Video : https://www.youtube.com/watch?v=pwIKp5NWrVc&feature=share

Page : https://www.facebook.com/pages/Islam-Hefny/515429955247119

فخامة جناب الرئيس اللي ناوي
يكون فوق كتافنا بحب وسلام
عشان تبقى ريّس ونرضى بحكمك
ياريت تبقي عارف خلاصة الكلام
والخلاصة اننا
عاوزين رئيس يشبهلنا
يعني دريان بالغلابة ف الشوارع والحارات
باللي مش لاقيين مساكن واللي ناموا ع البلاط
باللي ساكت واللي راضي واللي ماشي عالصراط
واللي لو ترفع هدومه تلقى عُصي وخرزانات
الرئيس عاوزينه عادي
مش ضروري م المعادي
يعني داق الفول بزيته
بيتنا يشبه شكل بيته
يبقي لونه طمي نيل
يعني وطني ومش عميل
عنده جرأة عشان يطلّع كارت أحمر لاسرائيل
ياجميع الكائنات
يارجال
ياانسات
لو حقيقي تعرفوا واحد مطابق للشروط
حلفوه باسم الاغاني والشوارع والبيوت
انه يعدل بين جميع الناس سواء
وانه يلحق مصر قبل ماتكون العراق
وانه يحكم للغلابة مش عشان حاشية ووريث
فاللي شايف نفسه ينفع
يجري يترشح رئيس

Mohand El-Sawy