Mstdfr Show 2018

استضفنا اليوم الكوتشز سيرين فتيح و عبدالله الصبان… صراحة الإستضافة ما كانت اليوم كانت قبل عشرة شهور بس أستروا ما واجهتم :) وأتكلمنا على تربية البنات في المجتمع العربي وتشجيع الأطفال بصفة عامة وبناء ثقتهم في أنفسهم. ودخلنا في كم موضوع ثاني على جنب زي ما عودناكم، وإذا عجبتكم الحلقة وحاببين تسمعوا أكثر لعبدالله وسيرين ممكن تتابعوا برنامجهم على شبكة مستدفر “بودكاست نقاش الكوتشز” إللي يناقشوا فيه قضايا شخصية واجتماعية ووظيفية في المجتمع العربي عامة والسعودي خاصة.

The MSTDFR Show

#080: كلام مدربين مهارات الحياة

حلقة اليوم طلعنالكم هي من خزنة الحلقات المفقودة! سجلناها في أغسطس ٢٠١٥ وبعد التسجيل أكتشفنا إنه الصوت كان فيه مشاكل وما قدرنا ننزلها. ولكن بعد سنتين وخمسه شهور قدرنا ننظف الصوت لدرجة شوية مقبولة وقررنا إننا ننزها اليوم. ضيوفنا كانوا الدكتورة أسماء مهرجي وعمير طيبة وخيرة بندقجي، واتكلمنا عن أشياء مختلفة من ضمنها كيف سماعات التيلفون تشتغل و كيف جهاز الأشعة يشتغل بشكل سطحي جداً. وكمان اتكلمنا عن الساعات الذكية و بعض البرامج التلفزيونية والأفلام زي Doctor Who و Interstar Galactica و Ghostbusters. ونتمنى انه الحلقة تعجبكم.

#081: حلقة مفقودة من ٢٠١٥

قد فكرتم في يوم من الأيام أيش ممكن يصير في العالم إذا التكنولوجيا أصبحت ذكية لدرجة إنها تسيطر علينا؟ يمكن الفكرة هذه تكون شوية غير واقعية… لكن بالوضع الحالي اللي إحنا عليه وطريقة تتطور الكمبيوترات وشبكات التواصل حول العالم، صارت الفكرة محتملة! عمار اليوم أستضاف صديق البرنامج علي الزين للمرة الثالثة وأتكلموا على بعض أشهر ألعاب الكمبيوتر إللي أتحولت إلى أفلام، وبعد كدة تطور الحديث ووصلوا لنهاية العالم… كيف؟ ما نعرف… بس أسمعوا الحلقة عشان تعرفوا أيش اللي صار وقولوا لنا إذا تتفقوا مع كلامهم أم انكم ضده تماماً.

#082: ت" تعني تمرّد تكنولوجي"

كلمة “الواقعية” هي حاجة نسمعها دايما وعادة ما ينطلب مننا تطبيقها في حياتنا اليومية. لكن أحياناً تكون النظرة الواقعية في بعض الأمور حاجة سلبية وتقتل أي طموح وأحلام ممكن تكون عندنا.

واقعياً… البودكاست في العالم العربي مشروع فاشل! واقعياً… شخص واحد ما يقدر يغير العالم! واقعيا… الرسم والفن ما حيأكلك عيش! واقعياً… ما تقدر تسيب الجامعة وتصير ممثل!

هذه كلها جمل سمعناها كثير واحنا صغار ولمن كبرنا، وعمار اليوم مع عمر ضياء وعبدالله رافعة أتكلموا على معاناتهم مع “الواقعية” وكيف كل واحد فيهم تحدى مجتمعه وحول أحلامه لواقعه.

#083: خلينا ما نكون واقعيين

وأخيراً… وبعد غياب… عمار ورامي أجتمعوا في استديو مستدفر وسجلوا حلقة مع بعض بعد قطعة لأكثر من شهرين! واليوم أتكلمواعن فكرة برنامج جديد بيشتغلوا على إنتاجه وحبه إنهم يشاركوا معاكم الفكرة وياخذوا أيكم فيها. البرناج الجديد عيارة عن بودكاست علمي للأطفال، والفكرة أبطالها خريجة جامعة ذكية ومخلوقين فضائيين إسمهم دقّس و أمبة. والبرنامج أستلهم من من عدة برامج علمية للأطفال مثل بودكاست (Wow in the World) وبرنامج (Beakman’s World) التيلفيزيوني من التسعينات. ومن ضمن الأشياء الأخرى اللي أتكلموا عليها مسلسل كوميدي أمريكي من السبعينات عن مخلوق فضائي يزور الأرض (Mork & Mindy) وافتتحوا الحلقة بسيرة الأستاذ القدير حسن كراني، واذا تبغوا تعرفوا ايش دخل حسن كراني في الهرجة… أسمعوا الحلقة!

#084: دقس و أمبة و كوكب رقم-٣

أغلبنا كبر على حكاوي غريبة كانوا الكبار يقولوا لنا هي… حكاوي عن وحوش مختلفة ممكن تطلع للأولاد والبنات إللي يسووا شقاوة! أمنا الغولة، النمنم، حمارة القايلة وعافية ربي. ولكن كبرنا واكتشفنا إنه كلها كانت تخريف! وكمان كنا نسمع حكاوي كثير عن الجن وعالم الجن الغريب اللي كانوا “على حسب الروايات” في ناس بينخطفوا له وما يرجعوا… لكن لحظة… إذا مارجعوا كيف وصلتنا الحكاية؟ ماعلينا، اليوم شاركنا الحديث صديق جديد… أخونا مِهاد كاشف وكمان صديقنا القديم عبدالله رافعة وأعطونا من أكياسهم شوية.

#085: !حمارة القايلة جاية تاكلكم

حلقة اليوم كانت حلقة عشوائية بتسجيل مباغت! كنا جالسين وفجأة المكرفونات أشتغلت وسجلنا حلقة… كنا حتى جيعانين وطلبنا أكل (ووصل في وسط التسجيل) وبالتالي بدأنا بالكلام عن الأكل وأنواعه اللي نحبها واللي ما نحبها. بالذات عمار إللي غالباً ما يحب أغلب الأكلات. ومن هناك دخلنا على قوانين الأدب والاحترام بين الكبار والصغار واللي بقدرة قادر أتحولت إلى كلام عن التخصصات في الجامعة وعلاقتها بالوظائف المثمرة والشغف الشخصي. وفجأة لقينا نفسنا بنتكلم عن الجنة ونعيمها وقعدنا نتخيل أيش كل واحد ناوي يسوي هناك، وبعد كدة أتفلسفنا شوية عن الإستماع للإنتقاد والنصائح من الآخرين وأنهينا الحلقة بحوار عن المبالغة في الإعلام والبلبلة الإخبارية… ألخبط من كدة… مافي :)

#086: ريحة اللبن عفنة ولا مو عفنة؟

مؤخراً كل ما نكون في فعالية معينة… يجي أحد منكم يا مستمعينا الكرام وتقولوا لنا قد أيش انتم تحبوا البرنامج وتشكرونا على الشغل اللي بنقدمه. وصراحة في العادة ما نعرف كيف نرد على هذا الحب غير اننا نقولكم انتم شكراً انكم بتسمعولنا وشكراً على دعمكم لنا. لكن في نفس الوقت الشيء دا خلانا نفكر في قوة الكلمة والفكرة اللي كثير مننا كصناع محتوى ما نستوعبه! وفي المقابل تتضح لنا حجم المسؤولية اللي تقع على كل كلمة نقولها… لكن هل من المنصف أننا نحط هذه المسؤولية على نفسنا؟

#جلسة مصارحة مع لوحدي :087

This episode was recorded on May 16th 2017... and we forgot about it and decided to release it.  If you don't understand what we re taking about in the beginning of the episode, go back and listen episode #067.

We are still trying to cope with remote recording and scheduling  issues. 

Today we talked about Net Neutrality, the latest worldwide online virus threat, using technology on airplanes and gaming. 

As well as some personal catching up.

#088: (دوبامين عبدالله رافعة (رحمة الله عليه

كثير من الآباء والأمهات مع الانشغال ينسوا انهم ياخدوا شوية وقت من جدولهم المشغول ويقعدوا يتكلموا مع أولادهم. فقررت اليوم أقعد أدردش مع ولدي سارية (آخر العنقود) وأخليكم تشاركونا الدردشة. سبحان الله كل مرة أتكلم مع واحد من أولادي أكتشف شيء جديد عن شخصيتهم.

#089: يا سارية خبرني

هل الأفلام الأجنبية في السينما السعودية حتتدبلج للعربي؟

هل اللهجة تأثر على أداء شخصية في فيلم أو مسلسل؟ 

أيش السن المناسب للأطفال إنه يكون عندهم حسابات في شبكات التواصل؟

ليش الناس بتتابع حساباتنا الشخصية؟ وليش يلغوا المتابعة؟

هل تربيتنا لأولادنا بتسلب منهم شخصيتهم؟

ليش كنا شاطرين في الإبتدائي وصرنا فاشلين في التوجيهي؟

عبدالله يبغى يعرف أيش جمع كلمة “شيبس”؟

#090: شبسات و لباينة و سعاودة

في ٢٠١٥ قعدوا عمار ورامي مع عمير طيبة وقعدوا يتكلموا على بعض المواضيع التقنية:

ليش اليوم كثروا مستخدمي أجهزة آبل أكثر من أول ما بدأوا؟

ليش في “Viruses” على الإنترنت وأيش بيستفيدوا الناس اللي بيسووها لمن 
يسووها؟

أيش يعني "هاكينج" وهل هو شيء سلبي؟ أو ممكن يكون شيء إيجابي؟

هل نظام الدراسة اليوم في المدارس والجامعات مفيد لنا اليوم؟ أو ماله داعي مقارنة باللي نتعلمه في الشغل؟

ليش أصلاً بنروح ندرس في الجامعة؟ هل هي وجاهة؟ هل فعلاً لحب التخصص؟

#091: مين قال إنه كل "الهاكينج" غلط؟

مع دخول السينما السعودية، وضع صناعة الأفلام الآن أختلف في البلد. والساحة صارت مفتوحة لجيل جديد من الفنانين والمبدعين في مجالات الإخراج والتمثيل والتصوير وكل ما يتعلق بصناعة المحتوى الترفيهي بإنه يتطور ويلاقي جمهوره في بلده. وبالتالي اليوم أجتمعنا مع نادية ملائكة وعلي الشريف وخالد يسلم، مجموعة من الممثلين السعوديين اللي دخلوا عالم التمثيل خلال السنوات اللي راحت وأتكلمنا على مستقبل المهنة في البلد وكل واحد فيهم أعطانا شوية من خبراتهم ونصائحهم.

#092: تكي هنا وأكتب التدوينة الأخيرة

لسكان مدينة جدة… أيش أحسن المطاعم اللي عندكم؟

اليوم قعدنا مع صديقنا أحمد درويش… أحد مؤسسي مجموعة
 “The Foodies SA” 
وأتكلمنا معاه عن الأكل في جدة والموضات المختلفة اللي بنشوفها في
 السوق اليوم. ومن ضمن الحديث سألناه عن أفضل المطاعم من وجهة نظره وقلنا على إختياراته لأفضل المطاعم في جدة اللي تبيع: ستيك، بيتزا، همبرجر، شاورما، أكل هندي، دجاج بروست، مناقيش، فول، طعمية وختمها بالسوشي.

#093: ياكلك حبة حبة... أكل الهمبرجر

رؤية ٢٠٣٠… سمعناها كثير وكل التغييرات اللي بتحصل في البلد مبنية على هذه الرؤية، المشكلة إنه كثير مننا ما قرأ أي شيء عن الرؤية وما عندنا أي فكرة عن أبعادها وحدود التغييرات اللي ممكن تحصل. وفهمنا للرؤية حيساعدنا كشعب إننا نكون جزء من التغيير وعنصر فعال في التحويل الإيجابي. وعشان كدة قعدنا اليوم مع الدكتور محمد حكيم والدكتور المهندس هاشم الزين اللي حاولوا يشرحولنا الرؤية بشكل مبسط عشان عمار بالذات يقدر يستوعبه. أسمعوا الحلقة وقولولنا إذا كان الشرح مفيد وواضح ودقيق من وجهة نظركم.

#094: رؤية عشرين ثلاثين صارت واضحة عشرين على عشرين

مو كل أفلام الكرتون أتعملت للأطفال… في أفلام كرتون أنتجت للكبار فقط! وواحد من أفضل هذه “الكراتين” هو المسلسل الأمريكي “ريك آند مورتي” إللي مبني في عالم خيالي مليء بالمتعة والكوميديا والإختراعات. وفي نفس الوقت… في بعض القصص الخيالية اللي صنعت للصغار والكبار على حد السواء… زي “الكوميك بوكس” أو القصص المصورة اللي أتعرفنا من خلالها على شخصيات زي الرجل العنكبوت وسوبرمان وكمان سلاحف النينجا. اليوم جلسنا مع راكان كدسة وعبدالله رافعة اللي أستدفروا معانا على بعض هذه المواضيع، إذا انتم من الناس اللي يحبوا أفلام الكرتون والكوميكس… الحلقة هذه حتعجبكم، وإذا ما كنتم من عشاق هذا العالم أسمعوها على أي حال يمكن تلاقوا شيء يعجبكم.

#095: هيا بينا نكون شويفتي هنا

فريق مستدفر يحب يهنئكم بمناسبة عيد الفطر ويقولكم كل عام وأنتم بكل خير… ولأننا آخذين إجازة اليومين هذه حنقدم لكم حلقة مسجلة مسبقاً في ٢٠١٥ وهذه أول مرة أي أحد يسمعها! ضيوفنا في الحلقة كانوا علي الزين وسندس الزين وخيرة بندقجي. الحلقة كانت أغلبها باللغة الإنجليزية (في أول أيام البرنامج الإنجليزي كان غالب على حلقاتنا) وأتكلمنا على بعض “الناس” اللي بنقابلهم في الشارع كل يوم وتصرفاتهم عادة “مشي حالك”. وبرضه أتكلمنا عن إستخدام برامج تخزين الكلمات السرية اللي بتستخدم في الإميلات وحسابات المواقع وشبكات التواصل الإجتماعي. طبعاً رامي عنده فلسفة خاصة في الموضوع وقلنا أيش أفضل الطرق إللي ممكن نحمي بها حساباتنا الشخصية.

#096: "ث" تعني ثور تائه في برسيمه

كأس العالم ٢٠١٨ كنا ننتظره بفارغ الصبر لأنه بعد سنين عجاف أخيراً وصل منتخبنا الوطني السعودي لتصفيات كأس العالم مرة أخرى. ومو بس كدة، كمان حنلعب المباراة الإفتتاحية مع روسيا وكمان المباراة حتكون ليلة عيد الفطر. وفعلاً لعبنا المباراة الإفتتاحية وقبل ما أهل سدير يشوفوا هلال شوال ويعلنوا العيد… قرروا لاعبينا إنهم يجيبوا العيد بنفسهم أمام الفريق الروسي بخسارة مضحكة مبكية بخمسة أهداف نظيفة. ما صدقنا العالم بدأ ينسى خسارتنا أمام ألمانيا بثمانية أهداف، نقوم نعيد تذكيرهم  بمستوانا “الرهيب” في إفتتاحية كأس العالم. وعشان نفضفض شوية قعدنا اليوم مع “اللبة” مؤسس حساب كورة جول عشان نعرف أكثر عن أيش اللي صار، وحابين نقول لكم إن كورة جول ممكن يساعدوكم في حضور أي مباراة كرة قدم في أي مكان في العالم. وممكن يوفروا لكم تذاكر المباريات وتذاكر السفر وحجوزات الفنادق بأفضل الأسعار. وبإذن الله مع بداية مواسم الرياضية الجديدة، كورة جول حيقدموا عروض خاصة بمستمعي مستدفر، فتابعونا على شبكات التواصل الإجتماعي لمعرفة التفاصيل.

#097: معاك يالأخضر في اليوم الأسود

مع إن مدننا فيها الكثير من المميزات اللي تفتقر لها كثير من المدن حول العالم… دايماً نطمح للأفضل. ومع إنه الكثير مننا يعيش في هذه المدن وزار عدد من المدن الأخرى حول العالم، في بعض الأشياء اللي شفناها وعشناها في مدن ثانية نتمنى إننا نشوفها في مدننا. لكن أحياناً نحتاج نظرة إنسان متخصص في مجال العمارة وتخطيط المدن عشان يقولنا ليش بعض المدن ينقصها الكثير، وليش بعض المدن الأخرى تبدوا متكاملة. وعشان كدة قعدنا اليوم مع المهندس هشام ملائكة عشان نعرف أكثر عن مدننا وتاريخها المعماري. وشاركنا في الحديث الدكتور ساري صبان والمهندس عمير طيبة. للأسف كنا نتمنى إنه مهندسنا عمار الصبان يكون معانا في هذه الحلقة بالذات بحكم خبرته في المجال، لكن الأخ في إجازة.

#098: ياريت عشان خاطر مدينتك

وهذه آخر حلقة قبل الحلقة رقم ١٠٠ من بودكاست مستدفر… محنا مصدقين كيف الوقت جري وحنخلص ١٠٠ حلقة! وبهذه المناسبة حنسمعكم تكملة لواحدة من حلقاتنا القديمة. حلقة رقم ٨ اللي سجلناها في أغسطس ٢٠١٥… بعد ما خلصنا تسجيل الحلقة كملنا النقاش كمان نص ساعة. التسجيل هذا أول مرة أي أحد يسمعوا من ثلاث سنوات وكان معانا فيه عمير طيبة و فيصل العسيري، واتكلمنا فيه على مواضيع كثيرة من ضمنها العلامات المسجلة وبراءة الإختراعات وهل تعتبر شيء كويس للبشرية أو لأ. وهل تشوفوا ويكيبيديا مصدر موثوق يعتمد عليه؟ وقد أيش ممكن نثق في كتب التاريخ؟ لأنه في الآخر التاريخ يكتبه الفائز والأقوى، والخسران والأضعف مالهم رواية.

MSTDFR Podcasting

#099: أبرئ ذمتك وخذ براءة إختراعك

بودكاست مستدفر هو برنامج إذاعي سعودي من تقديم عمار ورامي يأتيكم كل أسبوع فجر يوم الأحد من مدينة جدة ويقدم لكم حوارات عصرية  وترفيهية وثقافية مع مجموعة من أبرز العقول في مجتمعنا اليوم.

ونقدم لكم محتوانا بشكل عفوي وصادق من قلوبنا إلى عقولكم