الرابعة والثلاثون بتوقيت القاهرة
مسئول 
عن نفسي أنا مسئول 
ناجح في الدنيا بمقبول 
للناحية التانية أنا منقول 
وبغني بصوت عالي ومزعج 
وبصوتي دايما متمزج 
ولذلك هفضل أغني وأقول 
مسئول .. عن نفسي أنا مسئول

الرابعة والثلاثون بتوقيت القاهرة

1. الرابعة والثلاثون بتوقيت القاهرة

عيل تايه حد يدله على بيت أمه
حد يقوله إنه حاسس بيه وبهمه 
مهما بيكبر بيه السن 
برضو هيفضل عيل تايه 
لسة لبيته ساعات بيحن 
كتر خير اللي يقف جنبه 
عيل ضيع كل طفولته وهو بيجري ورا الفراشات 
وأما كبر ضيع من عمره عمر كمان يسمع حكايات 
عيل متمرد ع الواقع بس بيشبه للأيام
لما يمل على طول يمشي 
يمشي بسرعة بدون سلامات 
عمر ما تعرف إمتى بيجي وإمتى بيرحل 
فجأة بيظهر في الأحزان 
يرسم ضحكة لقلبك توصل 
تحس معاه إن إنت أبوه 
مع إنك أصلا محتاجله 
لو تمشي معاه مش هتوه 
لو تمشي من غيره ترجعله
عيل تايه بس في قلبه بيت بيساع كل التايهين 
بقى زي مقام والدراويش جنبه 
لما بيدعي يقولوا آمين

2. عيل تايه

موسيقى: جان ماري رياشي
تسجيل ومكساج : هيثم أبو عقرب 

حاجات كتير اتغيرت مابقاش ليها طعم 
قهاوي وسط البلد والنوتيلا وصوت الست 
أتاري السر فيكي أتاري الصحبة أهم 
لسة بتيجي في بالي مهما أعمل مش مهتم 

مشيتي لكن سايبة وراكي تفاصيل كتير
الأكل في العربية وضحكتك الرايقة والسفسطة 
مكالمة كل يوم باليل واسمي بصوتك وكرهي للمانكير 
هزارك البايخ ومواعيدك البايظة والتأخير 

وحشاني لكن قصتك خلصت 
والعمر بالنسبالي طريق وممدود خط 
محطتك فاتت والرحلة مش دايرة 
كل الحكاية شفت صورتك فاتلخبطت

تفاصيل كتير

 من ديوان كراكيب
تسجيل:أحمد نادر
موسيقى ومكساج: هيثم أبو عقرب 

تقريبا 85
كنت مجرد فكرة ودبلة وكتب كتاب 
قبلي التوأم حاولوا وفشلوا 
جيت للدنيا بعد عذاب 
في أغسطس 87 
رحبت بدنيا البني أدمين 
وبعد كتير من جذب وشد 
اسم الواد على اسم الجد 
في نوفمبر 89 بقيت أخ كبير 
وشيء جوايا كان بيقولي 
إني ف يوم هقدر أطير
وقفت على سور البلكونة 
لمحتني أمي وجريت جري 
شدتني 
شتمتني
يا ابن المجنونة 
ضربتني وعيطت كتير 
90 و 91 كنت بدأت أغني وأقول
من كام سنة وأنا ميال ميال 
92 كان الزلزال 
في نص التسعينات حبيت الكورة 
أشرف قاسم 
هشام يكن 
قاسي سعيد 
محمد صبري 
وأحمد الكاس 
كنت بقيت زملكاوي خلاص
الياقة المرفوعة والشياكة ورقم 14 
كان بديهي إني أحب حازم إمام 
في أواخر التسعينات عرفت معنى الموت 
جدي وأبويا 
أمي اللى كان ضحكها مالوش زي 
بقى نص كلامها سكوت 
في 2000 سمعت وحدانية 
وزودت حلم على الأحلام 
هبقى في يوم صاحب أنغام 
تقريبا دي الخلاصة وكل المهم في حياتي 
الزهايمر في عيلتنا وراثة 
وإحتمال كبير يحصل 
فلما يوصل 
أرجوكم أعذروني 
وياريت تبقوا تزروني 
وفكروني 
بكل ما هو سالف ذكره 
أما أي حاجة تانية 
كلام تافه 
ومش عايز أفتكره


1987

من ديوان كراكيب
تسجيل: أحمد نادر
ميكساج: هيثم أبو عقرب 

عن حاجة حلوة 
كانت في حياتنا وراحت 
عن قلوب عاشت تعبانة 
ولما ماتت ارتاحت 
عن ناس ضحكوا علينا بمزاجنا سنين 
بس خلاص ريحتهم فاحت 
عن حتت تلجاية جريئة 
خرجت في الشمس فساحت 

عن البحلقة 
بدون أسباب في النجوم 
عن سهر كل ليلة 
في عز شوقك للنوم 
عن عمر بيخلص 
في التوهان يوم من بعد يوم 
عن اليأس في العموم 

عن أغنية قديمة 
تسمعها تضحك 
وجواك متقطع قلبك 
عن البت 
اللي لو ماكنتش مشيت 
كان زمان عيالها شبهك 
كان زمانك إنت نفسك لسة شبهك 	
عن كل مرة لعنت فيها حبك 
عن كل مرة ظلمت فيها قلبك

أنا ممكن أقولك عن وتحط أى حاجة بعدها 
بس المهم تكون وجعاك وفاكرها 
وماشي وراها زى ضلها 


Mohi El Din Ahmed

Popular tracks