الحج سيد بسبب بجاحة الحياة مسجون
بسبب شيكات وكمبيلات وزحمة ديون
اتحكم عليه بسنين كتيرة
وكل سنينه الباقية وقفت واتعلطت بيه المسيرة
وهو وتفكيره في كام واحد من عياله مستنيه يخرج في حيره
خرج من سجنه بعد ست سنين الصبح
مهتمش ومببصش زي ما ببصله العالم بقبح
خرج وفضل يلف لحد ما الدنيا ابتدت تليل
عمال يدندن ويجري ع الرصيف اكنه رجع عيل
واتبدل ب عيل صغير كان مستخبي جوا راجل كبير
ويقول لنفسه انا فاكر ايام مكنت بتخيل اشوف النور
اهو الخيال صبح حقيقة اهو وعدا السور
لحد ما فاجاة روح وعدت عليه ايام وسنين
ولقي مفيش بشر فكراه وبهدلها الحنين
في ست سنين
وعاش لوحده في الحنين سنين كتيرة
ورجع تاني لنفس الدوامة اللي اسمها الحيرة
عم سيد لقي فاجاة الحلم قلب علي كابوس
بيتعاقب علي جريمة مش ب ايده
كأنه خاين جاسوس
وكل الحكاية والازمة
انه مش معاه فلوس
وحس انه ملوش لازمة
وخرج من السجن
وبردو فضل في البيت محبوس
عم سيد قال
ان مهما الدنيا ابتسمتله هو بني آدم منحوس
بيلاقي جوا الفرح الحزن مدسوس
وانه الدنيا زعلته هي وابنه المحروس
وان العيب مش في الحياة العيب في النفوس
عم سيد اكتشف ان العالم مأسوي
وان البشر كلهم مشوهين
ومفيش واحد فيهم سوي
وان مهما قالوا الدنيا اتعدلت هيرجع تاني العالم فوضوي
وقرر وقتها انه يرجع بيته ويعيش الباقي من عمره منطوي.

في ست سنين

ايه؟
سكت ليه وليه مستغرب؟
دول لسه اتنين وعشرين شمعة والباقي لسا متغرب؟
مالك واقف ثابت كده ليه كأنك متكهرب؟
أمال هتعمل ايه لما العشرين يبقوا تلاتين؟
وتقف لوحدك وسطيهم؟
وشكلك يتغير وتقول انا مين؟
وتعدي عليك السنين
وانت نسيت تعدي فيهم
عارف يا محمد؟
انا في اتنين عشرين سنة
مقابلتش علاقة دايمه
والناس قاعدة وقايمه
وانا كل علاقاتي عايمه
والبشر في قلبي مش نايمة
عارف يا محمد؟
انا طول الاتنين وعشرين سنة
 باصص لسما
وبعدها ببص جانبي
مبلاقيش حد فاضل هنا
ومن وقتها
متبقاش معايا غير
سجارة دايمه ف ايدي
وذكريات بدال الدم جوا وريدي
وكل أفعالي المحرجة
اللي قدام صبحتلي طوق نجا
طفي شمعك يا محمد
واحد واحد
عشان حتي انا وأنت
عمرنا مكنا واحد.

متغرب.

بقولها بكل كسوف
طلعت انت نكسة حياتي
رهنت بكل عمري عليك
ويا ويلي
تطلع انت مأساتي!


فين الوعود؟
ده الطريق صبح عتمة
وكل باب مفتوح
صبح قصاد عيني طريق مسدود
الحزن عدا بلادي
وسارح كمان ع الحدود
قولي بس مين هيبدلي
القسوة دي ب ورود؟
الغيرة دي ببرود؟
القلب ده ببارود
خلينا نحرق ف الالم
انا من زمان رافع العلم
وبعلن انسحابي
من وسط كل ده بهدوء
مخي مش ببطل خربشة
متحاوط من 
الحيرة
والمأساة
والسنين الكتيرة
وبكل حرف اذاه
متحاوط بين
لهفته ليك
و صدمته فيك
وحزنه بردو عليك


..
بص في عيني
وقولي انت مين
اكيد مش انت
الحنية
و الحنين
والطبطبة
وحب السنين
والونس الدافي
كل ده واضح قصاد عيني..
ولسه بمشي ع الازاز وانا حافي


يدوبك سرحت ف غفوة
صحيت لقيتني 
تايه بين زحام القسوة
والحزن
وقهرة الأيام عالسنين
مهنش عليا بعد كل ده
اقول عليك اناني
وانت ف لمح البصر
شاورت للي كان بينا
وقولتله بكل جحودية انساني
ياريتك حتي افتكرت الود
ده انت جبت جبل هموم
وزي ما تقول بتقولي سد
هان عليك تقول انساني؟
وانا مش عارف امحيك من عقلي
حتي لثواني!
تخيل تبقي انهاردة ليا
امنية من وسط الاماني
قسوتك لحد الان
مش قادر اجمعها
وكل حاجة مش عارف افهمها

ازاي بعد ما كانت هي ضهري وسلاحي؟
انهاردة تبقي أكبر كابوس بيطاردني وانا صاحي!


مكنش في طبعك الأنانية
ولقيتها
مش لايق عليك دور الضحية
وبقيتها
هل ف قلبك إنسانية؟
وانت كل دقيقة بتقتل قلب
قلب بيحبك
وشال عنك ياما ضرب كتير
ودلوقتي بيسبك
ع القسوة والخيبة والتغيير
ايه العمل؟
في بعدك اللي صابني بجنون
فين الامل؟
في قربك الغير مضمون
ازاي انتهت!
وليه ابتدت!
مستحيل تكون انت
القلب اللي حبيته
ده انا لو ربع جنيه قديم ف جيبك 
مكنتش رميته

-نفس اليوم بيروح وبيجي
ولا ده ايه
جوا في قلبي وفي تفكيري قاعد ليه!
اكيد ي محمد مش انت لوحدك
اللي عندك قلب
اكيد في بعادك بيعانوا يعني
= هههههه أهو ده الإفيه.

نكسه

انا كنت عايزك متقلقيش
انا كنت هنا عشان متزعليش
وسط الزحمة دي متنسانيش
انا اللي كنت معاكي قابليهم كنت جانبك لما مكنش في حد وبتقوليلي غيرك مفيش
ومتزعليش
انا عارف انه صعب تنسي
بذات بنت جميلة وفي شعرها بنسي
بس انت اتنسيت وخدت اعفي
وهتفضل فاكر كل حاجة كأنها
كانت انهاردة او امبارح قبل ما تنام
انا ممكن اسحل نفسي معاك في هزاري
لمجرد اني ابان كويس ومحسسكش بناري
بخوض حروب كتير محدش يعرف عنها حاجة
وببان قدامك كويس ودا شي في منتهي السذاجة
انت ممكن غلطة صغيرة تعملها تمحي حلو كتير
وممكن قرار عبيط تاخده يولد قدام زعل كبير
وممكن حاجات تحصل وانت فاقد وعيك تخسرك ناس حرير
دا أنا كل مأساتي اللي شوفتها في حياتي بشوفها قبل ما اغمض ع السرير
انا لسا فاكر شكل حنان
مش ناسي شكلها وانا ماشي زمان
كان الوقت ماشي عادي وانا وهي بنتمني الوقت يقف في المكان
 كان اللي فات كله سهل ودلوقتي الحزن اللي حان
انا فاكر قصتنا زمان
فاكر الزمان والمكان
انا ذاكرتي اقوي شي فيا
مبتفارقنيش الاوجاع بتفاصيلها
لدرجة اني حاسس لو يوم عدا من غيرها
هتوحشني حاجات منها
مبيحصليش حلو كتير 
ومع ذلك املي كبير
وبتمني اشوف حزني سفير
وإني ابقي فرحان وانا باخد اخر زفير
انا رجعت بيا الذكريات وخطفتني
رجعت ليا احاسيس اول مرة في كل حاجة وسحلتني
زي اول مرة اجري في ملعب المدرسة الرملة
تحديف التوب علي الشجرة عشان نوقع الثمرة
اول مرة اشرب سجارة مع قهوة
قلبي اول مرة دق عشان في مرة شوفتها علي سهوة
واول مرة وحشتيني
وقولت مش هظهرلك دا وهظهر انك شخص مشافش سنيني
واول مرة مسكت ايديكي
واول مرة عيني سرحت في عينيكي
اول نزولي للمياه المالحة
فاكر المركب وهي داخلة جوا وسارحة
اول مصيف مع اهلي
واول مرة اتعصب بسبب ماتش للاهلي
واول سفرية من ورا عيلتي وزيادة املي
انا كبرت ولسا فاكر دا
انا فاكر اول عيد ميلاد ليا
والوقت اللي محدش جبلي فيه هدية
انا حافظ اول اوضة لوحدي
واول مرة سمعت امي وهي بتقول اختي عنك مفلحتي
واول مرة عيطت فيها علي قلة حيلتي
واول مرا ابات برا البيت وانا مش عارف اخد راحتي
عدم النسيان دا شي مر
عدم النسيان شي بيقسي العمر
انا ممكن افتكر دا وانا راكب المترو
او بشرب فنجان قهوة وانا قاعد في سلينترو
انا من وقت ما قولتلها يلا روحي
وانا مهموم والهم طايل روحي
والهم بيطاردني كل ليلة ببشاعة
ومش عارف ارتاح منه لو حتي ساعة
لوحدي في اوضتي مع شوية مزيكا في سماعة
في يوم خبر موتي هيجي حقيقي مش اشاعة
مهموم والهم طايل روحي
والهم بيطاردني كل ليلة ببشاعة
ومش عارف ارتاح منه لو حتي ساعة
زرعت كل الامل اللي في الكون
ودخلت ماتش مع امل حياتي ومسجلتش حتي جون
مش الهم طايلني وطايل قلبي؟
مش طايل قلبي والهم طايلني
كل حاجة صعبة هنا
ومفيش امل موجود
كل حاجة كانت بتدل علي الخراب
والسعادة والامل والفرحة كانت مجرد سراب
انا كل ليلة بدفن حلم جديد ليا في التراب 
وبقول يتري هدفن كام حلم تاني بعديه؟
وكام مرة حد هيجرح مشاعري واقولها سامحيه
كنت طبيعي وكويس بس مش في الخراب دا لا...دا قابليه
اصلك مهما تكون لوحدك همك مش هينزاح
ومهما تكون مع الناس عمرك ما هترتاح
انا كل اللي شوفته خراب مفيش اصلاح
انا دايما بسيب قلبي مع اللي مش بيبقدره
ودايما بروح بحزني لناس مش بيفكره
ودايما بسامح ناس لغلطاتهم بيكرروا
وبعاشر ناس للحياة بيكرهوا
كل اللي شوفته سواد مفيش نور
عاجز وكل الحزن هيعدي لو عرفت اعدي السور
معاق هينتهي كل حزنه لو بس عدي كل البحور
اول ما تحس انك مش مرغوب فيك
اخفي مشاعرك وامشي وفارق
فكرة انك تفارق شخص وتكون لسا بتحبه وتتخيله مع شخص غيرك..دي مهلكة
بدخل كل ليلة معارك جوايا بتنتهي بحدفي..في التهلكة
وبس بقا
كفاية بكا
انا عيني وجعتني
وللاحزان رجعتني.

للأحزان رجعتني

دنيا الهوج والمرج عاملة زي المراجيح
وانا بقولك كل دا وبكلمك ب دور الصريح
وبعد كل دا هتبقي نهايتي اصلا في الضريح    
وانا كدا كدا ميت وهفضل في حروبي الجاريح
بجري ورا الدنيا وانا بهمي الكسيح
 كل حاجة مصممة تهدك
وانت واقف لوحدك عادي
كل الاحزان مصممة تشدك
وانت واقف محتار وبتنادي
حتي البشر رفضت تساعدك
وكل محاولاتك وقعت علي الفاضي
اخر نفس في الدنيا
اخر شعور بالخوف
احساسك بأخر ثانية
وانك خلاص مش هتشوف
نزلت دموعه غصب عنه
ومشفش كل واحد منه
كل ساعة زيادة هتعيشها في العالم
هتلعن اليوم اللي اتولدت فيه انسان 
بتفسر الاحداث وبتزرع الامل زي العالم
وعامل همومك صوف ولسا بردو بردان
رغم اذية العالم ليك لسا كاتم وعايش دور المسالم
همومك لسا مطرداك وتحل اي هم حتي وانت سكران
سبت الحياة ومشيت وخدت معاك الصراع
مشيت وهربت من التوتر والقلق والصداع
تحس انك خلاص مش تايب
وكل مرة بتسحب الشايب
والحياة هي اكبر شئ عايب
الدنيا صعبة
والبشر مؤذية
وانت في كل دا مجرد لعبة
ولسا خايب
بطالب بالحرية
م عادي الصعب هينتهي وهيبدا من الاول تاني 
كل حاجة مؤذية هتغيب وهترجع منها تعاني
كل افكارك هتسحلك وهتتمني تترحم منها لثواني
مش عارف تحارب ل اخر نفس
والحزن بيتغذي بيك وطفس
واقف تعيط علي خيبتك
والنتيجة انك قليل الحيلة انت وشيبتك
ولسا مصمم تعمل من احضانك صوف 
وكل حاجة مش بتحكيها ودا مش عشان مكسوف
اصل الدنيا صعبة ولسا هتحزنك ولسا ياما هتشوف
بكتبلك كل يوم قصيدة
وبتردد ابعتها
تفكيري فيكي بيغير كل يوم عقيدة
وبضطر اني احرقها
حزنك خلاص طلع علي عينيك
وكل المر مش هتغيريه بايديك
بس انت بارع
بارع جدا في التمثيل انك تمام
تروح البيت تبتسم لاهلك وتخش تنهار قبل ما تنام
وتمشي وتفتكرها في كل ذكري كانت بينكوا في الشارع
بس متبينش انك زعلان ماهو اصل انت ممثل بارع
والناس عارفين انك بقيت شاعر
وميعرفوش انك مش بس شاعر بالقلم
وان انت شاعر بالالم
شاعر بالعدم
شاعر بالندم
شاعر بالاذية
ومتقيد
ومش شاعر بالحرية
كترت خلاص مراسيلي
عجزت وانا لسا ف اول سنيني
محتاج بس لايدك تمديلي
وتحسنيني بكل املي وحنيني
بتحرق في سجايرك
بدل ما تحرق في همك
انا اخر مرة شوفت ياسمين
كانت اخر مرة حسيت فيها بتحسين
كانت عادية وحلوة
كانت بسيطة وغنوة
كانت هي كل الدنيا
وخرجتك من الدنيا بغير ارادتك
وضيعت كل سنينك يا خايب
وسابتك وبتقول ان انت اللي سايب
وحسستك ان انت العايب
دول مش بشر ولا حتي بني ادمين
دول هما اساس همك وانك قاعد حزين
جربت كل الادوار وانا لسا ف اول حياتي
ألم البعد وبهدلت الحنين
واني فرحان وإني حزين
ملازمة العياط وإني احسن الصامدين
السكر وضحك الحرانين
السكر وعياط البردانين
الاستقلال واني من التايهيين
الخوف واني من السياسين
البكي وإني من البكايين
بس الشعور دا شعور جديد بالنسبالي
شعور نساني املي وكل احوالي
احساس الراحة مش هينفع اشتريه ولو بكل اموالي
ان كل مرة ببص فيها في المرايا واقول لكل دا كان مالي
واشرب سجارة وقهوة بن تقيل
تنسي حبه حبه الهم التقيل
بس شربك لقهوتك بليل هيخليك تسهر
وخوفك من الخسارة المفرطة هيخليك تخسر
ومراقبتك ليهم كل ليلة هتخليك تتقهر
وفاجاة تنتهي كل حاجة وبحزنك تنبهر
وشربك لسجاير الكتير هيبوظ صحتك
ويقلل وزنك
ومش هترجع لوحدك
هترجع معاك حزنك
كنا كل سنة بنقضي اليوم دا سوا من سنين
عدا كل دا وضيعتي في غمضة عينين
شوفتي فرقتنا الايام ازاي خلتني مش عارف اقولك حتي ازيك
كنا اقرب اتنين في العالم دلوقتي الناس بتفكرني إن انا اللي سايبك
لو بس كنت عارف انها اخر مرة اشوفك فيها
كانت كل حاجة هتختلف
لو كنت عرفت ان الليلادي كل حاجة هتختلف وهتنتهي
كنت هعيد كل حاجة من الاخر
واخليها من الاول تبدي
وهفضل مصمم اعمل من احضاني صوف
اصل الدنيا صعبة ولسا هتحزنك 
ومش هحكي كل حاجة ودا مش عشان مكسوف
اصل الدنيا مسرح ولسا هتحزمك
 ولسا ياما هتشوف..

ولسا ياما هتشوف

اهداء
لكل من معملش بالولاء
اهداء لكل واحد رفض يطلع في الصورة ورفض ذكر اسمه
لكل من سيطر عليه خوف وقرر حسمه
لكل واحد روحه طلعت لسما وفضل جسمه
للي بيتحمي في كل حد مات وعاش بحسه
اهداء لكل من عاش ومات مليون مرة ولسا حي
وميعرفش ان في لسا مر في الطريق وجي
اهداء لاحمد الطحان ومصطفي ابراهيم اللي مرفقني في سماعتي طول الوقت مع اني معرفهمش
اهداء لنفسي ولكل اللي كان نفسي يفضلوا جانبي ودلوقتي مبشوفهمش
اهداء للكلام والسكات ولشعر عم نجم القديم الاصيل 
الشعر جميل
بس انتي اجمل
النفس مش طويل
بس معاكي اطول
الوطن مش بري
بس معاكي انبل
الوطن مش كامل
ولو حولت تكمله تبقي اهبل
كل حاجة كانت سهلة وبسيطة ولطيفة لغاية اما كبرت
اي شي كان نفسي اعمله يقولوا بس اكبر واديني صبرت
وكل حاجة تعبتني ومعملتش اللي نفسي فيه واديني كبرت
واديني كبرت ولاحزاني بقول قدامها اني صغرت
ومش عارف اقول غير اني حتي عافرت
ولكل اللي اذاني قولتله اني خلاص غفرت
وكوباية قهوة وسجارة
ومشاعري واحاسيسي محتارة
وشوية اغاني للينا مختارة
وعقلي بيتصاد الحزن من قلبي بصنارة
الشمس بتطلع بالتدريج مع كل طلوع نهار
بكون قبلها والقمر موجود في انهيار
الليل مخلوق لينا احنا
واحنا مخلوقين لليل
واحنا مخنوقين بليل
مع كل طلوع نهار
بكون قبلها في الليل ف انهيار
مع شوية اغاني مختارة
تسمعها تكون زي الطير
اغنية من كلام ميدو زهير
الموت خد مننا شاعر
شاعر بكل اللي فينا بكلامه
ونجاح الثورة كانت كل احلامه
كنت معاكي زي عيل صغير بيغير علي كل اقلامه
ويشوفك في كل ابطال السيما وفي كل افلامه
وكنتي انتي مجرد كل احلامه
بس طلعتي في الاخر احلام
وكل اللي حصل واتقال كان مجرد افلام
وحتي حزنه عليكي ميتكتبش بحبة اقلام
كنت بحكي عن كل حاجة والخلق قاعدين سامعين
بس نسيت باب قلبي وحبي مفتوحين
ونسياني خلي عيوني اللي اتنين مفضوحين
مع اني كنت مببكيش ورب العالمين
لا برجع ولا بتقدم
كنت متعلق في النص بقالي سنين
والانتظار مش هيشفيك
والذكريات هتأذيك
والمراقبة هتمحيك
والحنين زي المرض كل ما تتعافي منه حد هيعديك
حتي الاشخاص اللي بتحن ليهم هتعديِك
وتفتكر ذكرياتك وانت لوحدك وذكرياتك تاثر فيك
وتتمني لو مرة
جيت علي بال حد مرة
وبصدفة حن إليك
وطلع كل ده في الاخر حدوتة مره
وطلعت متكتف رغم ان كل احلامي حره
واني غريب محتاج تعرفيني علي كل حاجة
عرفيني علي الاماكن الهادية علطول
ننسي الهم ونخلي باب الحزن مقفول
نحارب الغم حتي لو هيطلع الفرح مقتول
اكيد يعني الفرح هيفضل حتي لو فرح مقبول
عرفيني علي الصديق
اللي بيحلي الطريق
وعلميني اخبي الاحزان واواجه البشر ب السعادة
واسكت ومتكلمش غير كلام للافادة
وسلميلي علي الصحاب
اللي سكنوا في التراب
عرفيني علي الحقيقية
وحب في سنين وهجر في دقيقة
وإحرميني من سنين
نست الواحد هو مين
عرفيني علي الكداب والامين
عوديني علي البعد والحنين
رجعيني ع السفينة
لبلاد العجايب القديمة
فكريني ب الافراح الجديدة
اللي بتسبب الأحزان الشديدة
وواجهيني ب الحقيقة
بس في اقل من دقيقة
وخليكي بس انتي
معايا اينما كنتي
وخليكي عارفه
ان الوطن مش برئ
وخليكي شايفه
كل الطموح الجرئ
ومتقوليش اسفه
عشان الوطن رديئ
ورجعت تضايق من وحدتك
وقلة الناس حواليك 
وتقول مفيش بشر حبيتك
وانت اللي بتمنع الناس تقربلك بأيديك
تخيل كل القلوب اللي جرحتها من غير قصد سامحتك
وكل الناس اللي هجرتك لقيتها بتحن إليك
بس الايام بتتكرر
وطعم الاوقات بيمرر
وهمك يتعمل منه قوافل
وان كل ما الدنيا تبتسم
بابها في وشك يقوم قافل
وان مخك كل ليلة من التفكير بيتقسم
وانك بقيت شخص فاشل
بتعدي دقايق حزنك في ساعات
فاشل في صنع الذكريات
ومش فالح غير في شوية حاجات 
تبيع ذكرياتك اوقات
بس تسيب ذكرياتك المؤذية
انسان عادي بيلاقي نفسه
في دفي القهاوي القديمة 
واماكن ذكرياته المهينة
اللي بتجيب هزيمة
وبتولد لحظات حزينة
ومفيش حاجة في حياته كريمة
الا الاحزان اوقات
والتفكير ف الذكريات
ورجوعه كل يوم البيت
بانتصار جديد للهزيمة
ومفيش حتة في قلبه سليمة
ويكتشف
إن الايام بتتكرر
وطعم الاوقات بيمرر.

الوطن_مش_برئ

بيقول بعد ما شرب الزبيب الخام
هلفطت كلام
تحت تاثير الكحول والدخان
اوعك تفتكرني سكران
انا يدوب بواقي انسان
عايش علي كام خبره
ونهايتي هتبقي علي جرعة زيادة من الذكري
انا اصلا البشر هما اساس همي وحيرتي
بقيت عاجز ومحلتيش حاجة غير قلة حيلتي
اسمحلي بس بشوية دقايق اكلمك فيها عن خيبتي
همي محاوطني من اربع جهات
وبفضل احارب فيه طول الاوقات بالساعات
وبطلع بعد كل اخر معركة مهزوم
انا حياتي عاملة زي الحكايات
زي مره سيبت البيت لاهلي يومين من خوفي
روحت لقيتهم نايمين ومطمنين
ومش مهتمين لعدم وجودي
وزاد قدام نفسي كسوفي
شوفي
انهاردة اوجاعي كلها اتعرضت زي الشريط السينمائي قدام عيني
انا كل دقيقة بتعدي قدامي سنيني
والغريبة اني..
اني متأثرتش خالص
زي اني مليان بالكلام بس في شي ناقص
رحبت بالفرح ودعيت يجي وفتحتله ايدي من جديد
ضحك عليا من بعيد ل بعيد 
وشوقني ومجاش
وقالي متستناش
صاحبي المقرب مبقتش انا المقرب إليه
بقيت انا واقف بعيد وبشر غريبة هي اللي حواليه
بقيت في دوامة مع التكرار
امبارح هو انهاردة
وبكره هو هو امبارح
بقيت فايق وانا سارح
وسارح وانا في عز الانكسار
وتفضل محبوس في نفس الانحصار
لهفة يومية تجيلي للانتصار
وتحس ان حكاويك بقت فضايحك
بلاش تقولي نصايحك
انا بحارب لوحدي 
وانت مش متخيل قسوة الواقع
والحزن مش بالحجم
الحزن بالطاقة
ومفيش علاقة
بين انك استحملت
وغيرك لسا بيعاني
ومش شوية كلام منك
هقولك الكلام للحزن نساني
ومتقوليش انا عيشت ده في سنك
وياعم خليك بنصايحك حد اناني
انا بسال كل الطرق نفس السؤال كل يوم 
هو لسا مجاش مشتاق
بتدوري جوا في عقلي كل ليلة زي السباق
وببقي انا في صراع مع قلبي وعقلي
هل انا مشتاق ولا مش مشتاق
غيبتي وسيبتي حاجات كتيرة كانت مابينا
مشيتي وطبعتي جوا عقلي ايامنا وسنينا
سيبتي في عقلي صورة حضنك وايديك علي هدومي
ونسيتي رسالتك كل اول يوم اللي كنت ببدأ بيها يومي
وبقيتي انتي اساس كل حزني وهمومي
كنت دايما بتمني امنيه
اني مترجعنيش اي حاجة لو حتي اغنية
نفسي اعيش مع الافراح بحرية
ولسا عندي يقين اغيب من الحياة اللي مليش فيها
وهسيب شوية حاجات تفتكرني انا بيها
هتفتكرني دايما
ب الشعر الكنيش
والقصايد اللي بكتبها وغيرها مليش
واللي بيطلع دايما ويقع علي مفيش
واللي دايما يقفل الشباك ويسيب للهوا الشيش
واللي دايما بيمسك ومبيمشيش.

هلفطة كلام تحت تأثير الكحول

الليلادي افتكرت امبارح
ومين كان معايا في وقتها
فكرت وفضلت سارح
ازاي سنيني اللي فاتت سرقتها
وازاي ذكرياتي حرقتها؟
وفضلت بردو في دماغي
وليه حلمي سابني؟
وازاي فضلت فيه أبني؟
مع إني عارف ان غيري هيجي يحققه
طب ليه العمر خاني؟
وسلمني لفرحة البدايات
طب ليه محذرنيش من كسرة النهايات؟
وازاي مينبهميش اني هفضل فاكر كل اللي فات؟
وانه مش شئ هيتنسي مهما عدت الساعات
وازاي كان عندي صاحب معايا في كل الاوقات؟
وليه راح ومطلعتش بيه زي كل اللي فات؟
وازاي كان عندي صاحب لو احتاجني بعمري عليه ما اتاخر
وازاي الليلادي معرفش عنه حاجة كأنه من الحياة دي اتبخر؟
وقلبي من وقتها اتعود علي الفراق
كأنه للفراق اتسخر
ووقتها
متبقاش غير ذكريات خدتها
وعلب سجاير حرقتها ونفختها
وقلمي 
وكل اللي فات من ألمي
وكتبت بقلمي كل حاجة الا حاجة واحدة ونسيت
ان كل اللي هيجي هيروح مهما علي نفسك قسيت
وحسيت ان كل شئ راح بيتأخر
عمره ما هيعود
وان كل حاجة بتتبخر
حتي الوعود
وإن الوضع الحزين بيتسخر
مع عزف اول عود.

Mohamed Ali | محمد علي

Popular tracks