Hljóðritun frá tónleikum í Gerðubergi í tónleikaröðinni „Klassík í hádeginu“ 19. febrúar 2016.

Finnur Bjarnason tenór og Nína Margrét Grímsdóttir píanóleikari flytja sönglög eftir Franz Schubert. Á milli laganna les Ragnheiður Harpa Leifsdóttir ljóð eftir íslensk nútímaskáld valin af Valgerði Þóroddsdóttur úr fórum forlagsins Partusar.

Í tónleikaskránni er spurt: „Hverju gæti ný íslensk ljóðlist hugsanlega bætt við sígild verk eftir Goethe og Schubert, og hvaða sambandi náum við yfirleitt við svo fjarlæga fortíð?“ Til þess að svara því bauð tónlistarfólkið Valgerði að velja dagskrá ljóða til að flytja á milli sönglaganna og setur þetta sérstakan blæ á tónleikana.

Auk ljóða eftir Valgerði eru lesin ljóð eftir Björk Þorgrímsdóttur, Ástu Fanneyju Sigurðardóttur, Soffíu Bjarnadóttur, Kristófer Pál Viðarsson, Kristu Alexandersdóttur, Þórð Sævar Jónsson, Bergrúnu Önnu Hallsteinsdóttur og Juan Camilo Román Estrada. Umsjón með upptöku hefur Una Margrét Jónsdóttir.

Brot úr þættinum Úr tónlistarlífinu frá 17. apríl 2016.
Upptaka af vef RÚV.

http://www.ruv.is/sarpurinn/ras-1/ur-tonlistarlifinu/20160417

Ljóðalög Schuberts og íslensk nútímaljóð

Þátturinn kemur við í Mengi við Óðinsgötu þar sem að kvöldi fyrsta sumardags, 21. apríl 2016, var haldið upp á sumarútgáfu seríunnar Meðgönguljóða úr fórum bókaútgáfunnar Partusar.

Í þættinum heyrist í kynni kvöldsins Kristínu Svövu Tómasdóttur lesa ljóð Jónasar Hallgrímssonar Nú er vetur úr bæ áður en ljóðskáldin þrjú þau Þorvaldur S. Helgason, Sigurbjörg Friðriksdóttir og Elías Knörr lásu upp úr nýju bókum sínum Draumum á þvottasnúru eftir Þorvald, Gáttatifi eftir Sigurbjörgu og Greitt í liljum eftir Elías.

Einnig heyrum við inngang ritstjóra hverrar bókar fyrir sig sem voru Haukur Ingvarsson, Jón Kalman Stefánsson og Kári Tulinius.

Brot úr þættinum Orð um bækur frá 23. apríl 2016.
Upptaka af vef RÚV.

www.ruv.is/frett/thrjar-nyjar-baekur-medgonguljoda

Sumarútgáfa Meðgönguljóða | „Greitt í liljum“, „Gáttatif“ & „Draumar á þvottasnúru“ | Orð um bækur

Jóna Kristjana Hólmgeirsdóttir í viðtalið við Elísabetu Indru Ragnarsdóttur í þættinum Stjörnukíki í Ríkisútvarpinu árið 2007. Í lýsingu þáttarins stendur:

"Jóna Kristjana Hólmgeirsdóttir er fjórtán ára gömul. Hún býr í Mývatnssveit, gengur í grunnskóla og yrkir ljóð um apatemjara, flamingófugla í Kirkistan og um hversdagslegt fólk sem lifir sín hversdagsævintýri. Hún les upp ljóð sín í Stjörnukíki í dag og talar um skáldskapinn og skólann."

Birt með leyfi.
Hægt er að hlusta á þáttinn í heild sinni hér:
https://player.fm/series/stjrnukkir/stjrnukkir-6-ttur

Jóna Kristjana Hólmgeirsdóttir, 14 ára ungskáld, í Stjörnukíki

Fyrr í þessum mánuði sendi Partus press útgáfan frá sér tvö ný Meðgöngumál. Meðgöngumál er litlar handhægar bækur með stökum smásögum eftir nýja höfunda. Meðgöngumál fimm og sex eru annars vegar Grandagallerí: Skýin á milli okkar eftir Júlíu Margréti Einarsdóttur og hins vegar Út á milli rimlanna eftir Þórdísi Helgadóttur. Umsjónarmaður þáttarins hitti höfundana og þýfgaði þá um sögurnar, leið þeirra til skrifta auk þess sem þær lásu brot úr sögum sínum.

Júlía Margrét Einarsdóttir hefur skrifað frá unga aldri, hún er útsrkifuð úr meistaranámi Ritlistardeild Háskóla Íslands og hlaut í fyrra nýræktarstyrk Íslenskrar bókmenntamiðstöðvar til að fullgera fyrstu skáldsögu sína Sirkus sem hún vinnur nú að. Grandagallerí. Skýin á milli okkar er fyrsta bókin sem Júlía Margrét sendir frá sér. Tími sögunnar er um það bil sólarhringur og segir frá ungum höfundi í Reykjavík sem býr sig undir að lesa upp, kannski í fyrsta sinn. Sagan einkennist af sterkri rammafrásögn og endurliti til atburða og drauma úr fortíðinni sem mynda forsendur atburðarásar sögunnar.

Þórdís Helgadóttir hefur unnið við textagerð um árabil en jafnframt því skrifað eigin skáldskap og birt í blöðum og tímaritum. Ekki alls fyrir löngu ákvað hún að láta slag standa og hóf meistaranám við Ritlistardeild Háskóla Íslands. Út á milli rimlanna er hennar fyrsta bók. Út á milli rimlanna segir frá ferðalagi ungrar móður til Amsterdam. Sagan gerist öll í óræðum rýmum sem ekki eru eiginlegir staðir heldur inn á milli eins og um borð í flugvél, á hóteli, kaffihúsum, í Rauða hverfinu í Amsterdam og í stórverslun þar sem stöðugt er gægst ú á milli rimlanna.

Partus Press er tiltölulega nýtt útgáfufyrirtæki semsérhæfir sig í útgáfu verka eftir upprennandi höfunda og hugsuði, meðal annars í seríunum Meðgönguljóð og Meðgöngumál. Á næstunni er von á fyrstu skáldsögunni sem Partus Press gefur út. Sú heitir Að heiman og er fyrsta skáldsaga Arngunnar Árnadóttur. Nánar má kynna sér starfsemi Partus Press á heimasíðu útgáfunnar.

Brot úr þætti frá 24. september 2016.
Upptaka af vef RÚV.

www.ruv.is/frett/sogur-um-ungar-konur-eftir-ungar-konur

Júlía Margrét Einarsd. & Þórdís Helgadóttir | Sögur um ungar konur eftir ungar konur | Orð um baekur

Hér má hlusta á óstytta útgáfu af samræðu um ljóð og ljóðskáld, aðstæður ljóðskálda og möguleika þeirra til að að koma ljóðum sínum á framfæri. Þau Anton Helgi Jónsson, Eiríkur Örn Norðdahl og Valgerður Þóroddsdóttir eru öll mjög virk á vettvangi ljóðsins. Þau ræddu ljóðaupplestra, ólíkar forsendur og markmið hópa á vettvagni ljóðlistarinnar, fagurfræði, verðlaun, útgáfu ljóða og úthald í því að standa í því að skipuleggja upplestra og útgáfu.
Anton Helgi Jónsson sendi frá sér sína fyrstu ljóðabók, Undir regnboga, árið 1974 og gaf hana sjálfur út. Síðan þá hefur Anton Helgi sent frá sér 9 ljóðabækur. Sú síðasta, Tvífari gefur sig heimakominn, kom út hjá Máli og menningu árið 2014. Anton Helgi hefur einnig skrifað leikrit bæði fyrir svið og útvarp, eina skáldsögu auk þess sem hann hefur þýtt nokkur leikrit. Á heimasíðu Antons Helga má finna margvíslegar upplýsingar um hann og verk hans.

Eiríkur Örn Norðdahl rithöfundur og ljóðskáld sendi frá sér sína fyrstu ljóðabók í eiginútgáfu árið 2001, Heilagt stríð: runnið undan rifjum drykkjumanns. Um svipað leyti varð ljóða - og útgáfufélagið Níhyl til sem stóð fyrir margvíslegum viðburðum tengdum ljóðum á fyrsta áratug þessarar aldar. Fram til ársins 2008 rak svo hver ljóðabók Eiríks aðra en nýjasta ljóðabók hans, Hnefi eða vitstola orð, kom út hjá Máli og menningu árið 2013. Eiríkur hefur einnig sent frá sér allmargar skáldsögur. Hann fékk Íslensku bókmenntaverðlaunin árið 2014 fyrir skáldsögu sína Illsku sem einnig var tilnefnd til Bókmenntaverðlauna Norðurlandaráðs. Eiríkur hefur einnig stundað þýðingar, meða annars þýtt ljóð eftir Allan Ginsberg og Idu Linde. Eiríkur Örn er einn ritstjóra menningar- og bókmenntasíðunnar Starafugl.

Valgerður Þóroddsdóttir sendi frá sér sína fyrstu ljóðabók Þungir forsetar árið  2012 og var bókin jafnframt fyrsta bók ljóðabókaflokksins Meðgönguljóð. Í þeirri röð hafa nú komið út 19 ljóðabækur eftir jafnmörg skáld og er í flestum tilvikum um að ræða fyrstu bók höfundar. Meðal þessara bók er fyrsta ljóðabók Valgerðar eftir hana eina, Það sem áður var skógur, sem kom út í fyrra. Valgerður starfar fyrst og fremst sem útgefandi en Meðgönguljóð hafa nú vaxið og orðið að Partus Press sem gefur út allar tegundir skáldskapar.

Ljóðasena, hvað er það? | Orð um bækur

Það er alltaf spennandi að opna nýja skáldsögu, einkum og sér í lagi þegar um er að ræða fyrsta skáldsverk höfundar. Arngunnur Árnadóttir sendi árið 2013 frá sér ljóðabókina Unglingar og nú er komið að fyrstu skáldsögunni, Að heiman. Arngunnur skrifar knappan stíl sem býr yfir ljóðrænu og íhygli um leið og aðstæður allar eru afar sannferðugar.

Sögusvið bókarinnar er Reykjavík í dag um leið og söguhetjan Unnur lætur hugann reika til nýliðins tíma þegar hún stundaði skiptinám í Berlínarborg. Í Berlín hafði hún upplifað margt, nýja list, nýja tónlist, víðáttur og fjölbreytileika heimsins og nýja ást.  Nú er hún hins vegar komin heim til Íslands sem virðist henni lítið og þröngt, hér andar hver ofan í hálsmál næsta manns og tilveran skreppur saman og í raun framtíðin líka.

Í þættinum Orð*um bækur er rætt við Arngunni um söguna og stíl hennar, um tónlist og skriftir sem og um andhetjuna Unni sem finnst hún alls staðar vera Að heiman.

Þetta er saga um unga stúlku sem leitar framtíðar, hún sér vel yfirborðsmennskuna og óréttlætið í kringum sig en finnst hún standa utan við það, eiga hvergi almennilega heima, vera Að heiman. Sagan gerist á nokkrum vikum í Reykjavík auk þess sem Unnur fer með tveimur vinum út á land, þau aka allan hringinn, búa hjá ættingjum og kunningjum eða tjalda. Þannig fær sagan á köflum yfirbragð vegaskáldsögu þar sem gestauganu er hvesst  á staði og fólk sem á vegi verða.

Brot úr þætti frá 29. október 2016.
Upptaka af vef RÚV.

www.ruv.is/frett/sogur-um-unga…r-eftir-ungar-konur

Samtíminn kraumar í sveit og borg | Orð um bækur

Kristín Svava Tómasdóttir segir frá þýðingu sinni á ljóði kúbanska skáldsins Virgilio Piñera, Þunga eyjunnar, og safni grískra og rómverskra ástar- og níðkvæða í þýðingu Þorsteins Vilhjálmssonar, sem hann nefnir Mundu, líkami. Báðar bækurnar eru upphafið að nýrri þýðingaröð frá bókaforlaginu Partusi.

Brot úr þætti frá 21. desember 2016.
Upptaka af vef RÚV.

Partus Press

Popular tracks