#عشانها :) ..
عشان الضحكة في عيونك أخرها دمع
و كونك مفرد لأحزانك و للسعادة جمع 
و كونك طيبة خالصة من قلوب ملايين
و كونك طيف بيطلع وسط بني آدمين
و كونك عارفة طيبتك دي رايحة لفين
لكنك قادرة تهوني عليا .

بقولهالك ..
وقلبي فيه حاجات كتير شيلهالك :
بيشكر طبطبة قلبك على قلبي .. و مسحه دموعي فى عنيا
بكلمة تطيب الخاطر .. وضحكة تغني حواليا
و بسؤالك ..
" ايه أحوالك؟ .. و أحزانك؟ .. في ايه مالك؟ .. شاغل بالك؟ طب احكيلي "
تضميني و تسمعي مني مواويلي
و انا بحكي و كل حكاية اقولهالك
وراها كلمتين منك يطيبوا الخاطر
وراهم مني " طيب .. آمين .. حاضر "

و شئ جوايا بيقولك ..
" كفاية انك هنا جمبي - 
كفاية وجودك الدايم -
كفاية الدمع في عنيكي -
على الضحك اللي مش دايم - "
و برايا بيضحك ويا ضحكاتك على الدنيا
" ماهي فانية " ..

مع ذلك بيضحك وياكي و يقرر
يزيل الحزن من قلبه اللي متعفر
و يفرح وياكي فرح الزيف
و يرمي الحزن جمب أي رصيف

لـ أمنية محمد عبد النبي

Omnia M. Abdel-Nabi