نحبك ...
بالشدة فوق الب ..نتشد نتكوى. 
نحبك و نحب ...نحب كي تقلي حتى أنا و نتغشش علا ماتقولهاش ! الكلمة مزيانة!
هات كلمة.. هات نغمة.. هات صبحية.. اي حاجة نعداها معاك و نحسبها و تضهرلي شوية . تضحكلي نضيع، نتمهمش تقلي مابنك! نقلك انت تتقرمش! 
نقلك حبني..تحبني و نحبنا و نضحكو خاطر سرقنا مالزمان لحظتنا خاطر منا صنعنا دنيتنا . و تحكيلي نكتة بايخة أما نضحك ناخولك بخاطرك تفيق بي تعرفني كي ما نضحكش بلحق و تقلي مانيش ضامر و عاذرك . نضحك بالقوي من قلبي كيفاش تطلب في السماح و منبوز مني و مخبي. 
نحبك ونحب نوريك لصحابي.. وللناس.. وللي جاو قبلك وللي على قلبي داس. كي تتصرف معايا تقول بنت 5 سنين وتحاسبني كايني أكبر منك ...كي تسامحني تقول علينا عشرة عامين وتفرح بي تقول لبارح تولد حبك. 
منحبش نكتب نص عالتعنيق و الحاجات إلي تصير بن أي زوز نحب نحكي عل المحبة عل نوارة إلي مخبيتها تحت لمخدة علمشموم إلي بن أوراق لكتب يتخبى...نحكي علخنار.. عالعرك وتسكير التليفون وريق المفرخ الصغار. 
كي نقلك إكتبلي كلمة ! حرف وتبدى تعصر في روحك وتخرجلي جملة تاعبة حوالها تكرب. كي نخزرلك في عينيك ومني تهرب تقلي مانيش كيفك لساني مايطاوعنيش نحبك أما للكلام متلزنيش... وإنت ماتعرفش إلي أنا في الكلام ماغرضيش أنا نحب نسمع صوتك وكالنبرة إلي في حضنها نتلف ونعيش . 
لا مغروم بالكتب ولا تحبهم قدي نقلك نقرالك؟ تخو بخاطري وفيسع  تفد وتولي في الصفحة تعدي. تقلي جرب غرامي وتشدني قدام ماتش لكرة وتفهمني وقتاش يتحسب التسلل وكيفاش شطر إلعب غورة ما نفهمش أما نحب نراك تفهم في.. تعصر في روحك وموسع بالك علي.
يقولولي كيفاش تحب واحد معندوش نفس لاهتمامات؟ نقول لمحبة مش أفار و مش مربوطة بلكتب و لكلمات
 لمحبةكي نبدا نبربش فيك نحب على كلمة إطيبلي خاطري... على سطر! و تغنيلي"أنا ليك نموت عليك لكن معنديش زهر. 
كي نخيطو شوارع بورقيبة وباب بحر ونحكيو على الناس ومرارة الدنيا وحلاوة لعمر . ونحكيلك حكايات لكتب إلي متعرفهمش و تغنيلي غنايات الحب إلي ما نسمعهمش. 
تعطيني وتاخو مني بعد مدة حليت لباب عليك  لقيتك شادد كتاب وهزيت علي التليفون سمعتني نغني.  
لمحبة كي نضعف وعندك نبكي وتقلي إمسح همك في ..تهنى على قلبك عندي وخلي دمعتك لي. ضعفك لي وقوتك لناس ابكي عندي وأخرج كان سألوك قول لباس. 
أنا وجيعتي بك تطيب وقد مالناس في محبتنا تعيب ما تعطيش واذنك في المحبة أسال مجرب ولا تسألش طبيب. 
المحبة مش إثنين يخمو ويراو الدنيا من نفس العين المحبة زوز صنعو عالمهم من دنيات مختلفين..المحبة مش زوز كاملين 
ومتفاهمين...المحبة كيفنا زوز تخاطروا بش كل واحد يوري لاخر قلبو ينجم يوصلوا لفين . 
.نكملك وتكملني وكان تعبنا في شطر اثنية.. بالمحبة.. على لمحبة صبرني

حكاية زوز

حكمت المحكمة حضوريا على فلان بالإفراج لعدم توفر الأدلة الكافية.... بعد 18 عام ..يحبوه يخرج و بعاود يندمج في النظام. الياب الأخضر لكبير تحل..خاف.. دَزُّوهْ مد راسو و طَلْ ..خطوتو ثُقْلِتْ ..بدنو ضعف..هِمْتُو جفلت..نبضو وقف. ميحبش يروح.. قالولو الحي يروح..ماقالولوش إلي قلبو بش يكون ميت و عينيه تنَوَّحْ. وقف سوايع قدام الباب تمنى يموت و يتلحم مع الأرض تراب. ميرضاش لأمو تراه اليوم... ولدها تاج راسها رجع مقسوم..كذب إلي قال لا حال يدوم و ما تلقي كان الأشوم كان هربت مالمشوم . بدا يمشي يتفكر في الثنية..زعمة يتفكر أما  هي عمرها ماكانت مَنْسِيَّة..حافضها و صوَّرها ليالي في السيلون خربشها على الحيوط و سب بحروف إلي خلا  قلب أمو عليه مغبون. حلم بالنهار إلي يخرج فيه بش يتكب عندها يمد راسو على زِنْدها ..يشكيلها عَلِّي عملوه فيه.. يحكيلها و تبكي عليه..النهار إلي حلم بيه جا راجع لأمو للي تلمو و طيب جرحو مالداء ...أما ويني الفرحة إلي كان يستنى فاها و كانت مصَبْرِتُو؟ ويني الأسئلة إلي كان يحضر فاها و الحلمة إلي كانت معيْشَتٌو؟..خايف.. يحب الباب الأخضر عليه يرجع يتسكر استانس بالوجيعة و عالدنيا قلبو معمر.. حاسس روحو مش في بلاصتو كل خزرة تُعِرْضُو تفكروا في خصاصتو...
وصل مرعوب مل حيط إلي تربى بين ياَجُورَاتُو..كان ملحيط خاف مالا كيفاش بش يقابل عبادو؟..حلتلو مرة الجيران فرحت وتفجعت كي راتو قدامها. خزرلها.. حكات ياسر وماسمع شي من كلامها..دخل يجري لقدام.. الثنية طوالت وذاقت عليه الحيطان . شافها و تمنى من خوفو يغطس فاها راسو كالنّعامْ أما امو لا ردت سلامو ولاجاوبتو بكلام. ..أول مرة يتمنى كان  جا مخرجش وتَحْكَمْ إعدام...حط حمل راسو علاها وباسها .. سند وجيعتو برطوبة راسها :" رجَّعْنِي... رجَّعْنِي لكرشك خليني في دفاك...دنيا لبرا باردة تو نصَوِّرْ دنيتي في سماك ..خليني تحت قلبك ورواريك..نتنفس بين ضلوعك ونرى الدنيا بعينيك ...عينيك ..أنا نموت من خزرة عينيك كي تعلمني وإطيَّحْنِي وتقدرني وتكبرني وتربيني وتعمرني وتفيقني وتخنقني بش نتعلمنستحفظ عالنْفَسْ.. بش نتعلم نفك بلاصتي .. أنا من كمالك عرفت خصاصتي. إنت قصيدتي عروستي مدينتي عشيقتي وقضيتي انتي أول حكاياتي وتسكتية تنهيداتي.إنت إلي نرمي قلبي عندها كل ليلة و أنا عارف إلي إنت تحبو أكثر مني. قعدت سنين يامي نحفر بش نخرجلك.. نحفر في بدني نلوج في بلاصة جديدة نعرضهالهم يضربوها ..خفت لا نموت و يجيك خبري في ورقة يبعثوها ...صبرت يامي عالموت خايف عليك ..أنا كان جا العمر عنبة نعصرو و نرويك..رجعني ليك.. رجعني ليك..سنين نستنى في روحي و فيك.. متمشيش علي معادش انجم نتقبل لوجَعْ...يامي تحرك حسسني إلي كلامي قاعد يتسمَعْ ..تتفكر نهار إلي هزوني؟؟..انت تصلي في الصبح و من قدامك جرجروني...أول مرة تقص على صلاتك و ماتِلوِيشْ السجادة..عرفت وقتها و انا نتكركر إلي حبك لي أقوى مالعبادة..غمضولي عيني و رماوني في دنيا بعيدة..تمنيت الموت اما كل مرة ترجعني ليك تنهيدة...عندك علي حق ..حقك علي اني نعيش ..قلبي تحرق أما نجمت نطيرلك كل ليلة.. نطير بلا ريش. ولدك راجل يامي ماخبَّرْت على حد خيطت فمي برجوليتي و كنت كيما قتلي حافظ للحق ..قتلي "اصبر مصيرك  تِتْعتق" و هاني جيتك.. قوم يامي خنحسك بلحق ..قوم كلمني. قوم فهمني ..دَوِّرْ يديك علي احبسني فيك.. بلا حضنك مفماش حرية.
 عليا ماستناتيش ..خذات تِكْتِبْ مكتوبها و نسات. قد ما وعدتني في لخر ما وفات . كيفاش نجمت يامي علي تخلاَّتْ؟ ياخي شصار و أنا في الحبوسات؟ علاش الدنيا تبدلت و العشرة تنسات؟ عليا عرضتني هازة زوز صغيرات.. عملت روحها ما عرفتني و السكينة إلي في ضهري زادت تِلْوَات ...زعمة يامي باسمي سمَّاتْ ؟ ولا حكاياتنا كالنسمة تعدات؟  أنا عديت حبسي نحلم بزوز نساء حفرتهم وشم على جسمي.. وحدة حبيت نرجع لحضنها ولخرى نقرن اسمها ب اسمي ...لولى ستناتني لين غابت ، الثانية على الوعد تابت ...أنا لواه خرجت كنت في حبسي نابت و على الضرب ساكت. 
في الحبس ريت ناس أخرى ..ناس تستحلى المشية عالجمرة ..كنا كي يضربونا نلوجو في بعضنا على بلايص مازالت تِحْمِلْ.. نتخمرو و نغيبو كالوجيعة فينا تكمل...نسهروا كل واحد يحكي على ناسو إلي لبرا و أنا كل ليلة نصبَّحْ نحكي على علياء و نتفكر جواباتي و نقراهم لين نحفظهم و كل كلمة و حرف في جواجي نردمهم..و توا مع كل كسرة و همزة و ضمة نحس في روحي راجل بلا همة...الحبس أرحم ياما..رجال الحبس تسندك كان طحت.. و انت كنت سندي يامي بالله مخَلْيِتْنِي لشكون كي رحت .. كنا نباتو كل ليلة نعسو على نفَسْ بعضنا وكي نقومو الصباح نكذبو نقولو إلي نحنا رقدنا ..تِتَرْبَطْ حياتك بصوت لمفتاح كي يضرب و كي تسمع اسمك بدنك من داخل يتكهرب ...ترجع لزنزانة بعد ساعتين كانك بزهرك.. ترجع كاينك سنين نقصو من عمرك ...في الحبس لعمر ينقص والمدة تطوال.. الموت رحمة ما يذوقها الرجال. نتفكر نهارة إلي عايطو لأحمد وبعد بسوايع ريناهم يكركرو فيه وراهم ممدود.. أحمد أقوى واحد فينا رماوه تحت اللحود..هو إلي كان مقوينا ومن هِمْتُو يسقينا كي ريناه شقف بلا روح تشوينا ترعبنا خفنا وخبينا..لازمنا نلقاو أحمد جديد يلمنا ويحمينا ..أحمد مشى و هما كي قتلوه فاهمين إلي حطوا الملح عالداء... وبداو يجبدو فينا واحد واحد يعصرونا... مايخرج منا شي يوليو يسبونا..يعرفونا لاعاد يفرق معنا لا ضرب لا كلام... أما كي يخزرلك ويقلك إلي أمك بنت حرام يقتلك من غير مايمسك ويحصرك في الظلام ...سبوك ياما و أنا يديا مكَّبْلَة ريت روحي عاجز والأفكار في مخي
مخّبْلَة.  الغضب قطع عليَّ النْفَسْ.. الكلمة إلي توجع أكثر ملضرب تِتْحَسْ ..
خفت على عليا... قالولي بش يجيبوها يمرمدوها وقدامي يذلوها ...خفت وحسيت روحي ضعفت ..من روحي حشمت ..تصور ياما شوية لا في كلامي زلقت ..كان مش بدني ثقل بي وفي كلحظة دخت.. راني ياما من خوفي لصحابي  خنت .
المرا إلي لحبها صنت وقريب نرضى نكون غدار ختارت علي المخ الفارغ والمصوار
الحبس مش بَنْيَة ..الحبس مفهوم ..يتغذى على روحك ويفيَّعْ لهموم..الحبس لداخل في كل واحد فينا كي نخلِّيوْ الناس تملك فينا ونخسرو إلي كان مسِمِّي  علينا ...لحكاية ماتقفش في علياء حتى إنت يامي خليتني.. نعرف إلي لمحبة بلية أما كان بش تاخو مني علاش عطيتني؟؟ عباد لحبس متلقاهمش لبرا ...ومسكينة النفس إلي عايشة في ها دنيا وتسخايل روحها حرة ...ة ..الدنيا صُرَّة..توفى بعقدة..الحبل كل مرة يزيد يتكبس بش تِكْمِل الشنقة ..والناس إلي تحتك يدزوك للخنقة يحبو يوصلوك  و ما يرتاحوا كان كي من دمك يشيحوك ..و وحدهم.... وحدهم أمك وبوك إلي للّوطة يجبدوك يحبوا يبعدوك وحتى كان ضلوعهم تقسمت على ضهوراتهم يهزوك " ...قام هز إلي قعد منو ومشى ...السطح إلي كان هو و عليا يتفرجوا فيه على السماء ..وين كانو يبنيو دارهم وين كانو يحلموا بعْمَارْهُم مشى.. ملقاش الحلمة ...وقف على لحافة ...ستنا توقفوا كلمة ..

افراج مؤبد

عطيتني كتاب ورقاتو بيض 
قتلي اكتبني
عطيتك فنجاني ببنو يغص
قتلك اقراني
لا فهمت خطي و لا وصلني منك صوت 
انت تحكي و توطي و انا عمري ماكتبت عالخطوط
تقول انت فاتنا الفوت؟
اقرا
اقرا فنجاني باسم الحب
باسم الناس الي بلا قلب 
اقرا 
باسم الي يحلم بالجنة 
و الي فاتتو اللحظة و 
قعد فاها يستنى 
اقرا 
اقرا باسم الي صابر في محطة بلا سكة 
بسم إلي مكتف يديه يستنى في جن لحكة
اقرا                                                            
باسم الخايف
باسم الضحكة الكذابة الي مخيطة الشفايف 
أقرا بسم إلي مازال حي وغير هو في رواريه ما عندو شي  
اقرا باسم الغضب 
الكرب الهم العصب 
و قبلهم الكل اقرا باسم الرب 
تقرا
و كتابك صفحاتو مازلت كيما هي 
حروفها ضايعة منها و حكاياتها منسية
  تقرا ضدي                                                        انا في حضرتك نتخمر 
و انت في حضرتي غايب
انا نبني و انت تدمر
و كي يتهد كل شي نلقاك علي عايب
نلوج عليك في صرر القهوة               
في وقتي الضايع في عز اللهوة
نلوج عليك في خيالات الناس
في الغصة المغلفة كلمة لباس                   

الفرق بيناتنا حرف 
انت شجرة كاملة و انا عرف 
                           
الفرق بيناتنا حرف   
حرف السكينة الي جارحتني 
حرف الياجورة الي معاها مطيحتني 
                             
وقفت الزنقة للهارب                
قفلة شفرك انت زنقتي                                                       و العطش سوك فم الشارب                              
 في فمك  انت شربتي                                                                                                أقعد متمشيش...كيفاش تموت في قبل ما مع روحك تعيش ... عطيتني  مفتاح بلا باب  كيفاش تحبني ندخلك ...عطتني أرض بلا تراب كيفاش تحبني نوصلك أقعد متميشش وكن حالف تبعد متودعنيش

(أقعد ما تمشيش (ندى & شواهنة

نحب ألوان      
     نحب لحمر لون المرجان مش لون روبة أمي 
نحب يسألوني كي نكبر شنوا نحب نولي 
نحب ترجع يد أمي تمسح علي غلي
تضفرلي شعري وفي ضفيرتي نخبي حلماتي
نخاف لا يجيو يفوكوها مع بقية حاجاتي 
نحب نكتب كلام كبير أكبر من فم المدفع 
أكبر من قهرة بابا وعين أمي كي تدمع 
نحب بلاد فاها عيد وغنايات 
وزحمة السير ماتسببهاش دبابات
نحب ألوان 
نكون نحلة ندور على زهر البستان 
نحب نفرح بلا خوف ولا نتمنى النسيان
نحب نتفكر بلادي في كل لحظة ويكون قلبها بالورد مليان
كي قلب أمي قبل البركان
كي صوت بابا يرتل القرأن
كي شجرة الميلاد من شباك الجيران
كي ضحكت خويا كي يقرب في رمضان الأذان
كي كل التفاصيل إلي قتلت حربنا
كي كل الرصاصات إلي ما فرقتش سربنا  
كي كل الدم الي سقا ارضنا
نحب ألوان 
تزين اثنية للمعلم ..الدكتور في بلادي والفنان

بوطني - صابرين و ندى

وخرت عليك
 كنت سابقني وعليك لحقت
 شدني عليك عوج الدنيا ، قتلان الوقت والمقت
 شديت روحي عليك
 ماحبيت نجيك كان بضحكتي في فمي
 خفت تنساني وتخزرلي وتقعد تسمي
 مانيش مسامحة في الوقت إلي غلب فيه فرحي همي
 تتفكر شمس جويلية إلي كنت نتدلى على خيوطها ونغزل بها فيفري ومطراتوا 
حرقتني ، صهدتني بسيوطها قتلي إنت بنت جانفي علاش طامعة في الصيف وأياماتو
انا بنت البرد وياما دفيت عباد
 أنا بنت البرد ضاقت بي فصول هل بلاد
أنا بنت البرد وتونس سخونة
 أنا بنت البرد ، بنت الوقت المخبي وبيت المونة
الورق خايف مني ..مش مستانس ببردي
 نجري وراه ..نشفق ما نلحق ..ايجا عندي
 خايف مني وما نجمش نقلو ما عندكش لحق..لا
 خايف مني و الي خاف نجا
 لين ولا خواف
الي ماخافش تكوى
 في محبتك حفا و بتراكن الورقة طاف
ايجا نحكيلك كيفاش بدينا لحكاية ملخر خاطر اعز مافاها بدايتها 
ايجا نقلك بش مانستحقوش كلمة تتفكر؟ويسهل علينا أصعب مفاها ..كمالتها 
نوصلو لأولها و نسألك على عمرك 
لون شعرك الاصلي و سر الضحكة المزينة ثغرك
نسألك وانا نعرف ردك
تجاوبني تاعب ..نعرف حبنا هدك 
نحكيو حكايتنا لبعضنا ...غبابر الذكرى تنفضنا 
تاعبين
كالعصفور الي جرح صوتو و سكتت التغريدة
كغنايات المحبة الي تقلبت تنهيدة
وكل ماقلنا وصلنا نلقاو المحبة بعيدة 
 مازلت نلوج عليك في النغمات في شهب يتعدى بين النجمات 
مازلت تراني كي تسكر عينيك تسمع صوتي كي يرن صوتي غيري في وذنيك 
مازلت بيك نبلع و نغص 
مازلت حاير في كلامك في كمالة النص 
نتمنى جيت نجم نكذب كذبة نصدقها
جيت نجم تبسيمتي عليك نفرقها كي تبدى عابسو تقلي نحبك كالايوم كي امس
و نصدق
بش نعيش
 امس و اليوم مايشبهوش لبعضهم و الثنين مايشبهوليش 
وما نوعدكش غدوة كي نرى روحي في لمرايا بي نشلق
 وإنت ورق... نهارة إلي يتبل بدفايا يتشق
 خليني نكتب فيك وانا باردة مليانة سرد
 واجا بجنبي نسهرو نستنو لين الزمن يتقد
  ويعمل بلاصة للي كيفنا..بش يعيشوا ..مش بالزايد ..أما قدقد

بنت البرد

هي الزحمة ، الهبلة والمحنة  
هي الورقة إلي قد ماتتعبى عمرها ما تفنى 
هي شمس قليبية كي تتفكرها في عز الصيف
هي مخطط مقدس سْلِمْ مالتحريف
هي الحوتة إلي تذِمْ في عوض ما تِتَاِكِلْ
هي إلي تخاف لا تهبل حتى كان مخها أصلا مش عاقل
هي مشهد هزلي مش كامل هي ساعد البناي وهمة العامل
 هي الخوف
خوف مالصاحب المرخوف من صاحب كلامو كلو حروف 
مطربتهاش به واو العاطف والمعطوف
خوف مالصاحب إلي معندوش صاحب 
إلي عمرو مايعاتب 

 
هي أول كلمة منطوقة عالخواء
هي بارودة صياد غفلت على حمامة في السما
 
هي الحال إلي مِتْبَّدِلْ
إلي كل ما يميل تستقوى عليه بش يِتْعَدِّل ْ
هي المحبة إلي على قد سِعَةْ القلب تِتْكَّيِلْ 
هي حزام الطفلة المزيانة إلي على إيقاع دنيتها تمَيِّلْ
هي زبد الموجة إلي تُحْضِنْ الشطوط
هي اخر النور قبل مايتسكر التابوت
الفرصة الأخرة قبل مايفوت الفوت
 
 
هي الحقيقة المُوجْعَة في وراق محمد شكري 
هي صوفية لفكرة في أبيات لحلاج
هي إلي تِتَّنْفَضْ كي تسمع شفايف تحكي عِِبْرِي 
هي الورقة الفاضلة بعد كل تِيرَاجْ
 هي الخير المخُبِّي 

شطر الكاس المعبي 
هي الكلمة الزايدة من فم المتربي 
هي النوم إلي في جفن الفايق يكَبِّي
 
هي مربع و ترفض نكون دايرة  
أربعة تراكن في كل تركينة فما مرا حايرة 
هي الساكنة في الطابق الثاني ...
ومع كل شمس متسرسبة الصباح تدعي من قلبها للفتاح " نَسِّينِي ليوم في عنواني
كي نجي مروحة منعرفش نرجع لحيط هالدار إلي كواني
ولا... نرجع.. ومانلقى حد ..
ويِِكْبِر عالنقبة المفتاح ونفرح ..نمشي ونقول بيني وبينو السماح 
خليني نسرح
نمشي في شوارع نستخايلها مسرح 
نرى قدامي كراسي و جمهور بوجودي أنا مبهور
هي إلي تنسى لكلام الدوني ومتنساش إلي قالوا
هي إلي تقول الناس يغيظوني أما لكلام حروف مع الريح يتشالو 
 وترجع تزرع في حلمتها في طريق سراب
تخُطْ حكايتها خرافة في كتاب 
هي كمالة لخرافة
لا يقدر علها زمان ولاعنين العرافة
تستحلى كي تمشي بين الناس وتحس روحها ورق شفاف
عمرو مايتقرب ولا يتشاف 
هي لون وجهها قمح وعينيها بلون الطين السبلة مستفصرة وحتى غشها اصلو حنين
هي إلي تِتْحَمِّل ..تِتْجَّمِل ..وتكمِل ...وإلي مش موجود في الدنيا في مخها يِحْفِل كي تِتْخَّيِل وعلى دنيتها تِتْحَّيل ..بش تعيش.. وتِنْبِت فوق ضهرها جوانح ريش ...اطير وتخزر للي حبوا يطَيْحُوهَا تقلهم "انا بيكم محشتيش" وتِتْلَّفِت لدنيا وتقلها "قتلك ألف مرة راك متنجمنيش أنا خاطرني نحبك ونحب ناسك نحب نعيش وكي نموت اكتبوا على قبري عشت و في هم الدنيا مهمنيش"

(الجرح يبرا يا جبرى  (  حكايات العروي

توضى..اطهر..ابعد عليهم ...و بعد تفكر ..إسكر.. بمحبتنا..بوجيعتنا ومرارة دنيتنا وكي توفى السكرة تكَبِّرْ ...تعمِّرْ وقبل ما تنطق حكِّرْ.
انطق وأخلقنا من جديد ..من رمادنا ..من الصديد. نعاودو ونتعجنوا في الدنيا مرة أخرى . 
اقف.. غمض عينيك إحسب لعشرة ..اغطس في دنيتك من غصرة لغصرة وكي تهز راسك بش تتنفس إركزلي من حبك عصرة...أنا نحبك نحبك وإنت أدرى.
أخرج من جلدتك واتعدى بجنبي وما نعرفكش اسالني علي.. وقلي شنحب نسمع قلي "حبني و نوعدك مانضمنكش ..ما نحسكش إلي إنت بالفطرة عندي ...مانضلمكش . نلهث كل نهار نحب نحصلك ومنحصلكش" ونحصل ونحبك ونسكر على قلبي بمفاتح قلبك.
توضى.اطهر ونعاودو عبادتنا من أولها وكي نتعبوا نعطيو لحكاية لغيرنا يكملها . ما تحسبش ..الدنيا مهبول من يمنها. 
خلينا نكونسوميو الحب من غير ما ندفعو حقو ونحلو بيبانو من غير ما ندقو. نغلطوا ونعطيو للذل كارو ونراو العيب ونمشيلو حتى لدارو ...يفرح بنا نباتو عندو ليلة ..يبات عيب يصبح فضيلة. وشكون قال منوليوش عيلة وخنار ونندمو ونصليو بش نرجعوا صغار نهربو مالعيب كي يجينا.. منسلملوش ولا نخليوه يعديها علينا.
نرجعو صغار وقبل مايطيح سقف محبتنا نحن نهدوه..ونطيروا وكي يتعبى قلبي بالمحبة نلوج غيروا . منتعبش ...ندخل معك في زنقة متنفذش نتحسرو نتغصرو دنيا مسكرة وما عندنا كن بعضنا كان بردنا ندفاو بكلمة "نحنا".
وال"ن" نوار يغطينا يفوحنا...يسقينا
وال"ح" حلاوة وجيعتنا كي هي إلي تداوينا
"ن" نكار عشرة يغدرني ولا نتعلم لا نبرى...نرجعلو ..نحب عندو نكون ..لحن موزون ..على دقات قلبنا ..محبتنا إلي تتقلب تولي حربنا.
تعطيني أكثر ملي عندك "وإلي يعطي سلاحو به يموت" ..أنا منك موجوعة نصيح بلا صوت ..مت من قبل وقاعدة نموت.
توريني القمرة ومن غلبي نخزر ليدك ..مش لها ..إنت دنيتي قمرتها نجومها وسماها. وكان حبيت تغيب وصل سلامي لاها.
وبعد غيب ...اغبر..تبخر ..وأنا منك ومن غلبي نتوضى ونتطهر.



الوضوء الأخير (تسجيل أوضح)

الطفلة الي دموعها في كمشتها 
الخزرة الي بين اليقظة و المنام حكايتها
انا في الشهر التاسع الحس...انا اليد الخفيفة الي تستاهل القص 
كلمة لو كان
و شبعة جيعان
انا تنقيزة في الفضا ....حلاوة اللوم بعد القضا 
كي تبدا انت على حق
انا الي وعدني يمشي على خطوتي و خلاني وسبق
انا القراية و الكتب 
المحبة الي ماتكفيش...لازمها تعب
انا الصاحب الي بخيرو غرقني...بعد عورني
الي طاح و ماطصككش كي طير البرني
الدقيقتين اللولانين قبل السبعة متاع الصباح
اليد بلا منقالة الماكلة بلا افاح
انا آخر عقدة في زرابي قروية
انا الي نسمع السو و نقول آش علي
نيران جاشي
و العسة عالجاي و الماشي
التنسنيس قدام الدار عقاب عشية
انا الوقت الي يجري و الدنيا هاربة بي
انا الزهر في القهوة السوري
و الفرق بين المجل و البوري
مادامة قليل الجهد يموت
انا يمين البكوش في سدرو
لا انت تسمعوا و لا هو عندو صوت
انا الحقيقة الي ماماتتش انا الكذبات الي كبروا
انا بعد الجرية النفس
انا الزيتونة و الفاس و الي سقا و الي قبلهم غرس
انا الجملة الي ماتحفضش غيرها في الغناية
انا الفم الحاشم و العين الفلاية
انا الي نملا و حد مايشرب الرونديفو الاول و الجو المكهرب
انا اليد الي كان سلمت على غيرك ننكر فاها
و البلاصة في 28 الي كي نراك نخلاها
انا الي يثقل عليك يخف علي
انا عيبك ...سرك...الي يموت في
انا النخالة الي تبيتها سنين و ماتصبح دقيق
انا الي على جال عيون الورد نسقي العليق
الكروية الكاسحة في فم المهراس
الحلمة الواقفة في صف الكاباس
انا البال الواسع و انا زادة صبر ام كلثوم
انا حلمة البارح الي قتلتها فياقة اليوم 
انا عينيك الي تسرح في دنيتهم عيني
و تخليلي منهم خزرتك لي 
انا غرضك لثنية
انا شهوة الصبية
انا كي السفرجل كل قدمة بغصة
انا القلب المعبي وكل حكاية تزيدلو رصة
انا الطريق الي متفاهمين نتقابلو في شطرو
انا كلماتك الي شابوا و وعودك الي كبرو
انا الكسرة و الجبيرة
انا الفرج و انا الحيرة

Omniscient

ماتعطينيش اكبر من حقي مانحبش
 لقمة اكبر من فمي ...مانغصش
 تنقصني و بلا بيك ريح يزفر بين ضلوعي
 تكملني و اللقمة الكبيرة عمرها ماتطفي جوعي
امشي و ارجع كالموجة ماتنساش
 تففدني ساعة ساعة رطب بيديك الي في حراش
مانحبش نستانس و تغاغلني العادة
 ابعد و خليني و انا نعرف دنيتي ولادة
الكرش جابت مرة تجيب اثنين
 دنيتي مش عاقر
 ابعد ولا تقعد و تخلي المر مرين
 وكان سألوني نقول مسافر
 يطل
كي يعرفني نقصتو
 يطل
 كي تكبر بيه غصتو
 يطل 
كي مايلقاش حل..هو الياسمينة انا الفل و نتركبو على بعضنا كي يطل 
لا نتسمى عليك و لايحسبوك علي 
كي تجيني نفرشلك الرموش الي مغطيتلي عيني 
و كي نحس روحي تعبت نجبد من تحتك الي فرشتو ليك 
تعرفني ليك و اعرفني كي نولي خاطيك 
تعرف وين تلقانيوردة مزروعة في جنينة الي سقاني 
تعرف وين تلقانيرقبتي مربوطة بحبل لساني
لساني ماطاوعنيش
نقلك نحبك اما زادة نحب نعيش
 نغبر في قلبك و تنسى ماتنفضنيش
 قلبي صغير شعرو شايب...فرخ في قالب درويش
 انت مكبرني و انا صغيرة نحب نعيش
 انت تصغرني و انا نحب روحي كيفاش ماتغيضنيش؟
طيرني تو نرجعلك كي يطيح الليل
 يدعثر..يطيح علينا و نعدلوه كي يميل
 و اخزرلي بتعب كي يتهد منا الحيل
 قلي " كي حبيتك ما حسبتش حساب الويل"
 اما انا حساباتي محسوبة
 ملي طفلة صغيرة مخيطة حلماتي في دونتيل الروبة
من اول حضرة لآخر النوبة
 نضيع..نتخمر اما نفيق
 و نفتق الدونتيل كي الروبة بي تضيق
 و انت تتخمر و ماتفيقش
عيبك تتخمر و انت تعرف روحك ماطيقش
 خطوتك تاخوها اكبر من سقيك
 وانا مانجمش نتبعك علاها
حلمتك اكبر من مساحة عينيك
و انا مش لاقية بلاصتي فاها
تنضفلي ذنوبي
 تفرشلي على عيني عيوبي
 و انا في راسي نصحح
 حالف تصلحني و انا حالفة مانتصلح
 و تسلم في و نضيع و نرجع نتلمس ثنيتي في خطوط يديك
و خط البخت في ايدك قصير و انا مانعرفش طرف عمري وين و حجرتي لتو ماضربت اخر البير 
ناسية في شفايفك اسمي
 نتلعثم ..نتمهمش و عليك ليك في المعنى نرمي
محبة ختار انا خاسرتو 
 الاسم سلمت فيه اما القلب عندك ناسيتو 
مش سائله عليه و لا تسألني شبيه
بش نجاوبك انت..انت بيه
قلبي عليك يقمر
وانت تحب فريش
قلبي صغير معمر
 و انت ماتطاوعنيش
 مانحبش نعرف غدوة شمخبي
 و لا نحب في كاس مشقق نزيد نعبي
 و عمرو مايتملا
 ماتنجمش تحبني بالفم و الملا...عمري مانتملا 
علاش تحب تنظمها؟؟ وتعرف صحيحها من عدمها؟
علاش تحب تسطرها...و انا نحب براحتي نصورها
 حلمة نزرعها في سحابة تظل عليك
 و يضربها الندى قطراتها تهدهد بيك
 راني مش خايفة منك قد ماني خايفة عليك 
بالهدا...نعصرو محبتنا في فم الورقة 
صادمين على جبل غرام و عارفين اخرتها فرقة
نتحايلو عالدنيا ووقتها الي علمنا السرقة 
 صادمين على جبل بنفحة 
ماسحين دمعة بخيال الفرحة
و نسألك وانا خايفة...نفرح؟
و انا عارفة كل شي بش يوفى و الدنيا مسرح
 نسألك نفرح؟
و تقلي ضيع و جاوب روحك و في عروق قلبي اسرح 
 طول عمري ماشية معاك في لعبتك اما وقتاش نربح؟ و قتاش نربح؟
كلمتين حطهم بين عينيك
 انا نحبك و فيك نهوى
خطوتين شد عليهم سقيك
 لبارح و غدوة
 نحنا ولاد اليوم هادين على غرام و عارفين غلا السوم 
نحنا ولاد اليوم نعطي قلبي ليك ووذني مانهداها للي يلوم
واقفين بين البارح و غدوة بين الفرحة و البلوةتعب يكبي فينا و مكملين..فرحة تغافل فينا وباها مآمنين 
 احنا بين البينين

-بين البينين-

حلمة مخيطة بكلام من القلب . 
______________________________________________
نصوص كتبتها في مراحل مختلفة من معترك الحياة.
بعضها مسجل صوتيا والبعض موجود في حسابي على الفايسبوك . شكرا على المساندة

Nada Ben Hammouda

Popular tracks