انتي ليه وازاي تسامحي قلب اقسي من الجبال <3

أوقات كتيرة بنمر بمواقف فى حياتنا .. 
المواقف دي بيكون لينا فيها تصرفات معينة .. 
أحيانا بنعملها بدون تفكير .. 
أو بإعتقادنا ان التصرف اللى عملناه ده هو التصرف السليم .. 
وإنه أفضل شئ ممكن يتعمل ..
لكن بعد مرور الوقت .. 
وإننا منحصلش على النتائج إللى عايزينها دي .. 
بنشوف إننا أخطأنا .. 
وقتها بيجيلنا إحباط وبنحس إننا فشلنا فى الموقف ده .. 
والأسوء من كده .. بنحس بالندم .. 

واحدة إرتبطت بواحد كانت شايفة إنه إنسان كويس .. وبعد فترة من الزمن إنفصلوا لأي سبب متعلق بيه.. وقتها بتحس بالندم على إختيارها .. 
واحد إستقال من وظيفته اللى كانت بتجيبله دخل ثابت .. لإن كان عنده حلم يبدأ مشروعه الخاص .. وبعد م إستقال وفتح مشروعه .. خسر .. وقتها كان ندمان على تصرفاته .. 

وغيرها مواقف تانيه كتير .. 
ممكن إنها تمر علينا,, ومنحققش فيها النتائج اللى بنتمناها .. 
بنحس بحالات من الإحباط واليأس .. وبنندم على تصرفاتنا .. 
نندم على الوقت اللى ضيعناه فيها .. 
وده مش أسوء شئ فى الموضوع .. 
والندم ده مش نهاية الطريق ... 
بالعكس خالص .. 
ده بداية لحالة من اليأس والإحباط .. 
وعدم الثقة بالنفس .. 
أصل الشخص اللى كل شوية يندم على تصرفاته .. بيحصل عنده نوع من الخوف من المغامرة والتجربة .. علشان ميضطرش يندم من جديد .. 
وبالتالى .. 
الخوف ده بيبقي قيد بيأثر على حركته وقرارته وإختياراته بشكل كبير .. 
وبعد كده تلاقي إن الشخص ده مش عارف ياخد قرار بنفسه علشان خوفه ده .. 
وبالتالى هيتحول لشخص إعتمادي .. بيعتمد على الناس اللى حواليه إنهم يختاروا ويقرروا ويعملوا .. ويكون هو مجرد شخص منفذ .. 
علشان كده ممكن تلاقي الواحدة اللى إتكلمنا عليها من شوية وإنها إختارت عريسها وإنفصلوا .. بعد كده هتعتمد على أهلها علشان يختارولها العريس المناسب .. وتوافق عليه بدون تفكير .. 
وتلاقي الشخص اللى كان متحمس إنه يسيب الوظيفة الأمنة دي .. وكان حابب إنه يغامر ويبدأ مشروعه الخاص ولكنه للأسف خسر.. بيدور على وظيفة ثابته من تاني لمجرد إنه كده هيضمن مرتب ثابت كل شهر حتى لو مش هتحققله الإشباع الذاتي.. 
وناس غيرهم كتير تلاقيهم ماشيين جانب الحيطة .. وعايشين بمدأ من خاف سلم .. 

لكن أكيد مش هي دي الحياة اللى الواحد بيتمني إنه يعيشها .. 
يعني هو أنا يا إما أعيش ندمان ومتأثر بتجارب الماضي .. 
أو أمشي جانب الحيط .. وأبقي شخص عادي عاش عادي وإتخرج عادي .. وإتجوز عادي .. وخلف عادي ومات عادي ..

أكيد الحياة مش كده أو كده .. 
هتقولي إزاي .. 
هقولك يا صاحبي .. 
انت دلوقتى لما تعيش تجربة معينة .. 
والتجربة دي محققتلكش النتائج اللى كنت بتتمناها .. 
هل معني كده إن الوقت ده راح ع الفاضي .. 
وإنك تعيش ندمان على تصرفاتك دي .. 
أو تندم على الوقت اللى راح فى العلاقة الفلانية .. 
أو فى الشغلانة اللى كنت فيها دي .. 
أكيد لا .. 
كل لحظة بتعيشها فى عمرك .. ليها تأثير كبير على حياتك إللى بعدها .. 
كل دقيقة بتقضيها .. بتتأثر بالعالم من حواليك .. 
وبتتخزن فى العقل اللاواعي .. إللى بيستوعب أكتر من 2 مليون معلومة فى الثانية الواحدة ..
بتسمع وبتشوف وبتحس بحاجات هتأثر على إسلوب وطريقة تفكيرك .. 
هخلي نظرتك تختلف للحياه .. لإنك إكتسبت مهارات ومعلومات جديدة مكانتش عندك قبل كده .. 
وبالتالى هتأثر على طريقة صنعك للقرار .. 

وبرده دلوقتى .. وانت بتسمع كلامي ده .. هتلاقي نفسك تلقائيا بتفكر في حاجات معينة بشكل مختلف عن قبل كده .. 
هتشوف زوايا تانيه من الموضوع هتأثر على عملية صنع القرار عندك .. 
وبالتالى التجربة اللى مريت بيها زمان دي مراحتش على الفاضي .. 
ده بالعكس إن إتعلمت من خلالها دروس كتير يمكن مش واخد بالك منها دلوقتى .. 
بس لو حصل وإتحطيت فى نفس الموقف مرة تانيه .. 
هتلاقي إن ردود أفعالك وتصرفات هتكون مختلفة .. 
يبقي ليه نندم على الوقت إللى عيشناه ؟!!


في رأي الشخصي أنا بعتبر الحياة دي زي لعبة الشطرنج .. 
عارفينها .. 
الأرضية المربعة دي اللى بيتلعب عليها بإستخدام قطع مختلفة الأشكال بلونين الأبيض والأسود .. وبيكون الهدف منها إنك تموت الملك عند خصمك فى اللعبة .. 
لعبة جميلة وبتعتمد على درجة عالية جدا من الذكاء .. 
انا بقي بشوف فيها الحياه اللى بنعيشها دي .. 
عندك هدف عايز توصله .. 
وعلشان توصل لهدفك النهائي .. انت محتاج تقوم بشوية خطوات صغيرة .. هتحرك عسكري معين .. أو هتاخد خطوة بالوزير .. أو الحصان .. أو غيرها من قطع الشطرنج المعروفة .. 
كل خطوة هتقوم بيها مينفعش تكون عشوائية .. 
لازم تكون مدروسة ومعمول حسابها .. وعارف إيه عواقبها ونتائجها .. 
وبالتالى إنت بتتحمل مسئوليتها لما تقوم بيها ..  
ولو حصل وعملت خطوة مش كويسة .. أو كان ليها نتائج غير اللى عايزها .. مينفعش إنك ترجع بالزمن وتلعبها بشكل تاني ..
زي حاجات كتير في حياتنا .. 
الكلمة اللى بنقولها وبتطلع من لساننا مينفعش ترجعله تاني .. 
الخطوة إللى أخدناها .. والوعد اللى وعدنا غيرنا بيه .. مينفعش نرجع فيه .. 
طيب بيكون إيه العمل وقتها ..
وقتها إنت مطالب بتحمل مسئولية الخطوة دي .. 
لا عتاب أو لوم أو ندم ممكن يرجع اللى حصل .. 
لإن الماضي خلاص فات وانتهي .. ومش بإدينا إننا نغيره .. لكن لو لسة عايزين نوصل للمستقبل اللى بنتمناه .. فإحنا بنملك الواقع حاليا .. 
أفعالنا دي هي اللى هتخلينا نصلح أخطاء الماضي ده .. علشان نوصل للهدف بتاعنا فى المستقبل ..
تخيل كده إنت ماشي بعربية وعايز تسافر من بلد لبلد تانيه .. 
 بس إنت جيت فى مفترق طرق معين .. وبدل م تدخل يمين .. دخلت شمال .. هتعمل إيه ساعتها .. هتكمل فى طريقك الجديد عادي وهتقول أكيد انا نصيبي كده .. ولو كان مكتوبلى إني أروح البلد الفلانية دي كنت أكيد هوصلها من غير م أتوه .. 
ولا هتركن العربية وتقعد تعيط وتندم على الخطأ اللى انت عملته ده .. 
ولا حاجة منهم هتخليك توصل لهدفك .. بالعكس .. ده إنت هتتأخر عن الميعاد اللى كنت هتوصل فيه .. ويمكن الليل ييجي وانت لسة فى مكانك وموصلتش .. 
أومال إيه الحل .. 
الحل إنك تعترف بإنك أخطأت .. مهو الإعتراف بالمشكلة ده جزء كبير من الحل .. 
وبعد م تعترف بالمشكلة دي .. هتبدأ تسأل هو انا ممكن أرجع للطريق التاني ده إزاي .. 
هل هتستخدم كوبري أو نفق يوصلك ليه .. ولا هترجع بالعربية لحد مفترق الطرق اللى دخلته وتغير إتجاهك .. 
شوفت إزاي إن الندم عمره م كان حل للمشكلة .. وإنه هو ممكن يكون المشكلة فى حد ذاتها ..

علشان كده النهاردة فى كبسولة النجاح بنقول لا للندم .. 
ولا لذكريات الماضي اللى بتأثر فينا بشكل سلبي .. 
الماضي ده حصل ومحدش يقدر يعدل فيه من تاني .. 
بس هو موجود علشان نتعلم منه .. 
وعلشان نقدر من خلال التجارب اللى حصلت فيه .. 
إننا نصلح في الحاضر .. 
علشان نوصل للمستقبل اللى بنتمناه .. 

وبكده نكون وصلنا لنهاية حلقتنا النهاردة من كبسولات النجاح .. 
لكن بكرة فى نفس الميعاد هنكمل مع كبسولة جديدة .. 
كبسولة يومية لحياة عصرية .. مع وائل محمود

07 كبسولة النجاح - ندمان

زهرة الحب للشاعر محمود رضا شعر رومانسي جدا

خرج مـ الدرج دفتره
نسي ياخد معاه
الواجب اللي حضره
ساقه كالعادة هواه
انه يغير تحت المروحة
منسيش كالعادة يبص
عليها من بعيد وهي مروحة
خاف جدا يكون دكتور
عشان ميدخلش المشرحة
حب جدا مع صحابه التهيس
نام فـ يوم ع سريره بالقميص
اكمنه كان تعبان من مشواره
اكمن ليله دايما يبدا بدري عن نهاره
اكمن شمسه بتغرب من الشروق
اكمنه بيسكر لجل ما يفوق
اكمن كل حاجة ف حياته مش مفهومة
اكمن وقعته ف كل معركة لقلبه
بتكون ليها مع واحدة تانية قومة
شكرا جدا البنج اللي خدره
راح بيه للقسم يشوف محضره
لقي السجن عليه محكوم
من قبل ما يمشي ويقوم
ويشوف حتي القاضي
فتح عيونه ع الفاضي
اكمنه كان متعشم اوي
انه يشوفها بعد الدرس
اتمني جدا يكون مـ الخرس
عشان يلاقي عذر لنفسه
لانه مقلهاش ع اللي حاسه
فـ يوم من نحيتها
كان بيقرب لباب بيتها
عشان يشم مرة ريحتها
اللي كانت دايما موانساه
لو عدت ف يوم من جمبه ا
العيل كبر وكبر معاه كلامه
كان من صغره باين ف ضحكته اللامة
برغم انه شاعر
وحب جدا منير
لانه زيه طريقه واعر
 الا انه بيحب يشوف صوركتير
وميحبش يقرا شعر
برغم فخره بالعشرين مليون واحدة
اللي عرفهم ف عشرين سنة
الا انه روحه الجاحدة ..
بتضعف جدا ف لحظة اشتياقه لواحدة
الوحيدة اللي معرفش يمتلكها
كل واحدة بالنسباله سلعة يستهلكها
كل حب ف حياته
كانت بيسبب لقلبه مماته
اللي حب واحدة بس منهم
وديه كانت فعلا معجزة
واوام خلت قلبه يموت
ومجتش حتي تاخد العزا
الاسم شاب طموح
السن : قلب عجوز
المدينة:روح حزينة
يملك :من الخيال كنوز
حبيت للخوف اكسره
خوفت اني اخسره
حبيت للدمع انزله
لقتني جاي منزله
وبتحايل ع الدمعة عشان تنزل  
لقيت الجفن شايلهالي كانها جميل
حتي الدمع بخيل
مرضاش ياخدني بالحضن
طول عمري بغني للرمان
وعمره ما جيه يوم ع حجري
لما قولت اني شاعر زمان
قالو ياعم شاعر ايه ..اجري
ليه لما احب اصون
 الاقي الماذون
خابت فيه الظنون
ويجوزها غيري
ليه ف وسط الحزن
بضحك ضحك هستيري
ليه دايما خلود ف تفكيري
يمكن عشان هي لسه فاكراني
ليه روحي مش واخداني
مع واحدة اعرف احبها بجد
 ليه مش فاهم دماغي حد
نفسي لما احزن الاقيها جمبي
تديني بوسة ع الخد
نفسي لو دمعت
الاقيها تشاركني بدمع
كـ مية السد
نفسي ف حبل ماينقطعش
عشان يكون من ايديها انشد 
نفسي افهم نفسي
 و الحق نفسي
قبل ما امشي طريق
اخرتوا اكيد معروفة
حبيتها عشان
اول ما قابلتها كانت مكسوفة
حبيت الحضن
اللي مضمنيش
حبيت ست الحسن
اللي مقبلتنيش
حبيت حبيبتي ! يمكن
او مثلت ع نفسي ! يمكن
حبيت جنية جات تسكن
روحي لقيتها محجوزة
حبيت واحدة روحها عجوزة
حبيت قصيدة كلامها مش مفهموم
جيت انام لقيت نفسي بقوم
انا زعيم مزعوم من زعامة خيال
انا حبيت بنت حافظ لبسها ف الشتا و طريقة حطتها للشال
انا حبيت مطرة كرهت من مدينتي الطينة
انا حبيت واحدة وانا وهي خبينا
انا اتجوزت روحي شرعا..وف نفس الوقت زنينا
انا لقيتك ف الحلم بتبكي ..صحيت
لقيت دموعك ع خدك
انا كنت مفكر مفيش هم قد همي
طلع مفيش هم قدك
انا روحي وقلبي ليكي ..
خديهم لو بدك
انا قلبي ليكي محجوز
لو في يوم يعني رجعتي
انا بقعد بليل افتكرك مع صوت فيروز
وانتي اكيد ف بعدك سمعتي
لان كلامي كله عليكي
انتي عارفة..انا وحشتني اوي عنيكي
انتي عارفة كام قصيدة انكتب ليكي
انتي عارفة اني بسببك بقيت شاعر
 و قلبي بقي داعر .
يخاف يحب تاني
فيمشي مع مجروح زيه وخلاص
انتي عارفة اني فقدت الاحساس
نحية كل الناس ..انتي مـ الاساس
اللي علمتيني ازاي احب
ازاي اسب للزمن..
عشان اخدك مني
انتي عارفة اني بكتب حزني بالجف
انتي عارفة ان قلبي زهق لف
فكان ليكي بيرجع
اتتي عارفة صح ان بعدك بيوجع
كام مرة من نارك اتلسعت
كام مرة خبيت حزن مكبوت
كام مرة من نصيبك اتوجعت
كام مرة دمعت من غير مايطلعلي صوت
كام مرة مت فيكي ..فخلتيني اعشق الموت
#محمد_المدبولي
لينك الصفحة ع الفيس
https://www.facebook.com/ShrNylyMhmdAlmdbwly

اعشق الموت_محمد المدبولي

شايل هموم البشر

GR & MK شكراّ ليكي يا أمي

تسمحيلي ياما من وقتك شوية

ابويا اللي سابني 
فـ ظهري تعبني 
وخد بعضه دوغري 
ومقاليش سلام 
هيرجعلي تاني 
عشانه وعشاني 
يطبطب عليا 
ويحضن قوام 
.
ويسألني مالك 
فـ اقوله مليش 
فراقك واجعني 
بدونك يا والدي 
مبعرفش اعيش 
فـ يفرد جناحه 
بوسع السما
ويظهر ملاكه
فـ صورة الافيش 
فـ امسك ف حضنه 
بـ قوه انما
بتخبط ايديا 
فـ كتفي اللى دايب 
وافتح عنيا 
بلاقيه مفييش
.
وامي اللي ساكنه
بروحها جنابه
ونادره حياتها 
لـ نظرة لؤاه 
مسيرها هتفهم 
وتحضن جنابي 
وتلمح ملامحي
فـ تبقي معاه 
.
واختي اللي سانده
ع جوزها لكن 
تكلمها ساكته 
عشان جواها ساكن 
فـ لو مره نطقت 
وقالت واحشني 
هتطلق عيارها 
وييجي داوشني 
فـ لما بتنطق
بتحضن عيالها 
وتقتل ضميرها
وتكتم واحشني 
.
بعد الفاصل 
.
اكيد هنواصل 
وقلبي اللي قاصر . وحالف يمين 
يأكل بناتك بعرق الجبين 
بيتعب عشانك فايته سنين 
وبرضه يعافر ويصرخ يناضل 
بيرجع وواخد الجرح المتين
وتنزف دموعه فـ تروي ضلوعه 
ويلعن فراقك وبيبات حزين 
.
مفيش احلام ولا ايام 
هترجع بينا للـ ماضي 
ومش راضي 
ادوق الفرحه من غيرك 
اعيش ازاي 
منيش نساي 
ده لحم اكتافي من خيرك 
.
يا والدي انا قلبي . طفح كيله 
بيشرب كل يوم احزان 
ويتعشم بـ اي كلام 
ويخطف فرحه كات تايها 
ويجري يديها لـ غيره 
.
علامك لسه بيعلم 
وحتي بدون ما تتكلم 
بحق تذاكر الأتوبيس 
وزنقتها ما بين الدبله وصباعك
وكيس الفاكهة المليان بخير الله 
والدنيا اللي سابت جرح فـ اصحابك 
لـ يطلع ابني متودك ع طباعك
.
بيخجل من سلام حوا 
ويزعل بس من جوه 
ويخلق ضحكه تتصدف 
ومتهونشي عليه الـ آآه 
ويعشق كل ما فيه روح 
كده لله . سلام الله 
سلام الله عليك يابا
سلام الله على دي دنيا كدابه
بتسرق روحنا فـ حضورنا 
وتخلق مـ الحضور اموات 
سلام الله عليك يابا 
يا اطهر اطهر الاموات 
بحق النومه ع كتفك 
واسمي اللي يليه اسمك
ومش بنسااه
معداش ثانيه وافتكرك 
وبدعيلك فـ كل صلاه
تكون مرتاح وحاجز قصر فـ الجنه 
تكون مرتاح وعايش بس تتهنا 
بتتعافا من المرض اللي كل جسمك 
تكون احسن من الصوره اللي بتجيني 
كل ما باجي افتكرك 
صحيح متخافش ع الاهلي 
برغم ان اللي ضاع منه كان الدوري 
لكن عادي . هييجي يوم وهنعوض
بنزعل بس .. 
ع الشئ اللي صعب فـ انه يتعوض
وانا مفوض . 
انا مفوض كبير الخلق يجمعنا 
بتسمعنا . بتسمعنا فـ وقت الضيق 
احمد قالي انك سامع
لما لاقاني ميت مـ الخوف
لكنه اجل الدعوه 
لـ بكره الصبح . 
بحكم ان احنا فـ الضلمه . 
هتسمعنا . ومش هتشوف 
فـ خدني من ايديه الناعمه 
وطلعنا . لـ اخر دور 
بنستنى النهار يطلع 
وصورتك فـ المكان تطلع 
تكلمنا . ونرد لاننا هنسمع 
وعهد الله ما بنسي شكل تكشيرتك 
فـ لحظه قسوه كات منك 
وقلبت ضحكه فـ الاخر وطمنتك 
امانه عليك يا شيخ ترجع 
بلاش ترجع . لكن سيب فـ المكان ريحتك 
وسيب بالمره فرد ايديك ع الاخر 
ونيجي انا وامي واخواتي ومعانا احمد
ونجري نترمي فـ حضنك

الشاعر محسن وحيد قصيدة خانة عذاب عن (الأم).m4a

Mohsen Waheed

Recent comments

احمد الطناحى

BaSma Ramadan

saleh afify

Related tracks