Үг : Ш.Оюунгэрэл				
Ая : Монгол Улсын Төрийн Хошой Шагналт, 
Ардын жүжигчин Н.Жанцанноров

Дуучин : Монгол Улсын Гавьяат жүжигчин Г.Ариунбаатар

Дууны шүлэг : 

Он жилүүд урсан урссаар

Дэлгэр орчлонгийн налгар нөмөрт
Дандаа чамтайгаа жаргаж явахсан
Дассан сэтгэлийн ариухан нууранд
Дураар цэнгэсэн он жилүүд минь
Урьхан хорвоогийн бүлээн цээжинд
Уяран хургасан залуу нас минь
Урсан улирахын цагаахан салхинд
Ухаарч хэрсүүжсэн он жилүүд минь
Өөрийн жамаар урсан урссаар
Алсран алсарсаар
Хайрын нуурандаа хөвөн хөвсөөр
Он жилүүд урсан урссаар

Ижий орчлонгийн шаргал энгэрт
Эвийн сэтгэлийг шүтэж явахсан
Ээлтэй амрагийн гэгээхэн ивээлд
Эрхэлж налайсан он жилүүд минь
Замлин хорвоогийн тэргэл хойморт
Цахилж өндийсөн залуу нас минь
Заяа тавилангийн саруулхан ерөөлд
Залбирч сүсэглэсэн он жилүүд минь
Өөрийн жамаар урсан урссаар
Алсран алсарсаар
Хайрын нуурандаа хөвөн хөвсөөр
Он жилүүд урсан урссаар

					


Он Жилүүд Урсан Урссаар

Үг: Ш. Оюунгэрэл                                                                                               Ая: М.Хатанбаатар			
Дуучин: Ч.Батцэнгэл

	Жаахан шаргын нутагт


Жаахан шаргын нутагт нь
Сэтгэл хоногшиж өөриймслөө дөө
Заяаны амраг чи минь
Зүрхэнд ижилсэж ханиллаа даа 

Дахилт:

Тоорой бандийн нутагт нь
Түмэн адуу үүрсээд байна  даа
Тавилан түшсэн чамтайгаа
Төөрөө нь үгүй дээ заяа минь дээ

Алтан Дарь- Эхийн овоо нь хө
Алсын бэрдээ ээлтэй шүү дээ
Алдартай шаргал уулс нь
Ачлал ивээлээ хайрладаг даа

Дахилт:

Хурдан хүлгийн өлгийд нь
Хүнийрхээ нь үгүй  сэтгэл минь дээ
Хун чуулдаг нууранд нь
Хөглөгдсөн дөө ариухан бодол минь дээ

Дахилт:


Жаахан Шаргын Нутагт

Үг: Ш. Оюунгэрэл 
Ая: УГЗ.Д.Баттөмөр 
Дуучин: Дариймаа Э. Бумхүү

 Дурсанхан дуулдагт итгээрэй

Цэнхэр Дунайн толиондоо
Сувдран цалгилах Будапешт
Тунгалаг Балотон нуурандаа
Тольдон гэрэлтэх Мажаар орон
Дуулиант оюутны амьдралаа
Дурсах бүрийдээ жавхааждаг	
Залуу нас минь тэндээс эхэлдэг
Замбуу тивийн Мажаар нутгийг
Дурсанхан дуулдагт итгээрэй

Арван зууныг өртөөлсөн
Мянган жилийн шастиртай
Угсаа нэгтэй үндэстэн
Үерхэлд үнэнч мажаар андууд
Үеийн олон залуусыг
Санах бүрийдээ догдолсон
Залуу нас минь тэндээс мишээдэг
Зартай дарсны өлгий нутгийг
Дурсанхан дуулдагт итгээрэй

Эртний түүхтэй сургуулиа
Эрдэмд хөтөлсөн багш нараа
Эвсэг дотно ангийнхан
Элтэл нь гүйлдсэн цэлгэр гудамжаа
Инээд хөөртэй жилүүдээ
Эргэн дурсаж хайрладаг
Залуу нас минь тэндээс ивээдэг
Замбуу тивийн Мажаар орныг
Дурсанхан дуулдагт итгээрэй

Дурсанхан Дуулдагт Итгээрэй

Шүлэг: Ш.Оюунгэрэл
Хөгжим: Төрийн Хошой Шагналт, Ардын Жүжигчин Н.Жанцанноров
Дуучин: Адьяасүрэн

Нулимс бүхэн ижилгүй
	
Захгүй цэнхэр далай
Нууцхан гунигт автвал 
Зангирч нэрсэн нулимсаа
Дунгийн хясаанд нуудгийн
Даамай учрыг ухаараарай даа
	Үр минь дээ
Гэгээн заяат бүсгүй
Гомдлын мананд автвал
Гэнэхэн сэмрэх нулимсаа
Зүрхний гүндээ чандалдгийн
Цаадах учрыг ухаараарай даа
	Үр минь дээ
Хөлгүй усан мэлмэрч 
Сувдан эрднээр бөмбөрнө
Хурсан нулимс нялхраад
Нөмгөн бодол хөвөрнө
Уйтай бүхэн ижилгүй дээ
	Үр минь дээ
Сувданд нэвчсэн нулимс
Сэтгэл дэврээх идтэй
Зүрхэнд дуссан нулимс
Итгэл үргээх адтай
Нулимс бүхэн ижилгүй дээ
	Үр минь дээ

Rentsen Bud

Popular tracks