شعر : إسراء مقيدم
القاء: ريهام حلمي

و دي تاني تجربة ليا :) 
---------
وهتعمل ايه يابو قلب مصبوغ بالجَدَب 
مع بنت تكوينها بيشبه للشتا؟ 
متلوّنة بريحة يناير 
روحها عاشقة الكلفتة 
واكمنها..مروّية فى القلب بتعب 
كان فيها منه حجات كتير 
يمكن دفاها..أو جفاها 
أو شرودها عن دواها 
أو هواها للسهر 
وبرغم سقعة جوّها 
تلقاها تقدر لو تعوز..تصبح غطا 
البنت سكة للسفر 
وانت المسافر فيها مهما كان قلبك عجوز 
..لساك فتى 
كات جدتى بتحكى زمان 
ان البنات.. 
تأويلها جوة الحلم دنيا 
والحلم كان واجب نفاذه فـ خطوتين 
"كام رقصة صولو من الوجع 
على رتم أوتار الكمان" 
وكأنه ديْن 
وان الميزان..علشان يوازن كفتين 
فـ البنت يلزمها تعيش كام ألف ضحكة 
عشان يعادلوا حزنها 
والحزن لو كان تُقل وزنه يسوى مَبْكى 
بضحكة واحدة منّها. 
يامفرّقين حبة دفا ع البردانين 
قلب الشتا زى الرصيف 
او زى شارع كان مداه ضلمة 
ومخبّى وسط العتمة نور 
والبنت برضه قلبها شتوى 
عكس الخريف 
يسكنها حبة ضىّ رغم الليل 
..كل البنات 
تقرب لروح البرد فى البوح والسكات 
زى الحكاوى الدبلانين 
حدوتة كات متشتتّة 
مكتوبة لكن ما اتحكتش 
مش ميتّة..لكنها 
تفاصيلها لسة ماتعاشتش 
وعشان كدة 
كل الصبايا فطبعهم.. 
بيكونوا أجمل فى الشتا 
كل الصبايا فطبعهم 
بيكونوا أجمل.. 
فى الشتا

البنت سكة للسفر

كل أسبوع طقاطيق جديدة وعودة لزمن الفن الجميل 
النهاردة مع صلاح جاهين
1- النهد زي الفهد نط اندلع 
2-كرباج سعاده وقلبي منه انجلد
3-أعرف عيون هي الجمال والحسن
4- إيش تطلبي يا نفس فوق كل ده 
5-إنشد يا قلبي غنوتك للجمال
6- يأسك و صبرك بين إيديك و انت حر

عشان تقرأ القصايد النثرية المميزة ممكن تدخل على المصدر 
http://www.adab.com/folk/modules.php?name=Sh3er&doWhat=lsq&shid=470&r=c_des&start=20

طقاطيق صلاح جاهين، وعجبي <3

دي أول حاجة اسجلها ... al audio-Blog  
معرفش إذا كانت الفكرة دي اتعملت قبل كده ولا لأ 
بس أهو الأوديو بلوج دي هسجل فيها أفكاري اللي بكتبها .. الخواطر بس مش القصص :P

أو أي حاجة أنا ليَّ فيها وجهة نظر وعايزة اشاركها مع أهلي وحبايبي والمجتمع والناس 

رأيكم أكيد هايهمنني ... 
ملحوظة .. بقبل النقد البناء 
هتقول حاجة مش بناءة ...خليها لنفسك لاحسن اخليهم يبنوا عليك .. اديني حذرت أهو :P

مساكم هنا 

Riham Helmy