برومو البرنامج الإذاعي انت الحكاية، تقديم الإعلامي محمد دريوة

انت الحكاية

برومو برنامج انت الحكاية مع محمد دريوة

الخير مش بس جزء من المال بيطلع للمحتاجين والفقراء والمساكين، الخير ممكن يكون على هيئة شخص ما بيأذيش الناس، الخير وانت بتعدي الطريق تلاقي واحده مُسنه محتاجه اللي يساعدها علشان تعدي الشارع، أو طفله ماشيه لوحدها فتمسكها وتبعدها عن ضرر ممكن يصيبها وهي ماشيه، الخير انك تبقى ماشي بعربيتك وتلاقي حد واقف مستني مش لاقي مواصلة - في عز الحر بقى أو في عز البرد – تقفله، وتوصله على الاقل لأقرب مكان ليه في سكتك،
الخير انك تبقى في عربية أجرة وتلاقي واحد من الركاب فلوسه اتسرقت، او وقعت منه وتدفعله الأجرة
أو انك تبقى سواق العربية، ومتاخدش منه الأجرة وتقوله "ولا يهمك.. خلي عنك "
 الخير ممكن يبقى في ازاز مكسور مرمي على الارض ممكن إنه يسبب ضرر لاي حد ماشي، وتوطي على الأرض علشان تشيله أو تبعده، الخير في كلمة طيبة، كلمة حلوة تطيب بيها خاطر اللي اودامك، في ابتسامه تبتسمها في وش اللي كتفه خبط في كتفك بدون ما يقصد، الخير انك تبقى موظف مسئول عن شباك واقفين عليه المواطنين، صفوف، وتعمل صف لكبار السن وتجيبلهم كراسي علشان يرتاحوا لما ييجي دورهم.. انك ترفض تمشّي حد قبل حد لمجرد انها واحده حلوه عجبتك، او لمجرد انه جايبلك واسطه من فلان بيه الفلاني. 
(الخير يا طيبين.. الخير يا أهل الخير)

(الخير - انت الحكاية مع محمد دريوة (ح1

فاعل خير دا عنوان حلقة النهاردة
ادعم اللي محتاج للدعم، ادعم بفلوس بتعليم، تدريب، بفكرة، بكلمة حلوه تشجع، علشان هو كمان، يردلك الجميل في حد تاني محتاج للدعم وأهي صدقة جاريه، وخليك فاعل خير
ملخص الحكاية، ان اللي بيتعب بيلاقي، صحيح بيتعب كتير، وبيمر بأوقات صعبه، بيحس فيها ان كيانه بيتهد، وممكن كمان الوقت يطول ويستمر على هذا الحال لفترة طويلة جدا، بس الحكاية دي كفيله تقولك ان اللي كان نفسه يدخل أي كلية علشان ظروفه المادية، ربنا كرمه وبقى طبيب، واللي كانت الناس بتساعده في مصاريف دراسته، اللي هي مش فلوس بالنسبة لمصاريف ناس كتير في حياتهم، 
هو بقى بيرد الجميل ده بعمليات جراحية كبيرة تمنها أُلوف الجنيهات، مجاناً، قاصد فيها ربنا، مش أكتر.
علشان كده، فاقد الشيء لا يعطيه خاطئة، فاقد الشيء يُعطي الأفضل منه، لأنه عارف كويس قيمة فقدانه، ولأنه جرب وداق منه.

(فاعل خير - انت الحكاية مع محمد دريوة (ح2

صلاة استخارة دا عنوان حلقة النهاردة
أتكلموا مع ربنا وفضفضوا ليه، واطلبوا منه يديلكم إشارات علشان تعرفوا تكمّلوا، اسالوا ربنا ان اللي انتم بتعملوه ده صح وللا غلط؟، خاصة لو حصل معاكم لبس في بعض الأمور، أو حيرة في اتخاذ قرار.. صلاة الاستخارة ممكن تكون حلول لحاجات كتيرة جدا في حياتك.
ارجع لربنا في كل حاجه بتعملها لان مفيش حد يعرف اللي ربنا يعرفه، ارجع لربنا في كل خطوة بتخطيها، ما تزعلش على اللي ضاع لانه مش من نصيبك، ولا تزعل على اللي راح لغيرك لأنه من نصيبه، العربية اللي مالحقتهاش كان هيجرالك حاجه لو لحقتها، والجواز اللي اتأخر لحكمة كبيرة كلها خير ليك، كل حاجه ليها سبب، بس المهم نرضى بما قسمه الله لنا.. ونستخير، لأن الاستخارة فيها الخير.

Mohammed Driwah