كلاسيكيات   - ابو العلا البشري

الحب المثالي

لو كنتى استنيتى شويه

كلمات واداء :- محمد سعد 
Music: Parting Lover - Yasser Farouk

www.facebook.com/KAMOOG


Zekriat Hob Fat - Mohamed Saad | ذكريات حب فات - محمد سعد

م الكون الضخم المتقسم بحر وديان
للقارة السمرا المليانة اشكال و الوان
لبلدنا اللي النيل ف جبينها بيزرع بستان
لمكان وسط القاهرة مأهول زحمة وسكان
للبيت اللي ف زاويته قاعدة اجمل
 واحده باجمل فستان
وبتملي مكان ف كيان الشاب التلاتيني
بهدي ل تالت المرة النص اليها
وبسيب ف ايديها جواب
ف بدايته وحشتيني
ولو كل اللي عارفينك قالولك ان خاب املي
ولو كل الظروف حالفين تفارقيني
وحشتيني
ويوحشني اللي من ريحتك
ولو ورقة
واحب الجاي من طرفك
ولو طلقة
واغير من اي شئ لمسك
ولو شعري
واسامح اي شئ منك
ولو باعني
تودعني الحياة
ومتمناش ف يوم صورتك تودعني
يا وردايه ف جبل روحي
يا اول شمس ف الدنيا
يا شئ well done
يا only one
يا زوجتي الاولي و التانية
معايا حتي ف غيابك
ومش شغلاني اسبابك
شاغلني انك لازلتي بخير
وده معناه بان الدنيا لسه بخير
وان الزهر هيفتح علي غصانه
وان النورس الشارد هيتمتع بشطئانه
وان خيالي هيطاردك باحضانه
ويطلق في سماكي الطير
شاغلني انك لازلتي بخير
ميشغلنيش سوي انك تكوني
كيف ما اقول عنك
وتبقي زي ما ارضالك
وتديني الحياة فرصة اسدد بعض افضالك
ولو كان فاضلك الاكبر بانك يوم قابلتيني
وحشتيني 
وتفضل فيا ذكراكي نسيم عابر
يا اجمل حاجه ف الاشعار
واجمل حاجه ف الشاعر
يا ست الجهر و الاسرار
يا ناعمة و الطريق واعر
بحبك مهما طال البعد
وقلبي عند نفس الوعد
وحتي الفعل من غيرك
كان بنعمله مع بعض
لا عمر نسيت تاريخ بينا
ولا ريحة ولا ذكري
بنام بالليل وكلي طموح
باني المحك بكرة
بتمحي غيابي بوجودك
وايدك تحضن الاوكرة
بقول لو حتي فات العمر
وصرت مسن ف السبعين
تساعني نظرتين عواجيز
وتكفي ضحكتين شايبين
ونسمع حاجه من فيروز
تاخدنا ليوم ما شوفتيني
وحشتيني ولو عيروني بغرامي
وقالوا عليا عايش وهم
اكون الايد إذا كيوبيد
بيطلق ف اتجاهك سهم
ولو عيروني بغرامي
ولو قالوا يعيني حرام
عشقها الواد وتاه فيها
هتبقي غصب عن عينهم
حياتي واغلي معاليها
ولو قالوا ده سحراله
وعملاله عمل بالشوق
ولو قالوا ان انا اتجنيت
بقسوة او بصنعه وذوق
فلو ده سحر انا قابل
ولو ده جنان انا قابل
ولو حبك اثر خمرا
محبش افوق
واه انتي نقط ضعفي
واه حبك علي عيوبك
واه ضلك
واه قلبي اللي فاضلك
واه ديما بطبلك
واه باشارة محسوبك
كلامهم عني مش فارق
ومش هفقد امل ف رجوع
مفيش مواضيع اقولهالك
غير انك وحدك الموضوع
وان حياتي نقصاكي
وقلبي سابني و معاكي
وان عنيا شيفاكي
فاول كرسي ف يميني
بتدي ضحكي للدرويش
عشان يلقي وحشتيني
فلو كل اللي عارفينك 
قالولك اني منفعكيش
ولو كل اللي عارفينك
قالولك بكرة تنسيني 
وحشتيني !!

عمرو حسن - وحشتيني ٣

وحشتيني 
ولو كل اللي عارفينك قالولك اني مانفعكيش 
ولو كل اللي عارفينني قالولي بكره تنسيني 
وحشتيني 
ولو كل البشر قالوا ان انا عاصي 
واني غلطت ف حياتي غلط ياما 
ده واد تلفان وكل يومين معاه واحدة 
وحتى فلان زعل وياه عشان واحدة 
انا أصلا مانيش يوسف 
ولو زوجة العزيز همت 
وقالت هيت لك ياجميل 
يجوز راح اميل 
وممكن اضمها جهراً
يسيل من ضحكها نهراً 
تدوب الاغنيات ف النيل 
لكن مهما هاشوف وهاطوف ومهما قابلت ناس وظروف 
هتبقي لوحدك القشة اللي جيت علشان تنجيني 
وحشتيني
مافيش انسان مالوش ماضي 
مافيش راجل مالوش أخطاء 
لكن دايماً ف نقطة ضعف 
ونقطة ضعفي هي انتي 
وطول الوقت كنت باقول 
انا مابقتش عاوز شيء سواكي انتي 
باحس معاكي اني مسيح 
براءتك عاملة زي الريح 
بتكنس ف الغلط بهدوء
وبابقي ف ضحكتك سكران 
ومش عاوز لا انام ولا افوق 
وكان فيه حل والله 
وكان ممكن اكون بالوقت زوج صالح 
ماليش ف المسئولية ساعات 
ساعات طايش 
لكن بالوقت كان ممكن اكون احسن 
تسامحيني ف غلط فالت
وهاحلفلك بإني هاصلح العدلة التي مالت 
بلاش تمثيل عشان أصلاً 
صياعتي وفشلي من غيرهم
ماكانش يجوز تحبيني 
وحشتيني
ف كل مكان ف ذكرى معاكي متسابة 
ايديا ف ايدك الطفلة باعدي معاك ف الشارع 
ملامحك وانتي بتسمعي فيروز 
نهارك وانتي بتواجهيه بشاي بحليب 
وحكاياتك على صحابك 
فلانة بتكرهك جداً 
فلانة قالتلي ماتشوفيهوش 
كلام قولتيه وكان لازم 
ف وقت الجرح ماتقوليهوش 
اكيد دلوقتي بتقولي 
زمانه مولع الدنيا 
بيغلط كل يوم عادي 
خلاص فاكك بقا ومرتاح 
وانا والله ف قيودك 
كطير من كتر ما اتقيد 
طلعله جناح 
انا ف البعد متحاوط بطيف ريحتك 
ولسه لحد هذا الوقت فاكر شكل تسريحتك 
وتنهيدك 
وشكل الساعة علي ايدك 
طريقتك وانت بتغني 
بعيد عنك حياتي عذاب 
حياتك ايه بعيد عني 
يا دنيا عرفتها فجأة 
وارض لمستها بشويش 
يا أطهر من رقم فلكي 
ف عداد اسمه أكل العيش 
بتحكمي ليه على غيابي 
وف حضوري بتنسيني 
رفضتي ان انتي تتسابي 
وفجأة انتي اللي سيبتيني 
وحشتيني

وحشتيني

جوابي ده الأخير ليكي 
يامعاليكي 
ياست الحسن 
ياسبب الحزن والعلة 
ياشجرة حسبتها ضله وطلعت نار 
بداية القول : مساء الفل ع الأزهار على خدودك 
مابنجرّحش 
ومابنسمحش حد يقول كلام عنك 
لذلك ثم أما بعد ،
أنا الطفل اللي كان ف عنيكي متشعبط 
يشوفك روحه تتلخبط 
وقلبه ابن الحرام يضعف ويستعبط 
كإنك زار وانا الدرويش
كإنك غار وانا الحرافيش 
كإنك كنتي قرش حشيش 
دخل رئتيني وملاني 
كإنك دار وانا اللي ماليش 
سوا الدار اللي لمّاني 
بغض الجرح مين خان مين 
ومين قصّر مع التاني 
وغض الطرفْ عن اسمك 
وطعم خروجه ف لساني 
أنا مليّت من القصة ومن لعبة خلاص لسه 
لقيتك غيمة ف حياتي حسبتك مطره قمت جريت 
وفجأة لقيت مفيش غير ليل 
سحابة ضلمة كنتي انتي
اشوفك ف الوجع بنتي 
واحسك ارضي وسفينتي 
وشمس بتملا ليلي شروق 
مافيش كام يوم لقيتني بافوق 
واشوف القاتل الفعلي 
لقيتك أرض ماتضمش سوى المطاريد 
وانا عيل بيفتح إيد يشوفك خط على كفه 
عنيا عيال اذا بصيتي يتدّفوا 
حسبتك أم بتدوّر رحى الأحضان على عيالها
لقيتك ماسكة كاتم صوت 
رصاصك فات وجع جواي
وهو ياحلوة يعني الموت
بيفرق شكله كان ازاي 
وهو الجرح للستات ومش لينا ؟ 
ما فيه رجالة بتعيّط 
وفيه رجالة بتفكّر ف عز الليل ف ناس باعوا 
وفيه راجل اذا فات ف المحيط وجعه مابيساعه
وفيه عناوين بتتلخبط 
وفيه بكره بيتشخبط 
وفيه أطفال مايتولدوش ف مستقبل ماجاش قدام 
وفيه زفة مابتقومشي 
وفيه فرحة مابتدومشي
وفيه نغزة ف صميم الروح 
ما دام ف القصة فيه دابح 
أكيد ف القصة فيه مدبوح 
ولو كان القتيل راجل 
ف دمه بيبقي مش بالسهل 
خسرتي معاه وجود الأهل 
خسرتي الضهر والضمه 
خسرتي الجمع واللمة 
وبكره هتندمي لما 
تحسي البرد من دونه 
ياريتك شوفتي ف عيونه دموع الأب 
أنا الشخص اللي كله ذنوب
لكن مليان حاجات تتحب 
ــــــــــــــــــــــــــــــــــ
عملت حاجات لأول مرة بعملها 
وكِملِت أغنيات بيكي 
لأول مرة اكملها
اشِمِّك ريحه وانا ماشي وأقول ماشي
واكلّم ربنا عنك وجع وغروب 
عكستي المشهد المكتوب
ماكانش الفيلم دي نهايته 
كده الكاتب لعب ف النص
وفيه لزق ف حياتي وقص 
وفيه تركيب لناس تانية 
فيه مشهد خارجي مش محطوط 
أنا وانتي 
ومطرة بتغسل الشارع من الاحزان 
حضنتيني زمان ومكان 
وقولتيلي مافيش غيرك 
نزلت ف لحظة على ركبي وانا ف ايديا كام وردة 
ضحكتيلي 
وطبطبتيلي علي خدي 
كانك كنتي بتعدي على قلبي بروح حافية 
مسكت الدمعه بالعافيه وضميتك ف عز البرد 
لقيتني الفيلم بالكامل مافيش ولا لقطة ماسك ورد 
طلع فيه حاجات بتتصور 
بتتقصقص من المونتاج
وأول ما المطر لمسك 
لقيتك دوبتي ف المكياج 
عروسة حلاوة أو صورة 
ملامح فازة مكسورة ف اخر جزء ف الذكرى 
خسارة تكمّلي بكره 
يا نور ساطع بيعمي العين ما بينوّرش
انا هافضل كده عيّل ومابيكبرش 
وبكره يجوز تقابليني ف أي مكان 
هاشوفك وقتها دخان 
بقوة ست هاعشقها ف زمان تاني 
ولمسة طفل يشبهني مايشبهكيش 
انا جوايا كام ميّت وحابب اعيش
لا هاتحوّل 
ولا هارجع من الأول 
ولا هاكتب عشانك شعر 
هبيعك دون نظر للسعر 
مكانك وردة ماسقيتهاش ف دبلت من خريف موجوع 
دموعي رصيد باحوش فيه لناس مستاهلة مني دموع 
وحلمي معاكي م الأول 
خطيئة لابد اكفّرها 
رميتك طفل ببراءته 
ندم على حاجة وكسرها 
يا أسوأ حلو كان فيّا
يا أطيب شر ف النية 
كسبت حاجات تسيء ليا 
وجه الوقت اللي انا اخسرها . 

كمان : بدر مصطفى
ناي : محمد مصطفي
ايقاعات : كريم صلاح 
كيبورد : صهيب النجار
تسجيل : من حفل الساقية اكتوبر 
رؤية موسيقية الفنان محمد مصطفي 

جوابي الأخير - من حفلة الساقية 2015

اللى قرر يحب بعقله ويخلى قلبه على جنب 💔


مابتحبكش 
بتتعب ليه وتزرع أرض مش أرضك 
وليه سهران 
وليه قلقان ومش نايم
وليه قاعد وليه قايم تجيب ف سيرتها ومشاعرك تسيل ع الارض ! 
مابتحبكش والله
وكل اللي اتعمل بينكم حكاية وقت مش اكتر 
كلامك كله كان عادي 
ووردك مرمي ف الشارع من الشباك 
بتضحكلك وتبقى معاك 
وتحلفلك تكون وياك
وبعد ماتمشي بتسيبك تاريخ مهجور 
حكيت وياها عن نفسك فتاجرِت بيك 
واديها ياسيدي بتعايرك باسرارك وبعياطك قصاد منها 
تجيب سيرتك واخبارك وتسبكها بدموع عينها 
ولا صانت كلام بيبنكم 
ولا قدرت تراعي حتى حلفانها 
ياراجل ده انت علشانها 
بقيت واحد ماتشبهلكش
مابتحبكش
بتبني ف ايه ؟
بتنكر ليه كلام واضح كضي الشمس 
بقالك قد ايه مشتاق 
لواحده كان لقاها فراق 
وكنت معاها طفل كبير 
حكيت للكل عنها بدون ماتتكلم 
وكنت تشوفها فتسلم 
وكنت تشم بارفانها فتعرف دارها ومكانها 
وتعرف كل الوانها بلمسة ايد 
ادي العيل ف وصف العيد 
لا نفع الشاي ولا الحكايات 
ولا الاحلام ولا البدايات 
ولا الحواديت ولا السلامات
ولا الحرُمات
ولا حتى الكلام بينكم
ف اول لحظة تختلفوا تهين ضلك 
وتشتم فيك 
وتدعي عليك 
ولا بتقول ده كان طيب وكان فيه بيننا ضحك دموع 
ولا بتقول ده صان وجعي ولا حافظ على المجموع 
مسافة ما الكلام بيموت بتنسى كل شيء له أصل
وتترك للمشاع سيرتك 
بتعمل ايه ؟؟ 
ياخي والله عيب فعلاً 
عشان امك ياخي حتى 
عشان حلمك 
عشان لو شفت ف مرايه انعكاس صورتك ماتتعرِّش وماتوطيش 
يادنيا رخيصه مابتديش 
لواحد حد يستاهله 
يشوف الشخص لما يعيش 
نتيجة موقفه وجهله 
نصيبك وانتي من أهله 
هموم الناس مابتضحكش
مابتحبكش
شكلك زفت 
اديك وعرفت
ف ايه ردك ؟
كفايه خيابه من حدك 
كفايه سنين بتتسرسب عشان ولا شيء 
مافيش ف الدنيا حد يبيع وهو بريء 
مقامك وسط كل الناس مقام عالي 
ووزنك في عيون اهلك دهب غالي 
وروحك نجمه بتلالي وقلبك ناي 
رميت نفسك لقلة قيمة بس ازاي 
طلع خوفك عليها ف عينها ضعف شديد 
وقربت بمشاعرك بس هي بعيد 
خيالها مريض بناس عدّوا 
بتتلذذ ببيع وجعك على الرصفان 
وتيجي انت وبتسامح بأي ضمان
لا والأعجب بتطلع منها غلطان 
وتطلع حد مش شاري 
كإن العرض كان ساري يومين بالظبط 
لا منك غِبت ولا قرّبت 
وادي الأيام بتثبتلك وبالاوراق 
غلط نظري ف نظرك فجأة ع الأشياء 
قعدت كتير عشان تفهم وربك شاء 
تضيع أحلى ما ف عمرك عشان انسانه ماتحسكش 
مابتحبكش صدقني 
مابتحبكش.

شكر : ستديو زين داوود 

مابتحبكش

متعتذريش القصيده الكامله
من ديوان لما كنا 
معرض الكتاب 
2017

الكلمات 

متعتذريش .. لا حبك آخر الدنيا ..
ولا وجودك سبب لحياه 
انا فـ " مآساه " .. 
بحاول أجمل المشهد 
و أمثل انى مش مهزوز 
" شبح أراجوز "
مركب وش على وشه 
عشان ميبانش ايه جواه
 
لا هشحت إهتمام تانى ..
ولا هطلب حنان لله 
انا كويس ..  كده أحسن
ومش هنكر ساعات بحزن
و أحن لكلمه متقاله ..
وذكرى و صوره ورساله 
فمتحاوليش .. تكونى ضحيه 
فـ القصه ..
و إوعى تصدقى الحاله
ده زى ما فيه بنات إتكسروا بسببنا 
فـ ياما بنات كتير حاولوا و نجحوا
فـ كسر رجاله 
وياما بشوف من الدنيا 
حاجات اغرب من السيما 
وربك برضه ليه حكمه
و ليه حسبه و تقسيمه 
و انا اللى مشيت و انا مآمن 
وسبت مشاعرى و اطمنت 
نسيت ان البلاء وارد
وقد يأتى فـ هيئة  "بنت "
انا يا حبيبتى مش تمثال
و ليا شعور و بعرف احس 
و اتأثر 
و قلبى ازاز .. 
يعور لما يتكسر 
متتخدعيش فـ كام ضحكه 
بخبى الحزن جواهم 
ده لو بصيتى جوايا 
هتلقى الحزن متفسر 
و تلقى الجرح ساب فيا 
علامه الوقت ممسحهاش 
وممسحكيش 
متعتذريش ! 
متعتذريش .. 
و صلى جنازتى وياهم ..
قصاد القلبه حطى الدبله و إدعيلى 
و قولى كان مريض و إرتاح 
كفايه نواح .. 
على القلب اللى شافك ورد 
فـ وطى لجل ما يشمك 
قتلتى قتيل ؟! .. و ايه يعنى 
فداكى .. خلاص و لا يهمك 
مسير اللى إتكسر 
يتلم .. مسير اللى اتقتل هيعيش 
متعتذريش .. 
ساعات الإعتذار بيهين 
ويجرح قبل ما يداوى ..
سلالمك كلها تعابين ..
و انا معرفش أكون حاوى ..
يا حبل إتلف بالتدريج على رقبتى 
و انا من طيبتى سبت الحبل عـ الغارب 
بنبعد مهما نتقارب .. و أشوفك غلطه و أستمتع 
بطعم الغلطه فـ بعيدك ..
يشاء ربك .. بإن الطيب الغلبان 
يبطل طيبه على إيدك ..
 
برائتك .. شكل من بره 
ديكور بيدارى سوء طبعك 
و انا مقلبش أكون تابع 
و خاتم تلبسيه فـ صابعك
انا راجل .. و ليا كرامه لو راحت 
حياتى تروح 
 وبابى لا عاد لا متوارب ولا مفتوح 
ومهما تحنى و تنادى 
خلاص باب الرجوع اتسد
بكيت بعد الفراق ؟! .. عادى
بكيت على نفسى مش على حد
معدش ما بينا شئ فاضل 
عشان نرجع نقول يا حنين 
ده لو نزلت دموع راجل 
ينضرب الوجع فـ اتنين  
مفيش راجل مبيعيطش لو فارق 
الفكره بس ان احنا بنخبى 
معرفش ببكى عليكى ليه و إزاى 
معرفش ليه وعلى ايه بتتحبى 
يوماتى عـ الله بسأل نفسى ..
ليه انتى ؟!
و ليه بالذات  
و كان فين قلبى  و انا مسحوب 
لتيارك 
و كان فين عقلى و انا بغلط 
و بختارك
وداخل جنتك عشمان ..
أتارى جنتك .. نارك
مخدتش بالى انك " وهم " 
مشيت عكس اتجاه السهم 
و قلبى اتذل و إتعلق بأكتر حبل كان دايب 
انا اللى اتسابت طول الوقت 
عشان مرضيتش أكون سايب 
رضيت أطلع فـ حدوتك بدور الحاضر الغايب 
 و أحبك من طرف تايه 
وراكب قطر مبيمشيش 
متعتذريش .. عشان و الله مش فاهمك 
و مش قادر أحدد موقفك بالظبط ..
براجع كل تفصيله .. 
مفيش فـ القصه حلقة ربط ..
مفيش حبكه .. مفيش ربكه 
مفيش فـ القصه دمعة عين 
 و قبضة قلب أو قهره 
أكيد فيه حاجه مش ظاهره 
تعالى نبص عـ المشهد .. 
نراجعه من الألف للياء ..
نشوف مين فينا كان مشتاق 
و مين قصر .. ومين إهتم 
و مين نايم بكل برود 
ومين سهران يعيط دم 
أكيد حبك مهم .. أكيد 
لكن يعنى كرامتى أهم 
فـ كان من حقى أقول همشى ..
و أقول سبتك لكل الناس 
و انا كداب ..
صحيح سبتك انا لكن 
انا المتساب ..
انا المتساب بأفعالك .. 
و إهمالك .. 
و إحساسى ان فى حياتك 
مجرد طيف ..
و ساكن جوا منك ضيف 
لا ليا حقوق ولا كرامه 
و عايش بس من غير صوت 
وطول الوقت بتذلل 
و بشحت كلمتين حلوين 
فـ آخر اليوم ..
عشان أعرف انام مبسوط 
بقول سبتك لكل الناس و برضى غرورى 
وسطيهم .. و انا جوايا نار قايده 
" مفيش فايده " .. بكابر قد ما بكابر 
و قلبى من الحنين مفضوح 
قريب وغريب .. يبص فـ عينى 
فيشوفك بكل وضوح ..
و لسه انا تحت تأثيرك .. 
ومش شايف بنات غيرك 
لكن أصبحت مبشوفكيش 
متعتذريش

أشعار : محمد ابراهيم 
رؤيه فنيه و توزيع : الموسيقار محمد معانى 
تسجيل و ميكساج  و ماستر : كريم حسن
فوكال : محمد الشبينى _هاله حسن 
ناى : أحمد أبو المجد 
باص جيتار : باسم معانى 
اليكتريك جيتار : أحمد طارق

شكر خاص 
" آيه عماد الدين فؤاد "

متعتذريش

محمد ابراهيم _  "متعتذريش " من ديوان لما كُنا

هشام الجخ - حظك كده - الديوان الأول

قصيدة " غير متاح " 

كلمات وإلقاء : محمد إبراهيم
عود : سعد العود
بيانو : شادي ابراهيم

غير متاح - محمد ابراهيم

أغنية " اسمي " للمطرب ادهم سليمان 
وقصيدة " بتحلوّي " للشاعر محمد ابراهيم

محمد ابراهيم وأدهم سليمان - اسمي & بتحلوّي

بالنسبة لواحد زيه اتوفّى اتناشر مرة بأساليب مختلفة 
واترمى ف الأوضه لحد ما ضاقت روحه عليه 
بقى صعب يواجه أي مشاكل من نوعية امتى وليه 
بقى كل مشاكله تخص المزيكا 
مواعيد السينما وطعم الشاي ، درجات الطقس ونوع الأكل وتمن الوحده 
والبُعد لاخر بُعد متاح 
انما موضوع تتعب علشان ترتاح 
مابقاش له معنى مع الصدمات 
فلسفة فارغة 
وكإنه حوار بين واحد وصديقه اللي ماجاش 
مسألة الموت أملاً ف حاجات تتعاش بتخلي الواحد يضحك على نفسه
بيقول : 
" يومياً باطلب قهوة زيادة عشان البنت اللي انا ماعرفش مكانها 
بافتكر الفايت وبافكّر كان مين ساب مين " 
يتأمل ناس بقوا بني أزمات مش بني ادمين 
يتذكّر نصه اللي اتسحّب منه 
وازاي بقا واحد بيعيط بس ف مكانين 
ويقول بحنان معجون بحنين :
" واحشاني حبيبتي ومش هانكر ، وواحشني كلامي معاها بجد ، بقى مرعب انك تتعلق وتعلق مفاتيحك مع حد ، تتمشى مكان ما انتوا مشيتوا ، تتذكّر ساعة مابكيتوا ، وتخش السينما وتنسى فتحجز تذكرتين ، الكون بقا شيء مضروب ف اتنين "
يتنهد ويبصلى فجأة ويكمل بهدوء شخص حزين : 
" للدرجة اللي تخليك وانت بتشرب سكر معلقة واحدة 
اول هي ماتيجي ف خاطرك تتناسى وتشرب معلقتين ! "
كان طقس بيشبه هبه طوجي ف تراك " لابداية ولانهاية "
والدنيا فلاش باك التفاصيل 
نسيت سجايرها ف يوم عنده وهو مبطّل من ست سنين 
لو كان ممكن بايديه مثلاً انه يبطلها مع التدخين 
كان ممكن جداً يتحسن 
بس الادمان درجات ياما 
أعلاهم إدمان الغايبين 
بيقول والخمره ف ايده بتطوّح : 
بقى فين أيامنا وليالينا 
حكاوينا وشوقنا وغناوينا 
كان لينا ايدين بتشبّك قدام الأيام 
بقت الأيام بتشبّك بُعد ف ايادينا
ويحط الكاس على طرف البار 
ويزيح بايديه كل الموجود 
" ادي اللي كسبته معاك ياحليم ، مفقودٌ مفقودٌ مفقود " 
بعدها بينام زي ماهو 
ودموعه تسيل منه لجوه 
فتغرّق روحه عياط مدفون 
مش كل جراح شرطها ف جروح 
ولا كل البكا تلزمله عيون
شُفت يا صاحبي 
الورد اللي انت مشيت تلاتين كيلو علشان تعرف تتأسف بيه 
امبارح شُفته ف مدخل بيت قاعد خايف 
اترمي بايدين ناعمه وبارده 
الورد اللي انت فضلت تكوّن فيه وردة بوردة 
اتوفى الصبح من الإهمال 
شُفت ياصاحبي 
وفضلت احرّك فيه علشان يتهز ويرجع لحياته 
انما كان قرر يتحول مزيكا ماتسمعش نصايح 
الحب ازاي كله فضايح
وازاي الجاي أصبح رايح 
نفس الشخصين بقوا أي اتنين غير نفس اللي زمان اتقابلوا 
هي ف آخر العالم يمكن 
يمكن دلوقتي بتتعرف على شخص جديد 
ف مكان بيقل رومانسيه عن أول مطرح يجمعهم 
يمكن بتحط ف ماكياجها علشان سهره 
او نايمه ومش حاسه بحاجه 
يمكن ناسية ومش محتاجه بحد يفكرها بعهد قديم 
او يمكن زيه ف طرف البار بتعيط على حس حليم
ادخل بيته 
ابيض واسود من بيت ألوان أيام هي ماكانت ساكناه 
كان بيها بيقعد مع نفسه كان زي لوحده وهي معاه 
يادي المعاناه 
الكل اتورط كده وياه 
البيت اللبس الطفايه ، الشجر الميت ف المأساه
الأكل هدومه القصافه ، الفازة البارفان اللي معاه 
بقا كل جماد له روح وحياه 
الليلة 
لقيته بيتمشى ف شارع كان ليهم فيه قصه 
لحيته أطول من خوفي عليه 
كان ماشي بيتطوح وايديه فيها سجاره بعد مابطلها لست سنين 
دخل المطعم قلقوا القاعدين 
قاله الجرسون : 
كل ده محجوز 
وقبل ماتنزل منه دموعه 
مال على رجليه وبرق للنور 
بقا ميّت بعد ماكان مكسور 
ادي الفنان 
وادي الجمهور 
ادي اللي ماجاش ف خيالها اهو كان 
قتلت انسان 
كسرته بالبُعد وبالخذلان 
واتكاترت على نفسه همومه 
ماقدرش يكمل بقا يومه ريّح وارتاح 
ادي المايسترو 
بيموت ف مكان فيه مزيكته والناس سمعاها ومش سامعاه
فيه يوم هتخشوا عليا البيت 
تلاقوني مشيت 
من غير اسباب ولا شرح عبيط 
قالي وانا نسيت 
واديني باقول 
احترموا المتعوّر من دول 
حاوطوا المهموم قبل فراقه 
ان كان ساكت يبقى لأسباب
اوعوا تشيلوا ايديكم م الباب 
املوا حياته بحب وأحباب 
قبل ما يدبل قدام عينكم 
وان شوفتوا حبيبته ف يوم بينكم 
خلوها تكون عارفه مقامه 
وانها عدت من قدامه وخلته مقتول بغياب أعمى 
ملعونه ايدين مجرمة ناعمه 
مادتش الفرصه لحد يعيش 
مع انه اتوفى قصاد منها اتناشر مرة 
واترمى ف الأوضه لحد ماضاقت روحه عليه.

المايسترو

بقيت عادي 
كإني ديكور 
مابتكلمش عن حاجة ومابعلقش
ومبكدبش حد ف شئ، ومبصدقش
ومش مهتم بالدنيا ولا بالحرب
ومش باحزن علي الرايح ولا الآتي 
ومش حابب ادخل حد ف حياتي 
بقيت مبقتش من ساعة وجع ف الروح
ولاشرير ولاطيب ولاحساس ولا سادي
بقيت كما طيف
بقيت كما ضيف
بقيت عادي
ع الحال ده بقالي زمان
بقالي كم سنة يمكن
ماحدش منكم خد بال
روبوت تشغيله بحجارة
وطول ماحجارته فيه شغال
شجر أخضر مابيجرحش عين الناس
فانوس بيقيد ونوره سبيل 
ده مش تمثيل
ولاتطويل ف مشهد ما
لكن أسلوب وشكل حياة 
فماتلومنيش ع غيابي انا موجود
فاعيادكم
واحزانكم
صديق ف كفاية بيسرح ف اللي ضاع منه
شريك منزل 
نزيل غرفة 
وجع بيبص من الشرفة 
انا موجود ومش بفسد فرح بينكم
ولابزعل قوي منكم 
انا علي غير ما جوايا
مهرج باسعد الشلة
وصاحب إفيهات حاضره
وعامل لجلكم حضره
تقولوا ف وصفها الله 
فلو وجعاكو كلمة اه هابطلها 
يومين عزلة واكون أحسن
وهارجع تاني للشكل اللي كان بادي
انا عادي 
فخد راحتك
وقول عني اللي بتقوله
انا وكتير من الناس اللي بقوا زيي
مابنقربش من العالم عشان يحلو
ومابنفسدش ابداً جو
ومبنأذيش
لكن بنخاف من التجديد
من الناس اللي بيخشوا الحياة فجأة
وبيفاجئونا بوجودهم
عملنا سياج علينا عشان
ماتتعشمش ناس فينا
ف كل مساحة تلاقينا
نميل لأغاني شتوية
ولون غامق ف لبس عتيق
ريحتنا بيوت فارقناها
وهدومنا ناس قلعناها
وسميعة
بنعرف نكرم العالم ونقراهم
مبنملش من الحكايات
ولينا ف كل صدر نبات
ولينا الجدعنة الكاملة
ماننساش عيد ميلاد صاحب
ومبنبخلش بالمواعيد 
جدير بيكم تساعدونا 
تغنولنا .. وتحكولنا .. وتسقونا
يجوز دون قصد تحيونا
وتدون امل ف الضئ
يجوز نتراضي علي روحنا
ونتطمن لبكرة الحي
يجوز بالوقت نتطمن 
ونرجع نبتسم عادي.

وما أدراك ما الفوبيا

الشاعر هشام الجخ 
قصيده متزعليش

هشام الجخ - متزعليش.

حاجة كدة زي الشعر ..
أداء صوتي لـ : محمد فاروق ..
ومونتاجه وتظبيطه أيضا

وكتبها حاتم عرفة
تقدر تقراها على صفحته على الفيس بوك من هنا :
http://www.facebook.com/note.php?note_id=251117048232826

للأعمال الأخرى لـ محمد فاروق ممكن تتابعها من هنا
https://soundcloud.com/mfmaegy-1


فاكرة لما كنتي حلوة أوي

وهم
أداء وكلمات: محمد هشام رجب

FB: https://www.facebook.com/lllHlll
Youtube: http://bit.ly/3cfJnuv

وهم - محمد هشام رجب


أيوه بغير
لا انا نقصان ولا ضعفان
ولا مسطول ولا سكران
ولا زايغ من عيني الضيّ
ولا حد احسن مني في شيّ
بس بغير
 
واللي قالولك غيرة الراجل
قِلّة ثقة او قلة فَهم
خَلْق حمير
 
غيرة الراجل نار في مَرَاجِل
نار بتنوّر مابتحرقش
واحنا صعايدة بنستحملش
شمسنا حامية وعِرْقنا حامي وطبعنا حامي
واللي تخلّي صعيدي يحبها يبقى يا غُلْبها
 
اصلنا ناس على قد الطيبة كلنا هيبة
والنسوان في بلادنا جواهر
 
طب لو عندك حتة ماس
حتخلّيها مداس للناس؟
ولا حتقفلي اوضة عليها بميت ترباس
يمكن حتى تأجري ليها جوزين حراس
 
يبقى انا لا انا جاهل ولا غافل
كل الفرق ما بيني وبينك اني صعيدي
ينعل ابو ده اليوم الاكحل اللي لا ليه اخر ولا أول
اللي طلعت لقيتني صعيدي
 
لو كان بايدي كنت اعملك هندي بريش
واقلب شعري كنيش كرابيش
والبس لك سلسلة متدلدلة خرزة وقلب
بس ازاي البس لك سلسلة ؟ هو انا كلب ؟
 
ثم العبرة ماهيش في اللبس
أصل المشكلة مش فى اللبس
أصل المشكلة عندك .. عندك
قلت حاسيبها وبكرة تحس
بعده تحس.. بعده تحس
ده انا لو جبس كنت زعقت
 
ماشي صداقة وماشي زمالة
بس ماجَتْش على الرجالة
ماهي نسوان الدنيا كتير
وانا ما بقولش تخاصمي الناس
ولا تِتْحِجبي عن الرجالة
ولا تعتكفي وتسكني دير
بس يا ريت حبة تقدير
اني بحبك  واني بريدك
واني زرعت حياتي في ايدك
واني غزلت بنات الدنيا عقود على جيدك
واني تعبت من التفكير
واني بغير
 

pom

Mona Amer