هذه الأغنية تحكي عن الأحداث التي حدثت بجامعة الخرطوم في يوم الأحد 25-12-2011 .. و ما جابهه طلاب جامعة الخرطوم مع اجتياح قوات مكافحة الشغب (الكجر) للحرم الجامعي و ما تبعه من اعتصام طلاب الجامعة اعتراضا على ما حدث.
 هذه الاغنية تجسد بصورة عامة الواقع الجامعي في السودان عامة وكيف صار على الطلاب التعود على سناريو المطاردات والعكاكيز والبنمبان.. ولذا اخترنا لها الاسم,, بمبـــان

=======================================

قايم تعبان من السرير
 في عيوني النوم حالف ما يطير
الليلة احد موضوعو خطير
 هومويرك واللاب وتسليم تقرير
وكمان اسبوع مليان تستات 
كم شيت كدا داير ليو تصوير
وانا طالب حر ما تابع حزب 
 ولا في الموضوع عندي التفكير

وين البصات يا جماعة في كل ثانية متابع الساعة
خايف اتأخر على الليكشر واتهزأ برضك في القاعة
يا جماعة خليل هل مات بالجد الزول جنبي قال دي اشاعة
زول فجأة حلف قال نشروها كان تلفزيون او كان اذاعة

ويا جماعة خلاص انا شايف الباب
 جاري بسرعة عاوز اخش اللاب
خايف من ليه ما جيت بدري 
وشغل تحقيق شغل استجواب
من حظي الليلة مزاجو جميل
 وقبل عذري ما قال كضاب
اللاب كان ماشي جميل مظبوط 
بالجد دسيس ما فيهو عذاب

يا خوانا هوي شنو الحاصل  العاب نارية دا متفائل
والجو دا كتم كدا ليه فجأة وصراخ الناس جاي متواصل
والناس خافت كسروهو الباب القصة حياة لالا ما تماطل
وسألت البرا عن الحاصل الناس ساكتة وخانا التعبير
شكلو الموضوع الليلة خطير ما الحاصل دا ما عندو تفسير

نازل في السلم بسرعة شايف دي سماح بت في الدفعة
ساكيها كجر جيبي التلفون وشبابنا جرو وخافوا الرفعة
والجو بمبانو عمل ضجة وفي عيوني كمان جاب الدمعة
شنكلت الكلب انقذت سماح جاني العكاز كسر الضلعة

ومعقولة يا ناس ديل الشرطة
 ختوا الطلاب جد في ورطة
بين العكاز بين البمبان
 جايين والدق بس هو الخطة
ومعقولة الجامعة دي هي الخرطوم 
بين القاعات الشرطة تحوم
طلاب جرحي وبنات هاربات 
 ناس الازمات راقدين بالكوم

والضرب الجد في شارع المين واحد في الراس واحد في العين
طلاب جارين وكجر حالفين الليلة تشوفوا الوش الشين
وبضربوا الكل اولاد وبنات شرطة ارهاب لا اخلاق لا دين

الليلة التيــــت يا بت الحرام الليلة تعرفي معنى النظام
عاملين فيها الطلاب راقين الفهم الليلة كسير عضام
وبنات ببكوا وهو شايل السوط و الما لاقي فيهم جرا الحزام
ياخوانا خلاص لومافي احترا م مافيك انشان او حتي اسلام!؟؟

عاملين الموضوع انتو حصار
 ستين بوكسي وستين دفار
لو كانوا الطلبة الليلة ضعاف 
قدام الرب بالظلم كبار
عسكر بمبان ودروع وعصي 
قدام طلاب شايلين حجار

وتعال يا سيادتك يالمسئول قدام الرب ايـــــه حتقول
اولاد الناس كسرتوهم والجرح النفسي الما حيزول



طلاب الجامعة طلعتوا رجال وريتو الناس قادة الاجيال
 لا عسكر يوم بخوفنا والظلم بزول مهمن زاد وطال
والجامعة تظل مصدر الهام و شعار للعزة في اية حال

==================================

https://www.facebook.com/Ne7na.BroS

=================================

Ne7na production @ 2012 


Ne7na

Popular tracks