من كلماتى : نبيل عبد الحميد و ألحان : هانى عادل
وسط البلد - حفلة ساقية الصاوى 21 فبراير 2013
-----

عقارب ساعتي تتسابق مع اللفات
تخطّي الخطوة تتقدّم 
ولا ترجعش ..
يمُر العٌمر في اللفة ورا اللفة
و فاكر نفسي في اللفة
ولا بكبرش ..
يادوب ألحق ألّم الفرح فـ دقايق
و أقول للوقت يتأخر
ميتأخرّش ..
و تجري الساعة فـ الأيام تخلّصها
و مهما أصرخ
عقارب ساعتي مبتسمعش ..
و أروح على فين ..
لانا عارف لفين العُمر راح بيّا
و لا عارف
أجيبلى عُمر تانى منين ..
أنا طفولتى و كُل اللعب كان ساعة
و باقى الوقت متردد
ما بين و بين ..
أنا إللى ساعتى خدعتنى بـ دايرتها
خدت ويّاها أوقاتى
فـ غمضة عين .. 
تدور بيّا وماسكة فـ إيدى بالقوة
و أبُص فـ قلبى من جوه
أشوفه حزين ..
يدوس عقرب على أملى و يتجرأ
و عقرب تانى بيفرّق
ما بين إتنين .. 
يخطّى الخطوة يتقدّم
ولا يرجعش ..
و مهما أصرخ
عقارب ساعتي مبتسمعش ..

لـ نبيل عبد الحميد

Wust El Balad - 3a2areb Sa3ty

فى حادث قطار أسيوط - نوفمبر 2012
---------------------
من كلماتى : نبيل عبد الحميد
ألحان : أحمد مصطفى
غناء : هانى عادل و أحمد مصطفى
-----
http://youtu.be/1NqmV8VK9Es
-----

السيّد فخامة الرئيس .. 
ابنى مات ف الأتوبيس .. 
ولا باقى منه حاجة
غير شوية كراريس ..
و شنطة فاضية
و ساعة واقفة
و بقعة حمرا ع القميص ..
أمه راحت لما سمعت
ان روحه الطاهرة طلعت
و ان مبقالهاش ونيس ..
هعمل ايه أ أنا بالفلوس
خد فلوسك وهاتلى ابنى
كان نفسى أشوفه ف يوم عريس ..

#نبيل_عبد_الحميد


Hany Adel & Ahmed Mostafa - فخامة الرئيس

من كلماتى ( نبيل عبد الحميد )
ألحان و غناء : محمد طارق
فى عيد الأم 2013

Singer: Mohamed Tarek
Lyrics: Nabil Abd El Hamid
Composer : Mohamed Tarek
Arranger : Mohamed Abd El Wahab
Sound eng : Islam Ghallab
Violin by : Hesham Amer
Producer : Nada Khozam
Social media expert : Osama Mostafa

القصيدة كاملة
---

أيوّة يامّه إزّى حالك 
عامله إيه ؟ ..
ألف حمد و ألف شُكر
يامّه صوتك واطى ليه ؟ ..
لسا برضُه زى مانتى
زى طول عُمرك ما كُنتى
شايلة بيتنا بإللى فيه ..
يامّه بكفاية إللى فات
من تاريخ ما أبويا مات
و إنتى ضهرك محنى يامّه
لمّا حِملّك زاد عليه ..

لسا فاكر يامّه صوتك
لمّا كُنتى بتقوليلى
إنى أروح و أشّد حيلى
كان فى حُزن بتُسْتُريه ..
شُفت حُزنك من سكوتك
خُفتى يومها تشتكيلى
بس خوفك كان دليلى ..
قاللى ع إللى خبيتيه ..

كُنتى شايله هم سفرى
همّ بُعدى و الغياب
كُنت سايبك للعذاب
كُنتى راضيّة برضُه بيه ..
رُحت وأنا حالف عليّا
إنى لازم أبقى حاجة
لجل ما تحتاجى حاجة
م الزمن و الحوّجه ليه ..

يامّه جايلك بُكره بدري
جاى و هفضل بين إيديكى
جاى أسدّد دينى فيكى
إللى كُنتى بتدفعيه ..
يامّه أنا جايلك و واقع
شوقى ليكى فوق كتافى
جهّزيلى حضن دافى
و مدّى إيدك نزّليه ..

يامّه قولى عايزه إيه ؟
عايزه أجيب ويّايّا فرحة
ولّا أجيبلك توب بـ طرحة
تدعى ليّا و تلبسيه ..
لولا يامّه ظروفى خالفه
كُنت أجيبلك و أشتريلك
عافيّة بيها تشدى حيلك
عُمر تانى تعيشى بيه ..

Law b2eedy - Mohamed Tarek - عيد الأم

" إنتباه "
من كلماتى ( نبيل عبد الحميد ) .. - ألحان و غناء : محمد تميم
مهندس الصوت : إسلام غلاب  - ستوديو 1

صفحتى على الفيس بوك - قلم رصاص
www.facebook.com/pencil.writer
إنتبــــــــــاه ..
كُل واحد كان مفكر
إنه برّه الإشتباه ..
قال كلام فى أى حتة
كلمة من أى إتجاه ..
كان مفكّر إنه صايع
قال و مش فارق معاه ..
النهاردة جالُه باسم
كُله يلزم الإنتباه ..
إنتباه
حُط يا باسم عليهم
إكشف المستور و عيش ..
و إللى فاكر نفسه ناصح
حُط صورتُه على الأفيش ..
هات كلامهم وريهولهم
دوس و عدّى متختشيش ..
خُش حارب بالحقايق
و إحنا لجل الحق جيش ..
إزنق القواشيط بتوعهم
خلّى يّك الثورة شيش ..
و إفضح إللى مستخبى
هو و إللى كان وراه ..
إنتباه ..
إحنا جيش حُر و فدائى
أقوى من جيش الدفاع ..
جيش صحيح من غير سلاح
بس هيجيب إللى ضاع ..
يقفش إللى خان و دمّر 
و إللى شارى و إللى باع ..
جيش رجال عِترَه و مجدّع
و إللى فينا جبان شُجاع ..
فـ الميدان جاهزة الكتايب
جيش وحوش زى السِباع ..
جيشنا لمّا يدّب أرضُه
صوتُه بيرجرج سماه ..
إنتباه ..
جيشنا لو يبقالُه حق
عند حدّ ما هيسيبوش ..
و إللى عندُه الحق يجهز
و الحساب ما يزّعلوش ..
أما لو ماطل و أنكّر
الجنود ما بيرحموش ..
و إللى كان باطل هياخد
درس عُمره ما ينساهوش ..
جيشنا وقت الحق مارد
و إللى خايف ميشوفوش ..
جيشنا لو يصرخ فـ بحرى
قِبلى راح يسمع صداه ..
إنتبـــاه ..
كُل حد فـ راسُه بطحة
أنصحُه يحسس عليها ..
أصل مش هنسيبه يخلع
من عمايله السودا بيها ..
مصر مش هتخلّى فاسد
كان بيسرق مرّة فيها ..
إحنا جيشنا يا مصر ليكى
و الجنود روحها فـ إيديها ..
إحنا هنغنى بلادى
من قلوبنا و تسمعيها ..
مش هنقبل بيننا واحد
حُبه للتخريب عماه ..
إنتبـــاه ..

جيشنا جيش رجالة جدعة
متلاقيش فـ ما بيننا خايف ..
مش كلام بنقولة إحنا
فـ الميدان و الكُل شايف ..
و إللى مش عارفنا يسأل
حد م إللى شاف و عارف ..
جيشنا لو يغلط فـ مرّة
يبقى لجل الحق آسف ..
رجالتنا شباب قويّة
صبر قاسى و عرق ناشف ..
كُل جُندى فينا فارس
شال سلاحُه من صباه ..
إنتباه ..

جيش مؤيد للى يبنى
جيش معارض للى هادم ..
نقطة بيضا للى يعدل
وقعة سودا ع إللى ظالم ..
يوم مهبب ع إللى تكتك
و إللى خطط و إللى راسم ..
إحنا بايعين روحنا بدرى
لمّا خدنا قرارنا حاسم ..
إننا فـ جيشك هنبقى
كُلنا جنودك يا باسم ..
قلنا نمشى معاك طريقك
من بدايته لمنتهاه ..
إنتبـــاه ..


Mohamed Tamim - Entbah - Bassem Youssif - إنتباه | محمد تميم

كلمات : Nabil Abd El Hamed
غناء : Mohamed Tamim
توزيع و ميكس : Mohamed Adel
تصميمات : Moataz Gad
انتاج : A M P MUSIC
====

دُكانة فـ الحارة ..
بيبيعوا فيها الموت
و بضاعة جُوة تابوت ..
ولا دايم إلا الله
و الفاتحة ع اللي يفوت .. 
يا بلاد ما فيها بيوت ..
يا بيوت ما فيها رغيف 
الماضي كان أشكيف ..
عايش معاك فـ كابوس
فـ خيالك المحبُوس 
جالك فـ حِلم مُخيف ..
يتّمشّى فـ الحارة
و فـ إيدُه زُمّارة
زَمّر بصوت عالي
جيت إنت على بالي
أيّام ما كُنت ضعيف ..
فـ صحيت أنا مفزوع ..
خايف و مش شايف
و إن كُنت مش عارف
هـ حكيلك الموضوع ..
مين إللي كان ظالم
مين إللي كان موجوع ..
لمّا العِجاف حلّت
مين إللي مات م الجوع ..
الحرب دي حربي
و الخيل مكانش أصيل
و الدرع فيها هزيل
كان م الورق مصنوع ..
و لا كانش عندي سيف 
يا بلاد ما فيها رغيف ..
ساعتى فـ إيد الوقت
وقتى فـ حُبك ضاع ..
و أنا لمّا قُمت و فُقت
كان فـ المزاد إتباع ..
يا بؤرة الأوجاع
خِفّى عليّا شوىّ ..
من يوم ما وجعك شاع
راح من عنيّا الضى ..
و الجرح بعد ما مات
صبح النهاردة حيّ ..
خِفّى عليّا شوىّ ..
الماضي كان أشكيف 
جالك فـ حلم مخيف ..
و فـ إيدُه زُماره
زمّر بصوت واطى ..
و إن كُنت أنا الخاطى
أستاهل إللى يكون ..
يا غُربتى فى الكون
أنا بِعت فيك عُمرى
و ما خدّت فيه عربون ..
و إن كُنت أنا التاجر
فـ أنا بعت بـ خُسارة ..
كان السداد آجل
و الدفع بالتقسيط ..
أخدوا إللى كان حيلتى
و طلعت أنا إللى عبيط ..
قالوا الحساب موجود
عدّى علينا و فوت 
هتلاقى دُكانة
بيبيعوا فيها الموت ..
موجودة فـ الحارة 
تاخُد هناك حقّك
طبلة و زُمّارة ..


Mohamed Tamim - Tabla w Zommara - طبلة و زُمّارة | محمد تميم

من مواليد 19 فبراير 1982 - المنصورة - مهندس مدنى 
عاشق للقراءة و الكتابة و أحاول فقط أن أترجم ما يدور داخلى فى كلمات بسيطة و مُركّزة ..

Nabil Abd El Hamed

Popular tracks