تلات خرفان

ودي حكاية وكان يا ما كان

ولا يحلالي أي كلام

إلا بذكر النبي الهمام

عليه الصلاة والسلام

 

تلات خرفان

ومعزاية

وشجراية

وبير بترول

وديب فجعان

 

تلات خرفان ما يتاكلوش في يوم واحد

ما يتهضموش

 

راح للخروف

أتخن خروف

قال يا خروف

عيال اخوك متنعنعين ومتنغنغين

وانت هنا في اسوأ ظروف

يادي الكسوف

راح الخروف

علشان خروف

ضرب الخروف

الديب حيسكت

راح للخروف

تالت خروف

شفت الخروف

ضرب الخروف

أحميك انا

و ابات معاك في الدار هنا

واديني بس انت مكان

راح الخروف

علشان خروف

إدّاه مكان

 

يوماً سنقراُ في الجريدةِ يا بلادي أنّنا كنا خرافْ

سيجفُ هذا النفطُ فوقَ جلودِنا

ونودّعُ السبعَ السِمانَ ونلتقي ألفاً عِجَافْ

سيُدَوِّنَ التاريخُ اسماءَ الملوكِ العادلينَ

الصابرينَ

الساكتينَ

الكاتمينَ الصوتَ بينَ شعوبِهم مثلَ الزرافْ

سيحاكمُ التاريخُ حكامَ العروبةِ كلِّها

وسينزعُ الاظفارَ منهم في سبيلِ الاعترافْ

إني احبك يا بلادي مرغما

واقول شعرا يا بلادي مرغما

والشعر إن مسَّ السياسةَ يستحيلُ مصائبا

والشعر إن مسَّ الصعيديينَ مثلي

يستحيل كحدِّ سيفٍ لا يخافْ

انا لا أخافْ

 

 

من كام سنة بِنْهِشّ بإدينا الفيران

ونقول ما نتدَّخلش في امور الجيران

من كام سنه راسمين رجولتنا أدب

ناقشين إدينا نقش حنة وقلنا سنة

ورمينا من إيدنا سلاحنا وقلنا هدنة

وبلدنا بِكْر بتُغتصب

يِعلاَ صوتها غصب عنها نِتْهِمْهَا بالشَغَب

يا بلاد ماليها الاَّ العجب

يا ( معرَّمين ) شعر وادب

 

هي الرجولة تتوزن وقت الغضب غير بالغضب

هو اللي متَاخد غَصَب مش برضه يتاخَد غصَب

يا بلاد ماليها الا العجب

يا ( معرمين ) شعر وادب

الوزن هو اللي اختلف ولا الميزان اللي اتقلب

 

من كام سنة بنسأل "بهية" مين قتل

واحنا اللي قاتلينه بإدينا

مدِّينا إيدنا للغريب

وف بعض عضِّينا وعَادِينا

 

مين اللي ظالم في الحكاية .. ومين جبان

مانلومش ع الديب اللي خان

احنا اللي خرفان بالوراثة

الصبر وارثينه وراثة

والطاعة وارثينها وراثة

والحكم وارثينه وراثة

وحاجات كتيرة مش وراثة احنا خدناها وراثة

 

انا كل ما اتذكر تحية العلم يسرح خيالي

كان صوتي لسه عيالي .. بس عالي

كنت احسّ اني بهزّ المدرسة

كان العلم من فرحته يرقص على الساري شايله

طب كنتو ليه بتعلمونا نحفظ البرّ وجمايله

طب كنتو ليه بتعلمونا نكره الظلم وعمايله

لمّـا انتو ناويين تسجنونا في ارضنا

كان ايه لزوم العلم .. وهمومه .. ورزايله

 

طب كنتو سبتونا بهايم كنا نِمْنَــا مرتاحين

ازاي ابيع ارضي وعارف إن جسمي اصله طين

طب كنتو علمتونا مثلا إننا من أصل تركي

أو أوروبي

إن جسمنا أصله حلاوة.. أو مِلَبَّس

اشمعنى طين؟

طب ولما الطين يروح ايه اللي فاضل

ولمين نغني ونفدِي روح ولمين نناضل

ولمين اعود واشتاق واحب واغير واكافح

ولمين اغني و اقول ( بحبك يا بلد) والحب طافح

 

لاموا عليَّا الناس

عايزيني اقول اشعار في محمد الدرة

مش قايل

ما انا لما قلت زمان يا بلادي يا ( رحبة )

قالوا ده واد سافل

واللي اتلَوِتْ مني واللي اتقمص مني

ونزلت عنيهم م الخجل في الأرض

وبهدلوني وحَدَّفوني لبعض

وقالوا برضك عيب .. القاعة فيها بنات

طب يعني وفلسطين مش برضه فيها بنات

 

والله دي فلسطين نسوانها رجالة

هما اللي عمَّالة واحنا اللي قوَّالة

عندينا تِبْقَى الست وَلَدها طول الباب وتخاف يروح مشوار

وهناك حريم من غَضَب شايفين عيالهم دهب

وعشان ما يلمع زيادة لازم يدوق النار

وتقولوا اقول أشعار

 

هما 3 كلمات

نعم .. اكيد .. طبعا

وطول ما فيه جُبَنَا

فرعون بيتفرعن

 

والشعر اصله جبان

اللي يقوله جبان

واللي يعيده جبان

 

قولنا بلاش نكتب والحرب اولى بْنا

قالوا حرام والنبي خلُّولْنا اولادنا

خايفين على ولادهم م الجنة ونعيمها

شوفتوش خيابة و همّ

الاسم رجالة والاسم عندنا دم

دي ام موسى ( المرة ) خافت على ولدها

رمته في قلب اليم

 

واحنا ( بنتسولق ) وبنتشوي قرارات

تطلع قراراتنا صورة جماعية على صفحة الجُرنان

يا ما اشجع الفرسان

 

همست في وِدْني بحبك

كان جسمها مفرود والخمرة عامياني

وبياض إديها كان بيزعق لما تعدل شعرها

 

الواد بيعرج م الرصاصة اللي في رِجْلُه

 

شدِّت حزام الروب

وبانت زي شيء معرفش شعري يوصفه

 

كانوا العساكر قربوا والواد متبت ع الحجارة اللي ف إديه

 

مدّت إديها وقَّفِت كل الساعات

صوت الكاسيت نبَّهني اني ف شقتي

 

كانوا العساكر قربوا

بيقربوا

بيقربوا

والواد متَبِّت ع الحجارة اللي ف إديه

 

وَقَعِت قزازة البيرة من إيدي على طرف السرير

 

الواد صرخ في مخبأه

 

فاتلفتت قلقانة خايفة لاتجرح

 

جريت على الصوت العساكر

وابتدى صوت الرصاص يملا الجبل

 

دوَّرت عندي في الدولاب على حاجة تنفع لجل تِتْحَزَّم لي بيها

ما التقيت غير شال اخويا اللي اتقتل تحت الجبل

كان برضه يعرج لما يمشي من الرصاصة اللي في رجله

وكان متبت ع الحجارة اللي ف اديه

مين اللي خانك يا وطن

قلعت حَلَقْها لما عَوَّرني ف رقبتي

وحطته جنب السرير

 

نامت على الارض العساكر

لجل تسمع دَبِّة الواد اللي لسة مستخبي

اتكسف صخر الجبل من وقفته

هيَّج رماله ع العساكر

 

سامحيني يا وحدك

مقدرش اعيش هارب

انعس في حضنك كيف

والرملة في الصحرا واقفة وبتحارب

 

أعطوني عاما تقريبا لأجيد اللغة العبرية

فالجاري في وطني هذا

أخجلني صدقا أن أكتب

شعرا باللغة العربية

هشام الجخ - 3 خرفان

دوام الحال  عمرو دياب 2014

لسه شايلك جوه قلبي  راب حزين

الجوكر - 2014 - نسعيناتي راب جامد

الجوكر - 2014 - تسعيناتي راب جامد

Young Pharous يلا بنا نعيش

قصيدة مطلوب قرار
كلمات والقاء / سهيلة محمد
شاشه بعرض الدنيا ليل !
تايه ومش لاقى الدليل ..
مكتوب على الشاشه انتبه !  
مطلوب قرار من غير بديل ..
انا مين وايه جابنى هِنا ؟!
تسميع فى حصة ميس مُنى ..
افتح ايديك .. افتحها ليه ؟! ..
خايب وهتعيد السنه ..
العمر ضايع مش لاقيه ..
كل الظروف مش ممكنه ! .. 
كمّل فطارك هوّه ايه ..
بهرب ما بين الازمنه !! ..
ومعلّى صوت الزفت ليه ؟
عدت سنين مش هيّنه ....
..
البس هننزل من سكات ..
مانا اصلى بكره ميس نجات ..
انجز قوام الوقت ضاع ..
معلش هما اربع ساعات ! ..
نام بدرى بكره الامتحان ..
الليل يضلّم ف المكان ..
والصبح ييجى عشان اشوف !
الخوف واقفلى ع اللجان ..
مبروك هيدخل طب فين ؟
وقفت معاه على نص درجه ..
هيخش خاص ؟ هنجيب منين !
وايام تروح وتجيب سنين ....
.. 63
اوضه وسرير نايم عليه ..
مانا كنت عايش من مفيش !
غيبوبه ليه بيحصلّى ايه ؟؟
يا زمان بجد ميختشيش ..
ماتقول يا دكتور ايه اللى فيه !
هتفوق يا بابا وقول هعيش !
معرفش يابنى اقولك ايه ..
مانا بردو يمكن اروح مجيش ..
الدنيا بتهز السرير !
والكون بيصرخ م المرض ..
و فلحظه كان اخر زفير !
ملحقتش ابداً اعترض !
واهى موته واحده ومش كتير ..
فرضيت بكل اللى اتفرض ....
..
اّن الاوان للاختيار !
كل السنين اتحوّشت !
ممنوع رجوعك ف القرار
الشاشه سوده وشوّشت !
ده شريط حياتك الحزين ..
اختار تعيشه او تموت !! ..
وتكون اجابه محدده .. 
الخوف مالينى بالسكوت ..
مش عايز اعيش ف مرار كدا ..
احسنلى اموت !
- ماهو انتا ممكن تستفيد ..
وتغيّر الجاى من جديد 
متشوفش اصلا ميس نجات ..
ولا من قَريب ولا من بعيد ..
تسهر تذاكر بالساعات ..
وتخشّ طب ف بورسعيد ..
و افصل من الاوجاع بقى ..
تقدر تعيش الدنيا عيد ..
= طب لمّا ييجى اليوم واموت !
- ملهاش حلول الموت اكيد !!
= طب م النتيجة واحده اهيه ..
مين كان اساسا مات سعيد !
من وسط كل الخلق ديه !
اخترت اموت وافضل وحيد ....  
#مطلوب_قرار
#سهيلة_محمد
www.facebook.com/sohailah.3ammeya

مطلوب قرار

تنام الليل ف وسط ايقاع 
يرتب فوضى اوجاعك
ومشهد كل سيرته وداع
وبطله يكون واحد باعك 
بوجعك تمشى وتدور
فى مين كان حضنه بيساعك
ومين وقت الوجع سابك
ومين منهم ف اتباعك
سكون الليل يلملمنا ..
ويحضن ف الكسور فينا ..
تزيد اوجاعنا تألمنا ..
ننام بالليل يدفينا ..
وييجى الصبح يئذينا ..
يشقشق باللى فات عادى ..
ولما بنيجى يوم ننسى !
بتيجى الذكرى لا ارادى ..
يزورنا الجرح ف منامنا ..
طشاش اوقات من الماضى ..
بكيت على كتف ايامنا ..
جنيت اوجاع على الفاضى ..
داويت اوجاعى بالوحده ..
لقيت الجرح مش راضى !
يحل المشكله ودّى ..
وغصبن عنى حبيتك !
وكنت كتير زمان بدّى ..
حاولت كتير توصلّى ..
بحورك رافضه شوق مدّى ..
وانا بغبائى مفهمتش !
سامحنى انا فهمى على قدى ..
اخيرا فوقت من وهمى ..
عرفت انا مين وفين حدّى ..
وادينى مشيت ومش راجعه ..
ودمعى اللى اختصر ردّى ..
انا اللى فضلت على اصلى ..
وكل الخلق بتصدّى ..
انا اللى الدنيا وجعتها ..
بجرح وحالفه ما تهدّى ..
ولسه الناس بتوهمها ..
بان الذكرى بتعدّى ..
وان الحب كان اصلا ..
ولا بيجيب ولا يودّى ..
انا المكسورة و ف حالها ..
ومين فى الدنيا دى بحالها ؟
بيشبع م الوجع قدى ..
#طشاش_ماضى
#سهيلة_محمد
www.facebook.com/sohailah.3ammeya

M R

User 346015361