காற்றில் கரையாத இசை:- சென்னை தாம்பரம் - கடற்கறை மின்தொடர்வண்டி பயனத்தின் அசௌகரியங்களைக் கடந்து ரயில் பயனத்தை உன்னதமாக்கும் புனித ஆத்மாவில் இவரும் ஒருவர். கடந்து செல்லும் ரயில்விசையின் காற்றில் கரையும் இவரது இசையைத் துரத்தி பெட்டிகள் தோறும் பின்தொடர்ந்ததுண்டு.  வெறும் யாசித்தலின் பொருட்டல்ல இவரது இசை.  கேட்போர் நெஞ்சைப் பிசையும், குற்றவுணர்வைத் சீண்டிப்பார்க்கும் பாடல் வரிகளை பாடி கருணையை வென்றுவிடும் இனிய தோல்விகளை நோக்கியும் பயனப்படுவதல்ல அல்ல இந்த இசை. அதையெல்லாம் கடந்து வேறு எதுவோ இவர்களை வழி நடத்துகிறது. புல்லாங்குழலில் அவசியமாக கொண்டிவர தேவையற்ற சங்கதிகளைத் துல்லியமாக இசைப்பார். சரணம் பல்லவி என்று மட்டும் அல்லாமல், வேறு இசைக்கருவிகளில் வரும் Interlude-களை வாசிக்கும் போது அந்தப் பாடலுக்கு இதுவரை கிடைக்காத புதிய பரிமாணத்தை அளிக்கிறார். அந்த பாடல் இருதையம் முழுக்க நிரம்பி அந்த நாள் முழுக்க வியாபித்து இருக்கிறது. அன்றைய கண்ணீரை உலரவைக்க கொஞ்சம் வெப்பம் தருகிறது, ஒரு சந்தோஷதினத்தில் சற்று அதிகமான காற்றை நுரையீரலில் நிரப்பிக்கொள்ள உதவுகிறது, கனத்த மனமுடைய ஒரு வீடுதிரும்பதலின் போது, இவர் வந்துவிட மாட்டாரா என்று சாத்தியத்தின் கருணைவாசலை மன்றாடி நின்றதுண்டு. இங்கு யார் யாசகன்? யவன் புரவலன்? கொடுத்தலும் பெறுதலும் காசின் பொருட்டு மட்டிம் சுழலுவதில்லை - இந்த பகடியை நிகழ்த்திக்காட்டத் தான் இவர்களை இறைவன் அனுப்பினானா? இல்லை இறைவனே கோவில்களிலிருந்து மின்தொடர்வண்டிகளுக்கு இடம்பெயர்ந்து விட்டானா? எதுவானாலும் இறுக்கி, நசுங்கி, பிழியும் நகரவாழ்வில் இருப்பின் – இன்றதன் - நாளையின் பொருள் அறியாது நகரும் நரகத்துண்டில் இவர்கள் தருவது நம்பிக்கையின் தரிசனம்... வாழ்வுணர்தலின் வாசல்... சுவாசிக்க கொஞ்சம் அதிக காற்றும், ஆசுவாசமும்! தடதடக்கும் தொடர்வண்டி இரைச்சலில் தொடரும் இணைக்கம்பியாக இழையும் குழலோசையை நடைமேடையினின்று விடைதருகிறேன்... இனி தண்டவாளங்கள் கொண்டுசெல்லட்டும் இசையை பல இதையங்கள் தாண்டி....
(ஒலிப்பதிவின் தரத்திற்கு மன்னிக்கவும், ஓசையை விலக்கி இசையைக் கேட்டு மகிழவும்)

Janani Janani - Train Flutist

prawintulsi