بجري 

وكل مرة يوصل حد غيري

أثور واعترض

وارجع استغفر 

وأقول معلش لسه النصيب مأذنش

ربنا بيحوش نصيبي من السعادة

وفي معاده هايتبعت

تتأخر الأيام

وتتقل الدنيا على صدري

وتتقل رجلي م الحركة

وتتقل ايدي من رفعتها وتنمِّل

اثور واعترض

وارجع استغفر 

واعيط

واقول دي مؤامرة كونية 

في حد واقف في السما كاره وجودي

وبيدعي عليا!

اطُل من عين الحقيقة المُرة وانا مش قادرة اكمل

يصعب عليا انتهي بالشكل دا

يصعب عليا حياتي تخلص من قبل حتى ماتبتدي

وافرح !

يصعب عليا اضيَّع كل محاولات الانتصار 

والدنيا تكسبني بسهولة وعِند بيِّن

الموت دليلي بقاله مُدة

واقف في آخر الأوضة وبيندهلي اروح 

مش قادرة اكمل تاني ولا عارفة اني احارب 

عمالة أقدم رجل وبأخر في روحي

وافكر 

لو مت بكرة في حد هايحس بغيابي ؟!

في حد غيري هايفرق البُعد في عينيه؟

في حد هايحس بغياب الورد من حوش الجنايني ؟!

في حد هايحس بغياب الضلمة من سقف الأوض

مين وقتها يبكي

مين وقتها يغني 

يعصُر في عينه اليوستفندي

ويودعني زيف  ؟! 



الوصول الأخير

موحشتنيش!

ولو مرِّت سنين أكتر هتفضل جوا قلبي تعيش

بلاش المرة دي اقولها بنفس الضعف والحيرة 

ياريت تبعت عينيك تحضن 

عنيا حتى تصبيرة

بقيت وحدي 

بكون أضعف وانا لوحدي

بزور شوارعنا يوميًا 

وبكتب كل يوم كام بيت

وبكتبنا في أغنية

وبركنها في دُرج جديد

لحد ما الاقي صوت ينفع

يدندن الفراق لينا ..


انا بكدب 

بتوحشني 

مفيش ولا يوم جديد عدى 

عليا غير وتوحشني

ودا قلبي العنيد عادي

بيخفي شوقه ويعيط 

لوحده كل آخر ليل 

اكيد فاكر 

ولو ناسي اديني بقول بتوحشني

ونفسي تقول وحشتيني 

انا بكدب ووالله على عيني

أشوف طيفك ومحضنهوش

احس بروحك الطفلة 

واسيبها تنام بعيد عني 

على عيني 

ياعيني وحتة م النني

حياتي في البعاد بتسوء

وكل مانجمة بتعدي بشوفك فوق

بشاور للحنين وبقول

أكيد بالوقت يشتاق لي

أكيد الوقت هايعدي

ويرجع من جديد ليا 

سنين دلوقت مابترجعش

وقلبك كل يوم يعند 

شيطانك قاسي 

وسوسلك عشان تبعِد

عنيد انت 

لكن مش قاسي والله

وقلبي مداقش من قلبك 

غير الحنية واللهفة

بشوفك فيا يوميًا

واحس بإيدك الدافية 

كفاية حنين وقسوة وكبرياء بالزيف

مفيش غير حضني مفتوحلك 

وأي مكان جديد غيره

هاتبقى يدوب مجرد ضيف ..



موحشتنيش

مفيش مانع اكمِّل اللي جاي وحدي

انا اتعودت من بدري

مفيش ولا حاجة بتكمِّل

مفيش واحد حظوظه سيئة قدِّي

حياتي طريق طويل بمشيه 

وكل محطة بوصلها بكون وحدي 

اتوه وارجع وانا لوحدي

مكنتش عايزة اعلق ناس بطيفي واغيب

بحب واسيب

وانا بهرب من الماضي 

الى اللاشئ..


مكنتش اقصد اجرح حد والله 

وكان نفسي اعيش قصة غرام عادي 

انا اضعف من الذنب الكبير في الحُب

واضعف برضو م البُعد اللي بعد القُرب 

واضعف اني أعيش ندمانة  مجروحة

تلال الورد مزروعة على خدِّي 

مفيش ولاايد بتعرف حتى تقطفها

مفيش ولا يد غير يدِّي

مفيش دلوقتي فرصة عشان 

تبص في عيني تدفى

تبص في قلبي تبكيني

وفين انت وانا فيني ؟!

شفايفك طابعة في جبيني 

وكل ما ابص في مرايا اموت وابكي 

بشوف كفك على كفي 

واشوف ضحكة عينيك العيِّلة 

وامشي 

عشان ميعيطوش ليا

عشان متشعبطين فيا

معنديش اي شئ دلوقت اشيلهولك 

بهد بإيدي بيت الحب

اللي كنت زمان بنيتهولك

رميتهولك

صورنا خلاص اديني قطعتها بطولها

مكنتش عايزة اقولهالك

لكن دلوقتي أهو بقولها

وصوتي اتفك من حظره 

مشوفتش حاجة من قلبك غير الشك الجبان 

والخوف 

بقيت دلوقتي من غيرك

لكنْ عينيا قادرة تشوف

بقيت دلوقتي اميِّز كدابين الوعد 

وكله بفضلك السامي 

يا أكبر كدبة حصلت لي

وسرقت نص احلامي 

هاعيش بعدك

هاعيش وانجح واحب 

وافوق

وهتشوفني 

هناك عند النجوم وتفوق

وتعرف وقتها اني 

مكنش يصح اوارب بابي تدخل فيه 

وتعرف وقتها اني 

كتير جدًا على واحد مريض زيك 

مكنتش احب اطلاقًا

ألوث شِعري الطاهر بذكرك فيه

مكنتش احب ادخَّل قلبي في الحرب 

اللي هتقوم ليك

رميتك مني في الشارع 

وحِجر البرد هايشيلك ويقرُص قلبك الكداب

مفيش ولا باب هايفتح لما هتخبَّط

وترجع للي فيك منهم 

وطبع الغدر فيهم كيف

وتفضل ضيف

يشيلك قلب دي ساعتين

ويرميك قلب دي بكرة

وانا هافضل بعيد واضحك

علشان اصبحت دلوقتي 

مجرد وقت حولته

قصيدة مصيرها للذكرى ..



مجرد وقت


مكنتش أول مره أتلجلج 
أو أحس روحي فـ لحظة بتّلج 
الخلق واقفة وحلمي جاي يعرج
يشكيلي عجزه وجريه بالمشاوير 
حلمي اللي داب في الزحمه قلمه ضرير 
معرفش يكتب مرَّة عن حالة
وإزاي في لحظة اليأس أوحى له 
إن اللي جاي لصحاب نفوس بايشه !
خدته ف طريقي وقولنا نتمشى
وهناك هنحكي كل شيئ بوضوح
نوّصل طموحنا الجاي بالمسموح
ونغمى روحنا بحبل براحه
وبدأنا نحكي بفوضى متناغمة
أحكي ويسكت ، أسكت فيحكي وهي دي الأزمة 
حلمي عَفي وروحي عيانه
حلمي طموح وعنيا دبلانه
حلمي حُصان عاوزله خيّالة 
وأنا كف إيدي مايكفي للجامه


تلاتين سنة وكفوفي مبتكبرش 

مع إن قلبي كبر ومكفي ناس بالكوم 

تلاتين سنه بكتئب وماليش مصير معلوم 

موهبتي أخر طرف ممدودلي م السماوات 

لما اشتكيت للرب وقولتله آسف مش قادر أتحمل 

الناس بتوجعني والدنيا ماشية تضيق 

ياربنا إفرجها هوّنها ع المخاليق

وارزقني بالموهبة يمكن ساعتها أبوح 

والهم يتاخر بكتابتي برا الروح

وكتابتي بالصدفه هتمس ناس تانين وجعاهم الدنيا 

يقروها لصحابهم ويقولوا مية الله

هنزف كتابة يارب والناس هتنزف آه ..


تلاتين سنة وبخاصم الدنيا 

وأديها ضهري تلفلي وتليّن ! 

متشال تملي ف دايرة المساكين 

ربي العظيم سَلّمني في ولادتي مجاديف أبحّر بيها وأوصلّه 

وأبويا العظيم علّمني أجدف فين وأرفعها ليه وإزاي

وقت الصلاة مثلا ، وقت القلق والخوف 

برفع إيديا لفوق وأنسى إن عندي ظروف 

بدعي بعنيا ساعات وقت أما إيدي تضل 

وأدعي بقلبي أكتر وقت أما عيني تنام

جوايا مية بركان وعيال بتبكي بجوع 

كان صوتها مش مسموع ولا حد مراعيها 

ما الدنيا دي فيها من كل شكل ولون 

أنا جبت صبري في يوم وقعدت بيه على جنب 

وبدأت أحكي الذنب اللي إبتليت يوم بيه 

كان كل همي أراضيه وأطيبه ونعود 

وكدبت كالعادة وقولتله متخفش 

وقولتله هتُفرج ومسيرنا بكره نخف

ومسيرنا برضو نلف على كل حد جبان 

ونقوله فعل الصبر بيعوض الإنسان 


تلاتين سنة وأنا وحدي جوايا 

ووحدي برضو بين مئات الناس 

عايش غريب وحيطاني كشفاني 

كل أما بصحى بتقتل تاني 

وقتلي يتأيّد بدون فاعل 

عصفور ضعيف كان نفسي أتفاعل 

وأجمع دموعي من كفوفهم قمح

شِد الستارة بسرعة لو تسمح

علشان هعري ف روحي جوا النص

وعشان راح أكسر وزني ميت مرَّة 

وعشان راح أبكي بشِدّة في الأبيات 

وعشان هنادي لأبويا بعد مامات 

وهقوله هات آدم معاك في إيديك 

وهقوله سيب نهله مكانها هناك 

انا عارفه مبسوطه مابين الحور 

الجنة والله هتصبح بور لو مرَّة طلّت منها ع الدنيا 

وأنا قلبي يصبح حتة م الجنة لو طل فيكم حبة بعد غياب 

سيبوا المواجع برا عند الباب 

وإتمشوا فيا بخطوة تحييني 

وأنا همشي فيكوا وهمشي في الدنيا

مكسورة وكل حروفي تواسيني 

النص رافض يتقفل بهدوء

والقفلة طَلّه من حَباب عيني 

تلاتين سنة

الكل وقت الحرب قال نفسي

وانا نفسي وقت الحرب ندهِت عليك 

الكل شد حبيبه من ايده

وانا 

شديت ايديك 

وطلعت أجري بعيد

وانهج

واحدف عنيا المرعوبين م الفقد 

يطمنوني عليك

بصيت

ولقيتني ماسكة في الفراغ 

ولقيت بدال ايدك دموعي

ووحدتي

وكسري

شوفت النهاية المؤلمة؟!

وعرفت معنى الفراق

وعرفت معنى الفيلم لماينتهى والبطل مقتول

دلوقتي قاعدة ع الرصيف 

بتفرج ع الصور 

واضحك

تفِر دمعة من عنيا 

أفوق

وافتكر

انا اللي جبت الباقي من عمري 

ورميته في حِجرك القاسي 

انا اللي وقت ماكانت تجلدك دنيا

اجري احضنك

وتيجي اللسعة في كتافي 

وانا اللي صحيت الحنين جواك

ورجعتك تكون انسان

وخليتك تحس بكل شئ دافي

وانا المرمية دلوقتي على صِدر الفُراق بنزف

واقول 

أكيد الباقي من ذكراك هايخلص وينتهى بالوقت

اكيد هانساك 

وطيفك هايقابلني في يوم 

وابص في عينه مفتكروش 

وتبقى كابوس

يدوب فتحت عيني نسيته

ملمحتوش

في ست تضحي بحياتها عشان راجل

طلع راجل

وست تضحي بالراجل علشان قال وعد

وقت الجد

كان عيل منفذهوش ...



مسيري أنساك

الفجر أذن فيا مسمعتوش 

سلّكت ودني بعشم وجبرتها تركّز 

ماانا كنت بتأزأز م الفِكر علي غفله 

والدنيا بتشيلني وتهبدّني مية مره 

كروان بيتسلي فوق السطوح بيا 

ويسلّم الملكوت للمالك الأصلي 

هب الهوا فيا وقالي أوصفلي  

إيه اخر الأخبار والدنيا ماشيه إزاي 

قلبي البعيد نساي كل اما يتوجّع ينسي اللي يحصله 

وياخدله ركن بعيد يبكيله كام ليله ويعود برئ جدا 

شديت زحامي بذوق

ودعيت بكل خشوع اني اكتمل إنسان .. 
وان الادان يكمل ..


_ المشهد الاول ..


الشمس طالعه وجايه تتمخطر

وتمد نورها ف عيني تلاعبني 

كان ايه اللي خلي الحزن يغلبني 

ويشق روحي ف اتقلب ماضي 

كان إيه اللي خلي دايرة الملاعين
 تتلف فيا وتبتسملي ف أموت 

او أعيش بدون ما اتمني اني اعيش

كان ايه اللي خلي شجرة الجميز
 مكروه جداً جوا حلق الناس 

مع ان أصلاً كان أبوها التين 

ماشيين ف دايره يحتويها الطين 

كل أما بدخل فيها بتّلوث

والناس تنفّض ضهري بسذاجه 
وتقولي كمّل انت أهو كويس !

بيجمّلوني بزيف وبيهربوا مني

بهرب بخوف مني وأدارى ف جيوبهم 

بطلع ونيس زايد بخرج مع الفكّه

كان نفسي اتكا علي حبي ف قلوبهم
 وألبد بدون ما أتوجع أو ينزفوني بعنف ..


_ فاصل ..


في سحابه واقفه جنبي طول الليل 

عماله تبكي بعشم وتقولي معذوره 

مكنتش تقصد ف الفراق تتكسر 

او حتي ينزل من عنيها دموع

في سحاب بيبكي بس مش مسموع ..


_ المشهد التاني ..


الدنيا ملعب وانت كوره شراب 

الناس تشوطك تتقسم نصين 

باقي القصيده راح يودي لفين 

ولفين هتهرب من قدر محتوم 

كل اما تكبر تتملي ف هموم 

كل اما اما تكبر تتلبس ف هدوم 

ويقلعوك منهم او يقسموك نصين

أنا وانت جايز نتقلب شطين 

والناس تعدي علينا وتدوسنا 

او ياكلوا ترمس ويقلبوه فينا 

انا وانت دنيا وتايهه خطاوينا 

الشمس طلت فينا نورنا 

مدت شعاعها بشوق .. سيحنا وعورنا 

فبدأنا نَزّ ظروف وبشر بتوجعنا 

عاوز ألحق أخلع نفسي من روحهم 

وانا بجري تايه مني جواهم 

كل اما برفع رجلي بتّثبت 

واعود لنفس الوقفه ف قفاهم !

هامش تملي ماليش مكان فيهم 

بيدخلوني عشان بعرف ادفيهم 

وانا العليل برتجف م الوحده طول الليل..!


_ المشهد الأخير .. 


سلّمت قرص الشمس جسمي ولا إتهزيت

وسلّمت ودني للأدان بالوقت

الشمس حاميه وكتفي تلج يسيح

والناس بتنزل منه لا إرادي 

وانا بجري مُجهد حبه م الايام

والوقت ماسك فيا ورابطني 

معرفش فعل اليأس دا عادي 

والأ كلام الناس بيحبطني ؟!

ماشي وبيمد ايديا علي بكره وبقوله خف 

بلاش تجيلي كئيب 

وان مره شوفت ظروفي قلبت ديب 

خليك حنين وشدني منها 

مش كل مره تسيبها تنهشني
 تنزل دموعي تسّكرك فتموت !

وتجيلي ليل غامق بيطَّوَّح 
مش هابقي دايما بحضنك مبسوط 

كل الظواهر فتنت عليك للناس

وقالوا طيب وقلبه سهل يميل 

الوقت دا كان وقت للتطبيل 
علشان يعدوا ويشربوك بهدوء 

عملوك إزازه بقلب سهل الفتح 

كل اللي يعطش يشربك مصلحه 

ويلم روحه ويجري بيها بعيد 

وانت الوحيد الباقي ف المشرحه

هتعيش تملي ف دنيتك عربيد 

كل المشاهد دايره بتلفّك

وتلف فيها وتنتهي جواك 

الناس مصالح ، وقت .. 
عِد اللي لسه معاك  .. 

..
#مروه_كامل

المشهد الأخير.mp3

يابنت الإيه ياغجريه " مروه كامل

نص عارف مروه كامل .ogg

تحويل مسار - مروة كامل

قُصر إيد

زي الشتا

ماتسيبش ايديا المرة دي

أمي ايدين الصبر وعيونه

لو خيروك بين موت وموت 
اختار تموت في محاولة منك للحياة 
متموتش وانت بتتكسر ..

#مروه_كامل

Marwa kamel

Popular tracks