شعر



عمرك حسيت
انك محتاج ..حضــــن؟؟
مش شرط يكون من حد معين
او عارفك
وكفاية اوي انه يكون دافي
ومش متكروِت
ف سلام مستعجل
ومجرد بس بروتوكول !
(للحضن اصـــــول)
فتحة دراعين,,
ماتاخدش الا انت
وتسيب تفاصيلك برّاك
ملهاش تفسير
لتصرفها
غير رغبة لـ بث الدفا
جواك
وكأن مفيش غيرك موجوع
محتاج يحتوي حد سخافته
صدقني كتير جدا
-علي عكس المُتعارَف-
بتكون صعبة السخافات
محتاج حضن يضمك.. ترتاح
تبكي..ماتبكيش
تضحك..تشكي..
او تفضل ساكت ماتزوِّدش
ماهو برضه الصمت بيعرف
يتكلم.. أوقات
والباب مفتوحلك
ب يــــميــنك
خش وطوِّل اوي ف الضمَّة
وكأنك قاعد كدا علي طول
مانتاش
متزحزح..ولا منقول
من وضع جنيني...
..يحب النوم اوي ف الضلمة
ايه بس اللي يخليك تخرج
وتعجز ...من اول مرة
هنا احسن بكتير من بره
هنا اوسع حيز من نفسك
اللي كتير ضاقت..مضطرة
هنا اخر فرصة تكون عاقل
أو تعمل شئ ويكون..معقول..
محظوظ جدا..لو هتلاقي
اللي يضم بدون ماهيسأل
ولا حتي يفتش عن اجابات
و بيقدر يفهم..ان ساعات
للحضـــــــن اصـــول

للحضن أصول - مي رضوان


    النهارده لامبو مات..
    قتله ليل اسبانيا في الليل ع الرصيف
    قلبه كان لابس خفيف
    قتلته الآه..
    قتلته في الحانة شنبات الشاويش..
    قتلته الناس اللي غرقانة بهمومها في النبيت..
    قتلته الدوسيهات في دواليب الحكومة..
    قتله الطفل اللي مش لاقي الفطار
    طلعت الناس النهارده للكنيسة
    لقوه جنب الجدار..
    قطته جنب الجيتار..
    قاعدة مش شايفة النهار..
    في انتظار الليل.. واسبانيا.. وشنابات الشاويش
    لامبو مات.
    لامبو؟؟ يا عيني.. وتبكي الطفلتين
    يمسحوا دموعهم في ايد الامهات
    في المناديل الجديدة
    آخر الرحلة تموت يا لامبو على طرف الرصيف
    وانت لو جالك فقير..
    كنت تشوي قلبك الطيب تحطوله في رغيف؟!
    قطته توطي
    عشان دمعتها ما تعملش ع الاسفلت صوت..
    لامبو مات

    #الخال

شعر

Mohammed Raafattino