ديفيد رفيق

شعر و إلقاء : ديفيد رفيق
موسيقى : On Confused Night - Master One هشام عفيفي


اوقات كتير باتمنى اكون
طاير .. محلّق في السما
عايش حياتي بدون قيود
اصلي بكره القيود.. كره العما

و باكون ساعات محتاج لناس
ارغي معاهم بالساعات
و نكون سوا ضحكة و اهات
و نغني غنوة في ليل جميل
مليان نجوم .. مليان هدوء
و انا نفسي ادوق
طعم الجمال
اصل الجمال طعمه ده حتة من الخيال

و ساعات بشوف نفسي جبان
مليان هبل .. مليان جنان
بيني و بين الفجر .. سور

و ساعات باشوف نفسي بطل
و في قلبي حتة من الامل
عمالة تنشر فيّ نور

و انا نفسي نوري ينتشر
بين البشر..
و القى الامل جوايا غالب .. منتصر
مش منتظر .. يجي عليه الدور
في قلب مليان بالتناقض
و المشاعر جوه منه ملخبطة
نفسي تكون حته امل
في برد الحيرة..
هي الغطا.

حتّة من الامل - ديفيد رفيق

الفشل مُر بيعرّفك حلاوة طعم النجاح :)

يا فاشل - ديفيد رفيق

قصيدة : بحلم ولّا بجد ؟
تأليف و إلقاء : ديفيد رفيق
موسيقى (قلم رصاص) : اندرو عاطف

ماتيجي نرغي شوية
نشرب كوباية شاي
نلعب لنا دور طاولة
و اعزفلك بكمنجة و ناي

نسهر و نقول حواديت 
للصبح نقضيها كلام
اشوفك فاكر ولا نسيت 
مرارة طعم الايام
و الجري في ديل الاحلام
و الضحك اللي بيفتح نفسي
و المتعة في شوف الافلام

ماحلقتش دقني بقالي كتير 
اصلها بتداري ملامح العجز
العجز الناتج م التفكير
اللي قتل في سعادتي و غَز

هاحكيلك عن كل مشاكلي
هاتشوف ازاي اتغير شكلي
هانجيب في سيرة كل الناس

هاحكيلك عن عيلتي و اهلي
و هاقولك على علمي و جهلي
هانناقش كل الاحداث

هانغني و نقرا ف اساطير
و هانسمع لجاهين و منير
و يمكن نتغزّل في بنات
او يمكن نبكي في اوقات 
ع اللي اتقال من غير تفكير

فاكر وقفتنا على المسرح ؟
سامع اخر صوت سوكسيه ؟
قلبي ساعتها دق بسرعة
نفسي اعرف سقفوا على ايه ؟

انا فاكر ان العرض عجبني
لكن مش فاكر تفاصيل 
انا اصلًا شاكك .. مش متأكد
ان انا بفهم في التمثيل

هو انا كنت فوق ع المسرح
ولّا كنت قاعد تحت ؟
هو انا كمّلت العرض لاخره
ولّا مشيت بدري و روّحت ؟
انا شكل كلامي يبان تخاريف
لكن بعد ما قلته ارتحت

هو انت سامعني ولّا سرحت ؟
عمّال  اتكلم من بدري
 من غير ماسمع منك رَد
هو انا قاعد اكلّم نفسي 
ولّا قاعد و بكلّم حد ؟
هو انا قاعد اصلًا فين ؟
هو انا بحلم ولّا بجد ؟

بحلم ولّا بجد ؟! - ديفيد رفيق

حلقة من حلقات راديو روبابيكيا .. اعداد و تقديم : ديفيد رفيق

www.facebook.com/barrraelkadr

ديفيد رفيق

user739008651