رحم الله ود الفضل
الكرار جدو

النص الكامل لقصيدة الراحل الشاعر الكبير محمد الحسن سالم حميد :
كلمات اغنية ست الدار محمد النصري

لقد عجبت جدا حينما قيل لي ان محمد النصري غنى هذه القصيده
ولم اصدق حتى سمعتها فاصابتي الدهشه 

محمد الحسن حسن سالم (حميد)
ست الدار بت أحمد قالت :
ليك يا الزين ود حامد شوقنا
أما بعد ،
المبعوتة المنك .. وصلت
ورُح فكيت الطلب الفوقنا
باقي الدين يا الزين خلصتو
قدر الفاضل .. مصروف راشد والتومات
والجايات من جاي .. لا جاي
زي ما قت لك قبال ده 
شهر إتنين حا نطهر راشد
شهر إتنين المدرسة تأجز
الله يبعد العارضي تجينا
وراشد حالف ما يطهر
إلا أبوهو وعمتو تحضر
وإلا يجيبو الغنايين
شان الشوق بت سرنا ترقص
قلنا نجيب المداحين
طنطن .. أنا جاي من الحج
وعارف راشد لما يطنطن
كل الدنيا الفيي تطنطن
غايتو بشر .. بس ربو يهون
ما كلمتك بالتومات
أول البارح جني يرطنن
قالن نحنا الخواجات
بسم الله .. مرق حصلت
لقيت لك جعفر زارد البيت بالخواجات
يبقى حداشر وخواجية
ناس البلد الكسرو عليهن
صدو يقلبو في إيديهن
عدمانين من إسم حكيم
واللا خبيراً للمشروع
علماء آثار .. فضلت في آثار
ما خموها الجونا قبلكن .. شن خلولنا بلا حجار
الله يصرف الخواجات
بينات جعفر والمحجوب .. والمحجوب والخواجات
طقت حجي .. العمدة طفاها
باقي الناس الجات للفرجي ..
قنبو قيلو شبعو لحوم .. والخواجة يصور ساكت
ستة خرفن وتيس ما كفن
ستة خرفن في فد يوم
المعدوم أشكال وألوان
أي خدار في اليوم داك في
كملن رف كمين دكان
أول كفو الخواجات
بعدو العمدة وصمد الساقية
ناس المجلس والمشروع
بعدو الطلبة وباقي الناس
حتى الشفع والحروم
ستة خرفن وتيس إنصفن
ستة خرفن في فد يوم
جات من صالح بت كلتوم
تسكت تخبز طول اليوم
لمن حرقت الدولاب
قنبت المسكينة تدعي
الله يصرف الخواجات
غاية الليلة السقا يشولق
واطات الله دي ست رشاها
ما في غنوتاً ما غناها
ما في مدحتاً ما سواها
حمارو صبح لحق أمات طه
سب الدين والأمريكان
جنس بدع
زولك ده يحير
عند الجد كان أده ينقنق
عند الفارغة يشيل ويبعزق
إذكرت كلامك ليا .. 
إنو في ناس لاعبين بالدين
وناس لاعبابا الأمريكان
الله يصرف الأمريكان
الله يصرف الصرفيكان
ما خلوني نشدتك منك
كيفن حالك والخرتوم
كيف المصنع والعمال
حالم لسع نفس الحال ؟
وما رقوك سووك باشكاتب ؟
يورينا الله زيادة الراتب
كيف الناس والحالة عموم ؟
والعزابة الكحيانين
سيد البيت عل ما زكاكم
لسع تقعو تقومو براكم ؟
قلبي معاكم
ربي يخدر عود ضرعاتكم
بالي معاك يا الزين ود حامد
بالي هناك والشوق الشوق
خلى شدير الجوف محروق
راجي مطيرة الزين ود حامد
نحنا نصاحاً زي واطاتنا
نحنا نصاح إلا القراص والتجار والحاص البحصل كل صباح
شتلاتك قبضن
الحملان كبرن بلحيل
العضمين الروكة إنزرعن
اوعك تشفق من تالانا 
ولا نبقالك مشغولية
زيك واحد مستورين وما ناسين المسئولية
هي يا الزين زغرد 
ما قتلك ...
بت ام زين جابت لها بت
ستة أولاد حتان البت
المحجوب ينشد من خبرك
شافعو محسب من يومين
التومات طيبات ونصاح
إلا هباش بلحيل آ الزين
راشد كرر .. شهر اتنين كان ما جيت أنا ما بطهر
الله يبعد العارضي تعال
كان فد دور يدوك يا تعال
كان بالخصم إن شاء الله تعال
وما تتوصى .. وداعة الله
أوعى البشغل والعربات والحيكومة السمها فاير
أم أولادك ست الدار بت أحمد جابر
ست الدار بت أحمد كيفك
جاني جوابك مفتوح شارع
جاني جوابك وانا بتصور في ناس راشد والتومات
في الشتلات والحالة عموم
ناس حلتنا التحت .. الفوق
الليهم الله وعيشة السوق
جاني جوابك وانا بتصور 
في المشروع وعمايل جعفر
ولما بكيت .. يا ست الدار
أيوة بكيت .. يا ست الدار
لما قريت علماء آثار
علماء إيه يا بت الناس
سواح إيه .. ما عندك راس
ست الدار تتوهدبي ليه
ديلا جماعة السي آي إيه
تعرفي إيه السي آي إيه ؟؟
امريكان في كل مكان
ديل مالين الدنيا ملي
ديل قالين الخلق قلي
باسم الدين والأمريكان أي عوج مبدي ومختوم
صوتنا هناك وهنا مكتوم
ومافي فرق في الوقت الراهن بين واشنطن والخرطوم
أنا مأزوم .. مأزوم .. مأزوم
يا خرطوم وينك وينك
يا خرطوم شن شبّ وقلبك وسلبك
حلبك ؟ زنجك ؟ بجتك ؟ نوبتك ؟ عربك ؟
أنا مأزوم .. مأزوم .. مأزوم
يا خرطوم أزمني الصلبك فوق الطلحة الأمريكية
يا خرطوم .. أوه خرطوم .. أوه واشنطوم
طن .. لفتك فجراً يقطع رحطك
ست الدار سامعاني يا اخيتي ومرتي وامي وأم الكل
أنا بندهلك من شارع الله .. فوقي هجير والتحتي بقل
سبي معايا الشردو راجلك .. والحرمونا شوية الضل
سبي الحالة العالة علينا .. حتى احكيلك بالتفصيل
حاصل الحاصل يا بت أحمد
جاني وفد في المصنع زاير .. وكان الوفد ده أمريكاني
لفّ وفات اليوم التاني
جانا مدير المصنع فاير
وشو حمار العمدة العاير
نف.. المصنع فيهو خساير
وقالوا يخفضوا مائتين عامل
مائتين عامل في فد مرة
مائتين عامل .. مائتين عامل
يبقوا هوامل .. يبقوا هوامل ؟؟
ما يهموش .. الهم المصنع
تفّ قراروا وفات في حالو
مسئولين ونقابيين مافي العارض واللا اترجى
العمال من سمعوا احتجوا ... سيرو موكب صامد وصامت
إتضامنا معاهم سرنا ..
أب عرام دور عربيتو .. العربية الامريكية
زنقح خلا الموكب ثابت
احتجينا مع الإحتجو
إتكلمنا كلام موضوعي
قلنا المصنع حق الدولة .. والعمال أصحاب الحق
هي اللي تقرر والتتولى
هي البتحدد سير المصنع
إيد العامل هي القاع تنتج
ما المكنات الأمريكية
زيت العامل ياهو البطلع .. مو المكنات الأمريكية
ودرن الأيدي العمالية 
أنضف من لسنات الفجرة
ودين الدقن الشيطانية
ومن كرفتة البنك الدولي .. وكل وجوه الراسمالية
وأشرف من ..............
داك الحين المصنع هاج
جات عربات اللات بوليس .. فضوا العالم بالكرباج
والبمبان الأمريكاني
شرقت شمس اليوم التاني
كنا حداشر ونوباوية
متهمنا بالتخريب والتحريض والشيوعية
البوليس صاقع شيوعية 
وفاكر نفسو بنبذ فينا
هي آ بوليس أمك مسكينة
البوليس عمدني شيوعي
التحقيق طلعني مدان
التحقيق طبعاً تحقيقهم أو تحقيق الأمريكان
اسبوعين عديتن جوه
اسبوعين زادننا قوة
ست الدار ما تشفقي خالص
ست الدار أنا ياني الزين
ست الدار سامعاني كويس ؟
كل الهم ما يغشى الغم بيتنا وراشد والتومات
وكل الناس الحالهم شاهد
ست الدار الشوق الواحد
لي حلتنا وليكم ليكم
وللإشراقة في عينيكم
وكل الناس الزولهم صامد
شوق وسلام .
الزين ود حامد
ردي سريع .. باليد .. باليد
في دورين موعود بي شغلة
لمت لمت .. كان ما لمت أنا جاييكم وما ندمان
(بعد الحاصل والإتحصل ست الدار بت أحمد تكتب) :
زيني الزين .. أب حالاً زين
جاني جوابك .. يا المبروك
وسابني أشوف الدنيا كويس
وأعرف غلط الصاح مظبوط
سابني أميز .. وأقدر أفرز .. وأرجع أميز
فرحانابك يا أحزان 
فرح النار بي لوح الزان
مبسوطابك يا المبسوط
ما هزاني مصيرك
قدر ما أذوني الميتين عامل
ميتين عامل في فد مرة
ميتين اسرة تروح وين
في الأيام النجسة المرة
ميتين عامل؟؟
والله مهازل
والله عمايل
يا أوغاد .. وينا نقابة السجم الشوم
وين عمال السكة رماد
وين الطلبة ووين الوين
بعتو شفيعكم يا عمال
بعتو وجيعكم للراسمال
وشن راجين يا تعسا الحال
هاكم دي ..
والله مهازل
ميتين عامل ؟
والله عمايل
عامل ساكن في آخر الدنيا
وصل المصنع بآخر بنية
ينتج كيف؟ شغال بي فونيا؟
عامل ينتج عشرين حتة
تلحقو منها قيمة إتنين
ستة بغطوا المنصرفات
سبعة.. تمانية .. تسعة بغطوا
أدها تسعة المنصرفات
كل الفايض ..بدخل وين؟
قولوا البفضل بمشي لي مين؟
وبرضو خساير؟
والله مهازل
يا مضغوط .. خفض ميزك حبة تين
تنك القعدة تلاتة خطوط
خفف مرتك توب مضغوط
من التمسحبو كبابي الصين
خفض عمرك يا ابن الفانية
وبي نظارتك واجه ثانية
ثانية عيون الشغالين
ثانية وبس
والله مهازل
ميتين عامل ؟
ميتين بيت ؟
ميتين اسرة بلا راس خيت؟
ميتين اسرة ملوها جراح
ميتين اسرة حا تولد صاح
وليكم يوم يا أولاد الهرمة
ليه يا الزين بتوصي عليّ
وانا بت احمد ست الدار
ام اولادك وهم صغار .. ثم اولادك وهم كبار
وياك الزين ود حامد داك
كان متوظف .. ياكا الزين
كان متوقف .. ياكا الزين
ليش يا الدخري توصي عليا
اسبوعين قضيتن جوه
يبقى غصب .. زادنك قوة
ليش يا الزين بتوصي عليا
ليش يا الدخري توصي عليا
وعارف ام راشد والتومات .. مرتاً دغري وغلباوية
آه يا الزين .. لو كنت معاكم .. كنت بقيت النوباوية
ما تهتم يا الزين بالحاصل
واصل سعيك .. واصل واصل
واصل سيرك
كان ما كنت الزين ود حامد كان حا يكونك واحد غيرك
في فضاء فالك يا إنسان
نسمة تقولك في الإمكان
أبدع واحسن من ما كان
ياتو مطرتاً سوت شو .. فرقو غيما الأمريكان
ياتو رصاص ما عقبو خلاص 
ياتو سجن يا الزين ود حامد
ياتو محن تمحى الإحساس
لما يكون في الساس والرأس
ياتو وطن يا الزين ود حامد
ياتو زمن دام للأنجاس
طه ترابلتو راحو الديش
غزّا بكانا اتنين رطانة
صاقع كلو من اسماعين
هو الفسر لهن الشغلانة
ويا اسماعين
ما كان الديش شقّ مسيمعك بالجبخانة
لو المجلس قبل اوراقك .. أو في الثانوي لقيت لك خانة
لكن قدرك يا إنسان .. بلداً هاص هيصة جبانة
طالو الناس التريانين .. ضلو الله الما ضلانا
أخّدو نورة الحاج بالدق
باكر دور ما خشّ عليها
خاتي اللوم قطع التمرات الفوق راس بيتو
الخلفاء شكوهو وما لقو حق
المحجوب إتلقى اخبارك وقال جاييك في أول بص
البرسيم طهرنا البارح
نعجة راشد صبحت والدة
الحيضان سقناهن لوبي
التومات طيبات ونصاح
راشد طيب
وانا طيبين
كل الناس يا الزين طيبين
ينشدو منك في الأفراح
وفي الأتراح .. الزين الزين
ما تشغل بالك
بس يا الزين كان درت مشورتي
اصلو كتالك ياهو كتالك
تجي مندلي
الواطة تراها
وبي جاي جاي .. بندبر حالك
ما الحيكومة الضاقت دمك
عينا محل قبلت قبالك
شورتك عندك
عندك شورتك
والببقالك .. الببقالك
التمرات بعناها آ الزين
خفنا السوس ونزالة السوق
مبعوتالك عشرة جنيه
والأشواق من هنا لا عندك
ست الدار بت احمد جابر
تلغرافات :
نوري . السوق .. ست الدار بت أحمد جابر
المحجوب في قطر اليوم
عفش الزين
النوباوية
\\\\
الخرطوم .. الخرطوم بحري .. كشك الشعلة \ الزين ود حامد
راشد راقد والواطة جعفر طالق فيها بهايمو
ست الدار بت احمد جابر
\\\\
نوري السوق المحجوب ود أحمد جابر
كتب الزين .. كل الاوراق .. راشد كيف
النوباوية
\\\
الخرطوم .. الخرطوم بحري .. كشك الشعلة
النوباوية
أنا في السكة وست الدار
راشد ود الزين ود حامد


محمد النصري - ست الدار بت احمد

لكتابِ اللهِ أقرا وأفهم
قوم ليلك باكِي كي لا تندم
لازِم أذكارك، بيها تكلَّم
لرسولك صَلّي، يَنزاح الهَمّ
ليش ليش يا مجاهد
ما تتقدَّم للحَور والجنَّة؟ 
تَكسب تَغنم
ليش ليش يا مجاهد


بكلاشنكوفك والجيم أفَهم
في الرَّاس تنشينك، لا لا ترحم
للقاء أعداءك، سُرعة اتقدم
لا تهَاب الدَّانة، لا تخشَى لَغم
ليش ليش يا مجاهد

أعداء الله عايشين في وَهم
ناسين الآخرة، يومًا أعظم
لاهيين في الدُّنيا، تَطريب ونغم
لا عَبدوا الخالق، لا دين لا فهم
ليش ليش يا مجاهد

للغربِ انصاعوا، باعوها ذِمم
في دَربه سارُوا، هزّوها قِيَم
لكن والله لن نستسلم
لو جات الدُّنيا أعراب وعجم
ليش ليش يا مجاهد

العَهد الباقي صُغناه قَسم
لغير الباري لن نَحمل همّ
لعدونا نَدمّر، نصليهِ حِمم
لبلادنا نعمَّر تبقالنا رَقم
ليش ليش يا مجاهد

صلوات الله تَغشى الأكرم
لرسول الله الهادي عَلم
ما سار مُجاهد لصفّو اتقدم
ما عَبر شهيدًا ما سال الدَّم
ما سار مُجاهد بصفّو اتقدم
ما عَبر شهيدًا ما سال الدَّم.. 


ليش ليش يا مُجاهد؟

الكُورَاك ضَرَب مَرَقَن جَا راقدًا دار
الكُورَاك ضَرَب مَرَقَن جَا راقدًا دار
أندَاد النَّصارى الكُلَّهم بُولاد
أندَاد النَّصارى الكُلَّهم بُولاد
الكرَّار علي كَبَّر عليهم زَاد
الكرَّار علي كَبَّر عليهم زَاد
سِيفَك في غَضاريف الرِّجال صَيَّاد

 متين يا علي تَكبر تَشيل حِملي؟
إيَّاكَ علي الخلَّاك أبُوي دُخري
متين يا علي تَكبر تَشيل حِملي؟
إيَّاكَ علي الخلَّاك أبُوي دُخري
للغَني والفَقير الكان أبُوك حامِيه
للجار والعَشِير الكان أبُوك بِدِّيه
للغَني والفَقير الكان أبُوك حامِيه
للجار والعَشِير الكان أبُوك بِدِّيه
اتسُولب مِن العَلج الحَرير واكسِيه
اتسُولب مِن العَلج الحَرير واكسِيه
لا تَعاين الوجُوه، ضَربك دَشَّرًا سَوِّيه
سِيفَك في غَضاريف الرِّجال اروِيه

ضبحُولنا الكَرامة وصِبحنا فَرحانين
سوّولنا الكرامة وصِبحنا فرحانين
ضَربُوا دنقرُن جوني العيال مارقين
ضَربُوا دنقرُن جوني العيال مارقين
بسأل عَن علي، الفَارس البيقُود تسعين
بسأل عَن علي، الوَلد البيقُود تسعين
هو اللَّدرَ العَلى ظَهرو الخَبوب والطِّين
هو اللَّدرَ العَلى ظَهرو الخَبوب والطِّين
ما بياكل الضَّعيف، ومابسُولِبَ المسكين
إلَّا سِيمت الأسد أب قَبضةً لِين

ما دَايرالك المِيتَة أُم رَمادًا شَح
دايراك يوم لُقى بِدَميكَ تتوشَّح
ما دَايرالك المِيتَة أُم رَمادًا شَح
دايراك يوم لُقى بِدَميكَ تتوشَّح
الميّت مَسُولَب والعَجاج يكتَح
الميّت مَسُولَب والعَجاج يكتَح
أحيَّ على سيفُو البِسوِّي التَّح
أحيَّ على سيفُو البِسوِّي التَّح

فرتيقَة أم لبُوس لوَّيعة الفُرسان
اللَّيل بابلِي، عَنزة وقرُونها سُنان
فرتيقَة أم لبُوس لوَّيعة الفُرسان
اللَّيل بابلِي، عَنزة وقرُونها سُنان

يا الخالِد مالك تَنين عرَّش دود الأربعِين
السَّيل بُوبا، يا الفُوتك مُو دَحين
يا الخالِد مالك تَنين عرَّش دود الأربعِين
السَّيل بُوبا، يا الفُوتك مُو دَحين

تَغنِي ليك أُمَّ هانِي يشهدوا أهل المَعاني
السَّيل بوبا
تَغنِي ليك أُمَّ هانِي يشهدوا أهل المَعاني
السَّيل بوبا
نظيفًا خاتي ريحة الشَّاني، قَتل ديلَاك خَبرُو جَاني
السَّيل بوبا، يا الفُوتك مُو دَحين

تَغنّي ليك ظِبيةَ الحُدر
ما بنبلع من وصفُو مُرّ
السَّيل بوبا
تَغنّي ليك ظِبيةَ الحُدر
ما بنبلع من وصفُو مُرّ
السَّيل بوبا
المَكنة فوقو بتكاكِي
والمَدفع تَحتو بيخُرّ
المَكنة فوقو بتكاكِي
والمَدفع تَحتو بيخُرّ
لا بِيخاف لا بيُترّ
قدَّام العِينهُم خُضُر
السَّيل بوبا، يا الفُوتك مُو دَحين

يا القَمرة المَاك شِهَير
يا الرَّاسِي المَاك صغير
السَّيل بوبا
يا القَمرة المَاك شِهَير
يا الرَّاسِي المَاك صغير
 السَّيل بوبا
أبوكَ بساطِي القِبيل
تبراهُ الشَّعبة والجنزير
أبوك بساطِي القِبيل
تبراهُ الشَّعبة والجنزير
خَت كُرسيه للعَديل
وكورك قَال يا غَفِير
العَاداك وين يطِير؟ 
شَقيًّا صادف نِكَير
السَّيل بوبا، يا الفُوتك مُو دحين

يا القَمرة المَاك شِهَير
يا الرَّاسِي المَاك صغير
السَّيل بوبا
يا القَمرة المَاك شِهَير
يا الرَّاسِي المَاك صغير
 السَّيل بوبا
أبوكَ بساطِي القِبيل
تبراهُ الشَّعبة والجنزير
أبوك بساطِي القِبيل
تبراهُ الشَّعبة والجنزير
خَت كُرسيه للعَديل
وكورك قَال يا غَفِير
العَاداك وين يطِير؟ 
شَقيًّا صادف نِكَير
السَّيل بوبا، يا الفُوتك مُو دحين

يا الخالِد مالك تَنين عرَّش دود الأربعِين
السَّيل بُوبا، يا الفُوتك مُو دَحين
يا الخالِد مالك تَنين عرَّش دود الأربعِين
السَّيل بُوبا، يا الفُوتك مُو دَحين

يا الخالِد مالك تَنين عرَّش دود الأربعِين
السَّيل بُوبا، يا الفُوتك مُو دَحين
يا الخالِد مالك تَنين عرَّش دود الأربعِين
السَّيل بُوبا، يا الفُوتك مُو دَحين


الكرَّار عَلِي

لو اعيش زول ليهو قيمة - حنان النيل

استنا يا رعديد بنجيك في الغابة _ فرقة السحر

اقبل على دربنا  تصميم الاخ المجاهد أحمد عبدرحمن تقبل الله منا ومنكم صالح الاعمال(MP3_160K).mp3

إبراهيم الكاشف  وداعاً روضتي الغناء

أُمّاتِي القِبيلْ

بي حِنّهنْ لجّـنّي

كَرفة وقَلدة

كيف شوق اللّبن رَجّني

حُزناً جاني في مَيْع الصِّبا يلَجِّني

أطلعْ مِنِّي يا جلدي المِنمِّل جِنيِّ

واطلعْ مِنِّي يا حُزناً بِقى مكَجِّني

 

خَلّني أبدا مُسداري

وأودي قفايا لي داراً بِقَتْ مِي دَاري

جِيتَا ..

وجِلْدِي بينو وبين عضاي الشّحَمَة

إلا النّار بِقَتْ قِدّامي

جِلْدِي اللّيلة بينو وبين عَضَايَ المافي

إلاّ تراني شَوّالْ الكِبِسْ

نِفّيخْ جَراريب الوَرَمْ هَدّامِي

في جِلدي الورم قُولَنْلي

وللاّ صَحِي الورم عَضّامِي

سفريتك مِي الفي النيّة

وميها الكانت محريّة

خابراكْ عِرِّيفْ ..

ذم العُربانْ واللاّ قِيام الوردية

مالكْ ؟؟؟

تَرْيَانْ ومندِّي

كاسي الكِتّان والهندي

قولَكْ كِكّيفْ ترجى البيشان

واللاّ الغُربة البي الزِّنْدي

برقاً عِبْدِللِّي الوَزْنِ

يا طاشْ .. يا جاب المُزْنِ

فَرِّقْ يا الضّيفْ

فِعْل الغَضْبان ..

أم فِرفيرات الحُزْنِ

وشِنْ القَعدة

يا أبو السُّرة

في ضُل العمارات أم كمرةً برّة

ضُقْنا الحَنْضَل اليانكي

وبَلَعْنا المُرّة

كِمْلَتْ كوتة التُّمبَاك

صَقَعْنا الجِّـرّة

ووكت إتقفّلَتْ شِقّيشْ

قَبَلْ بي المرّة

نَرْمي أمُرنا في بلد المعاني الحُـرّة

الشّمْ خَوّخَتْ

بَرَدَنْ ليالي الحّـرّة

والبرّاق بَرَقْ ..

مِنْ مِنّا جاب القِرّة

شوف عيني الصِّقير بجناحو كَفَتْ الفِرّة

تلقاها ام خدود الليلة مَرَقَتْ بَرّة

مَرَقَتْ بَرّة تغلي مديدة الحِلْبة التَسَمِّن رِدْفَها

السَمِنْ المبَسْتَرْ يانْكي

والويقود بعيرات الدُّخان في العين

وفي الفَشْفَاشْ يسوِّي عمايلو

شِنْ فايدة مديدة الحلبة والويقود بشيلو اليانكي ؟؟

يا ابو السُّرة

قامت من دخاخين العمى تلمِّع وشِيها

اليانكي مِسْتَنِّيهَا

كان اليانكي مستنيها في مراية السَجَم في اللّيل

لقيتها مِتِلْ فريخ الطّير

مَرَقْ ود عينها من ود عينها

رجّافة المزمّلْ حُمّى

جَفَلَتْ مِنّو

وَقَعَتْ عندي

صدرها بغلي

يا ابوالسُّرة

شُفْتَ اليانكي في ود عينها

سُقْتَها للبحر

يمكن يغسِّل عينها من اليانكي

فُتْنَا الحَجْرة بالكَتّة وغطسنا مسافة

تبقى قَدُر مسالك الرّيدة

ما لاقانا من يغبانا في البحر الفَدَرْ تحتاني

ناس عارفاها

ناس عارفاكا

ناس عارفاني

ناديت القعوي والبُلْطي

قرقور السّمَك ودّاني لي دابي الخُشَشْ

نادينا عُمّال الطّمِي

عُمّال الطّمِي الصّارقيلا

والقَرْمُوط

وود الموية

فُتْنَا عليها

كانت نايمة

عَجّال البحر حارساها كانت نايمة

بين حجرين وضُل ساسوية كانت نايمة

وعُمّال الطّمِي الصّحونا لّمُو حصى البحر

قسموهو ياتْ من كان سبع جمراتْ

دابي الخُشّة قال :

أدُّوها في الجمرات تلات سبعاتْ

قُلْنا :

أدُّوها في الجمرات تلات سبعاتْ

 

مَسَكْنَا دَرِبْنَا

عُمّال الطّمِي الصّحوها

خابرين الدّروبْ

مَرَقوبنا فوق مُشْرَعْ مسارب الضّيْ

لقينا الدُّنيا تترجّانَا

قُوقَا القِمْري

خَوّى صِقيرْ

وعَوّى حِديْ

وعُمّال الطّمِي الصّحونَا

لَمُّو على البعرفو الصّيْ

حَصَى القيزان

دوابي الدّارْقَة

والسِّحْليّة

والنّاسْ التِّحِتْ

النّاسْ التِّحِتْ خابرين عَمايْل اليَانْكي

مَرّة معونة لي اللّغّاف

ومَرّة دَوانْكِي

شِنْ معناهو جيبها إن كان ملوهو بوانكي

صوتها مكتِّمو القَرَبين سيوف وسَوانْكِي

الكرَّار عَلِي

سَجى.

Recent comments

RED SAIS

RED SAIS

Tasnem Jalal

Related tracks