ياسمين

كلمات و آداء صوتي : رباب محمد

www.facebook.com/roroo.lodaa


عارف يعني إيه بحبك ؟ <3

يعني أضحي بـعمري كُله .. لاجل ثانية أعيشها جنبك

يعني تيجي وقت ضعفي .. و أبقى أقوى بـ لمسة منك

يعني أدوب من كُل كلمة .. حلوة تطلع من شفايفك

يعني لما فـ مَرة تزعَل .. بسرعة أجري عليك أصالحك

يعني بيضيع كُل خوفي .. لما ببقى جوه حضنك

يعني كُل حاجة حلوة .. تبقى جاية بس منك

يعني برجع تاني طفلة .. معاك و أحس كإني بنتك

يعني أنا بحس بأمان .. لأني ساكنة جوه قلبك

يعني قلبي يكون أناني .. و مش عايز غيرُه يحسك

يعني لما تغيب ثواني .. قلبي مايبقاش قد بُعدك

يعني بيك أنا قلبي ينبض .. و أتمنى أعيش عمرين بـ قُربك

يعني لو دمعي فـ عيني .. أول ما أشوفك بس أضحك

يعني لو فـكرت أخاصمك .. و سمعت صوتك بس أسامحك

يعني كل الكون ده كله .. أنا قلبي جواه بس ملكك

يعني من جديد اتولَدت .. من يوم ما قلبي حس حُبك

يعني قلبي مكانش عايش .. و اتوَلد لحظة ما عِرفك

يعني بيك عُمري ابتدى .. و ماعِشتش اللي فات قبلك

يعني بيروح كل قلقي .. لما تأسرني بأمانك

و فـ لحظة بس أنا بتخِطف .. بـ نظرة واحدة من عيونك

و إحساسي كل أما أشوفك .. هو نفسُه .. زي أول مرة شوفتك

يدق قلبي كتير أوي .. و أحس إني نفسي أضُمك 

و لما أسيبك بس و أمشي .. بزعل أوي .. و أستنى تاني ميعاد أقابلك

أقولك يعني ايه بحبك ؟ <3

يعني مهما فضلت أقول 
مستحيل حروفي تقدر .. توصف إزاي قلبي عاشقك

يعني هفضل بس عايشة .. بيك و ليك و جوه منك <3

عارف يعني إيه بحبك ؟ - رباب محمد

كلمات : محمد سامي زيدان
www.facebook.com/mohammed.samy.zidan

آداء صوتي : رباب محمد
www.facebook.com/roroo.lodaa


أخيراً ...
زيطه .. مَزيكا , و زغروته , و شموع بَمبى !
تهانى بزيجه مَبروكه ,
خلاص جَنبك .. خلاص جَنبى !
جَميل ..
جداً ,
مَفيش أجمَل ..
و لا انقى .. من الحاجة ,
الـ تتبارك بدين رَبى ..,
عَظيم صوتُه , و مَنديلُه ,
و يُطلب ايدى اديلُه ,
و تهبَط فوق مطار ايدَك ,
عَظيم نَقلُه لكُرات دَمى ,
لـ تسكُن جوة فـ وريدَك ...
و شربات ماما ,
و الدَمعة فـ عين والدى من الفَرحة ,
مَفيش باقى ,
غير البَدله و بيبيونتَك , مع الطَرحه ..
و زغروته و باب يقفِل ..
و ضوء شَمعه ...
و نتلاقى امام الله فـ سَجده
و دَعوة فـ الركعه ..
يهنينا ,
هاكون مكسوفة ., مُش هانكر ..
و مين فينا ,
هاينكر انُه لم يخجَل ..
و مين فينا
ماعش العُمر بيخطط ..
ليوم .. فَرحُه ,
يشوف طَرحُه ,
أمام عينُه ,
و ينسى الجُهد و ان انُه
طِلع عينُه .. عشان يفرَح ,
انا خَجلانه مش هانكِر ..
لكِن ... هـَ افرَح ..
بحبَك .. يا الـ من أجلى ..
شقيت ياما ,
بَحبك حُب مش عادى ..
رَفيع رافع لفوق هامة ..
و انبَل مـ النخيل .. كِبراً ,
و اعذب مـ القصيد .. روَحاً..
بَحبَك .. ثُم مش عارفه ..
من الفَرحه , أقول و انطَق ..
و ايه يكَفى فـ وَصف الحُب
غير انُه حلال جداً ...
أمام رَبى .. هانتمَعشق !
انا ملكَك . فاحضُنى ...
و لملمنى .. و احوينى ..
و اعذُرنى اذا خَدك ,
يلامس دَمعه من عينى ..
انا طايره من الفَرحه .. ماهُش اكتَر !

عشان نفرَح ..
سهرت كتير .. و كنت اسهَر ..
و ادعيلَك ..
و ادعيلى يزيد حُبَك
.. و اعود من تانى ادعيلَك !
و اتمنى اذا تبكى ..
اكون صَبرَك و مَنديلَك !
و ادمّع كُل وَقت صلاه ..
و اقول امتى ..
هاترجَعلى .. و ارجَعلَك ..
تصدقنى ..
اذا تعرف .. بأنَك كُنت ويايا ..
بتتكَلِم .. و بَسمَعلَك !
فـ طول وَقت الغياب ..
لما ..
ما كُنتش جَنبى و مسافر ..
ما كُنتش عايشه تَقريباً ..
ما كات روحى هناك ساكنه
فـ جنان روحَك ..
و كان عَقلى هناك بَردُه ..
مع طموحَك ..
يادوب عايشه ..
عشان عايشه , النهار كُله ..
و سرحانه فـ أوصافَك ..
و ليل يجى تزيد حيرتى ..
و اتسائل .. ده مين شافَك !؟
و مين سَلِم و اتكَلِم .. !؟
و مين زارك فـ حِلمَك ..
لو فـ ليل تحلَم ! !؟
و مين تانى و ايه تانى ..
و هَل يعنى .. !؟
و كيف حالَك ..
و مين جالك ..
و ألف سؤال ..
يهاجمنى ضلام ليلى ..
و آدى الحال ...
فـ بُعدك عَنى
يا الـ عايش فـ أحلامى !
رقيق حُبَك لكن حامى !
و بُعدك عَنى كان ليا ..
لكِن قاتِل ..
بتتغَرب و تتعذب ..
عشان حُبى ..
ماهُش كافى يا روح قَلبى ,
اقدملَك يادوب قَلبى ..
ماهُش كافى ..
هاعيش عُمرى ,
عشان عُمرك
يكون دافى ..هـنتهَنى ..
هادوق نارى ..
عشان انتَ تدوق جَنه ..
هاعيش وافيه ...
نعيمَك فَرض جوايا ..
نيرانك تبقى لى سُنه ..
بحبَك .. ثُم آه عاشقه ..
بحبَك ثُم مَجنونه ..
بحبَك حُب عَذبنى ..
بيتواعِر و فـ ليونه !!
انا جَنبَك ..
مانيش جَنبَك ..
معاك .. ويايا ..
أو لأ ..
اذا تسأل
هناك دَقه .. هتلقاها ..
بتتغنى بحروف اسمَك ..
بحبَك .. دَمعه من عينى ..
تعبت .. يارب !

أخيراً - محمد سامي زيدان - رباب محمد

شتا 2022

law yesalo | قصيدة : لو يسألوا

كلمات : الشاعر معتز الميرغنى
اداء : عبير وارث & معتز الميرغنى
------------------------------------
هى
-----
سيبت ليه الحى فيا .. يوجع النص اللى مات
ليه كتبت علينا بكره .. نبقى سطر ف ذكريات
اللى طمّن قلبى سابـُه .. قاله انسى .. قاله خاف
ياللى كاتب فيا اسمك .. جوه قلبى بخط جاف
قلبى شاف الشوف بعينك .. انت فينك ؛ فين انا !!
ده انت حاله بتيجى مره .. كل كام مليون سنه
انسى عادى !! 
يعنى نبقى م الليلادى مش سوا !!؟
طب موافقه ....
بس مين فالدنيا يقدر .. ينسى يتنفس هوا !!؟
ده الدوا .. لو فيه شفا .. يبقى بس عشان ايديك بتمدهولى
خدت ليه من ليلى حضنك .. اللى كنت بتدهولى
عمرى قبلك كان ف كفه .. و انت وحدك كنت كفه
ضمنى فى الحلم قرّب .. يجوز احساسى يتدفى
--------------------
هو
-----
ان جيتى للجد 
انا اول واحد حَب بجد
انا اول واحد شال صورتك
تحت مخده عشان يحلم بيكى
انا اول واحد غمض عينه
علشان مايشوفش الا عينيكى
ان جيتى للجد
انا اول واحد خباكى فحضنه ونام
كان اول واحد بيقابلك وسط الاحلام
ان جيتى للجد
انا اول واحد صام عمره
واستنى كتير اوى يوم عيدك
انا اكتر حد من الدنيا
كان دمه بيوصل لوريدك
ان جيتى للجد
انا اول واحد حَب بجد
وانا اول واحد ساب ايدك
--------------------
هى
-----
ليه كنت اقوى عليا منى
مع انى سيبت الروح معاك
وانت مشيت بعد اما جيت
وانا قلبى ياما كتير ناداك
فهمتنى بيك ان بكره
سهل انى اعيش ....
وماينتهيش .....
يظهر مفيش ..
فايده فهواك
نفسى اسمعلك مبرر
تقنعنى بيه ان انت احسن
انت عايش ازاى كده
وانا كل لحظه تعدى بحزن
ودموعى تلحق بعضها
والقلب واقف مطرحه
ولا نبضه قادر يعترف
ولا ذكريات بـ تريحه
الوحده بس بتدبحه
والبعد .. جوووع
كلام الليل مدهون دموع
ومافيش له شمس بتمسحه
--------------------
هو
-----
صدقينى مش قساوة قلب منى
غصب عنى انى اسيبك للدموع
واكتم الشوق اللى فيا و اخرسه
ولا سهل انى احبسه بين الضلوع
صدقينى .. لسه بحلم بردو بيكى
وردتك لسه ف كتابى بشمها
ما يادوب بقى حبة مشاعر
بقدر انى ألمها
لما تصيبنى الوحده بيكى
و احضن عروستك أضمها
وانسى معاها الكام نفس
دافى بيخرج شحتفه
وانسى الشتا وانسى المطر
واحس جنبك بالدفا
واشتاق زياده اوام والين
لكنى وحدى بستكين
زى الجمل ما تشوفه عين 
او تلمحه لحظة صفا
صدقينى دى الطريقه
انا مش بحاول أعذبك
وانتى مش كدبه ف حقيقه
بعرف انى اكدبك
لسه ماج الشاى بيسال عن ايديكى
لمستك .. نفختك .. حتى شفايفك
وحشاااااااااه اوى 
حتى روجك لما كان مطبوع عليه
ياااااه .. حتى الجماد صعبان عليه طول البعاد
حسوا الفراق ؛ وبيسالونى و اقول مفيش
فـ استغربوا !! ازاى انا ظاهر كده
بالشكل ده قادر اعيش
--------------------
هى
-----
سالوا عليا لوحدهم ؟؟
معقول بجد وحشتهم ؟؟
والماج رافض يتكسر!!
انا عارفه انى جرحتهم
وجرحت قلبك قبلهم
وادينى جايه بعتذر
ماتهدنيش ارجوك حرام
طب قولى اكفر ذنبى فين
وحياة هواك قربنى ليك
وبلاش نتوه وسط السنين
وبلاش حياتنا تفترق
واعيشها وانت مش معايا
دانا كل ليله بتحرق
وبشوف خيالك فالمرايه
وحياه عينيك سامح بقى
انا عارفه انى وحشتهم
عارفه اشتياقك زاد اوى
نفسى فعينيك احلفلهم
شهدهم انت .. قولهم
انى بموت .. وانى بضيع
والله دموعى بتشتريك
ازاى كده قادر تبيع
--------------------
هو
-----
الحكايه فكبرياء !!!
قصدى الحكايه فكلمتين
مش معنى انى فاشتياق
هتبان دموعى فكل عين
واستنى عطف او اسرقه
من اى حد و ابوس ايديه
ولا صنف راجل اصدقه
لو كان يبان الشوق عليه
احنا كده جلمود حجر
مش م السهوله تكسريه
او تلمحيه ف تقربى وتجربى
تكتبى اسمك عليه
و يا بختها .. تتهنى بيه
اللى هتقدر تنحته تمثال دهب
وبنار غيريتها تلهلبه
يعشقلها طعم اللهب
صدقينى باختصار
كان بايدك لاختيار
بين قرب جنه وبعد نار
يمكن عنادك كان سبب

"يَعشَـقُها ؛ ولكن .... "لمعتز الميرغنى

كلمات : محمد سامي زيدان
www.facebook.com/mohammed.samy.zidan

آداء صوتي : رباب محمد
www.facebook.com/roroo.lodaa

و اقابلَك و اسرَح و اشهَق و ادوب ,
و اترُك عشانَك مئات القلوب ..
و اشوفَك قُصادى !
فـَ يجزم فؤادى ,
بأنِك بلادى ,
و انَك سعادتى ,
و انَك حدادى !
و انَك أميرى ,
و انَك مليكى !
و انك بدايتى و انك نهايتى
و انَك هدايتى و انَك ذنوب !
و اقابلَك و اسرَح و اشهَق و ادوب !
و قَلبى يخوضلَك آلاف الحروب ..
و يسفِك دمايا ,
بنبَضُه الـ فاير ,
و يغسل عيونى ,
بـ دَمعى الـ حاير ..
و يوعدنى انك هاتشرُق فـ دَمى ,
فـَ استنى تشرُق .. يحين الغروب !
و اقابلَك و اسرَح و اشهَق و ادوب ,
أنا يا حَبيبى يادوب بَستهَجى ..
بقالى حوالى يادوبَك شهور ,
ده من يوم ما شُفتَك ,
و هيمت فـ ملامحَك ,
و قررت انى أكونلَك سرور !
و ألمَح خيالَك ,
و اركِز و اشاغلَك ,
و انتَ فـ خيالَك ,
مركِز فـ شُغلَك ,
كتيرة عليا أدوق نَظرة منَك !؟
هل انتَ بتخجَل أم انُه غرور ! ؟
انا كُل حِلمى ,
اعوم جوة دمَك ,
كما انتَ عايم كَــ مركب فـ دَمى
.. مانيش عايزة ابداً 
تيجان أو مهور ..
و ليه تبنى بينا حواجز و سور !
اذا كُنت عاشق ..
كما حَجم عشقى ,
و صادق فـ حُبَك ,
كما رُبع صدقى ..
ما تُفصِح بحُبك و اصرُخ و قول ,
انا عارفة انَك ,
مركِز فـ هيبتَك ,
أو انَك بتُحرَج و انَك خَجول !
لكن نفسى اِنَك ,
تكون مَره ناعم
تكون مَرة هايم
و ما تكونش ابداً معايا مَلول !
فـ رأيي ,
اذا يعنى تسمَع كلامى ..
و تنسى شويه طباعَك يا حامى !
اذا عوزت تُملُك
مشاعر و حُبك يسير فى سلام ,
بسيطة و سهلة ..
يادوب اهتمام ..
ابُص فـ عيونَك , تبُص فـ عيونى ,
اقُولَك هاكُونلَك ,
فـَ تفرَح تقولّى , خلاص انتى كُونى !
اقُلَك بحبَك . تقولّى بَحبِك !
و تسمَح لـ قَلبى يعيش جوة قلبَك !
و تُعجَب بـ ذوقى ,
و تمدَح فـ لونى !
تشوفنى , تبدد مشاغلَك عشانى ..,
و تصبَح فـ حُبى , انانى و انانى ..
لا تسمَح لغيرك , يبُص فـ ملامحى ..
و لا حَد غيرك يشاركنى فَرحى !
و اذا قَلبى يصرُخ فـ يوم
مـ الوجيعه ..,
مفيش حَد غيرك يطببلى جَرحى !
و اذا مَرة تتعَب من الدُنيا
تهرب ..
فـ يبقى عشانى ., و اليا الهروب !
و اقابلَك و اسرَح و اشهَق و ادوب ,
و اترُك عشانَك مئات القلوب ..
و لسة فـ ليلى ..
بتمنى انَك ..
تجينى تقولّى . بَحبِك . بَحبِك ..
و اذا كُنت ناوى تأخَر عليا ..
آدينى بَعاتبَك و هـَ ارجَع اعاتبَك ..
و طبعاً فـ كُل المواضع بحبَك ..
و هافضَل , اسيره فـ عُمرى بحُبَك ..
عجيب و الله قلبَك ,
برغم انُه واسع .. شبيه للدروب !
و اقابلَك و اسرَح و اشهَق و ادوب ,
و اترُك عشانَك مئات القلوب ..

و أقابلك - محمد سامي زيدان - رباب محمد

كلمات : محمد عبدالله حموده
آداء صوتي : رباب محمد

Mohamed's profile: www.facebook.com/mhmd.abdlla7
Rabab's Page : www.facebook.com/sense.of.girl

( المفتتح )
سايق عليكى الهوى ..
ماتزوديش الهم ..
سايق عليكى الصبر ..
شيلى المرار م الدم ..
حنى بقى وقربى ..
دا أنا روحى متبعتره ..
يا أم العيون بهدلة ..
بكفاية بعد وغم ..

( القصيدة )
ماتدمعيش ..
هذا فراق بينى وبينك للأبد ..
كل الحكاوى ان احنا راح ممكن نكون ..
صبحت سراب ..
ما أنا حبى كان لك سنبلة ..
زرعتها ايدك فى الخراب ..
يا أنتى يا شوك الورود ..
حضنك صنعنى للصدود ..
سطرين وغناهم غراب ..
بهديكى أنا أخر قصيدة لحبنا ..
لكن رثاء ..
ملضومة روحك جوا منى بمعجزة ..
وأنا قلبى بعدك حضنه متلصم عزا ..
ودموعى من بعد الرحيل صبحت صوان ..
أرجوكى يا ست البنات
.. ماتدمعيش ..

دا أنا بعد منك مامعاييش ..

غير بس ضحكة ف ذكريات ..
على كام رسالة بتحضنينى وسطهم ..
مع ضحكة بتبكى النايات ..
فاكرة أما كنتى بتحلفى هفضل معاك ؟
فاكره انشغالى كل يوم ؟
لأجل ان أصيغك فى القصايد بنت حور ؟
طب فين وعودك ياهى ؟
مش قلتى برده أنا عمرى ما أخد م الفراق ولا أى دور ؟
وأديكى خدتينى لبعاد مالهوش رجوع ..
أقسم بانك كنتى أروع ملهمة ..
وانك مجاز ..
ولو اتكتبتى ف 100 ديوان ماتكفيهوش ..
بس النصيب صاغك كده ..
أغنية علشان الفراق ..
طب فاكرة أيام الخناق ؟
ولا أما أنام ..
وأسيب دموعك ع المخده فى اشتياق ؟
ولا أما أغيظك كل ليلة بصوت منير ..
" ليه غاوية دايما تبعدينى عن حياتك بالملل ؟ "
فعلا بعدنا والرجوع مافيهوش أمل ..
وختام أخير قبل السلام ..
مبقاش يفيد انك تجاورينى المنام ..
ولا عاد يفيد انى أعشقك رغم الحنين ..
فان كان اكيد ..
أنا نفسى بس تزورى قبرى بوردتين ..
واقرى لى عدية يس .!!

ما تدمّعيش - محمد عبدالله حموده - رباب محمد

زى كــل مــره بكتبـلك 
اقـول كل اللى فـ قلبى ليـك 
وكـالعـاده غيرك يتأثر 
وياريتك بتتغــير ,, والا حتى بحس بيك 

فــ لازمـ لمـا تقـوللى مالك 
اقـولك عـادى مافيش

يمكن وقتهـا بضحـك قدامـك  
بس ضحـكـه كدابه وطـالعه مغشوشه 

وتمـلى عـلى طـول مابتفهمنيش

فـ طبيعـى معـاك اكون معـذوره 
اصـلك ولا مـره حسستنى بحبك 

عـادى اخدت ع كـده خلاص
وبسببك نفسـى مالقتنيش 

بس لازمـ فـ وسط النـاس
اكــون عـايشه 
لكن للاسف من جوايـا بسببك 
بقيت مقتــوله

◆◆◆

أداء صوتى ♪♪ ساره أحمد

ضحكه كدابه

اداء صوتى . محمد عزمى (عز بيك ) الكلمات
وحتى لو حبنا كان وهم
هتابع كل اخبارك
واحبك من طرف موجوع
مصمم انه يختارك
واجيب دبله  .  واعينها فى ظرف
واقول عادى مسيرها تحن
.
مريض الحب لو يوم خف  .   هيرجع للأسف لاجن
وهبعت صوره للذكرى
رسمتك فيها بأديا
اصالح قلبى ع الفرحه . برغم ان انتى مش جايه
واكلم نفسى عن صوتك . واقله انى بحبك موت
لا انا طايل اعيش فى القرب ولا فى بعدك بكون مبسوط
بتجرى فى دمى وعروقى
وليكى فى كل شئ ذكرى
.
مصبر روحى بالصدفه . معلق حلمى على بكره
كان نفسى تكون هيا الاخر . كان نفسى ماشوفش بنات غيرها
كداب من قال غيرها فى غيرها
لو كانت فضلت ممشتشى . لو كانت فاكره و منستشى
عمرى ما كنت اوصل للى انا فيه
.
ازاى انا اصلا كدا دلوقتى ؟
بايت فى الضلمه الكرهانى . سارح فى الوقت
 الليل بيطول علشانى ولامتى هتفضل وحشانى
وبرغم البعد اللى ما بينا . مبقولش زهقت
النور مبقاش شايف حاجه . النور من غيرك ضلمه موت
وازاى انا اعيش من غيرما اشوفك ؟؟
انا احسنلى اموت ..... لـ
محمد هشام رجب

حب صنعه الوهم

منك لله
كلمات: يحيي مرتضي
غناء: تقي
مهندس صوت: أحمد صالح

شيرين عبد الوهاب ... كتر خيري

a teama studio product

Mennak Lellah

انتي منى

"اقولك علي سر 1 " رفقا بيا..

هيجيلك يوم.

اول اغنية تتسجل فويس نوت - مكانك - رانيا عجمي

الفيديو :https://www.facebook.com/vatrenaplay/videos/2057781730948480/?t=2

اول اغنية تتسجل فويس نوت - مكانك - رانيا عجمي

Amr Gamal - Raper
Mohamed Harpy - Singer
Ahmed Omar - Oud & Melodika
Amr Gamal - Mix&Master

العمر بيعدي

بيقولوا عني شاعرة بس على قدي كده :)

و أقابلك - محمد سامي زيدان - رباب محمد

Rabab Mohamed

Recent comments

Ayman Henawy

Walaa Gamal

Chetos

Mohamed- A.zim

Related tracks