المكان:شقة حلوة صغيرة ومحندقه
على الاقل ف عيونا كانت كدا
الزمان:لما العيون كانت تملي مبرقا...
حاسة دايماًبالسعادة والرضا
والحكاية:عن واحد داقت طعم الشقا
لكنها كانت تملي متـــــأكدة

ربنا هيعوضني خير ف العيال
استحملت وكملت
قدرت تعيش على كل حـــال

أمـــــــــــــــــــــــــــــي

طـــــول الـليل علينا تتطل
ماكنتش تمل م التكرار
وتصحى بردوا قبل الــــكل
عشان تجهز الـــــفطار
دي تبقى حبيبتي ست الكل
واحنا لما كـــــــنا صغار

من احلى نومة كنت تملي اصحيها
لما اقول بعلو صوتي انا عطشان
كانت تجيب المية وبسرعة تدفيها
تخاف ل يجيلي برد او احتقـــــان

بتحبنا حـــب عبادة
مش مجرد ام وعيالها
بتخاف علينا بزيادة
وليل نهــار على بالها

جمع حنية الامهات كلهُم ف بعضهُم
قطة من خوفها على عيالها
ممكن بسنانها تعُضهُم
شايفة كل البشر ف كفه
وعيالها ف كفه لوحدهُم
في اي طريق مشيوا فيه
كانت بتبقى ارضــــهُم

وانا قاعد........ بخيــــــــالي كدا سارح
افتكرت حاجات كأنها حصلت امبـــــارح
منظر وحوش بتطاردني مع لصوص
عدى بسرعة قدام عيني
كان هو دا ارخـــــــــــم كابووووس
دايما بالليل بيجيني
وف لحظة الاقيها عمالة تحضن تبوس
وماتسينيش الا لما تصحيني

النوم على انغام دافـــية ..
نام نام وادبحلك جوزين حمااام
والصحيان بدري بالعافية
ولما تشيلني لحد بـــاب الحمام
اغسل وشي
وارجع تاني النوم يغلبني
تروح شايلاني حليب يا لبن
تجري على المطبخ وتسبني
وتبدأ ازمة شرب اللبن

سندوتشات لانشون وجبنة
وكيس شيبسي بالاوطة
ونص جنيه تحطه ف جيبنا
وعنيها بينا مبسوطــــة

والزغروطة

وال بيبس للجيران
لما ننجح اخر السنه
جوا عنيها كان بيبان
نظرة دول ولادي انا

يااااااه عالايام عدت بينا قواااااام
وحنيتها مليا كل اركان البيت
ولسا بردوا مابتعرفش تخش تنام
الا لما تسمع "ايوا انا جيت"

هقولك ايه يا امي تاني
كلامي خلص مع اني شاعر
اوقات بتعجز المعاني
توصف فيض من المشاعر

انت الوتدد والضهر ونهرالحنية ...مابينا وريد وشريان دم
وانا ما حيلتي غير نور عنيا.....في احـــلى عيد لاحلى ام

رامز الجاولي

Rãméz Mãrzøük

Popular tracks