كلمات و ألحان و توزيع و تسجيل: أحمد هوارى


مش خايف أموت .. كلنا هنموت .. بس المهم .. عملنا ايه ؟؟
مش شايف وجود .. لناس عاشت من ميت سنة .. غير باللى عملوه 

عملت ايه .. تسيب بيه الدنيا دى
عملت ايه .. يفتكرك الكون عليه
عملت ايه ..
 ألمس بيه قلوب الناس ..أو أهدى الضحكة للأتعاس
و أحفر اسمى جوا الزمااان

مش ناوى أموت .. غير لما الكل يعرف .. أنا عملت ايه
لو كان وجودى .. مش فارق.. من بكرة راح أختفى


عملت ايه .. تسيب بيه الدنيا دى
عملت ايه .. يفتكرك الكون عليه
عملت ايه .. ألمس بيه قلوب الناس .. أهدى الضحكة للأتعاس
و أحفر اسمى جوا الزمااان

مش خايف أموت .. كلنا هنموت .. بس المهم .. عملنا ايه ؟؟


مش ناوى أموت - أحمد هوارى

كلمات و ألحان و توزيع و تسجيل: أحمد هوارى

بعيش و استنى .. و أنام و أتمنى
أفتكر أيام زمان
ريحة و طعم .. و صوت و حلم
حضن و لمسة حنان

سنين
إحساس غريب
يقتلنى حنين
لذكريات .. فى عالم غريب
فى عالم قديم

فى ناس نسيانى و ناس فاكرانى
و ناس شيفانى و طناش
أصحاب من زمان فرقنا المكان
معناش غير ذكرى و خلاص

عالم قديم - أحمد هوارى

كلمات و ألحان و توزيع و تسجيل: أحمد هوارى

بقالى كتير مشوفتش ضحكتك
قلبت الكون أدور على ضحكة أهديها إليك
بقالى كتير بنشف دمعتك
بينجدنى من غرقى فى دموعك قشة حبى ليك

اضحكى اضحكى .. موجود دايما هنا
اضحكى اضحكى .. لا تقلقى لازق هنا لحد ما تضحكى

بقالى كتير مستنى فرحتك
عشان بسمة .. كل ورود العالم بأهديها إليك
بقالى كتير بأحاول أملا وحدتك
و اتمنى ييجى اليوم .. و لا تفارقى ضحكتك

اضحكى اضحكى .. موجود دايما هنا
اضحكى اضحكى .. لا تقلقى لازق هنا لحد ما تضحكى 

بقالى كتير مشوفتش ضحكتك  .. يللا اضحكى
:) :)

اضحكى - أحمد هوارى

 من ارتجالات الإمام الشافعى
ألحان و عزف و تسجيل أحمد هوارى كيكو

ما في المقامِ لذي عقلٍ وذي أدبِ    .:.          مِنْ رَاحَة ٍ فَدعِ الأَوْطَانَ واغْتَرِبِ
سافر تجد عوضاً عمَّن تفارقهُ      .:.            وَانْصِبْ فَإنَّ لَذِيذَ الْعَيْشِ فِي النَّصَبِ
إني رأيتُ وقوفَ الماءِ يفسدهُ  .:.     إِنْ سَاحَ طَابَ وَإنْ لَمْ يَجْرِ لَمْ يَطِبِ  

تحرك يا فتى .. ارحل من هنا      .:.         و أحلم  بالعلا .. فى أرض الهنا
تحرك يا فتى .. لا تقف هكذا      .:.         و أحلم  بالعلا .. فى أرض الهنا

والشمس لو وقفت في الفلكِ دائمة ً .:.      لَمَلَّهَا النَّاسُ مِنْ عُجْمٍ وَمِنَ عَرَبِ
والأسدُ لولا فراقُ الأرض ما افترست  .:.   والسَّهمُ لولا فراقُ القوسِ لم يصب
إني رأيتُ وقوفَ الماءِ يفسدهُ .:.     إِنْ سَاحَ طَابَ وَإنْ لَمْ يَجْرِ لَمْ يَطِبِ  

(( البيتين فى المنتصف من تأليفى))



أرض الهنا - أحمد هوارى

كلمات و ألحان و توزيع و تسجيل: أحمد هوارى

فى ليل ساقع أدينى فى بلكونتى لوحدى
حزنان ويا سما لابسة اسود .. بتبكى
و أنا اللى جى أشكيلك .. طريق أحلامى تاه وسط الشتا

مبسوط بكل يوم .. مش حامل هم بكرة
زعلان من كلام الناس .. انت إزاى مش فى دماغك فكرة
عملت ايه عشان .. حياتك بعد ميت مليون سنة

و ليه الفرحة بعيدة زى النجوم 
و ليه فى كل خطوة جديدة فى خوف موجود
و ليه أنا جبان

ثوانى أهى خلاص و ضوء الفجر يعلا
بداية يوم جديد .. بكلام الناس يوجع
عملت ايه عشان .. حياتك بعد ميت مليون سنة

يمكن .. زى ما ناس كتيرة قالت
يمكن .. كل حاجة فى إيدى باظت
لكن .. على وشى ضحكة .. و مش ندمان على أحلام موصلتلهاش
الفرحة بعيدة زى النجوم 
فى كل خطوة جديدة خوف موجود
لكن أنا مش جبان


مش جبان - أحمد هوارى

من أشعار الإمام الشافعى
ألحان و عزف و تسجيل أحمد هوارى 

دَعِ الأَيَّامَ تَفْعَل مَا تَشَاءُ .:. وطب نفساً إذا حكمَ القضاءُ
وَلا تَجْزَعْ لحادثةِ الليالي .:. فما لحوادثِ الدنيا بقاءُ
وكنْ رجلاً على الأهوالِ جَلْداً .:. وشيمتكَ السماحة ُ والوفاءُ
ولا تُرِ للأعادي قط ذلا .:. فإن شماتةَ الأعدا بلاء

وأرضُ الله واسعة ً ولكن .:. إذا نزلَ القضا ضاقَ الفضاءُ
دَعِ الأَيَّامَ تَغْدِرُ كُلَّ حِينٍ .:. فما يغني عن الموت الدواءُ

ولا ترجُ السماحة ََ من بخيلٍ .:. فَما فِي النَّارِ لِلظْمآنِ مَاءُ
وَرِزْقُكَ لَيْسَ يُنْقِصُهُ التَأَنِّي .:. وليسَ يزيدُ في الرزقِ العناءُ
إذا ما كنتَ ذا قلبٍ قنوعٍ ..... فأنت ومالكُ الدنيا سواءُ
وَمَنْ نَزَلَتْ بِسَاحَتِهِ الْمَنَايَا .:. فلا أرضٌ تقيهِ ولا سماءُ



حكمة - أحمد هوارى

كلمات و ألحان و توزيع و تسجيل 
أحمد هوارى كيكو

مش لازم خياشيم عشان نغوص .. أو ريش عشان نطير
و فى يوم هنلمس النجوم .. طول ما فى أحلامنا مصدقين

و هيكون عندنا رونالدو و بيليه
لو مدرس الحساب مأخدش حصة الألعاب
و هيكون عندنا موتزارت و ياننى
لو فى حصة مزيكا
(( عايزين .. حصة مزيكا))

و نغمى عيون عيالنا عن التمثيل و الغنا و لعب الكورة  
عقولهم لسا فيها الخير .. و احنا عايزينلهم وظيفة حكومة .. عشان مضمونة

و يسألنى ابنى إزاى أوصل للنجوم
هأقوله تقدر توصل لكل اللى بتحلم بيه
و يسألنى ابنى إزاى أكون زى النجوم
يابنى النجوم صبحوا نجوم لما قالوا مفيش مستحيل


أحمد هوارى كيكو 23/7/2014


حصة مزيكا - أحمد هوارى

تأليف و ألحان و توزيع و تسجيل
أحمد هوارى


فى مكان موجود بس جوا منى
فى بيت خشب صغير و بحيرة هادية و غروب بينيمنى
مش سامع أى صوت غير صوت الشط
و مش شايف عربيات و زحمة .. سرحان مع شوية بط
و مابين حقول القمح .. الشمس تسيح
و ريحة ورد حلوة .. شايلها الريح
قلبى يدق بسرعة و أنا فى المدينة
وسط ناس طول اليوم مستعجلة .. عايزين طلبات كتيرة
و أكتر حاجة بأبص عليها عقارب الساعة 
و خايف أتأخر على طول متسربع .. بتفوتنى متعة كل حاجة
و أنا نايم .. و أنا بأنهج
و وقت راحتى .. عمال بيهرب
لمكان جميل .. خدنى يا تفكير .. أغمض عينى و أشوف كل اللى نفسى فيه
لمكان مريح .. خدنى يا ريح .. أغمض عينى و أعيش حياتى برتم هادى .. لو بس لحظة
جسمى هامد زى رصاصة .. هيحركها سلاح
زى فاس ملوش لزمة .. غير فى ايدين فلاح
عقلى قافل زى قفل .. و لقيت المفتاح 
انى أرتاح

أحمد هوارى 9/1/2015


أرتاح - أحمد هوارى

من أشعار إيليا أبو ماضى
ألحان و توزيع وتسجيل
أحمد هوارى

أيّهذا الشّاكي وما بك داء    كيف تغدو اذا غدوت عليلا؟
إن شرَّ جناةِ الأرضِ نفسٌ   تتوخى، قبل الرّحيل ، الرّحيلا
والذي نفسهُ بغير جمالٍ   لا يرى في الوجودِ شيئا جميلا
فتمتّع بالصّبحِ ما دمتَ فيه   لا تخف أن يزول حتى يزولا

أيّهذا الشّاكي وما بك داءُ   كن جميلا تر الوجود جميلا

وإذا ما أظلّ رأسَك همٌّ   قصّرِ البحثَ فيه كيلا يطولا
وتوقّع ، إذا السّماء اكفهرّت   مطرا يحيي السهولا

ما أتينا إلى الحياة لنشقى    فأريحوا ، أهل العقول، العقولا 
لا خلود تحت السّماء لحيّ   فلماذا تراود المستحيلا ؟


كن جميلا - أحمد هوارى

من تأليف و تلحين و غناء و توزيع
أحمد هوارى

بندور عالدهب من بين الرمل .. و ندور عالجواهر وسط الجمر
و ورود من صخر
عايزين الطريق السهل
نوصل بيه للنجوم .. من غير ما نقوم مالنوم

و ننام .. و نحقق أحلامنا
و ننام .. عايشين فى خيالنا

بندور عالسعادة فى ألحان .. نستنى البخت من فنجان
والراحة من دخان
كسلان .. إنسان
عايز يوصل للنجوم .. من غير ما يقوم مالنوم


ننام - أحمد هوارى

أبو جهل

طول عمرى باركب عجلة .. واخد عالتأليس .. و لما الريس ركب عجلة بقا العجل لذيذ
و شربت أنا سجاير .. ولا حد كان دارى .. و لما شربت فى يوم بايب قالوا الخواجة هوارى
فمجبتش آى فون زى بقيت الخلق .. جبت سونى قلت رخيص .. و أنا أولى بالفرق
قالولى يا غبى سامسونج أحسنهم .. حتى الناس فى نوع تليفونى حاشرين مناخيرهم

ليه لازم نلبس نفس اللبس و نبقى نفس الشكل .. و منجربش حاجة جديدة إلا وصفات الأكل
بنحاول نرضى الناس و كأنه سهل .. و اللى يمشى بدماغه .. يبقا أبو جهل

واقف قدامك بجيتارى وألحانى و توزيعى و نغماتى و تركيبى و تلحينى و تسجيلى و إخراجى
بأدى تحية على كل مين لعب موسيقى محترمة .. و بأتف .. على كل شركات إنتاج الإسفاف و العرى
 
حلمت أكون بمزيكتى مشهور .. بعيد عن قرف ستار أكادمى و أراب أيدول
لكن مسلمتش من إحباط الكل ليا بيقولوا .. لازم يبنى عشان تعدى تبقى حليوة وأمور
ثم أن أغانيك غريبة مستفزة .. اتنحنح .. اتشلح  و لو عندك وسط هزه   
و لما ببعد عن الحب أغنى فى أى هتش .. هتلاقى الكل بصوت واحد يقوللك بطل ألش
 
هوا دا شكلى .. هوا دا أنا .. بأعمل نفس اللى بأعمله بقالى ميت سنة 
مقتنع بيه .. و سيادتك لأ .. اتفضل اقفل الأغنية مأشوفكش فى أى حفلة   
عشان أوضحلك .. أنا مش أراجوز .. هأعمل اللى تقوللى عليه عشان شهرة و فلوس
الشهرة عالإسفاف جريمة .. فى حقك انت .. من ساعت سح الدح امبو .. لبوس الواوا و لسا
خلينا نلم التافهين نعمل منهم مشاهير .. خلينا نكرم أراجوزات يبقوا دول الفنانين  
خلينا نغنى عن الحب و عمرنا ما حسيناه .. و بكدا أبو جهل فى المراية نلقاه 
   
ليه بنألس عالبنات بهدوم العيد .. على لفة طرحة أو شعر بلون غريب
عالأقرع و أبو غويشة وأبو توكة لابس فيزون و حلق .. أو بياكل بشوكة
مسرح شعره على جمب أو عامل قصة .. كل واحد حر .. معايا دى نهاية القصة
نألس على جو تيوب و شادى سرور وآية مصطفى .. لكن سامحونى خليل كوميدى أنا لو شفته هأنفخه


كل واحد فينا عنده رأى .. كل واحد فينا عنده ذوق
فلو اختلفت معايا فى الرأى .. أرجوك متبقاش قليل الذوق

أبو جهل - أحمد هوارى

من قصيدة (كم تشتكى) لإيليا أبو ماضى
مع بعض التعديلات 
ألحان و توزيع و غناء : أحمد هوارى كيكو

كم تشتكي و تقول إنّك معدمُ	و الأرض ملكك و السما و الأنجمُ ؟
و لك الحقولُ وزهرُها و أريجها	و نسيمها و البلبلُ المترنّمُ
فكأنّه الفنّانَ يعرضُ عابثا	آياتِه قُدّامَ من يتعلّم
أتزورُ روحُكَ جنّة فتفوقها	كيما تزوركَ بالظنونِ جهنّمُ ؟
هشّت لك الدّنيا فما لك واجما ؟	و تبسّمت فعلام لا تتبسّمُ
يا من يحنُّ إلى غدٍ في يومِهِ	قد بِعتَ ما تدري بما لا تعلمُ
إن كنت مكتئبا لعزٍّ قد مضى	هيهات يرجعه إليك تندّمُ
أو كنت جاوزت الشّباب فلا تقل	شاخ الزّمان فإنّه لا يَهرَمُ

كم تشتكى - أحمد هوارى

كلمات و ألحان و توزيع و غناء أحمد هوارى كيكو

عاملين غلبانين .. عشان نص الكوباية فاضى .. و ناسيين ان عندنا كبايات كتير
عاملين غلبانين .. بنقول مش لاقيين ناكل .. لكن عمرنا ما نمنا جعانين

فى كل يوم بأفكر نفسى انى مش فقير .. أشتغل و أحمد ربى عالرزق .. و أقول أنا
غنى

عاملين غلبانين .. معناش فلوس نركب تاكسى .. مش شايفين ان فى ناس ماشيين
عاملين غلبانين .. ماسكين آى فون حقير ..  أكننا بننام عالحصير

غنى

و بأضحك على طول عشان أنا غنى 
و بأنام نص اليوم .. أصل أنا غنى
مبأفكرش فى الهموم .. عشان أنا غنى
و انت كمان ممكن تكون

غنى

غنى - أحمد هوارى

من أشعار الإمام الشافعى

نعيب زماننا والعيب فينا ... وما لزمانا عيب سوانا
ونهجو ذا الزمان بغير ذنب ... ولو نطق الزمان لنا هجانا
وليس الذئب يأكل لحم ذئب ... ويأكل بعضنا بعضا عيانا

نعيب زماننا - أحمد هوارى

بمشاركة الفنانة نوران حسن


نضفت بيتها .. لمت زبالتها فى كيسة طوحتها من الشباك
شتمها صاحب الدكان .. و كنسها على عتبة جاره من سكات
ركن سواق تاكسى .. فوطة صفرا .. و ساعة و نص بيلمع الإزاز
و اتأكد ان محدش باصص .. فتح الباب الورانى عمل زى الناس

آيات قراءان .. صلبان متعلقة فى الرقاب .. عالحيطان
و احنا نسيناهم .. و كرهنا بعض ظلمنا نفسنا 
ربنا بيقول السلام .. ربنا بيقول السلام .. ربنا بيقول المحبة و الإحترام

شالت الأكل .. نسيت تعمله الشاى .. زعق .. حبسها فى البيت
نزل يصلى .. و هو راجع يدعى ربه يكرمه و يتوب عليه
بنت معدية جمبه .. بص تحت .. عشان قدام الناس بيحفظ عينيه
و اتأكد ان محدش باصص .. لف وشه فضل مبحلق ابن الايه

فى العربيات .. صلبان فى المرايات .. مصحف من ركنته اصفر الورق
عيزينه يحفظ من سوء .. و احنا كل السوء .. لما بنسوء .. بالخناق و انعدام الأدب
الدين مش شعارات .. ولا شموع و صلاة و آيات .. لو كنا فهمناه كان فرق
الدين هو الأخلاق .. نرضى و نراعى الناس .. مش كلامى دا كلام الى خلق

ربنا بيقول - أحمد هوارى

كلمات و ألحان و توزيع و غناء أحمد هوارى كيكو

لا تقلق يا أنا .. بما بيننا .. سنبحر أهوال الغريق
تمسك يا أنا .. لحظات صعبة .. وما لى سواك صديق

موج الحياة يصارعنا  ..  فى الصخر نحفر أسمائنا
موج الحياة يضاربنا  .. سننتصر كهبو الرياح .. قادمون

فلتقو يا أنا .. لن نفقد وعينا .. معا سنواجه المحال 
فلتبق يا أنا .. على مبدئك .. فالمبادئ ما تصنع الرجال

و لن نهاب الموائج .. مهما كانت هوائج 
فمريئة غايتنا
و لن نخشى هيبةُ البحرِ ..رياح تقلب الأمواج .. أنت و أنا

رياح - أحمد هوارى

تأليف و لحن و توزيع و غناء - أحمد هوارى كيكو

بأنزل يوماتى الصبح  آخر شارعنا شمال فى يمين
عالناصية فى كافيتريا .. طربيزة رقم عشرين
لازم أعدى يوماتى .. أعد أظبط دماغى
و أشرب قهوتى من ايدين الجميل

حبيتها عشان ريحتها و عينيها مكحلين
 روج أحمر .. شعر أسود .. حنة عالإيدين
بإبتسامة و صوت رقيق .. سألت قهوتك ايه ؟؟
قهوتى سادة لكن النهاردة .. حبيت أكون جرئ

اعمليلى قهوة سادة .. و بصوابعك قلبيها
و يا ريت كمان تدوقيها .. بشفايفك هتحليها
اوعى تفتكرى انى بأعاكسك .. خلاص هأشرب عالريحة
لكن دى مش أى ريحة .. دى ريحة برفانك

فجأة وقت الفاس فى الراس .. فضحت أنا عن مشاعرى خلاص
وشها احمر و برقتلى .. أحرجتها وسط كل الناس
و شى يضحك و من جوا اتخضيت
سابتى و مشيت .. (( أوبااا)) .. أنا شكلى عكيت

نادت المدير و جت .. زعقلى بتعاكس ليه
لبست الوش البرىء .. أنا بس طلبت قهوتى
قوللى اللى قلته تمام لا يومك مش معدى
بصراحة يا سيادة المدير .. كانوا هما كلمتين .. قولتلها

اعمليلى قهوة سادة .. و بصوابعك قلبيها
و يا ريت كمان تدوقيها .. بشفايفك هتحليها
اوعى تفتكرى انى بأعاكسك .. خلاص هأشرب عالريحة
لكن دى مش أى ريحة .. دى ريحة برفانك

ريحة برفانِك - أحمد هوارى

أحلى حاجة محتاجة لوقتنا  .. وقتنا ضايع فى شغلنا
شغلنا طول اليوم يهدنا .. و ننام .. فى أحلى حاجة نفسنا

بأقوم من النوم عالمنبه .. متنرفز مصدع متضايق مكسل
أبل دماغى بشوية ماية .. و أنزل الشارع و الدنيا غم عليا
نفس الورق .. نفس الوشوش .. نفس الشغل .. نفس الهدوم
كرفتة خانقانى مع انها واسعة .. و الجزمة مضايقانى مع انها ماركة
و تيجى فلوس ..  الصحة راحت .. عقلى فين .. أنا دماغى ساحت
أركنها جمبى تحت المخدة و أنام .. أصحى تانى يوم أكرر نفس الكلام
عمرى ما فكرت أحب الشغل .. لكن باجى عشان مرتب آخر الشهر
لا لا لا
أحلى حاجة محتاجة لوقتنا  .. وقتنا ضايع فى شغلنا
شغلنا طول اليوم يهدنا .. و ننام .. فى أحلى حاجة نفسنا

بأستنى أجازة آخر الأسبوع .. فار مستنى أكل ميت مالجوع
عايز أعمل كل حاجة .. مش لاقى حاجة اعملها .. خايف أبدأ أى حاجة عشان مش هكملها
من القهوة دى للقهوة ديا .. و دماغى تلف تلعب بيا
بقالى عالحال دا كذا سنة شغال .. حالة نفسية اجتماعية هيا هيا
متفتكرش انى سعيد .. فلوسى طول شغلى أكتبلك بيهم شيك
 اصرفه و رجعلى الوقت اللى ضاع .. صدق اللى قال الراحة مش بالمال
عمرى ما فكرت أحب الشغل .. لكن باجى عشان مرتب آخر الشهر
لا لا لا
أحلى حاجة محتاجة لوقتنا  .. وقتنا ضايع فى شغلنا
شغلنا طول اليوم يهدنا .. و ننام .. فى أحلى حاجة نفسنا
وحشنى .. قعدة الشباب ..  و وشى الوارم و عينيا الدمعانة من كتر الضحك
وحشنى    إحساس الرملة بين ايديا و ريحة  و لون و شكل البحر
وحشنى .. حضنى لحبيبتى .. و ضحكة طالعة من القلب .. يا ترى دول بكام  

باين أحلى حاجة فى الدنيا دى محتاجة لوقت .. و وقتنا ضايع لأجل المال 
تأليف و تلحين و توزيع و غناء : أحمد هوارى كيكو

لأجل المال - أحمد هوارى

مزيكاتى من اسكندرية :) :)
اسمعنى و قوللى رأيك .. و خد رأى صحابك .. و صحاب صحابك .. و صحاب صحابهم .. وصحــ ..
أكيد فهمت يعنى .. تعالى بقا اقوللك ايه الحكاية !!

الموضوع ببساطة انى بقالى مدة بألعب جيتار و بأغنى .. و حاسس ان فى ناس كتير عمالة تطبل فى أغانى أى هتش عشان الجمهور ينبسط و ييجى يحضر حفلات و يشترى البومات و كل الحاجات الجميلة دى .. بس المشكلة ان نفس الناس دى ممكن متكونش حابة نوعية الفن اللى هيا نفسها بتقدمه لكن مضطرين يعملوا كدا عشان الجمهور يحبهم ! فأصبحت الأغانى كلها شبه بعض .. حتى فى عالم الأندرجراوند underground - و هو عالم الفرق المستقلة اللى بيعملوا فن مختلف عن موسيقى السوق و الفن السائد- أول لما واحد ينجح تلاقى كله عمل أغانى شبهه فبقى كله شبه بعض !

اللى أنا بأعمله هنا ليس له علاقة على الإطلاق بحب الجمهور أو كرهه .. و برضو مش هو اللى هيعمل منى شهرة عمرو دياب ولا منير - و دى ناس أحسن منى مليون مرة أكيد بس أنا بأضرب مثال فى أشهر ناس فى البلد - لكنه ببساطة فن صادق بموسيقى صادقة بسيطة و كلمات مباشرة بأحاول أعبر عن حالتى النفسية أو حاجة أنا شخصيا مريت بيها.

دا مش مشروع أكوستيك .. و مش سبوبة .. و مش حاجة أنا بأكل منها عيش .. اسمع الأغانى  .. و لو عجبتك اعمل (فولو) و  (ريبوست) عندك و اعمل لايك على الصفحة على الفيسبوك علشان تتابعنى .. و كل ما بتعمل شير عندك فى صفحتك انت كدا بتساعدنى انى أنتشر و أوصل موسيقتى و رسالتى الفنية لناس أكتر .. شكرا لإهتمامك و قرايتك للكلمتين دول .. و يا رب مأكونش ضيعتلك وقتك
أملى كله ان الموسيقى دى تلمسك و أكون قدرت أوصللك اللى أنا حاسس بيه :)

أحمد هوارى كيكو


Ahmed Hawary Keko

Popular tracks