اغنية ياواد يا مألوظ كلمات الشاعر محمد الساعي 
ولحن وغناء الفنان والشاعر /صادق حمزه منذر

اغنية ياواد يا مألوظ كلمات محمد الساعي ولحن وغناء صادق حمزه منذر

لسَّاني فاكر
لسَّاني فاكر بسمتك لما تشوفيني
لسّاني فاكر طبطبة أجمل ايدين
صورتِك في بالي ولامسه قلبي..
وجوا عيني
رغم بعدك واشتياقي من سنين
لسَّاني فاكر ندهتك..
"يا واد تعالى.
جبتلك توفي ولبان"
وندهتي ايام زمان..
وانتي قاعده ف وسط صحباتك جيراننا
"تعالى يامه "
تقولي طيب بس يعني ..
هوا دا وقته يابابا؟؟
وتبقي فاهمه ندهتي مقصدها ايه
وهاتكسف اني اوضح في القصيده
كنت بندهلك لايه 
تقومي سيباهم وقايمه وجايه ليا
وتطبطبي وبشوق عليا
وتغمريني بأحلى حضن
وانام وانا قاعد في حجرك
زي طير آمن في عشه
حب صافي مافيش في مره
حد غَشُه
لسه فاكر لما ابويا كان بيشخط
او يزعق مره فيّا
كنتي تبقي طوق نجاه وبر الامان ..
بالنسبه ليا
كنت اجري وف عيونك استخبى
تحضنيني وتمنحيني بحور محبه
وتجيبيلي حتة البسبوسه اللي..
شيلتهالي من وراهم
واشتكيلك من ابويا.. وتقوليلي
هو اكتر حد عاوزك تبقى شاطر
قوم وذاكر
واجتهد علشان تحقق
كل آمالي وامالك
لسه فاكر..
لما كنتي بتقوليلي 
نفسي اشوفك يابني ظابط
او مهندس
ولَّا دكتور في العياده
وانا أقول مش عاوز ابقى
غير ممثل .. ولاَّ شاعر
اوصف الاحداث بدقه
وبمشاعر
تضحكي وتقولي خايب
حد يبقى مشخصاتي ولاكاتب؟
تنتهي بينا المناقشه بحضن جامد
وب تَمَنِّي اني أكون اجدعها شاطر
لسه فاكر
لما كنت باعوز ازوغ م الدراسه
واعمل اني قال مريض
كنت اشوف قلقك وخوفك
واغمزك ... تقري الحكايه
وتفهميها
كل بلوى كنت باعملها ...
بحبك ... بتداريها
وتعمليلي 1000 خاطر
لسه فاكر
يوم نتيجتي ف لابتدائي
ودعوتك:
"روح يابن بطني
يِنَجَّحَك ويفَرَّحك والخير تلاقي"
وفرحتك لما لقتيني
يامَّه ناجح بامتياز
ساعتها قولتيلي بفرحه
"يالا عقبال الجواز"
وف عيونك ضمتيني وقولتي 
شاطر
لسه فاكر
يوم ماسبتيني ورحلتي
هو دا يامّه اتفاقنا؟؟
مش عاهدتيني بإنك
تفضلي دايما معايا
م البدايه .. لحد ما اكبر
مش وعدتيني بإنك
تختاريلي طريق حياتي
لاني من غيرك مابعرف
حتى افكر
مش عاهدتيني وعاهدتك
مستحيل هايكون فراقنا
هو د يامه اتفاقنا؟؟
الحياه من غير وجودك
مش حياه
الحياه صبحت وسيله
عشان مابكره نلتقي
عند الإلَه

لساني فاكر

مضناك جفاه مرقده ..وبكاه ورحم عوده ...حيران القلب معذبه ... مقروح الجفن مسهده

مضناك غناء الفنانه المغربيه  ليلى سعد


الليل حزين ...
قمرُه ونجومُه بينزفوا موال دموع
والضحكه غابت من عيونه الملهمه
وبدون رجوع
الوحده ... جوع
ينهش في قلب الليل فيستسلم ومجبر..
للخضوع
مالهوش انيس ..
غير دمعه حايره مابين جفونه والخدود
غير بس ذكرى بتمنحه
حق الوجود
غير حزن راسخ جوه قلبه مالوش حدود
وياريت تعود
يا حلم أجمل م الحقيقه الموجعه ..
 والمبهمه
يا حلم ابعد ... م السما
يانبض ساكن في الوريد 
وسهم في القلب اترمى
لكنما ...
شتَّانِ بيْن الحُلم في زمنِ الجمود
وبين  حقيقه مؤلمه
****
الليل خلاص..
بيودَّع الضحكه اللي جات بعد اشتياق
علشان تنوَّر قلب جدرانه الحزينه المعتمه
وبيستعد عشان هايستقبل فراق
ما اطولك يا ليل بصحبة لاشتياق
ما اتعسك ياليل وحيد من غير ونس
كل الكلام اصبح ... خَرَس
قمرك .. ورافض انه يطلع من جديد
حتى النجوم استوحشت 
رحلت بعيد
والسهرانين .. ال ..مغرمين ..
 ال ..عاشقين ال.. موهمبن المسطولين
والقلب ..أصبح مش سعيد
ما اتعسك يا ليل وحيد
ما اطول الليل الحزين على قلب عاشق مبتلي
محتاج وليْ
يوصفله طعم الصبر في حلق المرار
ويعلمه النسيان بدون حق اختيار
ولا انتظار .. الموت بطيئ
الليل بريئ
من ضلمه بتعشش على قلوب البشر
الليل أكيد هايكون حزين
من بعد ما غاب القمر


قصيدة الليل حزين للشاعر محمد الساعي

#موتنا_المفترض

كل القلوب اتعلمت..
 واتألمت 
وبكت قصايد حزن عَمْ 
وبحور شعورنا علي الورق..
 نزفت زهقها سطور ادب 
وحروف صابتها التهتهتة واللخبطة 
نطقت عجب 
نزلت دموعنا علي الضحايا الابريا..؟؟
 ولا البغايا الاغبيا والكدابين ؟؟
وصورنا بالبنط العريض اتغيرت
 واتبدلت فينا الوشوش 
حتي الكلام جوا القصيده بيتخنق ..
ما بقاش بشوش
ويومين وننسى ..
وترجع الصوره القديمه المبهجه
نفس الاطار اللي بيجمع ..
ضحكة الغرقان لشوشته في التفاؤل
رغم المحن
يادي الزمن
اشباه رجال اتحكموا وباعوا الضمير
يا ادي الزمن اللي بيحفر عمرنا ..
ويبيع لنا اوجاعه بالمجان
وبيسرق الفرحه اللي نابته في القلوب
وبيجعل الضحكه البريئه الطيبه
حبة سراب
يادي العذاب
لما يكون قلبك قفص
وضلوعك السجان
يادي الهوان اللي بيكسر نفسنا
وبيحجب الضي اللي بيحاول يغادر ضلمته
والحجه .... لغلو التمن
يادي الزمن
حبة وشوش اتجمعت فوق الرصيف
 واحد ضعيف .. واحد شريف..
 واحد بقي عايش حياته ...
ف وسط انَّات الخريف
 بيسابق الايام ويجري ف دنيته
 مش لاجل عيش
 لكن عشان يعمل حساب ..
 حق الكفن
وبيدفن الاحلام معاه تحت التراب
اصعب عذاب
لما تلاقي الدنيا رافضه تقبلك اشلاء
والاستياء ظاهر قوووي
على كل اشباه الرجال
على كل اذناب البشر
فما تزعلوش على كل حلم بتغتالوه
او بتبعوه باسم الضمير اللي انقرض
من امتى عينكم دمعت على حلمنا..
علشان تدمع يوم لموتنا المفترض


موتنا المفترض1


#إكتبيني

إكتبيني حرف تايه
وسط زحمه م الحروف
وارسميني بريشه عاشقه
للبراح .. رغم الظروف
واحفظيني ف نِنْ عينك
وانقُشيني فوق جبينك
لو جرحتي .. مين يدينك؟؟
وانتي عُشَّاقِك .. ألووف
****
إمنحيني .. من حنانك
بحر موجٌه ماينتهيش
وانطقيني من لسانك
كلمه تتحدى ال مافيش
والهميني حروف قصيده
كلمه من وحْيِّك جديده
ترجع الضحكه الوليده
للقلوب .. يمكن تعيش
****
أُستريني من عيوبي
لاجل كل المحرومين
كوني رقعه جوا توبي
تحمي من برد السنين
والبسيني تاج في راسك
واشربيني شوق في كاسك
علِّميني .. طبع ناسك
يام كل الطيبين
****
عوَّضِيني عن غيابك
وامسحيلي دموع عنيه
وافتحيلي بسرعه بابك
واحضني  بشوقك ..ايديا
لسه محتاجلك يا شابَّه
ف اغمريني بالمحبَّه
رجَّعيني .. حَبَّه .. حَبَّه
شمس حاضناكي وعَفيَّه
#يا_بهيه


اكتبيني1

#كوكتيل_وجع
وفاضلك ايه؟؟
من بعد حلمك ما اترسم / حبة رتوش ..
بهتانه فوق جدران حياتك بالمافيش
من بعد عمرك ما اتسرق ..
لحظات وجع مابتنتهيش
من ضحكه غايبه عن شفايفك من سنين
مستني مين؟؟
يمسح بطراطيف الأمل دمعة عنيك
ويقول بإن الحزن فعلا مايساويش
فاضيلك ايه .. علشان تعيش
مقسوم مابين الزيف ساعات
ومابين حقيقه تفرض الواقع عليك ..
كوكتيل وجع
الصدق اكبر كدبه في كتاب التاريخ
و بضاعه اتلفها الهوى والانصياع
الصدق – زي الحق – ضاع
بين اللي اللي باع .. واللي انتفع
سكران بتصرخ في الحانات
انــا ..... جدددددع
مع انك اضعف من جناح عصفور هزيل
تحسب نجوم الليل هاتهديك للطريق
وتكون دليل للاحتياج
مليون سياج
حوالين رصيف الامنيات
تقتل طموحك للوصول 
ليلك يطول .. من غير قمر
مليان غيوم
حاجبه امتدادك للنجوم
وعنيك ماهش شايفه النهار
والانتظار قاتل قوووووي
ف بتتركن على اول الشارع هناك
تتكتف الخطوه اللي كات سابقه الزمن
وتموت خلايا الجدعنه من نخوتك
وقوتك..
تصبح وَهن .. عفن .. عطن
ف تقوم تدور في الخريطه ..
عن وطن

#أنـــــــــــا
#محمد_الساعي















قصيدة كوكتيل وجع للشاعر محمد الساعي

#محمد_السيد_سعد
تيجي نضحك ؟
يلا نضجك ..
كل واحد عنده نكته ..
يقولها يمكن ينكسف على دم حزنه
مره واحد ...
كان في شارع ذكرياته ..
ماشي ينده ع اللي فاته
 فجأه شافها بس خوفها كان طريق
يمِّة الناحيه الشمال 
صابه سهم البعد تاني
 قاد صوابعه العشره شوق 
طيَّر الاحلام لفوق
 و ابتدا يرسم فـ ضِحكَه
 تملا وش حدود مداه
 هو حاول يبني نكته 
بس من واقع حياه 
هو مش غلطان لكنه
 رقّص الاحساس باليه
و ابتسامته كات بيانو 
صوته هز الدمع فيه 
ولا ايه رايك يا ساعي 
انت ما بتضحكش ليه ؟

#محمد_الساعي
وليه لأه
وماله الضحك؟؟
مش أحسن من الخنقه ؟
تقول نكته .. واقول نكته
ووحياتك ماهش فارقه
هاقول النكته واستحمل 
ومش هاكدب .. ولا اتجمَّل
ولا هاعرف اكون جاحد .
مره واحد ..
كان بيحلم انه بس يادوب يعيش
كان بيتمنى ان بكره يبقى أحلى
بس بكره اللي في باله كان عنيد
داب في وسط الناس وحاول
يبقى راضي او سعيد
يهزم الاحزان بضحكه ..
تخلقُه .. انسان جديد
والأكيد..
انه عاش طول عمره راضي
يرسم الحلم ف خياله ..
يتكسر..  ف يقول داعادي
بس فجأه..
حلمه اتحوِّل حقيقه ..
من سكات
لما قرر مره يحلم ..
انه مات.
في الحقيقه "ضحكت"من قلبي عليه
ولَّا ايه رأيك يا "تيفا"
انت مابتضحكش ليه؟؟

#عاطف_حمدان_محمد

وايه يمنعني اني اضحك ؟؟
 واقول ع الحزن 100 افيه 
ولو نرفزته ببرودي فقام عيَّط
 ازيَّط اني شردته واقول اخييييه 
اتاري الحزن واد عيل ومتنيل 
غلبته بنكتة بهتانة ما تسوى جنيه 
مره واحد ..
زوَّق الحلم ف خياله 
بمكياجات فرحه القديم 
شافه ينزف بين صحابه ووسط اهله
 قام ندهله وقاله سيبك م الدموع 
جوع سنينك للمحبة حبة حبة 
خبى م السكة العتامة وقاد شموع
 البس البيبيون يا صاحبي وهات جاكتة
 وارمي جتة فرح قلبك ع الهموم 
خلي ضحكك جوه روحك واد غشيم 
واد لئيم .. لما تغمزله المواجع 
يحلف انه .. غصب عنه 
لان قلبه دخَّل الدمعة ف ريجيم 
والسليم اني افضل اضحك الف مرة 
لسه طبع الضحكة حرة ومستقيم
 والملامح راح تحب الوش اكتر
 لما تفرح مش تكشر .. 
تبقى آيه 
غاية الدنيا ابتسامة للنهاية 
خارجة وبدون سين وجيم 
يالا نضحك..
 مرة سامبا ومرة رومبا 
نشبك الضحكة في دراعنا ..انكجيه 
قولي ايه رأيك يا "عالم"
 انت ما بتضحكش ليه ؟؟؟؟ 

انت_ما_بتضحكش_ليه #


  


القصيدة الثلاثية انت مابتضحكش ليه

عزيزي المواطن ....
عزيزي اللي عالم بكل البواطن
وفاهم وداري..
ودُقْرُم أراري
وقاعد في دارك تبحلق في داري
وواعي وفاطن
بكل المَوَاطن 
يميني ... وديني ... اشتراكي ويساري
باقولك....
 تَرَيَّث .. ودقق ومحص
لتصبح مفلس .. وتشبه لفاتن
عزيزي المواطن
*****
عزيزي اللي سايق ..
هباله وغلاسه
وعامل جنابك في غاية الكياسه
بتفهم في "ناسا"
وفزلوك سياسه 
ورافع شعارك 
تطور .... حداثه
بتفتي وفتيك كبيرُه افتكاسه
ياريت ترحمونا في ظاهر وباطن
عزيزي المواطن
*****
عزيزي اللي دايما 
هارينا آراء
ودايما آراءه ماليها الغباء
شويه... مناضل 
شويه ... رياء
وراسم في وشه شعور لاستياء
معاهم... معاهم ... عليهم ... عليهم
وفاكر بإنك في غاية الدهاء
هاتظهر بوشك ...
وكل اللي غشَّك
مسيرك تهادن وترجع تماين
عزيزي المواطن
****
عزيزي اللي قاعد
وفايق وراسي
كلامك صراحه بيخلق مآسي
بحرب الكراسي
يموَّت في ناسي
وارجوك تحاول 
تشوف التماسي
باني مواطن وعقلي في راسي
ماليش في السياسه 
وشغل الخباثه
لكني باحاول اشغل دماغي
واحوَّش وادبر في قرشي وصاغي
عشان لقمه حلوه وعيشه سعيده
لاني بصراحه بقيت ع الحديده
بفضل اللي زيك 
وزي اللي ناسي
مبهرج وعايم في بحر المفاتن
عزيزي المواطن
*****
عزيزي السياسي
ياريت مره تعرف....
بإني مواطن وعاوز اعيش
وباحلم ببكره اللي جاي من مفيش
ولكن في لحظه بتهدم أساسي
وتوعد وتخلف وتحلف أصدق
ولكن بالاقي ماعندكش مبدأ
بكلمه تريح وكلمه تواسي
وبرضه في غمرة مزاج السياسي
يضيع المواطن
عزيزي المواطن
#محمد_الساعي


قصيدة عزيزي المواطن  للشاعر محمد الساعي


لما صوت البحر يحدف / نوته فضه و غنوتتن 
ترقص شباك الصيادين ويا النوارس
و المناير واقفه كورس 
تسند الموج لو غرق وسط الليالي
اسكندريه الحلم و المنظر
اسكندرية السحر لما بيبقى رباني
دايب في رنة ترمياتها 
لما صبح الفجر يحضن في الندى
اسكندريه الحلم و الذكرى
و القعده ويا الشله ع الكورنيش
لما الكلام يعشق دموع الفرحه صباحي
كل التعب يبهت مع او ل صور
و الموج بيغسل فـ الشقى اللي فوق كتافنا
اسكندريه الامل ....
و الملتقى لو مره يوم عن بعض توهنا
اسكندريه الحلم و المطره
لما الشتا يكسي فـ بيوت الحلم لاخضر بالحرير
نبض الشوارع وقتها يرمي السلام
ع العابرين المستورين بالبرد و الضحكه
لعب العيال جوه الحواري يزيدها نور
من غير كسوف تفتح ستاير قلبها لبكره البريء 
صوت الادان في المغربيه 
و لمعة البحر فـ عيون كل المراكب ملهمه
لقصيدة تشبه بنت لسه بمريله
و ضفيره خام ماقدرش كف الريح يطيرها
اسكندرية الروح و انا .. مخلوق عشانها

محمد السيد سعد


قصيدة اسكندريه للشاعر المبدع   محمد السيد سعد

اخر رسالة 
مش دي الدليل إنك هنا 
اكبر دلالة .. وجودنا مش حاسين ببعض 
بعد السؤال والتحية
وبعد راحة البُعد 
اه بعترف 
مبقتش لما بشوف خيالك برتجف
ولافارقه انك في وسط دايرة من البنات
حتي العناد وقت الخصام
حتي الخيال فيك وانشغالي 
والكسوف في الضحكة 
مبقتش بسرح في الليالي
ولا بسهر أستناك .. وأنا سمعاك في غنوة 
وأنا حساك في حضن ف فيلم
مبقتش ريحتك في القميص
ولا في الغرام قيس ولا في الحروب سِلم 
مبقتش أشوفك في الوشوش 
لوكنت ناسي بقينا فين / بفكرك 
مش بكرهك .. لكن عزوفي عنك أكسجين 
بعد السلام 
انا بس مش صعبان عليا الا السنين
صوت الدموع وانا مغرمة 
والحب والشوق والحنين 
وجع الفراق مبقاش يذل 
مبقاش يخل اركان المعادلة
كل شئ فيا اختلف
اكتشفت ان الصدف 
مش خير من الف ميعاد
ساعات بتبقي خط فاصل . بين حياتنا والممات
مش فاضلك مني حاجه
مش فاضلي م اللي فات
غير ذنوب 
كل دمعه منحني للذكريات 
أوقات بحن لضحكنا ولحبنا ولغنوة شافت دمعنا 
وكتير بحن ليومين بكل الأيام 
لكن حنيني لضحكتي .. اكتر من حنيني للدموع وقلة لاهتمام
ل مني عمر

قصيدة اخر رساله للشاعره المبدعه منى عمر

بلياتشو
عمال بيلغبط في الالوان ويزوق وشه
علشان يرسم ضحكه تفرَّح ..
 قلب المساكين اللي اتغشوا
واقف على باب السيرك بينده :
قررررب قررررررررب
خش وجرّب
عندنا رقاصه بتتلوى بجسم مكهرب
لسه بتهرب
من جوع اولادها بهز الوسط
ماتخش ياغاوي
عندنا حاوي / بيخبي النار جوا ف بُقُّه
وينام – بالجسم العاري - على المسامير
مستحمل ألم الدنيا معاه وبصبر عجيب
قرررب هاتلاقي المتعه كتير 
ماتخش يابيه .. قرَّبي يا مدام
عندنا شاعر / بربابته بيعزف احلى كلام
ويعيَّش كل اللي بيسمع
في بحور اوهام
عن بطل الساحه اللي بيهزم ..
في جيوش اعداء
والبت الحلوه ام ضفاير .. 
وعيونها اللي بتنطق اشواق
وبتتحداك ..
وبيوصف حالك / ف نشوفك
مجذوب بيفرق في المولد 
ع الناس كونياك
وزعيم السيرك المتَّنك ع الكرسي هناك
بيلم ف كرشه شقا المساكين
ومسلط على رقابينا سيوف الحوجه /
بعصايته العوجه..
يرسم خطوتنا على السكاكين
مستقبل طين
وبثقة المفتون بكلامه ..
بيقول الدنيا هاتصبح وردي وانتوا معايا
بس انتوا اتلموا وجوعوا شويه
واخيراً .. اعرفكوا بنفسي
محسوبكوا البلياتشو الساخر
ابو توب الوان / ودموع أسود
من ليل احزان
راسم ع الوش بريشة قهر ..
البسمه الزايفه اللي بتخدع قلب الاطفال
علشان تفرح
مع ان القلب بينزف هم
ودا مين هايحس .. ومين يهتم 
وبتشكي همومك للعالم ..
ما بتلقاش رد
وكأن العالم .. أعمى أصم
ف باسلم للامر الواقع
وامشي في طريق مرسوم سلفاً
بس سؤالي ..
كم واحد فيكم شاف نفسه ..
رقاصه تهز ف اوجاعها لاجل عيالها
مش لاقيه القوت من فتحة شيش
كام واحد فيكم كان حاوي ..
واستحمل م الايام تلطيش
كام شاعر نافق .. باع الوهم ف شكل قصيده
لاجل العيش
كام كرش بيبلع قوت الناس .. وبدون احساس
يوعدكوا بجنه تلاقوا مافيش
كام واحد فيكم عاش بلياتشو بدون ما يحس
خبى الاحزان جواه والفرح يا دوب تناتيش
جايين تستمتعوا بالفُرجه؟؟
وعيونكوا بتضحك مبتسمين؟؟
اضحكوا اكتر واكتر واكتر
دانتوا الفرجه ..
ومانتوش حااسين

#أنـــــــــا
#بلياتشو
#محمد_الساعي

قصيدة بلياتشو للشاعر ــ  محمد الساعي

#أنا_المقتول_وانا_القاتل
أنا المقتول ودمي ع الرصيف سايل
وانا القاتل وايدي غرقانين بالدم
وانا المسئول. وهاعدل بختك المايل
لكن .. لو مره أشلائي في يوم تتلم
****
صعيبه الضحكه في عيونك يابت الإيه
مافيش غير دمعه نوَّاحه على خدودك
وليل الحزن مش عاوز يفارق ليه؟
كأنه سياج وداير شوك على حدودك
****
يا فايتاني مابين التوهه والغرقه
رهينه لحلمك الغايب بقاله سنين
مافيش ويايا غير قلبي اللي داب حُرْقه
وشطر ف غنوه غضبانه ..واجيبه منين؟
****
مانيش جاحد ولا ناكر في يوم خيرك
لكني تعبت من تعبك ومن ضعفي
ولو هامشي / قوليلي ليا مين غيرك
ومين هايشيل حمولك انتي غير كتفي
****
خلاص مش باقي غير كلمه باقولهالك 
رسمتك في الجبين دُرَّه بتاج النصر
وفرحه ف قلبي طول عمري شايلهالك
وروح تتمنى لو راحت وتفضل .. مصر

#أنــــــــــــا
#محمد_الساعي

قصيدة انا المقتول وانا القاتل للشاعر محمد الساعي

وانا بره تأثير الزمن 
من جوه روحى المجرمه 
بكتب لها 
هى الوحيدة الملهمه 
بكتب بدافع لاحتياجي المستميت
انى اوهبك روحى الخشب 
فتشب  فيكى الروح
تقوم تخلق بدن 
فى الشطر دة مش لازم اثبت بالكلام
انك حقيقة مؤكده
فانا بعتذر مش هكتبك 
حبة نصوص 
الشعر مش بس اتخلق علشان يكون 
فى محبتك
صوت البريئ اللى اتشنق
ورفضتى تاخدى فىه العزا 
كان انقى شئ مفهمتهوش 
فالوضع الراهن دلوقيتى 
انا ممكن اتقمَّص دورك 
وانساكى واقولك معلشى
وارمى الاثبات انى بحبك
ورا ضهرى واقولك معلشى
دي طريقتك دايما ونظامك
الأراجوزات علشان تعيش 
بتبص لنفسها فى مرايا 
فى المجمل بتعيش القصة 
وتلون نفسها ييجي 100 لون
وبترمى مبادئ كات ساكنة 
جوه البلاتوه 
علشان تهرب جوه البراويز 
تسكن ع الحيط 
انا جيد جدا على فكره
فى ضرب الافية
وانا مش مضطر انى اكتبلك 
تخاريف وعياط فى النص عشان ..
اثبت واقع اصبح ملموس
هخرج من النص الحزين 
واضحك بصوت 
من تحت تأثير الضغوط
واكتب حكاية شاب مات 
من تحت تأثير الحشيش 
وسكنت انا فى روحه غلط
فمتسأليش ازاى بقى
فلقيت فى ايدى سيجارة فرط
متغمسه بحبة حشيش 
من صنف تقريبا مفيش 
هم الشباب ليه اختشوا 
لما دخلت الصومعة 
فىه بيره من الصنف النضيف 
تأثيرها بس خفيف اوى
وعرفت لية دلوقتى بس
ازاى بنات تشرب حشيش 
بتعيش وتتقمص حياه 
وتخش زمن المعجزات 
بسيجاره واحدة م الحشيش 
ياأيها الزمن النضيف 
مليون سلام للا نسجام 
مع حضرتك

قصيدة سيجارة حشيش للشاعره إيمان صابر (قيثارة الأمل)

خروج من حدود الشرنقه

حطم جدار الخوف بقى
وفُك حبل المشنقه..
حوالين رقبتك وابتسم
هاتلاقي ضحكه بتترسم
متشوقه
واعمل مخاوفك كلها
عصافير ورق
واطلق سراحها تسَمَّعك
صوت زقزقه
افرح بقى ... واسمع بقى
محتاج لايه علشان تفوق
تخرج بروحك من نيران 
المحرقه
****
اطلق سراحك ياللي عايش
جوا سجن برغبتك
وافتح شبابيك الامل 
على نور صباح
علشان تنول حريتك
وارمي اللي كان بيخوفك
جواك وحطم محبسك
لساك بشر
لساك يا دوب ترس فطاحونة
الحياه
لازم تدور علشان ماتكمل
دورة الكون الوسيع
ويا القمر
اياك في يوم تنسي انك انت
-	رغم كل المستحيل –
لساك ... بشر
ف افرح بقى ..
واخرج بقى
من قلب شرنقة الألم
كفياك شقا
كفاياك تعيش دور الضحيه
المرغمه على سجنها
والدنيا تبقى كأنها.. على وسعها
ف عنيك كأنها خرم إبره
ضيقه
حرر ايدينك م القيود
واعبر بفكرك كل الوان
الحدود 
اللي رسمها
عقلك الباطن وسجنك
جوا منها
وخلقت قضبانك بنفسك
وفضلت واقف منتظر
والناس عيون ومبحلقه
امتى هاتخرج 
من حدود الشرنقه
اخرج بقى
اخرج بقى

اغنية الخروج من الشرنقه كلمات محمد الساعي لحن وغناء الشاعر والفنان صادق حمزه منذر

#نص_جديد
صوت الآدان ..
بيصحِّي قلبي اللي شبع من غفوته
فيقوم عشان  يلحق بواقي الحلم ..
 من فك الزمن
يعرف خريطة خطوته .. 
ويشوف مداين حلم تاه
 وسط الطريق
على صوت "كمان" يعزف مواجع حلمنا
ويدلِّنا ..
 على قلب طيب كان بريئ
الحلم جايز كان جريئ
علشان كده
متصنف انه يكون عليه
يافطه تقول الحلم للكبار فقط 
ممنوع دخول الاغبيا والحالمين
ممنوع على المتشعلقين في حبال هوا
والطيبيين
الحلم دا بالذات بقى ... للمخدوعين
فما تسرحوش بخيالكم الواهم قوي
علشان في يوم راح تنزفوا الأحلام دموع
ملعون يا من  .. جعل الأمل ممنوع
ملعونه ايد مين يمنحك حق الضياع
وبيجبرك انك تفرَّط في الرجوع
ملعون يا جوع
ياللي بتنهش جوا قلب المحتاجين
لعبور صراط المستحيل
متعشمين ف نهارهاييجي بشمسه
يمحي ضلام وليل
متأكدين ان الدليل.. حبة هباء
والكبرياء .. مانع صراخ الاعتراف
ان الأمل بقى حلم حاف من غير غموس
وان النفوس اتعودت ع الانصياع
ملعون أبوه كل اللي باع ..
 في السكه حلمه واستكان
معلونه كلمه بتتحبس في الجوف ..
 ومش قادره تبان
ملعون ابوه كل اللي خان
دا الحلم كان قرب قوووي
بس الغبي ...
قفل البيبان

#للكبار_فقط
#أنـــــــــــا
#محمد_الساعي

قصيدة للكبار فقط للشـــاعر محمد الساعي

أكاد أُجْزِمُ ..
بإن الحزن لو مُلْزِم
هايتحزم حزام ناسف ..
وينزل رقص
عشان لو بص في عنيكي 
هايلقى الفرحه مرسومه
ومش ممكن في يوم إنه ..
هـ يشبع بَصْ 
.......
أكاد أُجزم ..
بإن الوضع لو مره هـ ييتأزِّم
هـ يلقى بسمتك مَخْرَج
وطوق لنجاه
تخلي اللأه في ثواني بتصبح آآه
واقول الله ..
واكتب في العيون غنوه ..
وأجمل نص
......
أكاد .. بالكاد أكون شاعر
بيتلمس حروف عشقك في اشعاره
ويتحسس طريق العاشقين ..تِمَّاً
ودايماً .. في العيون دارُه
يبات في قصيدته .. متطمن
وبيأمن على الأبيات
وليه بالذات ..
ساعة ماباشوف جمال روحك
موسيقى القلب بتدندن
وفجري بطلتك .. يدَّن
ثم إنك .. وبصراحه ..
حلوه جددداً
شيئ حقيقي.. مش مجرد
طيف وبس
......
أكاد .. أُعْلِن ..
بإني المُسْتباح فعلاً 
بفعل الرمش والضحكه
بتخلص سكه .. بالقاني فـ 200 سكه
مانيش سَكَّا .. لكن مغرم سنييين بيكي
ولو هاوصل في يوم ليكي
هاحس اني فاتح عكا
وهاتَّكَا على المعنى ولو حتى يكون واعر
ومش هافتي ..
واقول المعنى جوايا انا الشاعر
ياريت يتحس
أكاد أُعلن .. أكاد بالكاد
أكاد أُجزم بإن العمر لو يتعاد..
هـ احبك إنتي بالعنيه
ومش هـ ابعد ولا ثانيه
ولو حتى واجهتيني .. وقولتيلي ..
كلامك .. هَجْص

قصيدة ..أكاد أُجْزِم للشاعر محمد الساعي

#على_باب_زويله

انا ليه تمللي باشم ريحتك ..
في الحواري .. والشوارع
بالخصوص جوا المُعِز
والمح ملامحك ع الحيطان في السيده ..
ف الشوق ينز
وفي الحسين شوفتك بتبكي احتار دليلي
وشربت روحك كلها ف خان الخليلي
اوقات تميلي ف ينطلق صوت الكمان
واما تغيبي باسمعك ..
غنوه حزينه لأسمهان
انا ليه زمان ... 
كنت اما توحشني عيونك
بالتقيكي في الغوريه
او في سور مجرى العيون
او في جمله تايهه بين الفين كتاب
جوا سور الأزبكيه
كنت حاسس .. إنك انتي ..
بس ليا
رغم حضنك اللي بيساع الألوف
وابتسامتك للي جايلك ..
وانتي في أحْلَك ظروف
كنت اطوف جوَّا الشوارع واندهك
اسمع صداكي ف صوت منير
او وسط زحمة بياعين عبد العزيز
وشعور لذيذ ..
اني بقيت باتنفسك 
مع نسمةالفجر اللي هَلَّه 
في رحاب السيده ..
يا موَلِّده الاحساس عشان يقدر يعيش
يا طعم قهوه محوجه على " مقهى ريش "
ازاي برغم البعد عنك .. فيكي شيئ
مابيتنسيش
بارجع لتحت الربع واكتب غنوتي 
ف القاني في حبك بقيت  .. "درويش "
طالب وصالك ويَّا حبة مغفره
يااااااااا قاهره
يام الحواديت الطويله
ليه كل ما اقراكي التقيني
مشنوق سنين ..
على باب زويله

#أنــــــــــــــا
#محمد_الساعي

قصيدة على باب زويله للشاعر محمد الساعي

#مَسْ_شيطاني

وقت احتضار الكلمه فوق طرف اللسان ..
بتبان مشاعر يأس طابق ع الصدور
والكاس يدور ..
بيوزع الآهه بشوق ع المجروحين .. 
اليائسين المشتاقين ..
لكلمة جوا الحلق مش قادره تثور
والسور / ماهوش عالي قوووي
بس انكسار النفس يجعل م اللا شيئ ..
مارد كبير
والمُسْتَجِير م النار بيلقى ف سكته
"رمضاء" بتشوي جتته ومن غير ضمير
قلبي اللي كان دايما بيفتح .. 
درفتينه ع المشاع
قرر يتوب
مغلوب على امره اللي كان 
دايما مطاع
والمستطاع اصبح في حكم المستحيل
ومافيش بديل للإنصياع
م الحلم – رغم القرب من تحقيقه – ضاع
والحب - ويّا العمر- ضاع
مابقاش فاضل لي من قاموس الذكريات ..
غير الوداع
طبطبت على كتف الوجع ..
بايدين صابتها التهتهه بالعجز
في الزمن العقيم
ودوايت جراحي ب مس من شيطان رجيم
ف دخلت بيت المعجزات .. بكاسين نبيت
ومادام نويت ..
فالأمر يبقى خلاص متاح
البنت غمزتلي بعين تُقْطُر سواد
والبسمه فوق شفه بلون الدم داكن
كل الأماكن وقتها صابها النواح
مسكين وباهرب من جراحي .. للجراح
وف ايدي كاس ..
نصه اللي فاضي بلون حياتي المبهمه
والباقي لون جرحي اللي نازف م الوريد
البنت رقصت رقصة الموت الأخير
مابقاش كتير
من ضلمة العين اللي شقت غصب عنها بخط نور
لَمَحِت في طرْف السكه سور
بالرغم انه كان بعيد ..
صممت إني اوصل اليه
ورميت بإيدي كاس عذابي .. ف انكسر
وشربت طعم النسمه من ضي القمر
بالمختصر ..
خطيت حدود خوفي اللي كًتِّف خطوتي
كانت السما بتشع نور
ووصلت للسور اللي كان حاجز منيع
ورفعت ايدي عشان اكسر فيه .. لقييت
السور سراب من فعل خوفي
مديت كفوفي للسما 
ولقيت لساني قال
ياااااااااااارب

#أنــــــــــا
#محمد_الساعي

قصيدة مس شيطاني. للشاعر محمد الساعيmp3

#تياترو

الزحمه كتيير على باب المرسح من بره
والناس بتخانق بعض عشان مطرح
والعرض ابتدا اصلاً من وقت ماكنت يادوب بالبس ..
علشان اخرج
شباك المسرح متسوح وبيشغي ايدين
تتمد عشان تحجز كرسي
عمك مرسي بيشخط في الناس علشان تترص
وكأن الأبعد عايش مثلاً دور "رضوان"
وبيبان المسرح ياخواننا مش أي بيبان
بتخطي الباب .. ف تلاقي العالم متغير
اضواء الصاله بتخطف عينك ف تسلم 
وكأنك متنوِّم جاهز ف تعيش في الدور
مكسور من جوا وبتعافر
مانتش كافر
انما مش مؤمن بالأحداث
قلبك منداس والروح محبوسه ف قلب كالوس
تستني دخولك ع المسرح
عقلك يسرح ف حوار مهروس
مليون مره
ب كلام متكرر عن ظالم ومعاه مظلوم
وخيانه وجرح وفرح ولوم
وتعيش مهموم مانتش عارف تهرب م الفخ
وشاكوش بيخبط في دماغك
طاخ طوخ طيخ طخ
وإلخ .. إلخ ..
تلقى العالم حواليك أصنام
وتحاول تهري ف أي كلام علشان يصحوا
إنما هيهات ..
العالم في الضلمه بتبقى .. فعلا أموات
ف تقول إيفيه
إنما برضك يطلع بايخ
والمخرج ماسخ مش سامح بخروج ع النص
وحوار مخنوق ويادوب يترص
واصرخ .. مش واصل حتى الصوت
وخلايا العقل بتتبخر ..
والناس متسمره في الكرسي 
وبتسمع بس سكوت ف سكوت
وتموت الضحكه على شفايف
مشتاقة لحتة بسمه يادوب
ويادوب الكلمه على لساني وهانطق واقول
والجمله ف راسي بتترتب عاملالي "دماغ"
ف عنيا تفتح ع الصاله ..
ألقاها فراااااااااغ
وانا وحدي الموجود في القصه
بمجرد بصَّه في الكواليس ..
بتلاقي الدنيا واحزانها حواليك كِتْروا
اتاريك بتمثل ولوحدك
والدنيا تياترو

#أنــــــــــا
#محمد_الساعي

قصيدة تياترو الشاعر محمد الساعي

#جديد
#رَجْع_الصدى

قلبي اللي كان طول عمره نبت اخضر
دلوقتي متبعتر بفعل الإستياء
والداء بيكبر كل يوم حبه
حاروا الأطبه وانا في الأصل ..
متحيَّر
قفل النهار صفحته على حلم كان بيطل
والضلمه لمّا تهل ..
أشياء بتتغير
ف بيصبح الحلم البريئ .. مجرم
محكوم عليه بالنفي في التوهه
أحلامنا مشبوهه
والضحكه صارت سكتين اشواك
ياللي انت ماشي هناك ..
ارجوك ترجعها
رد الصدى : ( .....)
ماهي كات في ايدك زمان
وانت اللي ضيَّعها
ماتلومش غير نفسك
مانت اللي من نفسك
سلَّمت للأحزان
ما اجهلك إنسان
مجبول على الطاعه
والدنيا طماعه وبتعشق الألوان
حلمك ضعيف مسكين متحني بمياعه
وما تفتيليش ببتين في قصيده منسيه
وحروفها متباعه
الحلم عاوز رجال متعودين ع الصبر
وانت اللي راضع قهر ..
بالذل .. بقناعه
ف ازاي هاتقدر تشتهي الأحلام
وانت يادوب .. ريكلام
بتعيد كلام اتقال  ..
من 1000 عام واكتر
" قلبي اللي متبعتر .. الحلم كان اخضر .. مكتوب ومتقدر "
وما تبدتيش مشوار ..
إلا لما يتكسر
جرَّب في يوم تقدر 
على كسرة المجاريح
داللي بياخده الريح 
عمره في يوم مايعود
موعود ماتشبع صراخ
من وانت لسه رضيع
هاتبيع ؟؟ 
ومين يشتري..
 أشلاء بدون معنى 
ارجوك كفايه بقى وبلاش تصدعنا
يا إما تمسك في حلمك 
مرصوص كما البنيان
يا إما هافضل اقولك
ما أجهلك .. إنسان

#أنــــــــــا
#محمد_الساعي

قصيدة رجع الصدى للشاعر محمد الساعي هندسة صوتية للقيصر الشاعر حمدي جابر

.آخر صووووت.....

شفت محمد ؟؟ 
و النبي يا وليد لـ تعَدِي عليه 
كده يا محمد ؟؟ 
وحشتني عيونك يابن الإيه 
الواد يا حبيبتى مكلمني 
و ادَّاني معاد 
قال جاي لِك طاير ع النِني 
ويَّا الأولاد 
مش ابوك جا لي !!! 
بات طول الليل قاعد جنبي 
و سألني عليك 
للصبح حبيبي يكلمني 
أرواح ما بتعرف كدب وهلس 
عبد الرحمن ! 
قوم صب لجدك حبة بيبس 
جدك حرَّان 
والأوضة دي كتمة و زي الحبس 
إرخي الشباك زي الأيام 
واتوضى حبيبي وصلي العصر . 
سيب بابا ينام 
ده مسافر في الفجرية لمصر 
والاقيها تعِيد نفس المشهد 
شفت محمد ؟؟ 
و النبي يا وليد سلم لي عليه 
وحشتني ياواد ضحكته وعنيه 
ما كفاية حرام عذبتيني 
وعرفنا خلاص انك ماشية 
من غير ولا صحبة ولا حاشية
ودموعي اهي فرت من عيني 
ونسيتي ياغالية كلامك ليه ؟ 
مش فاكرة ف مرة وعدتيني ؟
إستني الأول ..... ودِّيني 
و النبي تستني كمان حبة 
طب فين م الهم هنتخَبَّى ؟ 
و هنشكي لمين؟ 
طب مين القلب اللي يطبطب ؟ 
أو فين الكلمة اللي ترطب ؟ 
لقلوب نشفانة و بتشطب 
حضنك لو راح ها نجيبه منين ؟ 
كان يروي القمح سنين قدام 
و حكاوي كتير تحت التوته 
و كفوفك راحة عليها ننام 
و نتقـَّل و انتي المبسوطة 
ترميني الدنيا فْ مآسيها 
فالشوق لعيونك يرميني 
و إيديكي الطاهرة على جبيني 
تمسح على راسي و ترقيني 
هو انت يا واد دايما محسود ؟؟ 
والا عشان يعني عينيك خضرا 
طب ما انتي عيونك بالألوان 
و باشوف في عيونك 100 بستان 
و فْ نورهم تتجلَّى القدرة
والطلة تهل مندِيَّة 
أيوه يا غالية .. دايما محسود 
حاسديني عليكي يا فتحية 
حاسدين الضحكة اللي بتروي 
جوف العطشان 
حاسدين الدنيا اللي وارثها 
عن ابويا زمان 
دهبك و ياقوتك و ماساتك 
و النور المخلوق من فضة 
يغسلني فْ نورك وصلاتك 
و اشرب واتزمزم و اتوضى 
القلب اللي مدفينا خلاص
و الورث دا كان حلم و بيروح 
و القلعة جدار من غير حراس 
و مفيش زوار و الباب مفتوح 
أنفاس بتضيع وحروف بتموت
فيه إيه بيروح وبيتعوض ؟ 
فجأة نادتني .. كان آخر صوت 
قالت : يا وليد ... شفت محمد ؟؟؟

قصيدة اخر صوت للشاعر الكبير وليد مليجي

#جديد
#بتوحشيني

وبتوحشيني ..
من قبل حتى ماتنطقي كلمة "سلام"
من وقت ما باسمع ألووو
ف ازاي هاركز في اللي باقي م الكلام
إزاي وإنتي ساكنه أصلا نن عيني ..
بتوحشيني
مش كلمه ينطقها اللسان او لفظ عابر
او حتى احساس وقتي ف بينطق حروف
دا شعور مخيف في البعد عنك ثانيتين
مابقتش قادر
محتله كل التفصيلات / في تاريخ حياتي ..
اللي ابتدا بنظرة عنيكي
مُتخلله حتى المسام
باتنفسك .. مع كل نسمة صبح هالَّه بابتسام
او نور بيفتح درفتينه لشمس بكره ..
ف تعشقه .. حد الهُيام
ياللي الغرام مخلوق عشانك انتي بس
ف ازاي أحس بنبض غيرك في الوريد
وازاي بدون ضحكة عنيكي الملهمه
راح اكون سعيد
وازاي بتقدر كلمه منك تخلق الإحساس وليد
ممكن أزيد م الشعر بيت يوصف مكانك ..
جوا قلبي اللي حلف مايكون لغيرك
انا بس باتنفس عبيرك 
وجناح لطيرك .. لما تحتاجي الجناح
وبراح لقلبك لما بيضيق البراح
"سواح وماشي في البلاد ..سواح "
محتاج صباحُه يهل نور
علشان مايمحي ضلمة الليل الطويل
وسبيل بيروي روح عطاشى مشتاقين
وبحور حنين بتشدني لنفس المصير
ولفين أسير
وانا الأسير اللي بيعشق مرتين
مره بيعشق كل تفاصيلك .. حياه
والتانيه عاشق .. حتى للنسمه اللي مره بتحتويكي
ياللي بلمسه من ايديكي
تطيب جروحي
وف عز بوحي .. بالكلام
مش لاقي حرف لوصف شوقي .. والغرام
اللي اتولد من نن عيني
ف بنظره مني بتفهميني .. وتسمعيني
وهاعمل ايه ؟؟
ماهوغصب عني ..
بتوحشيني

#أنــــــــــا
#محمد_الساعي

قصيدة بتوحشيني للشاعر محمد الساعي

قصيدة دموع النورس للشاعر محمود هليل هندسة صوتية الشاعر محمد الساعي

قصيدة صدفة وفي التاريخ اتسجلت للشاعرة سهيله السيد جبر هندسة صوتية الشاعر محمد الساعي

إذا كان الهوى جنَّة
فنارِكْ بئسَ مَثْواهَا
و إن كان العَطَا مِنَّة
في جودِك عشتْ بلوَّاهَا
نسيتي الفَرْض و السُّنَة
ضَغَمْتِينِي مع الغُنَّة
فلو دِينِكْ على حَنَّا
انا ديني على طَهَ
أنا البَرَكة
و انا البُركَان
و انا المسجون
و انا السَّجَان
أنام الليل على صورتِك 
وانا خايفْ
أقوم بدري و ما القاكِي
و اشوفِك فوق جدار الكون
و نَفْس العهْد لسَّاكِي
أنا أدمنتْ يجري السِّم في عروقي
و أدمنتْ الظلام يزحَفْ على شرُوقِي
ما حرَمْتِش أغني لِك
و باجري لِك
في كَسْرِة كل يووم منِك
و انادي لِك
تجافيني
و انا اللى قلبي شالْ عنِّك
و اتابع ليه تفاصيلِك ؟
و اشوف الدنيا بتميِّل
كما الماشي في وسط جبال
في نار الصحرا بيْقَيِّل
تعليهم .. و تخسفني
تزكيهم .. و تكسفني
تدوِّنهُم.. و تحذفني
فالاقِي الصُّبح بِيلَيِّل
وليه يبقى الغرام كدبَة
و نفسي سلعة وبضاعة ؟
و ليه ادفع رصيد عمري
في شروَّة و هي متباعَة ؟
و نار قايدة
فراشة تحُومْ على نورَها
لا قادرة عنها يوم تبعد
ولا تطلع منابِرها
و اقول ابعد
ألاقي العشق سَابِيني
يزيدْ الشوق
ولا تقدر تحَابِيني
فليه يرفع غريب توبك ؟
و يهتِك من زَمَن سترِك ؟
و يبني جداره من طوبِك
و انا اللى م الأساس ساترِك
دا انا النور اللي هاديكى
و بدرِك من تمامي تَمْ
و انا القلب اللي هاويكي
و انا العمر اللي بيكي اهتَم
و انا الرمش اللي في عنيكي
و انا اللمسة اللي في إيديكي
أنا ميَّا بترويكي
فليه بتبُخِي فيها السِّمْ
و عشقي ليكي كان طاهر
حسَبْت حلالُه و الحُرْمَة
لقيت كل اللي كان ظاهِر
بإني عشقت يوم (إيرما)
على صفحة حياة عمرِك
بقيت هامش
و عاشِق ماشي ع السِّكَة
ماهوش عايِش
أنا اتهديت من الحسْرَة
و م الغيرة و م الخذلان
عشان قلت انها حرَّة
فشفت الكَرْب بالألوان
و لما الدنيا هانتنِي
و قلبي احتَدْ
و قلت حبيبتي من غيري
ما ليها حَدْ
لقيتها لسَّه مملوكة
بوضْع اليَّد 
و هارجع و اعشقِك تاني
بدون أسباب
لا هي فرصة 
ولا نَزوَة
ولا صُحْبَة
ولا عِزْوَة
ولا جُمْلَة في سطر كتاب
ولا بيعة بتتَّمِن
هاعود تاني
و انا المدمن
هاعود تاني
عشان عشقِك..... مرض مُزْمِنْ

قصيدة مرض مزمن للشاعر الرائع وليد مليجي إلقاء الشاعر محمد الساعي

عارف يا واد ..
انا كنت زيَّك .. باشتهي الأحلام كتير
وكنت باستنا الصدف – ومع الأسف –
بحماس كبير
وكنت عاشق للتمنى .. والحظوظ
وقت اما اعوز ..
باقعد وباستنا القدر يهديني بخت
قوم لما دُخْت ..
أهداني بوووز
عارف يا واد
انا كنت عيل فوق 13 سنه
وقلبي عجوز
ويجوز بإني وقتها ماعرفتش ارسم خطوتي
فوق الطريق
ويجوز بإني كنت محتاج الصديق
وكمان يجوز
إني كما الأراجوز باردد في الكلام
من غير ما حتى أنطقُه ..
أو أحس بيه
بُص ف عنيا وانت تشعر..
 باللي انا قصدي عليه
بس ركز واعرف الإحساس بجد
عارف يا واد ..
انا كنت عايش مش شاغلني أي حد
وباقول مسير الزهر يلعب .. أو يبوح
صدق بإيه ..
طول عمري وما كنتش طَموح
والليل بييجي ..
باحط راسي ع المخده وأروووح
بس الغريبه عمري ما اعرفتش أنام
شوفت الكلام ؟؟
هايخدنا من غير حتى ما اعرف ..
أوصف الإحساس في سطر
قطر الحياة مش أي قطر
قشاش .. ولكن مابيوقفش
مش قولتلك ؟
طول عمري واخد الدنيا قفش
وماباعترفش ..
غير لما رجلي بتتغرس جوا المحيط
ومانيش عبيط
انا كنت فاكر وقتها ..
إني حويط
بالمس طراطيف الأمل ..
وامسح بباقي الحلم دمعة ع الخدود
والخطوة كات متكتفة بفعل العناد
عارف يا واد ..
من 1000 عام وانا باغزل الأيام قصايد
وافتح ديوان عمري اللي فات
مالقتش غير سطرين فرح
والباقي أصعب م السُكات
والذكريات ..
حفرت خيوط العمر فوق صفحة جبيني
معلِّمه ..
عارف يا واد ؟؟
انا كنت باحلم إني هاطلع للسما
وأطول بإيدي نجم مخصوص باعشقه
"لو كل حلم حلمت بيه هاتحققه؟؟
لو كل قول وآمنت بيه هاتصدقه "
يا خسارة الحلم الطَمووح
كان عاجز انه يطول مداه
رجليه على حافة صراط المستحيل
والليل بريئ من أي آه
انا كنت بس باحاول امشي ..
جنب حيط الأمنيات ..
فـ الحمل زاد
عارف يا واد ..
هو انت ساكت ليه ماتنطق ..
حتى لو كان كلمتين
فـ لقيت صدايا رد قال :
لسَّاك بتهزي جوَّا نفسك في المرايا ؟
قوم يا حزين ..
واقفل بيبان حلمك ... ونام

Mohammed Elssa3y

Popular tracks