أطراف متكسرة..
متلصمة..
عذاب صانع عامود،
ملازم عمود فقري..
وحظ معروفه طلاسمه من بدري..
وصوت ما بين همسه وصراخه صمت بيدوي..
وروح مصممة تغرس نبات الجمال في كل عين تضوي..
وكلمة ما بتتنطق الا لتنور..
وكيان عايز يلئم..ما يعور..
وقلب ما بيدق اعتياد ابداً..
كل دقة محبة او وجع للوجع حالف ليشفي..
وعيون تنظر لجوه وتحب وسط الضلمه لون شفاف..
وشعر طاير في الهوا..حُر..بين الأحرار..الطيبين..اللطاف..
وايدين..تطبطب ع الجريح وتطيب الخاطر..
وعقل رافض يخضع لأي لئيم حتى لو شاطر..
ونية حذرة من نوايا أنانية..
لكن تحتفل اول ما تلاقي لمحة اخلاص فتوهب حجرة ف قلبها هدية..
قوية..رغم التكسير والتلصيم..
قوية..وبمحبة معجونة بانسانية..
قوية..وقوتها كبيرة..
بتخوف..الارواح الصغيرة..
قوية..في حبها قوية..
في حزنها قوية..
وف وقعتها..قوية؟
مفردات الوقعة مش مستخبية..
مش متصنعة صلابة..ولا مستحية..
تقول وتهتف..
انا بحب..
انا كارهة..
انا ضعيفة..
ومن قوة اعلانها بالضعف..
تخاف الايد اللي كان ممكن تطبطب..
وتغض الطرف..
وتدي ضهرها وتسد ودنها وتخبي صوابعها جوا كفوفها..
فتبطل تبقى ايد..
تبقى بس..قبضة..
قبضة..
تكسر..
وتفتكر زيادة التكسير نهاية..
تحاول تسمع صوت النَفَس..تلاقي بدل التنهيد..مواويل حزينة تحكي الحكاية..
القبضة..
مكانها المدشدش..يتحول نبضة..
تحي من تاني..شوية شجن..
يمكن..دموع..
لكن بتروي..
حكاية حياة..حكاية رجوع..

تبطّل تبقى إيد..

ف بحر الدوافع أغرب الأشياء
دافع لكل ثانية 
دافع لكل شخص، اليوم غير امبارح
كله له سبب "وجيه" وتبرير
كله عايز حاجة وحسب ما الضمير يسامح
حتلاقي وزير غيران من غفير
وحتلاقي وجع بيسوقك تبقى جارح
دوافع ألوان...تتغير تتشكل..تتبدل في ثوان
تحب امبارح والنهاردة تحقد وبكرة تنام من غدره زعلان
تظن امبارح ودلوقتي تقدر تخطط للسعة وخربشة وجدان
تخاف م الفقر فترمي شباكك في غيط غريب ساكن جعان
تخاف من قوة ظالم..تقلب جبان..و فار تجري وسط الفيران
تلاقي الضعيف مسكين حيران..تقلب حصان..ثور بين الثيران
توسوس في سرك..يمكن فلان يضرك..ترجع أشرّ وأطغى من زمان
دوافع انسان...بتعمي النظر والقلب..
بني آدم بنفسه شقيان..
بنفسه..شقيان!

في بحر الدوافع

أحلى ما في الرزق انه متقدر
وأحلى ما في الحب انه ما يتغير
وأحلى ما في الحياة انك متخير
تترك بإيدك مرة وبغيرك مرتين
يسقيك غريب المُر ويصيبه الأنين
عجلة ودايرة وما في حد على حالة باقي
يوم معيط م الفرحة ويوم م القسوة باكي
يوم ضحكك مسمع بحري
ويوم الحزن بدمك يجري 
يوم طاير زي العصافير
ويوم م القهر مرمي كسير
احلى ما في الرزق انه متقدر
شوية افتقار..شوية انكسار..شوية غنى..شوية انتصار
تعمل متعملش ممسوك شوية وشوية متيسر
رزق الراحة..رزق الونس..رزق القبول
رزق العيال..رزق الحلال..رزق يكفي بالمعقول
رزق لمعة العينين
رزق زغزغة القلب
رزق الانبساط بالجمال
رزق روح براح مليان حب
مين حيساعدك وحتطلبه من مين؟
مين غيره حبك وسامعلك فرحان او حزين؟

Rasha H. Aboelsoud

Popular tracks