3سلامات_محمد ابراهيم

"أوزان"
أنام..
كل الانام بتفوق..
افوق..
فيا الشقوق توسع 
ادوق العود
الاقي اللحن يتسرسب 
ادوق درب الهوى اشبع
وانا شابط منين ماتروح
ياسوّاق الغناوي معاك
ياريت توصل
لاخر حافّه ف عيونها 
وسيبني ارقص 
واقشر غلبي يمكن اتوب
عشقت يدوب 
دخلت الدنيا من ع السور 
كسرت ف نطتي الاُكره
يعصلج قلبها وتثور
تبص بطرف روحها تقول
منيش ناويه اخلع الاحلام 
ولا اتعري
تقولي الزحمه فيا ازاي 
ف وقت ان انت ساكنِّي..
وانا بره ؟
تعافر روحي تلحق..
دمعتي انت 
تكركب فيا شغل سنين 
يخصك او لناس تانيين
ده مش لو مره بس تفوق ..
ده لو في قلبي تتململ
اكمل شوقي ليك ولا ..
تسيب اسهل ؟؟
كم قولت لك 
ياسيدنا انامش هيت لك ؟
ده النور ف قلبي كحّلك 
هخلع طواقي المدح 
وانسي..
كل غنوه تاخدني لك
علي طول دراع الحزن هطوح 
مخملك
يملي الفلك
ده الحِمل حِمل الخضخضه 
والبال فسيح
وانا مش مسيح اقدر اداوي 
ضحكتك لو زان 
متخضش الاحمال قوي 
انا قلبي مش..
متعدد الاوزان

أوزان-محمد ابراهيم

بكتبلك 
جايز فرق الحزن اللي مابينا 
يغريك تسمعني ولو مرة 

بكتبلك وانا جوّه العالم 
واتمنى تكون مبسوط برة 

روحك حُرّة 
من يوم م زعلت وقولت أمشي 
بتلف معايا دروب البيت 
أنا عاوز اقول إن  أنا حنيت
 
ومعادش ف قلبي الحيلة إياها اللي تطولك 
ف القلب ليلاتي بتتمشى و فارد طولك 
ولا خصم مشاركك ف دموعي

مين جرّأ على قلبي الأحزان تكسرني وتخرج عن طوعي ؟
وتفركش ترتيب اللمة
كده بالذمة ..!؟
تعقلها لوحدك من غيري وتقول يافراق
بعدك بيلف الفرح  بكاسه محدش داق 
بكتبلك واتمنى تطمن قلبي المشتاق
 
فيه برد هناك .. فيه حد ف حضن الليل يرعاك ؟ 
فيه خوف جواك ؟
مطمن وحدك ف الدنيا التانية ياخِلِّي 
إرجع ...قولى 
شبعان ف الضِلْ ؟ 
محتاجلك وقت م تزهق ف الغُرْبة وتحب تهِلِّ
 
سألوني عليك أركان البيت اللي فايتها ومعرفتش ارد 
يبنولي سدود لدموعي عليك ودموعي تهِدّ 
بتمُرّ الأيام من غيرك مستنى الرد 

سألوني عليك قولتلهم مستنيه ف الحلم 
عدت أيام وانا من غيرك وبقولك ظلم 
متقولش نصيب وتقولي خلاص دي نهاية الفيلم .
 يا شريك العمر أيام مرة 
 ‏بكتبلك 
 ‏جايز فرق الحزن اللي مابينا 
 ‏يغريك تسمعني ولو مرة
 ‏
 ‏بكتبلك وانا جوة العالم 
 ‏واتمنى تكون مبسوط بره.
 ‏
 ‏
 #محمد_إبراهيم

Mohammed Ebrahim

Popular tracks