفك زي ما انت ويقولك خليني ليك صاحب.. واول مايتصاحب ويتمكن انك من جواك بقيت ماتبعد عنه صاحب..
يبيع ويشتري فيك فسوق النخاسه ويقولك انت ماتتصاحب...، 
بيع ارضك ياعواد وانا ارضى بيك صاحب.. عجبي عليك يازمن لكل شيء صاحب.. 
الا ده حتي نفسه مارضي بيها صاحب..
بس الحق مش عليه ، ده يصعب علي الكافر..الحق عاللي ربى وطَلع للدنيا واحد الغل ليه صاحب...
شكرا للي وجع فيا..
وشكرا للي ضم وجعه ليا..
شكرا للي رخصني..
وشكرا للي غلاني..
شكرا للي قال اني ما اسوي.. 
وشكرا للي شافني غالي..
شكرا للي بينلي قيمه ناس كانت حتنداس.. لاجل خاطر ناس ارضها ماتنداس..
شكرا للي علمني ان الحب مش كلام ..
الحب يعني حد مهما قسيت، دست، قهرت، ظلمت، كسرت، بَكّيت، سَهَرت، قَطَعت فيه، يفضل يقولك لاخر نفس جنبك مهما اتلام..
شكرا بجد..
اتعلمت والعلام بالغالي..
عرفت قيمه الصفيح واللي معدنه غالي..
يارب ادي كل واحد علي اد نيته ، الرخيص والغالي..
شكرا.....


Elrekhees Wel Ghaly

الكنز جواك Elkenz Gwaak

لسه شايف ان الجرح واجع ومصدق؟
لسه فاكر اني مش شايف حاجه ومصدق؟
لسه بعد عهر المشاعر والحب اللي زيفت كلامه وكررت حروفو بدل المره كتير ولسه علي نفس السكه ماشي ومصدق؟
عرفني بقي عملتها ازاي دي وكنت مصدق...
وازاي فضلت ماشي بخطي معاك علي ارض كلها شوك وكسر ازاز لشبابيك بصيت منها قبلي ولا سبتها الا لما جبتها 100 حته وبرضو فضلت مصدق
وحاولت اغمي عيني عن كل حاجه وكنت بسمع منك واقول صدق
وكل يوم ورا يوم يعدي الاقي كل حاجه بتقولي اوعي تصدق..
ده العيل اللي لسه بيرضع لو شاف وسمع مش راح يصدق..
قلت أرمي اللي فات واللي جاي ولا تحاسب حد علي احساس ممكن يخونك فيوم ويخليك ماتصدق..
خليك أصيل وافترض حسن النيه والأصل وأن الحب بيغير ويكونلك العمر كلو ويقف فظهرك ولازم تصدق..
وفضلت احاول مادعبس ولا ادور ولا اسمع ولا اشوف ولا احس ولا افهم ولا اراقب ولا حتي افكر عشان افضل مصدق
بس صدقني..صدقني بجد...
كل ده ولا كان عندي يفرق..وكنت مصدق... 
انما لما شفت بعيني فايدك حجر ورا حجر بيطير ناحيه شباكي عشان ابقي زي كل اللي فات واللي جاي ...شويه كسر ازاز علي ارضك السوده بتلمع  قلت مش راح اصدق..
يبقي كل اللي عشته وقلته صدق احساسي فيه وكل اللي عرفته ده كنت لازم أصدق...
ولان الغل خلاك أعمي ومفيش غير نفسك تصدق..
ماشفتش اني من تحت اديك خلاص بتسرسب زي شويه ميه ..ما خلاص مبقتش اصدق...
واتعلمت الكدب والكبر والغل والشك والسواد والانانيه وبيقت مرايه مشروخه ليك عشان يمكن تفهم وتصدق...
شوهت نفسي بسكينك التلم ووريتك نفسك فصورتي وياريتك تصدق...
أعرف كام حد أذيت ولسه اللي جاي اكتر وصدق
أعرف انك ضيعت اخر حته جوالك كانت نظيفه وكنت بحاول اكبرها عشان كنت مصدق..
كنت مصدق أني هقدر اشدك من ايديك واخليك فحضني تعيش وتصدق..
بس ياخساره...شيطانك كان اقوي مني ومنك وكنت زي البغبغان بتكلم واشرح واحاول وافهم واقول واتقهر وريقي ينشف ويبقي مر مرار الايام اللي شفتها وانت ولا بتسمع ولا بتفهم..ولا بتصدق..
مستني ايه...مستني ايه عشان تصدق...
لما كل الدنيا تشوفك كده ..وفضلت انا الوحيد اللي بحاول اصدق...
حتي انا...قدر شيطانك عليا..وخلاني خلاص مابقتش اصدق..
عارف ايه اللي حيخليك تصدق....
الزمن قادر يدمر شيطانك ويكسر اللي فاضل منك وانت حتصدق..
لما تبص وراك وتشوف وتفهم ...حتصدق
حتفضل مربوط فالأرض...بحجر السواد والغل اللي لسه مغمي عينيك..وحتصدق....حتفضل تقع وتهرس فنسك فنفس الخيشه اللي بتمسح فيها خيبتك وتداري ويتهيألك ان كل الناس مش حتصدق...
يارب يبعد عنك شرك...وتصدق
يارب يهدي قلبك ونفسك وتفهم بقي وتصدق
والله العظيم كنت مصدق,,,
بس خلاص ...سجنك قفلته علي نفسك ورميت المفتاح ومصدق...
انك حتطير فالعلالي وانا اللي كان الغلط عندي ..عشان كنت مصدق...
فعلا ...الغلط عندي...ايوع عندي...
عشان كنت شايف فيك حاجات محدش فالدنيا حيشوفها تاني وكنت مصدق...
وعارف ...بجد عارف... ان للاسف ممكن تقدر تكون أحن قلب...لو بس تفهم وتصدق


مصدق؟؟

بقولك ايه..
أنت عارف أن الست اللي معاك دي ممكن تكون مستنيه منك حاجه غير كل اللي انت بتفكر فيه؟؟
شوف.. انا عارف أن دماغها صعب شويه ..شويتين
ومش عارف تفهمها ومش عارف هي عايزه ايه..بس ببساطه كده هقولك..
أوعي تخاف من ذكائها أو قوه شخصيتها لان ده اللي هتتسند عليه لما تكبر.. او تكون لوحدها ..هتبقالك بميه راجل.. أوعي لما تحس بكده تخاف وتمشي أو تحاول تكسرها لانها خلي بالك..مبتتكسرش لانها من ضلع اعوج يعني مبيتكسرش مش معووج بلغتنا..لا..
أوعي كمان تحاول انك تلغي شخصيتها أو تضعف أو تتفه من عقلها دايماً وتتعامل معاها بتعنيف علاطول وفرض سيطره وتسلط عشان تبقي حاسس أنك جامد وكده هي هتخاف..لا لو سكتت يبقي عشان بتحبك 
وخايفه تزعل..
وأوعي تكون فاهم أن الهدايا والخروج والفسح والعربيات والفلل تعوضها عن حنيتك وحضنك وحبك..هي اصلها مش بدله هتشتريها وتحطها فالدولاب..
خلي ليها مساحه حلوه من الحريه فكل حاجه مادام واثق أنها محترمه وبتحبك بجد وانك عندها الدنيا وما فيها ومترضاش ان شكلك يبقي وحش قدام الناس.. متخنقهاش 
.. وبرضه مش معني كلامي انها تبقي الدنيا سايبه...بالعكس بقي هتكرهك وهاحس انك مش راجل... لا ..أقولك تعمل ايه..
طول ماهي فاهمه اللي بتعمله ومقدره وحاسه بحنيتك وحبك وبتحاول تحافظ عليك خليك كده.. انما لو زودتها بفعل مش عاجبك لو الفعل مش مصيبه يعني...اتكلم بالراحه مره واتنين وتلاته وبعدها انشف وزعق .. هتلاقيها فاقت ورجعت..عشان بتحبك
ومترضاش تنام وانت زعلان
وأوعي لسانك يطول عليها...الا لو طولت لسانها..
وأوعي تمد أيدك..الا لو هانتك وخصوصاً قدام الناس..
وأوعي تسبها وتمشي...الا لو حسيت أنك هتظلمها وتظلم نفسك..أو لو طلبت منك تدمر أو تخرب حياتك أو حتى حياتها,,, او أصرت من غير سبب مره واتنين وحاولت..فالحالات دي أمشي...
عايزاك تحبها أوي..تبقي حنين عليها..وتحس معاك أنها فأمان ..عايزه تدلع وعايزه تلعب ..جواها طفله صغيرة عمرها ماهتكبر,, وعلي فكره ولا كلمه بتقولهالك وهي زعلانه بتبقي تقصدها,,ولا عايزاها..لما تقولك سيبني اوعي تسيبها الا لو هي أصرت,,لما تزعق فوشك وانت غلطان اسكت معلش وخدها فحضنك..هتعيط وتبوسك .. لما تعيط من غير سبب اعرف انها موجوعه اوي.. خليك قاعد جنبها وطبطب عليها...
أعمل كل حاجه معاها.. اتجنن واسهر وارقص واسكر وحس معاها كل حاجه عشان متحاولش تحسها بره...
بتحب تجبلها شوكولاته وورد .. وتفتكر هي بتحب ايه وتجبهولها مفاجاه..حتي لو لبان بيعمل بلالاين .. انت افتكرتها دي عندها كفايه..
اوعي تنشغل عنها كتير.. لو هتنشغل فشغلك اضبط المنبه يرن كل ساعه..
عايزاك تقولها وحشتيني وبحبك ومقدرش اعيش من غيرك... هاودها فجنانها مادام مش هتضر حد.. اسمع كلامها العبيط وحسسها انه مهم مش تبقي بتكلم وانت بتنام..قوم معلش واسمع للاخر..
وأوعي تسيبها تغلط فحق نفسها ولا فحق غيرها.. اقف دايماً قدامها حتى لو علي جثتك.. 
خليها حضنك وانت حضنها.. انت كل حاجه ليها
وهي كل حاجه ليك..
خليك راجل معاها..مش عليها..
‫#‏راجل_معاها_مش_عليها‬
‫#‏نقدر‬


Mohamed Medhat

Popular tracks