بتوحشيني بشكل مستقطع
فبقول كلامي بشكل عشوائي..
حبي وحده حبيبتي لا يشفع
اني بداري ف جعبتي الباقي..
الليلة ديا قلبي كالمصنع
بيضخ فيا الدم و الوحدة..
يسقيني كاسك / و الحنين ملفت
و بكرة جايز يزهق الساقي..

الليلة ديا عيني بتماين
و النيل فراشة و انتي فيه مركب..
هل ده مؤثر من وجع خمرة
و لا لا وعيي بيحبك المقلب..
فبأي نعمة قلبي لو مؤمن
هيسيب عنيكي ف حلمه ده و يهرب..

بطلت اغامر بالخيال و ما فيه
صورلي ما لا عين رأت قبلي..
كنتي القصيدة ف ندر و هوفيه
لينت سد من الكلام دابلي..
وصلت حبل الشوق مع الافيه
الضحكة قطعت صوتي من حبلي..

كان حبل دايب هزهولي الشعر
فبقيت بخَير نفسي و أنا مجبر..
أكتب اليكي ما يعول عني
فالبير هيوسع تحت رجلي أكتر..
أو أكتفي بسلامي و أغني
و أهو لا شريك ف النفع و لا منضر..
فأخترت يحضن قلبي عمق البير
علشان وقوعي يا حبيبتي أيسر..

و كإني آفة بتحضن المحصول
أو طعم بيراوض سمك زينة ..
بغرق فعينك يا حبيبتي و أجول
علشان خارجها .. بتغرق المينا..
فهل لو سألتك و السما جنبي
هتميلي علشان
تضمينا ؟!!!..

بشكل عشوائي

متقبل
و برجع بالزمن جهرا
و أشيل الحلم من جدره ، و مش مهتم..
و عيل بجري حافي فوق خدود وردي
و ببكي بحكمة فدموعي ؛ تنَقَط دم..

مليش في الحالة غير النَص
بدون أسباب تسيبلي أثار تشوهني
بدون كسر في دراع الشعر
يظهر غصب في الصورة..
كإن الشعر أب بنلتحف روحه
و روحه تملي مأسورة..

لا بنت في أول الشارع
قَضِت أسبوع تعدي جوه قلبي مسار مَتتخطاه
و لا صوتي بوجع صوفي يقول ، الله
و لا بري الالم ع النفس
هيترك شعر قد أرضاه
و لا جمعا و لا صحبة
و لا إفراد و لا وحدة
و لا حبي لدي الواحدة
شفيع يقدر يرد الدين..
كتير النفس يدخلها
و يفضل جوه اركانها
بيعشق زحمة الميادين..

متقبل

لو كان في عقولنا دفاتر
كان ممكن اكتب فيهم
عن صوت لو مرة سمعته..

وكإني مشيت في طريق
و بكيت و أنا بملا البحر
فضحكلي البحر وجعته..

أو صوت نبضات عصفورة
بتخاف م المطرة بنادق
و أنا و دني الشمع بتسمع
علشان فيها قلب زرعته..

أو صوت من بيتنا إياه
علشان حكاوية معاه
فعضامه الجير تتوجع
فيداري ف شرخ وجيعته..

................

لو كان في عقولنا دفاتر
كان ممكن بس ساعتها
هنقول النسيان نعمة

علشان فيه ناس بتروح
بتسيب فراغات ف الروح
و تسيبنا عيون مفتوحة
و تسيبنا ف حضن الشارع
و تسيب الشارع أعمي

و يكون الشوف مكشوف
ف النور و ملوش عنوان
وساعتها هنمشي أنا  وانته
و نحسس ع الجدران
و نخاف من خبطة ذكري
و نخاف لنقابل بكرة
وإحنا الاتنين عميان
نتحول لبقع سودة
و ساعتها الضل هيطمع
هننام ع الأرض مكانه
و الضل يصير إنسان

لو كان ف عقولنا ما يشبه
كنا هنعرف بالمللي
إن إحنا يا دوب أسماك
بنحب اللون الفاتر

و قلوب تتحمل ذكري
لكن مش حمل دفاتر

..لو كان في عقولنا دفاتر

قلبي الراكور

كان ممكن نفضل نرقص طول الليل

أنا مش جبان فعلا
ببدأ مناضل و انتهي سياسي
مملوكي لابس عمة عباسي
و إن سرت خلف مفارق المعني
فأنا لين عضامي .. ابن طين قاسي
الشعر مني أو إليا سبيل
ثَبّت ناس حراساه ببنادق بكي
عمدان كبيرة ف بيتنا للسماوات
منظرها ساخر مش مجاز تهلُكة
مكتوب عليها الصعود ببلاش
فاتحين دراعهم .. و الطرق مربكة
الصوت بيوطي / جرب التسبيل
عيوني باظت من طريقة البكا
ببكي كإني لن أعود خطاء
و بعود كإني ف منتهي الإجبار
ببكي و بسحب نظري عن نفسي
(تسبيح بيطلع من ثنايا البار)
فيه شعرة بيني و بين مضاف ليا
لأ
أنا المضاف و بلخبط الأدوار
معرفش أحبك غير بحرية
و أنا قلبي شائك / يبقي حبي حصار
معلش رايح و السكك جاية
و دي مش شجاعة
قد كوني حمار..

أنا مش جبان فعلا

و أنا نَفس نَفسي

الوقت

الليلة ماشية الناس و بتودع
ماسكين ؛ شنط ذكري ، عبارات وداع
مستنيين بكرة
 بخوف بكرة
و عشان نداري الخوف
مستنيينه بفتحة دراع..

من نظرة تانية
لشخص غيري ، بس يشبهني
بيمد زيي ف كل سكة بطيف و ضِلهُ..
كان مين في ضِلهُ بيستخبي
و مين فاضِلهٌ..
غير ضِحك طفلة ماسكة ايدها ف كف قلبي..
بتعدي جنبي الليلة ، حاسبي جراح ف جنبي..
أنا شفت بُعدٌك جيش بينزل ف الشوراع
و لقيتني ضلي علي الرصيف و أنا مستخبي..

عارفة العيال ف الحرب بتسابق حنينها!..
بيخبوا بكرة الحلو من وحشة سنينها..
و بيفتحوه مرة يشوفوا النور و يبكوا!..
و إنتي اللي إيدك نور بتبكي الضلمة منها
كان فين مكان ف عنيا يعني يساع حنينك !..
عارفاني أبيض ، شيب يا حلوة مش براءة
عدت سنين من ضهري متعدتش ليا ..
لا العمر حمل الحلم و لا حمل الجراءة
عشربن و زايد ع السنين أغمق ما فيا..
شايفك بقلبي ، عيني حاجباها الاضاءة
جايبالي وردة ف وسط دنيا البندقية..

عارفة الخُطى ف الأرض لو بور ، بتداويها..
ف يوماتي بتعِدي السنين و بتِجري فيها..
و بتجري فيا من المطر للطَرح الأخضر..
من حرب جارية لحرب جارية لحرب أخطر..
من كل ضَرب الدنيا ، نالت من عنيا
غمضت عيني للحظة حسيت اني خايف
و سمعت صوتك جنبي ، شوفت النصر و اكتر..

و عشان كدا 
متسموهاش اخر السنة ، سموها بكرة
ليلة ميلاد الجي كل الجي فكرة 
شنط الحنين اللي اترمت ع البر فاكرة
إن الصور هتعيش عشانك مش عشاني..
كل العقارب ف الساعات هتروح معادنا
كل الأماكن قفلت سكة بُعادنا
بتجيب قصايد صوتك المليان اغاني..
نضحك كإن الضحك مش حمل الوداع..
و ان شفنا بكرة
نحضنه بفتحة دراع ..

مُحْسِن

Popular tracks