قصيدة "محل إعرابي" - ريم علاء

كلمات القصيدة :
كانت ليله متعلقتش فيها بمزيكا او اغنيه
اتعلقت وقتها للاسف بروح
اتعلقت بصوت وكلام وعيون مليانه حنيه
مكنتش متخيل انها بدايه للسيره الذاتيه
لقلبي في قسم الجروح
قالتلي روح
وانا يعني كنت هعمل ايه؟ ما باليد حيله
انا عافرت معافرات والله م هي قليله
ومن وقتها جرحي مبقاش هيّن وكأنه أصبح جزء من الروح
قالتلي روح .. قالتلي روح
انا حتى عاجز اني ابوح
ولا حتى قادر أكتم جوا مني
يا حمام فضلت اهتم بيه وخد طاقتي وطار مني
يا حاجه ملكي مبقتش عندي
وفي الاخر كنتِ بتقوليلي يا عندي ؟
دلوقتي .. دلوقتي مين فينا اللي عنيد ؟
يا أقرب شخص ليا بعيد
أنا مش بعيد في الحزن
انا بس كنت بتمناكِ تبقي ست الحسن .. اللي تبقالي
اصل سيبتيني ليه؟
عشان عيّنوا بدالك د.سالي؟
طب وانا مالي ؟
ولا عشان تعاقبيني دوا قلبي الي مباخدوش ؟
ولا عشان الاتنين اللي اصلا منعرفهمش اللي مكملوش ؟
سيبتيني ليه؟
سبحانه اللي مخليني ماسك نفسي عشان الصعايده مبيعيبوش
بس غبي اللي قال ان الصعايده مبيبكوش
مكنتيش ليلى بس أصبحت مجنونك
وحشني سكون قلبي لما كنت ببص في عيونك
بس انا دلوقتي بدونك .. تمام وكويس وقفلت الباب
يعني عدى على وقت م نسيتك شهرين، يومين
او يمكن انا كداب
بوهم الجميع إني بخير وفي الحقيقه انا عايش جوايا عذاب
انا واحد تاب عن الحب بسببك من سنين
كأنه كان ذنب اقترفته وعايش بكفر فيه بس لازلت عايش في جحيم
كل ده كان ليه ؟؟؟
عشان كلت تفاحه من شجره حنانك لاجل انول الرضا يومين؟
وبعدها حصل ايه؟
فجأه لقيتني اتطردت من النعيم
نزلت ع ارض ببص شمال ويمين ملقتكيش
متكدبيش
لما يسألوكِ عني متكدبيش
انا والله مسبتكيش
اسيبك ازاي يعني :)
ده انا حتى بعد سنين تركك ليا لسه مخونتكيش
في الاخر تقولي محبتنيش ؟
متعذبنيش انتِ بصور ليكِ مع حد غيري
احنا يعني كنا سوا وكنتِ برضه بتغيري
ايه الفرق دلوقتي اني لوحدي على سريري
اشوف .. اغير .. واكتم 
طب اقول انا هكلمها
عقلي يرد : يا ولا اكتم
انا قلبي اتسمم بجرحك اللي مش لاقيله اي دوا
بكتب قصايد والناس تتأثر وتقولها ورايا وتحزن وانتِ ..
وانتِ ولا الهوا :) ….

قصيده "قالتلي روح"  بالكلمات - ريم علاء - الغزال

وان كنت اقدر احب تاني، هحبك انتِ .

‎⁨بعد بعدك ٢⁩ | ريم علاء

كلمات القصيدة :
ناس بتعيش حياتها وبتقضي أيامها ، وناس زيي على سرايرها بتموت بذكرياتها بينهش الحنين في روحها
وبيعيدوا اليوم اللي قبله النهارده تاني، اليوم العشوائي اللانهائي، في الحاله دي بقالي فتره بعاني، أنام النهار وأصحى الليل اللي في وجعه ليا مبيبقاش حقّاني،
ليل طويل يدخلني في نقاشات وحديث تنتهي بإني أجهل انا مين ، بقيت شبه اعمى مش عارف الطريق منين، مش عارف هلاقي ايه قدامي..
في هذا العالم الفاني كانت هي الشيء اللي باقي اللي موجود بس علشاني، 
في هذا العالم العشوائي كانت الشيء اللي ينفع يتقال عليه استثنائي،
وسط كل احتمالات حياتي كانت هي اللي بتديني اليقين اني طيب واستاهلها تكمل نصي التاني،
وفجأه.. فجأه لقيتها بتضيع من ايدي في ثواني،

دلوقتي وصفها يليق اني اقول كانت زي التناقض الممل
بتشبه مثلًا لما أحل، إجابه بالصدفه في امتحان مش سهل، واستغرب ازاي قلمي كتب كل هذا الحل،
متبقاش عارف هتكون صح ام ان دماغك خانتك بس هتلاقي حظك في النهايه فُل،
هتعدي الامتحانات وكل الصعب وتلاقيك مثلًا في النهايه فشلت في امتحان الدين لنسيانك قهوتك فَـ في اللجنة النوم عليك حَل ، ف معرفتك تحل ، كانت زي التناقض الممل ..
مين بقى بدأ في البُعد عن مين انا مبقتش عارف
مين فلت ايديه في الاول انا مبقتش شايف
كل الطرق بتوديني اني ابقى خايف
ده انا على صدق حبك ليا كنت حالف
بس بُعدك عني بقى كاشف
ان كل اللي ما بينا كان متكرر و زايف
وقعدتي بتحاولي تقتليني ب سكينه تلمة وعملت نفسي مبتألمش وعايش
انا برضه كنت طايش لما خليتك طوق نجاتي
بس انا من سنين كنت حايش نفسي اني اعيش حياتي
ولقيتك.. لقيتك ابتديت اصالح بيكِ العالم
لقيتني فجأه من الاكتئاب بتعالج
انا كنت ساذج

بس انتِ ريحتك لسه مُحتلّه هدومي
لسه بصوتك محاوطاني
لسه انتِ السبب في سرحاني
طب انتِ لسه فاكراني ؟
لسه فاكره عصبيتي وجناني ؟
لسه لما بتبصي للقمر بتفتكريني ؟
مجاش عليكِ لحظه واحده فيها افتقدتيني ؟
يا شيخه ده انا لسه بحكي عنك لكل ورقه بتقابلني
وفي كل صفحه ألقاني كاتب امتى هتقابليني ؟ 
وحشتيني

مبقتش أحب أقعد مع حد تبدأ معاه قعدتي بـ " فيك ايه يابني مالك ؟ يعني انت بقى عاجبك حالك؟"
انا وبكل اسف عميت عن حالي وكأني دخلت متاهه في ظلامٍ حالك!

توهت مني ولما لقيتك افتكرت انك هتلاقيني
توهتيني اكتر لكني فضلت اصبر وكان كل اللي بيرضيكِ بيرضيني
زمان شوفتك وسط اللمة والزحمة اللي حواليكِ كنتِ مجرد عابره ما الذي أبقاكِ فيني ؟
بس منكرش انك بـ طلّة واحده منك كنتِ بتخطفيني
ولسه لحد الآن لما اشوفك الاقي عيني بتثبت عليكِ، لسه قادره تسرقي نظراتي مني..
عاهدتك اني هعيشلك وكانت روحي فيكِ، ليه اختارتي انك تبيعيني ؟
بعد بُعدك بعدت روحي معاكِ، انا حالي عكس م انتِ بتشوفيني
كل لحظة حزن كانت بتعدي علينا، كنت ألقاكِ جنبي بتسنديني
فينك انتِ دلوقتي من حزني تطلعيني ؟
فينك انتِ من خوفي تطمنيني ؟
عدَّى على الفراق شهور وانا لسه بعيد في مشهد لما كنت ماسك فيكِ، وبتقتل وانا بشوف نهايته وانتِ بتسيبيني
عدّى على الفراق شهور ولسه بتجيلي في احلامي تزوريني، أظهر في الحلم ببكي ألقاكِ جايه بتحضنيني
طب ازاي على بُعدك عني بتواسيني، وانتِ في الواقع قصدتي تدبحيني!!
على فوزك في التحدي بحيِّيكِ، انا بعد بُعدك ملقتش حاجه تحييني
كنت قد قررت اني عمري تاني م هكتب ليكِ، بس يؤسفني اقول انك لسه بتوحشيني
اتجننت بيكِ خلاص وبقيت اشوفك في كل الناس
ليه يا عينيا بتخونيني ؟
لسه جرحي بينزف منك والغريب ان عيني بتفضح حنيني
كنتِ حلم وقولتلك مش هيكمل صدقيني
طبطبتي عليا وقولتيلي عشانك هتحدى العالم ثم طمنتيني ثم حضنتيني ثم في قلبي سكنتيني
ثم فجأه طلع كابوس فعلًا ولقيتك بتكسريني!
حاسس إني في فيلم والمخرج قاصد يئذيني
حابب يطلعك في النهايه بتجرحيني
تعرفي.. انا لو مكانه كنتِ هتلاقيني
بنهي آخر مشهد وانا في حضنك بقولك "وحشتيني"

قصيدة "بَعد بُعدِك" - ريم علاء || Qaseda “Ba3d bo3dek” - Reem Alaa

قصيدة "ليكِ انتِ"
بكتبلك وعارف إن كل حرف واقف عاجز عن تكوين جمله توصفك..
قلمي حتى ضعيف إنه يكتب شيء عنك، حاسس إنه مكسوف منك..
بقيت أخاف تملِّي من كُتر ما بقول بإني بحبك..
لكني أحاول أوصف كيف حياتي اتحوّلت من لون كان بهتان، للوحة فنية اترسمت على ايد أعظم فنان..
كيف بنظرة منك وهبتيلي جنة ملكي يتمناها أي إنسان..
كيف أصبحتي لحن بيحلِّي كلمات دُنيتي..
كيف ابتسمت واطمنت لما ربنا نزّلي ملاك من الجنة كان هو رحمتي..
بكتب .. بكتب ليكِ انتِ !
إنك تديمي ليّا بقت أُمنية كل صلاه..
انتِ السبب اللي ربنا خلَّاه..
يجعلني أتواجد في هذه الحياه..
ويا الله على ده سبب .. ما أحلاه..
بشكر الصدفة إللي حطتك في سكتي..
بقيت عايزك ختام قصتي..
بكتب .. بكتب ليكِ انت !
دخلتي قلبي وخليتيني أشعر إزاي في الثانيه الواحده ممكن توحشيني.. 
إزاي أبقى لسه قافل معاكِ وألقاني افتقدت اسمي لما تندهيلي..
حسيت معاكِ إني ملاك وكإنك من ذنوبي بتطهريني..
بقى كل خوفي إني أعيش يوم بدونك بقى كل خوفي إنك في يوم تسيبيني..
مبقتش شايف غيرك حلوه في عيني مبقتش عايز غيرك يكمل معايا سنيني..
عن كل الناس أغنيتيني..
يا أرض سكنت فيها وعمرك م فكرتي في يوم تهمليني..
وبالرغم من الملل إللي في كلامي بتسمعيني..
وعلى كل حلم بحلمه بلاقيكِ معايا وبتشجعيني..
ياما شوفتي عصبية مني وبرضه بلاقيكِ بتهدّيني..
وبعاند معاكِ كتير وبتعرفي ازاي تفهميني..
وعلى كل رأي أقوله بتوافقيني، عمرك ما فكرتي في يوم تضايقيني..
بحس فيكِ بضعف وحزن ساعات وبرضه ألاقيكِ بتقوّيني..
بتفكريني بـ حُضن أمي إللي دايمًا موجود وبيحتويني..
انت سرقتي روحي مني، انا روحي بقت فيكِ..
بقيتي السبب الوحيد لفرحتي..
بتشبهي الملاك بالمللي والسنتي..
بكتب .. بكتب ليكِ انتِ !
عن كل مره زعلتك فيها بعتذرلك أرجوكي سامحيني..
واوعاكِ في يوم تخافي مني وبدون قلق حبِّيني..
انتِ صدقيني .. بقيتي هدوئي وسُكني..
داخله بـ حُب في حُضني..
مش زي اللي آذينِّي ووحدي فايتنِّي..
كان كل حد فيهم بيستلذ إنه يطعني.. 
محدش فيهم فكر في يوم إنه يفهمني..
دلوقتي..
دلوقتي بعترفلك بإنك القشه الوحيده اللي نجيت بيها..
حياتي بيها ليها معنى لما انتِ دخلتيها..
تفاصيل أيامي بقالها روح لما بقيتي جُزء فيها..
خلقتي جوايا أنا الروح بعد ما كنت شبه جماد..
خلِّيتي قلبي يحبك وكُنت فاكرُه مات..
نسِّيتي عقلي كل اللي عدّى من حياتي وفات..
وعشقت وجودك حتى لو كنا في حاله خصام وسُكات..
مش عايز أفتكر كل اللي مر في حياتي من ذكريات..
بس في زمن فات كنت بكتب لكل واحده قبلك..
وفجأه وبدون أي مُقدمات بقيتي انتِ كل ما أملك..
بعد سنين حُزن مرّت عليَّا بقت فرحتي بس إني أشوف وشك..
عشقت جنونك وحركاتك الطفوليّه وهزارك وتريقتك عليّا..
وبحبك أما تتعصبي لما أقولك إنك طفلتي ما انتِ أصلك فعلًا طفلتي..
بكتب .. بكتب ليكِ انتِ !
لسه فاكر لما كنت عايز أعترفلك بـ حُبي..
ساعتها قولتلك "أنا بحب جديد"..
بصيتي وبتريقة قولتي..
"مين المحظوظ ده والسعيد ؟"..
ساعتها خوفت أعترف وكل واحد يبقى عن التاني بعيد..
بس مقدرتش أخبِّي مشاعري..
وكانت بتبان في نظراتي، في رعشة ايدي لما تسلمي، في لخبطة حياتي، في خضه حسيت بيها لما خوفت عليكِ..
ف اتفضحت كل مشاعري..
وبدأت أكتب عنك في شِعري..
وفي آخر كل قصيدة ألقاني كاتب إنك بالنسبه لي عيد..
شوفتي دلوقتي مين المحظوظ والسعيد ؟ ..
بقيتي خلاص انتِ مُلهمتي..
بكتب .. بكتب ليكِ انتِ !
مش عارف إزاي وبالسرعة دي حبيتك..
يمكن جذبتني عينيكِ إللي فيها سحر..
أو يمكن عشان من اول ما عرفتك خليتك..
في مكانة بعيدة عن الكل ومكنتش عارف ايه السر..
إنك بتفكريني بكل شيء حلو..
بالشتا لما ييجي بعد حر..
بهدوء البحر..
بسكون الليل..
بشكل القمر لما يبقى بدر..
بوعدك دلوقتي بإني باقيلك..
والوعد هو دين الحُر..
لازلت بكتبلك وعارف إن كل حرف واقف عاجز عن تكوين جمله توصفك..
قلمي لسه ضعيف إنه يكتب شيء عنك، حاسس إنه مكسوف منك..
لازلت خايف تملِّي من كتر بقول بإني بحبك..
لكني على قد ما أقدر حاولت أوصف كيف حياتي اتحوّلت من لون كان بهتان للوحة فنية اترسمت على ايد أعظم فنان..
كيف بنظرة منك وهبتيلي جنة ملكي لسه بيتمناها أي إنسان..
كيف أصبحتي لحن بيحلِّي كلمات دُنيتي..
كيف ابتسمت واطمنت لما ربنا نزلِّي ملاك من الجنة كان هو رحمتي..
بكتب .. بكتب ليكِ انتِ !

قصيدة "ليكِ انتِ" - ريم علاء || Qaseda “Leky Enty” - Reem Alaa

الكلمات : 
قصيدة "بإعتبار إن في يوم هنرجع لبعض"

بإعتبار إن في يوم هنرجع لبعض
بإعتبار إن احنا قررنا نوفي بالوعد
ساعتها لا هيبقى هاممنا ظروف ولا حد
محدش فينا هيوجع التاني ولا حد فينا هيجيله فكرة البُعد
أحلفلك بغلاوتك إني دايمًا بفكر فيكِ ولو وسط حشد
مش عارف أشبهك ب ايه بس انتِ أصبحتي زي إدمان بيتسلل في الجسد
زي مثلًا واحد حس بالدفا بعد ما بِرد
بدِّيك كل ذرة مشاعر فيّا يمكن يبان صدق مقولة "مَن زرع حصد" 
وألاقيكِ حبيتيني ولو نص حبي ليكِ ومتخافيش عمري ما هقولك في يوم إني زهقت
يشهد الجميع إن حبي ليكِ بقى من ضمن الثوابت 
ده انا كل كلمه بكتبها بتبقي انتِ القصد
مش بتغيبي عن بالي لحظه ولا بعرف افرح بدونك ثانيه، انا والله عكس م بيقولولك البعض
كل يوم كنت أستنى واقول يارب قلبها يحن
يارب ترجع تحلّي يومي تاني بعد م بـ بُعدها بهت 
وألاقيني وأنا بدعي فجأه سكت وتيجي صورتك قدامي وأحس إني اطمنت
شوفت وبشوف كتير لكنك انتِ هتفضلي في عيني أجمل بنت
مفيش إنسان بدون أخطاء في حياته بيندم عليها وانا والله العظيم حرمت
صدقيني حياتي من غيرك زي سمكه من البحر طلعت او سفينه في البحر غرقت
ده انا بدونك زي سهم في بورصه عمّال يخسر وينزل لتحت
وكل م أحس إني خلاص زدت ألاقيني نقصت
إزاي بتقولوا ان مفيش رجالة بتعيط وانا كل يوم أجي انام افتكرها ف ألاقيني انهارت
واصحى وابقى في وسط ناس وتيجي سيرتها بحس إن دموعي من عينيا هربت
عيشت سنين قبلك كأني كنت في حالة سُكر ولقيتك فجأه لقيتني بيكِ فوقت 
دايمًا في بالي إن إحنا سوا ومع بعض في أي وقت
وكإن عقلي رافض يقبل فكرة عدم وجودك إلا في حالة لو أنا مُت
بعترفلك إني عشقت وبدأت أحس إني خلاص بيكِ اتجننت
بحب رغيك الكتير وطريقتك في السرد
وشكلك وانتِ مضايقه وطاغي علينا الصمت
ومشاكلك التافهه اللي مينفعش أعدّيها ولازم أدّيها الوقت
تقعدي تحكيلي عن ناس قبلي ف أسكت، ف تقوليلي "ايه ده هو انت بتغير؟" ، ف أقول في بالي "آه أنا فعلًا غِيرت" !
بيخوّفني منك فهمك ليّا الزايد ولشكل ملامحي لما بضايق
ويخوّفني وجودك إللي في حياتي بقى فارق وقلبي اللي في جنانه بيكِ بقى بادئ
لخبطتي حياتي من اول م اتعرفت عليكِ وسرحت في عينيكِ
كنت افضل أسأل نفسي "هو انا حبيتها بجد؟"
ألاقيني بفتح موبايلي وأقلّب في صورك
وأسرح فجأه وألاقيني من حالي استغربت !
ليه بيهمني أمرك؟ ليه بغير من زمايلك؟ ليه بقيت أهتم بيكِ وبحب أسمعك؟ ليه ببقى دايمًا عايزك؟ ليه بقيت بنادي الكل باسمك؟ ليه في كل حاجه بعملها بفتكرك؟
ساعتها صدقت .. إني فعلًا بحبك !
بإعتبار إن في يوم هنرجع
هبقى ليكِ الأخ والصاحب الجدع
وأبوكِ اللي في وقت مرضك يخاف عليكِ ويتفزع
أما عن حالي لو رجعنا لبعض في يوم
عمري ما هحس إني حزين أو مهموم
هبطل أصحى كل تلات وأقول "ده يوم مشئوم"
هفضل أدعي في كل سجده إن نعمة وجودك عليّا تدوم
كل ما أتخيل إن عمري ما هبقى من ضحكتك محروم أسرح وأتبسط..
بإعتبار إن في يوم هنرجع زي زمان
هيفضل حبك في قلبي ساكن
هتفضلي حواليّا في كل الاماكن
هفضل لذكرياتنا صاين
لكن حياتي دونك هيفضل طاغي عليها اللون الداكن
بإعتبار إن في يوم هنرجع لبعض
بوعدك إن وجودي جنبك بقى فرض
بوعدك إن ليكِ هبقى الأرض اللي عمر ما هيسكنها غيرك حد
أنا اللي هبقى عن كل اللي خذلوكِ عوض
أنا اللي هيفضل يحبك دون أي مقابل أو غرض
ده أنا اللي لكل الناس عنك حكى وسرد
أنا اللي دلوقتي بكل ده بوعد
ده بإعتبار إن في يوم هنرجع لبعض .

قصيدة "بإعتبار إن في يوم هنرجع لبعض" - ريم علاء || Qaseda “B e3tbar en fe youm hnrg3 lb3d”-Reem Alaa

لو في خناقتنا تلاحظي هتلاقيني كل شويه بعتذرلك مع إني مبحبش الأسف
لو تبصي في عينيا وتصدقيني هتلاقيهم عُمر ما اختفى منهم الشغف
لو تسألي الكل عن كلامي عنك هتلاقيه دون أيّ ذم، هتلاقي اسرارك معايا مفيش ولا سر فيهم انكشف
لو تابعتي افعالي هتعرفي اني بسمع كلامك بالحرف وبمشي عليهم زي الألف
لما بتيجي معايا في أي حته عمري منك ما اتكسف بالعكس انا دايمًا معاكِ بحس بالشرف
ده انتِ اكتر حد معايا وقف وفي تشجيعي سهر وعلى كل اللي بحتاجه جابهولي وصرف
وعارفه اني لو كتبت من هنا للسنه الجايه هتفضل الحروف تتريق على عجزي اني اوصف
لكنِّي يا أمي بحبك بعدد ما ربنا بخلقه في كتابه حلف
بحبك بعدد كل مؤمن قضّى ايامه في المسجد واعتكف
بحبك بعدد كل واحد تاب بعد ما حس انه عن طريق ربنا انحرف
بحبك بعدد كل مره حسّيتي اني مبحبكيش
واديني قدام الكل بعترف
كل دمعه نازله منك مبتبسطنيش
وكل مره بتعيطي بقفشك وتملِّي بكل شيء مضايقك بتقرّي
م انا دايمًا حاسه بيكِ ولو حتى كنت بعيد
ده انا حته منك لولا قطعوا الحبل السُرِّي 
وعارفه ان قلبك ضعيف مهما حاولتي تبيّني انك حديد
متكشريش يا أمي واوعى ملامحك تنطفي
ده انا كل م احس انك مبسوطه حُزني بلاقيه تلقائي بيختفي
ودايمًا بلقاني في أي قعده مع صحابي عنك أحكي وبيكِ أحتفي
وعُمري منك يا أمي ما ازهق او اكتفي
ده انا عندي اسمع صوتك اجمل من فيروز واشوفك امتع من افلام عبد الحليم وشاديه
بترجّاكِ يا أمي تخليكِ عني راضيه
ده انا تملّي بدعي للخالق
ان يومي قبل يومك وميحرمنيش منك ثانيه
ده انتِ اللي وجودك بيعمل لحياتي قيمه وبيبقى فارق
وانا صغيره مكنتش عارفه ان كل عيد ميلاد ليكِ بتكبري سنه والتجاعيد تظهر علامه في التانيه
دلوقتي بدأت ألاحظ انك بتكبري وببقى بضّايق 
لكن تعرفي يا أمي ؟ دايمًا بحسّك ملاك لا بيعجّز ولا السنين من عُمره سارقه
كل ما احس اني خلاص هنهي القصيده ألقاني لسه في وصفك بادئه
هعترفلك ب شويه حاجات ووالله انا في اللي بقوله دلوقتي صادقه
لما بنزل وبقعد بالساعات برّا بحس انك فعلًا بتوحشيني
وببقى عايزه ارجع قبل م تتضايقي بسبب تأخيري وتلوميني
لما بتبقي مضايقه والله بحس وبيركبني ١٠٠ عفريت ببقى عايزه افرحك زي م انتِ تملّي من همومي بتطلعيني
ببقى عارفه لما دايمًا للاحسن بتعوزيني ابقى
وابان قدامك ل نصايحك مش قابله
لكن ألقاني بنصح بيها غيري لما يتكتبلي انصحيني
لما باجي عليكِ بيبقى غصب عني صدقيني
بس انا مهما حزنت بلاقيكِ جنبي بتسنديني
ده هم بيجرحوني ف اجرحك ف الاقيكِ بتداويني
على كل قرفي معاكِ سامحيني
ده انا لو فضلت أرُدلك كل شيء عملتيه علشاني هحتاج ولا الف سنه على سنيني
طيشي وجناني ده طبيعه سني وليقيني اني مهما عملت هتستحمليني
والعصبيّة دي طبع فيّا بس والله ممكن يتحوّل في ثانية ل هدوء
زي مثلًا قنبلة كانت هتعمل انفجار والأمر يسوء
بس عرفوا يتعاملوا معاها انتِ بس .. افهميني!
وإن حسّيتي في يوم اني مبحبكيش ف من فضلك اسمعيني
انتِ أمي اللي شيلتيني ٩ شهور في بطنك وبعدها للدنيا جبتيني
انتِ اللي علمتيني يعني ايه ممكن ألاقي وسط حروبي حُضن بيه تطمنيني
انتِ اللي لو حصل في يوم وكرهتيني هفضل احبك وعمري م هبطل
لكني عارفه ان الكُره ميعرفش لقلبك طريق ده انتِ مش بس شيلتيني في بطنك ده انتِ معيّشاني جوّا قلبك فـ ارجوكِ خلّيني 
ازاي بعد كل ده يعني مش بحبك ؟ انتِ بس .. افهميني!
ده احنا لما بنوصف حد بنحبه بنشبّه حُضنه بـ حُضن الأم فـ ازاي اوصف حُضنك انتِ دلوقتي فهميني..
لو هحاول أوصفه هقول إنه جنه بتحجج كل شويه ان بدخولها تسمحيلي
ده انتِ يا أُمي اللي بوجودك حييتيني ومن صُغري كل حاجه بعملها بتشاركيني
ده انا مقررتش اكتب شِعر غير لما حسيت إنك بموهبتي آمنتي ودايمًا بلاقيكِ في ضهري تشجعيني
هو فعلًا مش شويه كلام هيعرفك قيمتك عندي لكنك 
قولتيها زمان "حُبك باين في فعلك"
ف اتأكدت فعلًا اني بحبك .. لما مسكت القلم وقعدت أحكي عنك لحبه ورق
والاقي مع كل كلمه "بحبك" قلبي يدق
ولقيتني دمعت وانا بكتب "سامحيني"
فـ ارجوك يا أُمي افهميني واوعي يسكنك من ناحية حُبي ليكِ شك 
ده انتِ اللي الجنه تحت قدمك
ده انتِ اللي ليكِ بعد ربنا أركعلك
اذا كانوا بيقولوا "من علمني حرفًا صرتُ له عبدًا" ف انا يعني معتقدش انه حرام ابقى عبدك
كل اللي بيحاول يشكك في جمالك نعرف على طول انه مش في وعيه وبيخرّف 
كأنّك آيه نازله من الله ما يجوز انها تتحرّف 
أجمل حاجه في قدري إنك أُمي ودي مش صدفه مفيش حاجه اسمها صُدف
انا مبعترفش إن النقاب فرض لكنه ليكِ اتفرض لأجل ان جمالك ده ما ينكشف
ولسه بعد كل الكلام ده متنحه للسقف
وعارفه اني لو كتبت من هنا للسنه الجايه هتفضل الحروف تتريق على عجزي اني اوصف
لكني بتمنى اكون قدام الناس شخص بعشقه لأمه اتعرف

قصيدة " افهميني " - ريم علاء || Qaseda “ Efhameeny “ - Reem Alaa

قصيدة " مش كفاية ؟ " - ريم علاء || Qaseda “ msh kefaya ? “ - Reem Alaa

قصيدة "ليكِ انتِ"
بكتبلك وعارف إن كل حرف واقف عاجز عن تكوين جمله توصفك..
قلمي حتى ضعيف إنه يكتب شيء عنك، حاسس إنه مكسوف منك..
بقيت أخاف تملِّي من كُتر ما بقول بإني بحبك..
لكني أحاول أوصف كيف حياتي اتحوّلت من لون كان بهتان، للوحة فنية اترسمت على ايد أعظم فنان..
كيف بنظرة منك وهبتيلي جنة ملكي يتمناها أي إنسان..
كيف أصبحتي لحن بيحلِّي كلمات دُنيتي..
كيف ابتسمت واطمنت لما ربنا نزّلي ملاك من الجنة كان هو رحمتي..
بكتب .. بكتب ليكِ انتِ !
إنك تديمي ليّا بقت أُمنية كل صلاه..
انتِ السبب اللي ربنا خلَّاه..
يجعلني أتواجد في هذه الحياه..
ويا الله على ده سبب .. ما أحلاه..
بشكر الصدفة إللي حطتك في سكتي..
بقيت عايزك ختام قصتي..
بكتب .. بكتب ليكِ انت !
دخلتي قلبي وخليتيني أشعر إزاي في الثانيه الواحده ممكن توحشيني.. 
إزاي أبقى لسه قافل معاكِ وألقاني افتقدت اسمي لما تندهيلي..
حسيت معاكِ إني ملاك وكإنك من ذنوبي بتطهريني..
بقى كل خوفي إني أعيش يوم بدونك بقى كل خوفي إنك في يوم تسيبيني..
مبقتش شايف غيرك حلوه في عيني مبقتش عايز غيرك يكمل معايا سنيني..
عن كل الناس أغنيتيني..
يا أرض سكنت فيها وعمرك م فكرتي في يوم تهمليني..
وبالرغم من الملل إللي في كلامي بتسمعيني..
وعلى كل حلم بحلمه بلاقيكِ معايا وبتشجعيني..
ياما شوفتي عصبية مني وبرضه بلاقيكِ بتهدّيني..
وبعاند معاكِ كتير وبتعرفي ازاي تفهميني..
وعلى كل رأي أقوله بتوافقيني، عمرك ما فكرتي في يوم تضايقيني..
بحس فيكِ بضعف وحزن ساعات وبرضه ألاقيكِ بتقوّيني..
بتفكريني بـ حُضن أمي إللي دايمًا موجود وبيحتويني..
انت سرقتي روحي مني، انا روحي بقت فيكِ..
بقيتي السبب الوحيد لفرحتي..
بتشبهي الملاك بالمللي والسنتي..
بكتب .. بكتب ليكِ انتِ !
عن كل مره زعلتك فيها بعتذرلك أرجوكي سامحيني..
واوعاكِ في يوم تخافي مني وبدون قلق حبِّيني..
انتِ صدقيني .. بقيتي هدوئي وسُكني..
داخله بـ حُب في حُضني..
مش زي اللي آذينِّي ووحدي فايتنِّي..
كان كل حد فيهم بيستلذ إنه يطعني.. 
محدش فيهم فكر في يوم إنه يفهمني..
دلوقتي..
دلوقتي بعترفلك بإنك القشه الوحيده اللي نجيت بيها..
حياتي بقى ليها معنى لما انتِ دخلتيها..
تفاصيل أيامي بقالها روح لما بقيتي جُزء فيها..
خلقتي جوايا أنا الروح بعد ما كنت شبه جماد..
خلِّيتي قلبي يحبك وكُنت فاكرُه مات..
نسِّيتي عقلي كل اللي عدّى من حياتي وفات..
وعشقت وجودك حتى لو كنا في حاله خصام وسُكات..
مش عايز أفتكر كل اللي مر في حياتي من ذكريات..
بس في زمن فات كنت بكتب لكل واحده قبلك..
وفجأه وبدون أي مُقدمات بقيتي انتِ كل ما أملك..
بعد سنين حُزن مرّت عليَّا بقت فرحتي بس إني أشوف وشك..
عشقت جنونك وحركاتك الطفوليّه وهزارك وتريقتك عليّا..
وبحبك أما تتعصبي لما أقولك إنك طفلتي ما انتِ أصلك فعلًا طفلتي..
بكتب .. بكتب ليكِ انتِ !
لسه فاكر لما كنت عايز أعترفلك بـ حُبي..
ساعتها قولتلك "أنا بحب جديد"..
بصيتي وبتريقة قولتي..
"مين المحظوظ ده والسعيد ؟"..
ساعتها خوفت أعترف وكل واحد يبقى عن التاني بعيد..
بس مقدرتش أخبِّي مشاعري..
وكانت بتبان في نظراتي، في رعشة ايدي لما تسلمي، في لخبطة حياتي، في خضه حسيت بيها لما خوفت عليكِ..
ف اتفضحت كل مشاعري..
وبدأت أكتب عنك في شِعري..
وفي آخر كل قصيدة ألقاني كاتب إنك بالنسبه لي عيد..
شوفتي دلوقتي مين المحظوظ والسعيد ؟ ..
بقيتي خلاص انتِ مُلهمتي..
بكتب .. بكتب ليكِ انتِ !
مش عارف إزاي وبالسرعة دي حبيتك..
يمكن جذبتني عينيكِ إللي فيها سحر..
أو يمكن عشان من اول ما عرفتك خليتك..
في مكانة بعيدة عن الكل ومكنتش عارف ايه السر..
إنك بتفكريني بكل شيء حلو..
بالشتا لما ييجي بعد حر..
بهدوء البحر..
بسكون الليل..
بشكل القمر لما يبقى بدر..
بوعدك دلوقتي بإني باقيلك..
والوعد هو دين الحُر..
لازلت بكتبلك وعارف إن كل حرف واقف عاجز عن تكوين جمله توصفك..
قلمي لسه ضعيف إنه يكتب شيء عنك، حاسس إنه مكسوف منك..
لازلت خايف تملِّي من كتر بقول بإني بحبك..
لكني على قد ما أقدر حاولت أوصف كيف حياتي اتحوّلت من لون كان بهتان للوحة فنية اترسمت على ايد أعظم فنان..
كيف بنظرة منك وهبتيلي جنة ملكي لسه بيتمناها أي إنسان..
كيف أصبحتي لحن بيحلِّي كلمات دُنيتي..
كيف ابتسمت واطمنت لما ربنا نزلِّي ملاك من الجنة كان هو رحمتي..
بكتب .. بكتب ليكِ انتِ !

قصيدة "ليكِ انتِ" - إصدار جديد || Qaseda “Leky Enty” - New Version

قصيدة " مسك الختام " - ريم علاء || Qaseda “ Mesk El Khetam “ - Reem alaa

قصيدة "مني ليا"
النص ده لكل اللي زرع مشاعر جوا قلبي ثم اتحولت ببعده لسم لازال بيجري جوا جسمي
طبعًا هبان في الاول اني بكلم حد
بس انا من همي للاسف بكلم نفسي

لما بتحس بحزن ايه اللي بييجي في بالك؟
بتفتكر اخر مشهد وانت بتقولها متبعديش عني ؟
ولا بتفتكر حالك .. وانت لسه قاعد مستني ؟
طب وبعدين لحد امتى هتفضل ظالم نفسك وكل اللي حواليك واحد واحد ؟
متستناش .. دي واحده انت اول م حبيتها فجأه قلبها بقى حجر وجامد
الدنيا ماشيه وانت واقف مكانك ثابت
كابت حريتك ليه ولسه متقيّد باللي سابك !
اللي سابك هيجيله يوم يتساب وهيندم بإنه في يوم وبدون اسباب فارقك
لكنك لازم تتحرك 
قطر الحياه فاتك
ليه مُصّر تحزّن عليك احبابك
ده انت كنت اكتر حد بيضحك ليه دلوقتي ملامحك بهتت تاهت وعجزت من كتر حزنك؟
ليه ادّيت الفرصه لحد إنه يتعمق فيك لحد م خذلك؟
لحد الآن مش عارف ايه المغزى من ان احنا دايمًا بنحب اللي فارقنّا !
الحكايه بقى فيها إنّه
قصادهم دايمًا باينين ضعاف بمجرد م يرجعوا بنفرح انهم بيحنولنا..
ف بنتقبل اعتذارهم وبنداوي بالاسف بتاعهم قلوبنا
وبنسامحهم على غياب هز كياننا شهور وسنين..

بس انتوا خليتونا تايهيين
مش عارفين طريقنا منين ولا تفكيرنا ده هيودينا لفين
بنقسّم نفسنا نصين
نص بيلعن فيكوا ونص مش قادر يسيبكوا ومتعلق بيكوا وبنقف نبص ونشفق على الاتنين
الدنيا مخليانا في دوامه دايرين
واهمانا اننا عايشين بس بييجي علينا الليل نبقى بذكرياتنا متعذبين
مش لاقيين طريقه بيها ننسى
بنحبس افكارنا جوا دماغنا
احنا تعبنا من الحبسه
تعبنا من لعبه خلاص نسيب ؟ لالا استنوا لسه
مادام فارقتوا بترجعوا ليه تحيوا قلوب موّتناها عشان تنسى ؟
ليه الدنيا طلعت صعبه وكانت واهمانا انها سهله؟
بتبعد ليه يارب ناس عشقناهم وبتقرب ناس ولا بييجوا في تفكيرنا ؟
ليه يارب بنحب ناس بيحبوا غيرنا وغيرنا بيحبونا احنا !

رساله للي كاسرنّا ..
هل حالنا عاجبكوا ؟
هل بتناموا دون اي تأنيب من ضميركوا ؟
مبنجيش في بالكوا طيب ؟
طب بتهربوا ليه كل م بنسأل ليه فارقتونا وكان ايه السبب ؟
اعذرونا بس احنا جوّا دماغنا حرب ..
إحنا شوفنا منكوا العجب ..
وعدتونا وعود وطلعت كلها كدب!
كل ليله بنيجي ننام مبنعرفش وبنقعد نتقلب على كل جنب
ننام ازاي يارب .. ؟
الله م يحسس حد ب عذاب إنك متساب دون اي ذنب

لكل اللي بيسمع انا طالب منك طلب
متتعلقش ولا تسمح لحد إنه يتحكم في مزاجك
اوعاك تترك حريتك وتتقيّد 
عشان مكاني ميبقاش في يوم مكانك
وتبقى زيي قاعد مستني ومتقيّد .

قصيدة " مني ليا " - ريم علاء || Qaseda “ Mny Leya “ - Reem Alaa

كلمات قصيدة "اكدب عليَّا شويه" :
خسرتني وانا كنت علشانك بخسر العالم
كسرتني بـ شوية ضحك مع ناس وزحمه ملمومه حواليك وانت فاهم
انك اناني تعشق تمتلك قلوب البشر لكنك حر متسمحش لشيء يآسرك
والله قلبك ده ظالم
خلَّاك تقرّب مني وتوهمني بإني بقيت بنتك وفجأه تبعد ومفيش اسباب تتفهم
طب حد طيب يقدر يساهم ويفهمني هو ليه بعد وبيعشقلي وجع القلب والأذيّة 
حد يقوله إنه ببعده جاتلي أمراض مكانتش فيّا 
عيني مثلًا مبقتش ترضى تقف وتغمض ولو ثانيه
وان خونتها وغصبتها بإنها تغمض تخونّي هي كمان وتجيلي انت خيال وكأنك قصاد عينيا
امد ايديا .. ملاقيش غير ايد بتزيح فيّا وبتوقعني
ليه يا قلبي تملّي بتحب اللي بيوجعني ؟
ليه يا عيني مش قادره تشوفي غيره وهو عمّال بيجرحني ؟
ليه يا روحي مش ساكن فيكِ غير اللي فايتنّي ؟
طب اعمل ايه في حاجات خدتها معاك بعد بعدك عني ؟
كان آخر كلامك "اعذريني مش قادر أكمّل"
بتتأسفلي بكل سهوله وكأن اللي اتكسر ده مش شيء جوّا مني
مسكت القلم وقلبي كان بينزف كلام بكتبه .. لقيت عقلي بيعاتبني "برضه هتحنّي"
قام قلبي رد عليه وقعد يبررله بُعدك عني
كنت فاكره اني نسيت اكتشفت ان قلبي معاك وسايبني
طب لو غلطت معاك في حاجه متفوتنيش وحدي وحاسبني
اكدب عليَّا شويه طيب وقولي انك حتى كنت حاببني
طب انت واحشني ! ايه للدرجة دي مبتحسش
سبحانه اللي خالق قلبك حجز مبيتهزّش وسبحانه برضه اللي خالق عينيك فيها جمال من نظره واحده بيهزني
كأنك سحر ومسّني ولا له دوا
يمكن في شيء يعالجه إن إحنا نكون سوا
لكن العلاج ده بقى ناقص منعوه حتى ينزل في ادويه
وارجع تاني افتكرك بمجرد م ابُص للقمر في السما
وافتكرك ان اشتغلت اغنيه كنا تملّي نعتبرها المفضله
لسه بفتكرلك الحلو مع ان الوحش زاد وطغى
بحاول على طول انك متوحشنيش لكن لمحاولاتي مفيش امل ولا لمحاولات صحابي انهم ينسّوني فيها رجا
اكدب بس قدامهم كدبه ان الموضوع انتهى بس هو جوايا مبينتهيش
وامثل اني من غيرك خلاص بقيت قادره اعيش
وانت عن بالي ثانيه واحده مبتغيبش
حتى دموعي على فراقنا مبتنشفش
وزاد على الامراض وجع قلبي اللي مبيبطلش
ازاي قادر تعيش وانت كاسر قلب لغيرك مبيدقّش ؟
ازاي بتعرف تكدب ومبتحسش؟
ازاي حد بيقدر يكدب في مشاعر ؟
كأنك بالظبط كنت بتزوّر كلام عشان تبقى شاعر
كنت بتنطق كلام فراقنا وكأنك فاكر 
إنه شيء سهل
ووالله صعوبة فراقك كأني خسرت السند والأهل
كأنب كنت في عز النهار وفجأه الدنيا قلبت كحل
والله ماهوش سهل
حد يدخل حياتك وتحبه وتعشق وجوده وتهتم بتفاصيله فـ هل .. هل فراقه هيبقى شيء مش صعب؟
ده انت هتحس ان روحك بتطلع منك وبتموت وكل ده باسم الحب

ده في ذكرى وياك في كل مكان
كل م اروح اي حته بلقى ملامحك في اي انسان
ايه مش فاكر زمان ؟
مش فاكر كلامك لما قولتلي "محدش زيي هيحبك ومش هيقرب منك انا ليكِ وانتِ ليا طول الزمان"
ده انا مكنتش بحس دونك بأمان 
راحت فين وعودك وراح فين كل الكلام؟
اشتقت لوجودك اللي كان بيهوّن عليا مرارة الايام
عامل ايه في بُعدي عادي بتعرف تنام ؟
الحياه مشيت معاك بعدي بعد م قولنا سلام؟
طب هي ليه وقفت عندي بعد بعدك ومانعاني اكمل؟
ليه بقيت بهرب من الناس والاماكن حتى اسمك ليه مبقتش قادره اتحمّل ؟
طب قولي ازاي نسيت يمكن اعرف اقلدك وانساك؟
وان حصل ونسيتك هعمل ايه في قلبي اللي معاك !!

قصيدة " اكدب عليَّا شويه " - ريم علاء || Qaseda “Ekdb 3lya Shewaya” - Reem Alaa

قصيدة "عنبر كام ؟" - ريم علاء || Qaseda “3nbar kam ?” - Reem Alaa

قصيدة "متستاهليش" - ريم علاء (الغزال)

قصيدة "بَعد بُعدِك"
ناس بتعيش حياتها وبتقضي أيامها ، وناس زيي على سرايرها بتموت بذكرياتها بينهش الحنين في روحها
وبيعيدوا اليوم اللي قبله النهارده تاني، اليوم العشوائي اللانهائي، في الحاله دي بقالي فتره بعاني، أنام النهار وأصحى الليل اللي في وجعه ليا مبيبقاش حقّاني،
ليل طويل يدخلني في نقاشات وحديث تنتهي بإني أجهل انا مين ، بقيت شبه اعمى مش عارف الطريق منين، مش عارف هلاقي ايه قدامي..
في هذا العالم الفاني كانت هي الشيء اللي باقي اللي موجود بس علشاني، 
في هذا العالم العشوائي كانت الشيء اللي ينفع يتقال عليه استثنائي،
وسط كل احتمالات حياتي كانت هي اللي بتديني اليقين اني طيب واستاهلها تكمل نصي التاني،
وفجأه.. فجأه لقيتها بتضيع من ايدي في ثواني،

دلوقتي وصفها يليق اني اقول كانت زي التناقض الممل
بتشبه مثلًا لما أحل، إجابه بالصدفه في امتحان مش سهل، واستغرب ازاي قلمي كتب كل هذا الحل،
متبقاش عارف هتكون صح ام ان دماغك خانتك بس هتلاقي حظك في النهايه فُل،
هتعدي الامتحانات وكل الصعب وتلاقيك مثلًا في النهايه فشلت في امتحان الدين لنسيانك قهوتك فَـ في اللجنة النوم عليك حَل ، ف معرفتك تحل ، كانت زي التناقض الممل ..
مين بقى بدأ في البُعد عن مين انا مبقتش عارف
مين فلت ايديه في الاول انا مبقتش شايف
كل الطرق بتوديني اني ابقى خايف
ده انا على صدق حبك ليا كنت حالف
بس بُعدك عني بقى كاشف
ان كل اللي ما بينا كان متكرر و زايف
وقعدتي بتحاولي تقتليني ب سكينه تلمة وعملت نفسي مبتألمش وعايش
انا برضه كنت طايش لما خليتك طوق نجاتي
بس انا من سنين كنت حايش نفسي اني اعيش حياتي
ولقيتك.. لقيتك ابتديت اصالح بيكِ العالم
لقيتني فجأه من الاكتئاب بتعالج
انا كنت ساذج

بس انتِ ريحتك لسه مُحتلّه هدومي
لسه بصوتك محاوطاني
لسه انتِ السبب في سرحاني
طب انتِ لسه فاكراني ؟
لسه فاكره عصبيتي وجناني ؟
لسه لما بتبصي للقمر بتفتكريني ؟
مجاش عليكِ لحظه واحده فيها افتقدتيني ؟
يا شيخه ده انا لسه بحكي عنك لكل ورقه بتقابلني
وفي كل صفحه ألقاني كاتب امتى هتقابليني ؟ 
وحشتيني

مبقتش أحب أقعد مع حد تبدأ معاه قعدتي بـ " فيك ايه يابني مالك ؟ يعني انت بقى عاجبك حالك؟"
انا وبكل اسف عميت عن حالي وكأني دخلت متاهه في ظلامٍ حالك!

توهت مني ولما لقيتك افتكرت انك هتلاقيني
توهتيني اكتر لكني فضلت اصبر وكان كل اللي بيرضيكِ بيرضيني
زمان شوفتك وسط اللمة والزحمة اللي حواليكِ كنتِ مجرد عابره ما الذي أبقاكِ فيني ؟
بس منكرش انك بـ طلّة واحده منك كنتِ بتخطفيني
ولسه لحد الآن لما اشوفك الاقي عيني بتثبت عليكِ، لسه قادره تسرقي نظراتي مني..
عاهدتك اني هعيشلك وكانت روحي فيكِ، ليه اختارتي انك تبيعيني ؟
بعد بُعدك بعدت روحي معاكِ، انا حالي عكس م انتِ بتشوفيني
كل لحظة حزن كانت بتعدي علينا، كنت ألقاكِ جنبي بتسنديني
فينك انتِ دلوقتي من حزني تطلعيني ؟
فينك انتِ من خوفي تطمنيني ؟
عدَّى على الفراق شهور وانا لسه بعيد في مشهد لما كنت ماسك فيكِ، وبتقتل وانا بشوف نهايته وانتِ بتسيبيني
عدّى على الفراق شهور ولسه بتجيلي في احلامي تزوريني، أظهر في الحلم ببكي ألقاكِ جايه بتحضنيني
طب ازاي على بُعدك عني بتواسيني، وانتِ في الواقع قصدتي تدبحيني!!
على فوزك في التحدي بحيِّيكِ، انا بعد بُعدك ملقتش حاجه تحييني
كنت قد قررت اني عمري تاني م هكتب ليكِ، بس يؤسفني اقول انك لسه بتوحشيني
اتجننت بيكِ خلاص وبقيت اشوفك في كل الناس
ليه يا عينيا بتخونيني ؟
لسه جرحي بينزف منك والغريب ان عيني بتفضح حنيني
كنتِ حلم وقولتلك مش هيكمل صدقيني
طبطبتي عليا وقولتيلي عشانك هتحدى العالم ثم طمنتيني ثم حضنتيني ثم في قلبي سكنتيني
ثم فجأه طلع كابوس فعلًا ولقيتك بتكسريني!
حاسس إني في فيلم والمخرج قاصد يئذيني
حابب يطلعك في النهايه بتجرحيني
تعرفي.. انا لو مكانه كنتِ هتلاقيني
بنهي آخر مشهد وانا في حضنك بقولك "وحشتيني"

قصيدة "بَعد بُعدِك" بالإلقاء الجديد - ريم علاء

قصيدة "انا لما حبيت" - ريم علاء

اشبعي بيهم
اولعي بيهم
اقعدي يومياً وسطيهم
ادخلوا كافيهات
املوا السينمات
احكوا ف حكايات
اتمشوا ساعات
واعملي لحظات
وافرحي بيهم
الناس اللي انتي ف احضانهم
انا من ليلتين لسة راميهم
وبيتكلموا عني زيادة
بالصوت والنبرة المعتادة
واضحكي وانتي بتوصفي شكلي وانا ببكي عشان ناس فارقوني
دخلي ف حياتك كل الناس اللي انا قربت وخذلوني
واشبعي ب انصاص ع التربيزة
القعدة مع التافهيين ميزة
لا هتحكي عن الاحلام بكرة
ولا تمشي ف سكة من التفكير
ولا هتدوري علي بيت وسرير وحياة وكيان وامال باقي
في بنات بالفطرة تسيب راجل
وتسلم نفسها ل بواقي
اهي جاتلك فرصة متتخانقيش
ايام ببلاش .. بتعديها
في ناس بتعيش وتموت زيك
تقعد وتقوم .. وتقضيها
وانا مش هشرحلك لو لعبة اتزهدت
يحصل ايه فيها
كتري مكياج
واقسمي نفسك بين الكافيهات
افتكري ان انتي كسرتيني ب لمة نفايات
بكرة مع الوقت هتكتشفي
ان انتي يادوب كنتي وسيلة
غنواية وقعدة وتوصيلة
برواز الوان لاجل الليلة
وكمان كام يوم يعملوا غيرك
ان كان ع السر اللي فضحتيه
كتر خيرك
انا والله مسامح خالص
زعقت معاكي وخونتيني
ف اعتبري ان حسابك خالص
ف انا مش زعلان
انا كنت
لكني خلاص مبقتش
يكفيني ف يوم حبيت واحدة
وطلبت وجودها لكن مرضتش
اديتها القمرة حليب صافي
ومشيت وايديها علي كتافي
عديت ع الجمر طريق حافي
ولقتني هصونها ف منبستطش
دلوقتي بقيتي بتاعة الكل
كدا زي الفل
مبسوطة وراضية ومرتاحة
وجميلة وشبعانة مساحة
افرحي بحياتك ك متاحة
وانا مش هحزن اني عرفتك
انا لسة بحالتي وكلي ايمان
ان انا استاهل بنت حلال
الفرق اللي مابينا لا يمكن يتصلح
ولا يمكن يتقال
روحتي علي عيال تعملي صاحبة
وانا املي ف صاحبة وام عيال
انا املي ف بيت وخناق وعيوب
املي ف خلافات بالوقت تدوب
وف واحداة تخاصم . ومتفجورش
كان الغطا سترة وضلة
ف الغطا بيكي ضل ميسترش
وانا اسف علي كل محاولة
ع الحرب الخلصانة ب جولة
كان نفسي تكوني انتي الدولة
انما غلطان
انا هرجع زي م لقيتيني
مكسور بتعالج من الايام
يمكن نتقابل . وهيحصل
ونشوف مين فينا مشي لقدام
هتعدي عليكي سنين تاني
تفضلي بتزيدي وبتعيدي
وهقابلك علي حطة ايدي
لعبة بلاستيك ف كافيه باليل
بتدور ع الناس وبيرموها
في ناس زيك بيهدوا حياة
وفي ناس عايزة حياة يبنوها

قصيدة "اشبعي بيهم" لـ عمرو حسن بإلقاء ريم علاء

كلمات قصيدة السر ايه :

قررت تكون اغنيه رفض القلم يكملها
حبّت تكون الألم في كل قصه بسردها
بعدتْ من سنين ولازلت بميل ليها
م روحي وروحها ساكنين سوا فيها
قولتيلي تستحق كل الخير، تركتيني ليه لكل الشر ؟
تشهد عليّا حياتي اني مستحقش كل هذا المر !
قلبي البِكْر محبش غيرك ، ف ليه تسيبيه ؟
طب فين السر ؟ السر ايه ؟ 
اما اكون طول حياتي حر تظهريلي انتِ ..
وفجأه تقيّديني 
وتسحليني في دنيا تانيه
دنيا حاسسها مش هتبقى فانيه
كان حلم وفوقت منه في ثانيه 
وسيبتيني ..
اذكريني لما مزاجك يتعكر
افتكريني لما كان وجودي بيخلي حزنك يتبخر
انا لسه بفكر في كل شيء بيخصك
لسه فاكر كل شيء فعلته من أجلك
مش بعايرك ..
انا فرحتي كانت في ضحكه تترسم على شفايفك
في لحظه م اكون شايفك قدامي وبتحققي حلمك
كان بودّي ودك ما ينقطع لكن 
قلبك كان له رأي تاني يمكن !
الله العالم ..
ويعلم قد ايه وجع انسحاب اللي بيدمن
مخدر من وريده .. وريده اللي انتِ سكنتيه
طب فين السر ؟ السر ايه ؟
حييتي ما تبقى منّي وفي لحظه رجعتي دفنتيه
ياللي حكمتي عليا بالإعدام هان عليكِ قلبي تقتليه ؟
هان حبي عليكِ ؟ 
هان كلامي وغزلي فيكِ ؟
طب انا ليه لازلت بحنّ ليكِ ؟
قلبي ليه مش قادر يستوعب انك بعدتي ؟
محيت كل صورك لاجل م يفكروني بيكِ 
وامشي امثل على الخلق اني نسيتك
بس تيجي الست وتقول ..
"فكروني ازاي هو انا نسيتك؟"
طب انا حبيتك!
هوقّف حبي ازاي ؟
هحب ازاي غيرك ؟
م انا اديتك كل شيء كنت بمتلكه!
لكنك اختارتي برضه .. تهجريني :)
سيبتيني ليه وانا مش شاري غيرك؟
كسرتي خاطري ليه وانا تعبت اطيّب في خاطرك ؟
كل ده عشان ايه ؟ عشانه ؟ طب وانا ؟
دخلتيني ليه من الاول حياتك؟
حلمتي ليه معايا وانتِ هتحققي مع حد تاني؟
اديتيني ليه امل في بكره وبكره جه عشان يكون ذكرى لوداعك؟
مش هاين عليا ذكرياتنا تروح على الفاضي
مش سهل عليا حبنا يتحول لشيء عادي
كل يوم بتفوتي قصادي 
بحس ان حبي ليكِ بيزيد!
قبل م تحكمي على موت قلبي حكمتي ليه بالتأبيد ؟
ازاي قدرتي تخلي قلبي معاكِ يلين مع انه عايش حياته كلها حديد ؟
ازاي قدرتي رغم مراره الايام العاديه تبقي بالنسبه لي عيد ؟
وازاي في يوم ييجي حد حب ويقول انا نسيت ؟
اللي بيحب مبينساش مهما كان عن حبيبه بعيد
وانا مش حزين بالعكس 
كان حبك شرف ليا انه يسكن الوريد .. بس
بس انا عارف 
انك كل م هتقابلي حد جديد هتلاقي شيء ناقص
كل م هتحبي هتلاقي وجودي طاغي في كل ثانيه 
والله انا حاسس
ان مهما بعدتي هترجعي وهتبقي في الاخر ليّا
لمعه عيونك مكانتش كدب وانتِ بتشاوري عليَّا
وتقوليلي اني اكتر حد انتِ في حياتك حبيتيه
طب فين السر ؟ السر ايه ؟

قصيدة : 
             "السر ايه؟"
                                تمت

قصيدة " السر ايه ؟ " - ريم علاء | Qaseda “el ser ehh?” - Reem Alaa

‎آسف - ريم علاء | Sorry - Reem Alaa⁩

انا عارف اني لما هموت
هشوف منكوا حب كان نفسي اشوفه وانا عايش
مورتونيش ليه الحب ده وسيبتوا قلبي بايش؟
تعب عياط ووجع
وثق في الجميع ومن الجميع اتلدع
مكانش طالب يعني غير حبه تقدير
حتى ده استخسرتوه فيه وشوفتوه كتير ؟
انا تعبت من فرط التفكير
أصبح داء اتملّك عقلي
مبقاش سايبني غير وانا معيط كل ليله في السرير
وكل ليله اقول انا هتغير وابقى شخص غير
هدوس على قلبي ومش هسيبه يميل
لكني برجع تاني لنقطه الصفر م انا اصلي طيب
معرفتش في يوم ابقى شرير
هفضل انا زي م انا
هفضل اعاملكم بالحُسنى
اصل ابويا لما ربانا معرفناش يعني ايه قسوه
معرفنيش اني هقابل ناس وحشه
مش كاسرني غير اني
لسه بحنلكوا وبحس بالوحشه ليكوا
وبعدين فيكوا ؟
وبعدين فيكوا ؟
مطلعتش من الدنيا دي بصاحب ليا ولا حتى حبيب
حتى اللي عاشقها بقالي سنين
كانت عماله تلاعبني سيب وانا اسيب
يوم جنازتي عرفوها اني حزين ان الموت فرقنا
وخلاني عنها اغيب
مع انها يعني كانت مفارقه بقالها كتير
بس انا لا عمري هشتكي ولا عمري فيها هعيب
يوم جنازتي بس المهم .. متدمعوش
انا يعني كنت بينكوا بس انتوا مشوفتوش !
محسّيتوش ليه بيا غير وقت خبر موتي ؟
ده انتوا شهدتوا على كل زعلي وكلامي اللي كان مالي سكوتي
انا لا هعاتب ولا بعاتب
انا بس طالب تحسوا باللي عايزين ايد ليهم تتمد
لو الطريق قدام صاحبك في يوم اتسد
نورله طريق تاني
متسيبوش حد يعاني
وحبوا الخير لغيركوا يعني ده كلها يومين والعالم كله فانِ
واوعوا تتركوا حد يموت زي م سيبتوني مُت بأحزاني
هتقولوا اهو ارتاح اه
بس عندكوا حق انا فعلًا كنت بآسي
العمر معايا كله كان قاسي
سنه الحياه ان الحزن مش بيدوم
بس كل مره ييجي عليا الدور ملاقيش غير المر في كاسي
القدر كان ناسي يكتبلي شويه فرحه وابتسامات
انا آسف اني كئيب وكلماتي للحزن سارحه
شبه حُزن الكمانجات 
انا طول عمري بكره النهايات
بس نهايه كلامي 
وصيتي ليكوا
متنسونيش في الدعوات
:)🖤

أنا لما هموت - قصيدة حزينة مع الكلمات | ريم علاء (الغزال)

ولي مع القلم حكايه ترويها قصائدي .

El Ghazal الغزال

Popular tracks