بخاف على أد ما قريت
أموت جاهل
وبخاف من كل حاجة
بتيجي بالساهل
بخاف م الضعف و م القهرة
و بخاف على مصرنا الطاهرة
و بخاف منها
بخاف م الغربة و سنينها..
و م المطارات 
و أخاف م الوحدة و المسافات
و أخاف إن كدبت الستات
و بخاف م الموت
و أخاف تحديداً..
أموت غرقان في بحر ذنوب
و ساعات بخاف من المكتوب
و من بكرة، و م الأيام
و أخاف عشمي في كوم أحلام
يروح عالفاضي ..و ماطولهاش
فأقوم استأذن الدنيا
في رضاها و فرص تانية
فا ماترضاش
بخاف من الحاجات الي شايفها طشاش
يفوت عمري و ماعرفهاش
فا من تاني..أموت جاهل



بخاف

إيمان بالله
و بإن الدنيا دي فانية
إيمان بالمكسب بس
و اجوالنا بتيجي في ثانية
إيمان الفرصة الأولي
بيضعف في الفرصة التانية
إيمان بالثورة
وبكل أحلامنا الخضرا
يا نبينا يا ستنا العدرا
مدد بعدد اللي راحو
مدد بعدد اللي جي
وأنا لسه قلبي حي
لسه قادر يشوف 
لسه قادر يلاقي 
حد يشاركه الخوف
إيمان بإن الطريق أطول
من نفسك المقطوع 
من شغفك الخلصان
و إن الدموع راح تروي
حلمك الدبلان
وبإني رغم وجودِك
لسّاني برضه جبان
لسّاني بمشي مغمض
ورا عقلي المختل
كان ايه يكون الحل؟
غير إني ألاقيكي
تلت الهموم ليا
تلتين هموم ليكي 
وأنا لسه متعلق
مؤمن بكام حاجة
بإن الحب أعمي
و بإن الجنان نعمة
و بإني رغم ملامحي
من جوا شِبه عجوز
و بإن "كل شئ
إلا الخيانة يجوز"
إيمان بإيمان
بأي رهان
مادام هيفوز.

إيمان

علي طول علي بالي 
أنا حافظ صم
فاكر يوميها الشوارع
ريحتها كانت دم 
قنوات كتير.. صور لألوف
يا أبو فارس خاف ل عيالك 
يا أبو حمزة ملعون الخوف 
كفارة دي الناس بتحس 
كفارة دي الناس بتشوف 
الدولة بحالها قايمة
كل العيون الصايمة
فطرانة يوميها دموع
كل الآهات الليلة  
خارجة و بصوت مسموع
و الشهدا.. نصهم برصاص
و نص مات م الجوع 
و الحلم طال الكل
صلاة الثورة جمعاً
بتوضي بـ بيبسي و خل
القِبلة ع الميادين
لو حد فينا ضَل
و مصر حاضرة و شايفة
فاكر عيون خايفة
فاكر غلبنا البرد
متدفيين في النار 
و دم ساقي الأرض
طارح عداوة و طار
فاكر ميلاد شجعان
و وصية العرسان : 
أذكرونا حينما 
نسقط بطلقة غدر
علو رايات الحلو
و اتسلحوا بالصبر
الثورة أبقى، الثورة حية
مصر ياما يا بهية
الزمن شاب و أنتِ شابة
هو رايح، و احنا روحنا
كل لأجل.. إن أنتِ جاية


omarshadyy

Popular tracks