قالتلى انت ليه بتعمل كدة
قلتلها دة كدة و كدة
قالتلى ماكنتش متاكدة
قلتلها و فاد بايه التاكيد
ماحنا اللى فينا من التعقيد
كافى يغير حلمنا
و يخلى روحنا ف دمنا
و بنندبح تقليد
قالتلى شكلك جواك كتير
قلتلها و مين فينا ماستناش تقدير
و مين ماستناش كلمة
تخليه قادر على التغيير
و ساعتها نغير الواقع 
و نفك الحلم من سجنه 
ليوم تحرير
قالتلى ماتيجى نعمل كدة
قلتلها بجد متاكدة ؟؟
 ولا برضه كدة و كدة


قالتلى مابيبانش عليك الزعل
و ماتسالنيش عرفت منين
قلتلها مش هسال ع الزعل
عشان انسى انى بدارى
و لا هسالك عرفتى منين
و انا شايف عينيكى بتدارى
مافيش فرق بينا احنا الاتنين
بس الوجع علاماته معروفة
ولكل حد اتوجع 
اهات الزمن موصوفة
ف ماتساليش احسن
لاحسن اجابتى ماتعجبكيش
اصلك لو قلتى مالك
دايما اجابتى مافيش


,قالتلى بتكتب عشان حاسس
ولا بتحس عشان تكتب
قلتلها ساعات و ساعات
قالتلى انت دايما كدة بتحسب ؟
قلتلها معظم الاوقات
انا حبى ماهواش ساهل
بس اما احب 
يهون عندى تعب الحسابات


قالتلى ماتيجى نتكلم بصراحة
قلتلها عشان خاطرى بلاش
قالتلى مابتحبش انت الراحة
قلتلها صراحتك وجع مايستناش
وانا مش ناقص وجع
قالتلى بعنيها بحبك
قلتلها بعينيا كتير
مش عارف ساعتها فهمت
ولا .. دة كان تحذير
بس برضه يوميها
 مافهمناش
ان الصراحة وجع
ويا نتوجع يا بلاش


قالتلى خايفة اكون بجرحك
قلتلها ماسمحتش لحد بالجرح غيرك
قالتلى انا مش بمثل ف مسرحك
قلتلها و انا مش هخرج لغيرك
قالتلى بتحب شكلك تعيش مجروح
قلتلها ياريتها تيجى ع الجروح
ماكل جرح و له علاج
بس صعب تعالج المدبوح


قالتلى بتحبنى ليه
قلتلها مافيش اجابات
قالتلى ضعف دة ولا ايه
قلتلها انا جامد
 بس قلبى ماهوش جماد
قالتلى هات اثبات
قلتلها قلبك اثباتى
احساسك بيا و انّاتى
قالتلى حيلك
جبت الكلام دة منين
قلتلها من سؤالك
بس مش اللى قاله لسانك بدالك
دة سؤال جوة العينين
عرفتى جبت الكلام دة منين


قالتلى شايل جواك هم
قلتلها ليه السيرة الغم
قالتلى فيك 100 حاجة اهم
قلتلها جايز اكون مهموم
و جوة منى جبل فوق كوم
بس الحياة مش سهلة عشان
نعيشها من غير اى غيوم
قالتلى تعالى نشيل مع بعض
قلتلها اخاف اطلع مظلوم
و اشيلك هم المحتوم
خلينا كدة شايلين الهم
و كفاية بقى السيرة الغم


قالتلى صدقنى انا حاسة بيك
قلتلها مافرقتش كتير
قالتلى عندى الدوا يشفيك
قلتلها ماسبتيش فيا امل تغيير
قالتلى ليه على نفسك بتقسى
قلتلها لاجل ما انسى
لاجل ما ارمى هم جوة قلبى
قلبى مبقاش قادر يرسى
قلبى بيحزن ع اللى جاى
اكتر ما بيحزن ع اللى راح
مابقاش لاقى حتة براح
مابقاش عارف امتى يحارب 
و امتى يملا الكون افراح
قالتلى تفتكر هى دى القضية
قلتلها مش قلتلك ماصدقتيش
انك لسه مش حاسة بيا


قالتلى بحب فيك تقلك
قلتلها و ايه كمان
قالتلى خوفك على شغلك
قلتلها كله ف التوهان
قالتلى تحب تسمع حاجة
قلتلها كسرة ناى و كمان
حاجة تطلع الاحزان 
و تعلم عينى طعم البكا
قالتلى تحب تقول حاجة
قلتلها قلتهالك من زمان
ومستنى انك تقولى بس .. و انا كمان


قالتلى رغم احتياجى
منعونى مش بمزاجى
قلتلها ليه مستغربة
وليه ف وطنك 
حالفة تعيشى متغربة
قوليلى انتى فين و انا اجى
قالتلى مانت المشكلة 


قالتلى كلمنى عن نفسك
قلتلها بزيادانا  كلام
قالتلى عنيد و بتيجى على نفسك
قولتلها كرامتى مزودانى الام
قالتلى حبيت قبلى كام واحدة
قلتلها ماحبتش حب بجد
كان كله كلام ف كلام
و بكرة تثبتلك الايام
قالتلى بتقرانى من عينى
قلتلها عينيكى رغاية 
بتشرحلى يعنى ايه احلام
قالتلى بقولك ايه .. كفاية
قلتلها ما قلنا من الاول
بزيادانا كلام


قالتلى الحب مش ازمة
قلتلها الكلام مالوش لزمة
قالتلى انت ليه مش فاهم
قلتلها ما الاحزان بتساهم
قالتلى انت كدة دايما
مابتعرفش تتفاهم
قلتلها الفكرة مش فكرة حيرة
بس انتى جوايا كبيرة
قالتلى بتعند مع نفسك
قلتلها بتكشيرة
فهمتى بقى معنى الغيرة


قالتلى طب ليه بتسامح
قلتلها عشقك ليه ملامح
علمنى انى اكون احسن
علمنى احب الكون منك
و اشوف عيون الناس منك
واخلى فرحى يكون انك
فرحانة حتى لو انا زعلان
عرفتى عشقت ملامحك ليه
ولا هترجعى للنسيان


قالتلى حبتنى ف اد ايه
قلتلها السؤال دة ليه
قالتلى ليه بتزعل م السؤال
قلتلها بزعل م القيل و قال
لو نمشى يوم درب المحال
ماكنش يبقى حالنا حال
قالتلى بتفلسف عليا
قلتلها لو بتقرى كلام عنيا
كنتى عرفتى معنى الجمال


قالتلى قوم و اكتب ع الورق
امتى قلبك اتسرق
قلتلها لما شاف ملامحك
لما قالك مهما بتوجعينى
 هفضل دايما مسامحك
لما قالك شكرا على كل حاجة
على كل احساس حس بيه
على لهفته لما بتمشى و تسيبيه
على نظرتك اللى بتفهم من عينيه
وترد بنفس اللغة
لسه جاية بتسالينى امتى قلبك اتسرق
من اول كلمة شعر كتبها ليكى ع الورق


قالتلى هى ايه الحكاية
قلتلها البداية دايما ف النهاية
قالتلى القرار معايا
قلتلها بصى ف المراية
عاتبى نفسك 
شوفى نفسك من خلالى
و ارجعى لاصل الرواية
ايوة انا مش عنتره ولا قيس
بس حبى اعظم م البداية


قالتلى فاكر لما
قلتلها عمرى ف يوم ما نسيت
قالتلى مش بسال ع اللمة
قلتلها ايوة ف يوم حبيت
و فاكر يومها انى لقيت
قلبى بيرقص م الفرح
بس ماكنتش عارف يوميها
انه لازم بكرة يتجرح
قالتلى بس ماكنش انا سبب الجرح
قلتلها عمرى ما هحملك المسئولية
انا اللى اخترت اكون ضعيف
لما ببص جوة عينيكى
وانا اللى اخترت اكون كفيف
مش شايف الا بعنيكى
قالتلى كل دة فاكره
قلتلها مانتى كمان فاكرة
فاكرة كام قصيدة كتبتهالك
ولا اقول وسط اللمة

https://www.facebook.com/pages/%D9%83%D9%84%D9%85%D8%A7%D8%AA-%D9%88-%D9%87%D9%88%D8%A7%D8%AC%D8%B3-%D8%A7%D9%84%D8%B4%D8%A7%D8%B9%D8%B1-%D8%A8%D9%8A%D8%AA%D8%B1-%D9%86%D8%A8%D9%8A%D9%84/317468135086606

peter nabil koddos

Popular tracks