🔴 ИНТЕРВЈУ СО ЗОРАН ДАМЈАНОВСКИ: КУМАНОВО ЗА ПРВПАТ ОД НЕЗАВИСНОСТА НЕ Е ЛЕВИЧАРСКИ ГРАД

Во денешното издание на поткатстот „Политиканти“, поранешниот кумановски градоначалник, доктор-гинеколог, кумановска легенда Зоран Дамјановски – Циц со Сашо Орданоски поразговараа за некои подзаборавени теми, но и се слушна мислењето на „градоначалничката легенда“ за актуелните случувања.
Како се случи Циц преку Фејсбук да дознае дека не е кандидат за градоначалник иако Заев во разговор му рекол дека нему му е фаворит? Зошто Циц беше тргнат на страна и дали улога во тоа има неговото пријателство со Бранко Црвенковски? Дали таа одлука на Заев во 2017 година ги чинеше СДСМ победа на изборите во 2024? Како дојде од локално недоразбирање, СДСМ да се распадне во Куманово со партијата на Максим Димитриевски? Ако Куманово му даде идеја на Заев за „Едно општество за сите“, како проектот успеа да трае толку кратко? Како Максо успеа да изгуби третина гласови меѓу два изборни круга, а нив да ги добие ВМРО-ДПМНЕ? Зошто Циц смета дека овој изборен резултат од 2024 значи газење на политичкото достоинство на СДСМ што ќе има далекусежни последици? 
- Мешаница пред гол не е увек гол, вели Циц за многубројните кандидати за иден претседател на СДСМ и додава дека сега како никогаш досега немало ваква неизвесност за највисоката партиска функција. Во таа мешаница се споменува и името на поранешниот претседател и на партијата и на државата Бранко Црвенковски? Има ли тој амбиција пак да се врати на чело на СДСМ? Каков лидер му треба да СДСМ, според Циц? Колко је тачно тој дека кумановци направисва зијан за партију и одсад па надаље можев да се сметав за отписани за функцију?
Дали ваквата значителна победа на ВМРО-ДПМНЕ ќе ги сопре евроинтеграциите или ќе биде притиснат да го реши проблемот со Бугарија по европските избори? Циц вели дека придобивки од економија и правна држава може да има по 2-3 години, но битно е да не се „лизнеме“ на клучното прашање – напредокот кон ЕУ.
За меѓуетничките односи Циц вели дека нема шанси да има конфликт, ама може да има уличен криминал, додека на ДУИ им порачува дека треба да се помират со тоа дека нема да бидат власт. Ќе се изненади ли Циц ако Мицкоски му понуди на СДСМ да влезе во владата? Што мисли Циц за Мицкоски и каква политичка иднина му предвидува? А се гледа ли себеси како иден кандидат за градоначалник на Куманово?
Одговорите на овие прашања слушнете ги во денешното издание на „Политиканти“. Кликнете и слушнете.

Епизода 38 / Сезона 02 Гостин, Зоран Дамјановски - Циц

🔴 ИНТЕРВЈУ СО ГОРДАН ГЕОРГИЕВ: ВО ДОГЛЕДНО ВРЕМЕ НЕМА КОЈ ДА СЕ СПРОТИВСТАВИ НА НАРАТИВОТ НА ВМРО-ДПМНЕ

Во денешното издание на поткастот „Политиканти“, додека се конституираше новиот состав на Собранието на РСМ, а преговорите за новата влада се одвиваат „мазно“ и кај и да е ќе ја бидне, Борјан Јовановски и Сашо Орданоски претресоа некои нови појави на македонската политичка сцена, а и некои кои никако да се искоренат. Како и да се гледаат работите излегува дека во новата влада албанскиот коалициски партнер има најслаби позиции досега, споредено со која било досегашна Влада. Интересен феномен, иако повторлив, е дека десницата во Македонија на избори оди со десница, ама владее со левица што го оптоварува буџетот. Но, ако ги земеме предвид најавите дека даноците ќе се намалуваат, се наметнува прашањето: од каде ќе се финансира левоориентираното владеење на десната коалиција? 
Сте слушнале дека Македонија веќе не е интересна земја за странски инвеститори? Зошто? Оти нема работна сила. Ами сега? Кога ќе се потроши милијардата? Борјан тврди дека ако не влеземе во процес на преговори нема ни да се случат реформи. Сашо, пак, тврди дека ЕУ не пополнува финансиски дупки ами за реформи треба или зголемување даноци, на пример на банките, или да продолжиме да се задолжуваме.
Гостин во студиото на Политиканти, со Сашо Орданоски и Борјан Јовановски – е Гордан Георгиев, ко-основач и претседател на Форумот за разумни политики (https://frp.mk/mk/), инаку сериозен политички аналитичар со кој домаќините поразговараа за некои многу битни работи кои некои ги сметаат за небитни.
Анализата на актуелните прашања што нè мачат – иако некои и не ги мачат – слушнете ја во денешното издание на „Политиканти“.

Епизода 39 / Сезона 02 Гостин, Гордан Георгиев

🔴 ГОСТИН - ДИМИТАР БЕЧЕВ, ЕКСПЕРТ ЗА ЕВРОПСКИ ПОЛИТИКИ И РУСИЈА
🗣️ БЕЧЕВ: ИЗБОРИ ИЛИ НЕ - БУГАРИЈА НЕМА ДА ЈА ПРОМЕНИ ПОЛИТИКАТА КОН МАКЕДОНИЈА

Во денешното издание на поткастот „Политиканти“, последно за оваа сезона, Борјан Јовановски и Сашо Орданоски со кус преглед на постизборно стивнатата македонска политичка сцена. Што секако не значи дека нешто не се случува – ред на маса, ред под маса. 
Она што го чека целата јавност во човековоправно - Македонија, официјално Северна Македонија е конституирање на Собранието и Мицкоски да добие мандат за формирање влада. Ќе ја бидне ли Владата во јуни како што се најавуваше? Кога и да ја бидне, она што ги интересира Грците е дали на заклетвата на таа Влада, идниот премиер Христијан Мицкоски ќе го изговори... зборот, де. Нас граѓаните ќе нè интересира и сè друго вон домашните и меѓународните спектакли, ама нека седнат прво луѓето во фотелја.
Инаку, СДСМ месецов ќе бира претседател на партијата. Е, па, Политиканти, супер мега ексклузивно на шокантен начин ви најавуваат кои се кандидатите. Спектакуларно, секако. Никој не знаеше досега. Исто како што никој не знае кој стои зад именуваните кандидати.
Политиканти откриваат – не е лесно да си политичар на Запад. Зошто? Оти мора да мислиш и на другите.
Гостин во денешното издание е предавачот на Оксфорд, Димитар Бечев, експерт за европски политики и Русија, кој има што да каже и за балканските и за руско-европските и генерално за светските работи, оти нештата се случуваат и отаде „Табановце“ и „Богородица“. 
И со овој разговор, „стариве политиканти“ заминуваат цело лето да гледаат како се потат политичарите во новите политички шеми, за по летото, таман кога ќе залади и таман кога ќе се вжешти политичката атмосфера да ја почнат третата сезона на „Политиканти.мк“.

Епизода 40 / Сезона 02 Гостин, Димитар Бечев

Во поткастот „Политиканти“ се дискутираат и анализираат актуелни настани, политики и прашања поврзани со политиката и државата, често со интервјуа со експерти и политичари од различни перспективи и идеологии.

Politikanti.mk

Popular tracks