(A peine j'ouvre les yeux) - عسلامة يا حمامة

يا بنات الحَبْقَة، يا شَمْعة طافية، يا ريُوس كاسْحة، يا عينين طايحة، لاتنفعو لاتصْنعو، لاعندكم ما تعمْلو، دين بَرْكُم، تراب جِدْكم، والديكُم ناس ملاح قدّاه توحشتْكم. 
صحاب الخيرات، في الأصل خوات، لا بابا بوكم ولا امّي ربّات، هكّاك الدنيا كِتبتْ، أني وأكا ثلاثة بنات، خْرُد، معْدومين، مخزّين وياسر خرواتات. نْحِبنَا أحنا الكلنا مع بعَضنا، بالـمُخ الـمعفّن والفكر المسّخ والبدن الـمعوّج وبالشعر المخبّل والكلام الزايد والغش الماسط والعَرك المطوّل والحب المسوّد الحب المسوّد كيفكم، كيفنا. أربعة بنات، أربعة كيف نهار الأربعاء كان تدخل بيناتنا الخامسة تحضِر ساعة القضاء وما ادراك ما ساعة القضاء. خبّيلة سوري، ذبيحة عاصِي، طهُور أناثي، ثلج فعز الصيف، شمس نصف الليل، نجوم نصف النهار. يصير ما يصير وياما صار ما صار، وياما عراك فوسط الدار، فالقهواي، الشارع، قدّام الناس وفالبيران، ياما سبّينا، ياما حلفنا بالإيمينات وبالحرام كان مزّال فمّي يقابل فمّك، وكان مزّلت نعاود نكلمك، كان مازلت تحلم تراني وكان مازلت تعَفّس عتبة داري. منّو غدوة نلقاهم قدّام داري، السماء والارض يطلعو ويهبطو، وأحنا على بعضنا بالعمر ما نتغيرو. صحاب السيئات، لا ينفعو لا فدين ولا فعلم، يهزّوك لـماتاهات، وين الخلاء وين أحنا، الفايدة مع بعضنا وحدنا. الهربة من الدار وحديث الأسرار وقهيوة في بار وترتيب الأفكار والتخطِيط الجبّار وضحكة تعمل العار، السهر وتحوِيق العينين واللِيالي البِيضَة، فَصعة بالكرهبة، كذبة بيضة، كذبة كحلة، كان تخلى تزيد تحلى، خارجات بالسّرقة، هاني في داركم، هاكم في دارنا، الشتاء تصب، اللّيلة العشاء بحذانا، مستقبل لا علاقة، حكايات الهم والفرحة والبلادة والركاكة ولـمّة بنينة فاوحة مزيانة. تواحشتنا، توحشت روحي معاكم ملمُومة بيكم، نَنصح فيكم، نحكيلكم ونحكي معاكم وبالخير نحكي عليكم. توحشت ومازال عندي برشة وقت بش نتوحشكم أكثر، مازال الفراق بش يتحس أكثر، الجمرة شتزيد تشْعل تلهِب وتحرق الجواجي. مَازال الوقت بش يبعِّد ويفرِّق وكل وحدة فيكُم شتبقَى تقرّق، ايّا تحرّك روّح، بالدمُوع والشهقة وتَطفَى الضّحكة ونتحرمُو من الـلَمّة وتَحرمتُو منِّي وتَحرَمِت منكُم، وأني شنبقَى لَاني منكُم لاني مِن روحي، المشكل انتُم روحي، وروحي علِيكم ماتُصبِر، وحتّى وحدة فينا ماتُصبِر على بُعدنا ولا على فُرقِتنا، ميقدَرش يلّي ناوي يُقتل صحبِتنا، حتّى مَخلوق فالكُون يكونْ من يكونْ حتّى لَو كَان من عِيلتِي والاّ من عيلتكُم. مَعَ إنّي مانيش متاع الحُبْ وهداريه الفارغة، اما أنِي نحب رُوحي يلّي مازالت صبِية على الحُبْ لكِنها عرفت تْحِبكُم (...)

.الٌحَبْقَاتْ

نحكي معاك،
لا نحبك 
لا نحب عليك
نحب نقراك 
 نقرا حروفك
حرف حرف 
ونزيدك النقاط 
من عندي.
ماتخافش،
 أني مانحصلش
كافرة بالحب،
مانتبدّلش.
مايغرّكش اسمي
لا نوعد لا نوفي،
كذّابة كبيرة 
ما نعطيش الامان.
ساعة نردّك سلطان
وساعة تولّي خدّام عندي,
قول خاتم في صبعي
مع الوقت نردّك على قياسي
وتولّي تجي قدّي.
سحّارة نتطلع في الليل
وعز القوايل،
غارق بيري
صاحبي جيبي
روحي روحي
ولا ترحم حبيبي.

Ophé Merisa